1 AMAKHOSI 11 - IsiNdebele 2012 Translation

Abafazi bakaSolomoni

¹ Ngaphandle kwakaNaFaro, ikosi uSolomoni yabuye yathanda nabanye abafazi abanengi abatjhili, okubafazi abamaMowabi, ama-Amoni, ama-Edomu, amaTsidoni namaHite.

² Bekungebezizwe uSomnini uZimu athi kuma-Israyeli ngazo: “Ningalingi nihlanganyele nazo ngombana zizakuyengela iinhliziyo zenu kibosingazimu bazo.” Nanyana kunjalo uSolomoni wanamathela ebafazinabo ngethando.

³ Waba namakhulu alikhomba wabafazi ababelethwa ebukhosini kanye namakhulu amathathu wemingena. Abafazi bakhabo bamkhupha endleleni.

⁴ Kuthe uSolomoni lokha nathoma ukuluphala, abafazi bakhe bayengela ihliziywakhe kibosingazimu. Yeke ihliziywakhe azange inamathele ngokupheleleko kuSomnini uZimakhe njengekayise uDavida.

⁵ Walandela u-Atjhitaroti usingazinyanakazi wamaTsidoni noMilikomu usingazimu onyenyisako wama-Amoni.

⁶ Ngalokho uSolomoni wenza ubumbi phambi kwakaSomnini, azange alandele uSomnini ngokupheleleko njengombana kwenza uyise uDavida.

⁷ USolomoni wakhela uKemotjhi usingazimu onyenyisako wamaMowabi, noMoleki usingazimu onyenyisako wama-Amoni, indunduma phezu kombundu ongepumalanga yeJerusalema.

⁸ Wabenzela njalo boke abafazi bakhe abatjhili ebebatjhisa ipepho bebenzele nabosingazimu babo imihlabelo.

⁹ USomnini wathukuthelela uSolomoni ngombana ihliziywakhe yasele ifulathele uSomnini uZimu wakwa-Israyeli owaziveza kabili kuye.

¹⁰ USomnini naziveza kuSolomoni wamyala bonyana angadlhemadlhemi ngemva kwabosingazimu, kodwana azange awulalele umyalo kaSomnini.

¹¹ Yeke uSomnini wathi kuSolomoni: “Ngebanga lesenzo sakho sokungaphethi isivumelwano sami kanye nemithethwami engakuyala ngayo, ngiqinisile ngithi ngizokurharhabula umbuso ngiwususe ezandleni zakho bese ngiwunikela omunye wabangaphasi kwakho.

¹² Nokho ngebanga lakayihlo uDavida, angeze ngakwenza lokho ngesikhathi sokuphila kwakho. Ngizawurharhabula ngesikhathi sokubusa kwendodanakho.

¹³ Nalapho angizuwurharhabula woke ezandleni zayo, kodwana ngizayinikela ikoro yinye ngebanga lakaDavida incekwami nangebanga leJerusalema engayikhethako.”

Abajamelani bakaSolomoni

¹⁴ USomnini wavusela uSolomoni umjamelani, uHadadi umEdomu ovela ebukhosini baka-Edomu.

¹⁵ Kwathi lokha uDavida naseduze ne-Edomu, uJowabi umphathibutho wenyuka bona ayokubulunga abahlongakalele e-Edomu. Ngemva kwalokho warhadla woke amadoda e-Edomu.

¹⁶ Kwabathatha iinyanga ezisithandathu bonyana uJowabi nawo woke ama-Israyeli abhubhise woke amadoda e-Edomu.

¹⁷ Kodwana uHadadi wabalekela eGibhide kanye neenkhulu ezinye ze-Edomu ebegade zisebenzela uyise. Ngesikhatheso ubasese msana.

¹⁸ Basuka eMidiyani baya eParana. Bathatha amadoda eParana bakhamba nawo eGibhide kuFaro ikosi yeGibhide owanikela uHadadi ikumba nenarha bewamondla nangokudla.

¹⁹ UFaro wathabela uHadadi kangangobana wabe wamendisela nomlamakhe, wekhabo lendlovukazi, umma wesizwe.

²⁰ Umntazana wekhabo lendlovukazi wabelethela uHadadi umsana, wamthiya bona nguGenubathi. Indlovukazi yamkhulisela esigodlweni. Nje-ke uGenubathi wakhula nabentwana bakaFaro.

²¹ Kwathi uHadadi asese seGibhide, wezwa bonyana uDavida sele aye kiboyisemkhulu nokuthi uJowabi umphathibutho naye sele alele. Wathi kuFaro: “Bengithi yewungivumele ngibuyele enarhenekhethu.”

²² UFaro wabuza wathi: “Uzakuthi utlhogeni lapha bona ungaze ubuyele enarhenekhenu?” UHadadi wathi: “Awa, abe angitlhogi litho, nokho bese ngithi ngivumela ngikhambe!”

²³ Godu uZimu wavusela uSolomoni omunye umjamelani, uRezoni umsa ka-Eliyada, owabalekela isikhulu sakhe uHadadi-Ezeri ikosi yeTsoba.

²⁴ Wabuthelela amadoda bona amsingathe bewaba mrholi wesiqhema semigulukudu. Lokha uDavida nalinga ukubarhayila, banqomba eDamaseku lapha bafika banzinza khona bebabeka uRezoni bona abe yikosi.

²⁵ URezoni waba mjamelani waka-Israyeli ngesikhathi soke sokuphila kwakaSolomoni, wangezelela imiraro eyabangwa nguHadadi. URezoni wabusa e-Aramu begodu gade akghabhudlheka nabona u-Israyeli.

²⁶ NoJerobhowamu umsa kaNebathi wajamelana noSolomoni. Gade angomunye weenkhulu zakaSolomoni, umEfrayimu weTsereda, unina gade amhlolokazi ekwakuthiwa nguTseruwa.

²⁷ Nanti ibanga elamenza bonyana ajamelane nekosi: USolomoni gade akhe indunduma begodu wapara nesikhala ebegade sisebodeni loMuzi kaDavida uyise,

²⁸ uJerobhowamu waziveza bonyana uyindoda emadodeni. Kwathi lokha uSolomoni nabona bonyana isokaneli liwenza kuhle kangangani umsebenzalo, walibeka bona liqale woke umsebenzi wokukatelela owenziwa yikoro kaJosefa.

²⁹ Ngesikhatheso uJerobhowamu gade aphuma eJerusalema, wahlangana no-Arhiya umphorofidi weTjhilo endleleni embethe iphuraphura etja. Gade babobabili njalo kwaphela emmangwenapho,

³⁰ u-Arhiya wathatha iphuraphura etja agade ayembethe leya wayirathurathula yaba ziinqetjhana ezilitjhumi nambili.

³¹ Wathi kuJerobhowamu: “Zithathele iinqetjhana ezilitjhumi ngombana lokhu ngokwatjhiwo nguSomnini uZimu ka-Israyeli wathi, ‘Qala, ngizokurharhabula umbuso ezandleni zakaSolomoni bese ngikupha iinkoro ezilitjhumi.

³² Kodwana yena uzakubusa ikoro eyodwa ngebanga lencekwami uDavida kanye nedorobho iJerusalema engalikhetha hlangana nazo zoke iinkoro zakwa-Israyeli.

³³ Ngizakwenza lokhu ngombana uSolomoni ungihlanukile walotjha u-Atjhiterothi usingazimukazi wamaTsidoni, uKemotjhi usingazimu wamaMowabi noMilikomu usingazimu wama-Amoni. Azange akhambe eendleleni zami, enze okulungileko phambi kwami begodu aphethe imithethwami neemiso zami njengombana kwenza uDavida uyise.

³⁴ Nokho angeze ngawuthatha woke umbuso ezandleni zakaSolomoni. Ngizamenza abe liduna amalanga woke wokuphila kwakhe ngebanga lakaDavida incekwami, engayikhethako neyaphetha imiyalo nemithethwami.

³⁵ Ngizakuthatha umbuso ezandleni zendodanakhe bese ngikunikela iinkoro ezilitjhumi.

³⁶ Ngizakunikela indodanakhe ikoro eyodwa ukuze uDavida incekwami ikghone ukuhlala inesibani phambi kwami eJerusalema, idorobho lapha ngakhetha ukubeka khona ibizo lami.

³⁷ Wena-ke ngizakuthatha bese ubusa phezu kwakho koke okuthandwa yihliziywakho, uzakuba yikosi phezu kwaka-Israyeli.

³⁸ Nawenza koke engikuyala ngakho bese ukhamba eendleleni zami, wenze okulungileko phambi kwami ngokuphetha imithetho nemiyalwami njengombana kwenza uDavida incekwami, ngizakuba nawe. Ngizakwakhela ubukhosi obuqine njengalobo engabakhela uDavida bese ngikunikela u-Israyeli.

³⁹ Ngizakululaza iinzukulwana zakaDavida ngebangeli, nokho kube ngokwesikhatjhana.’ ”

⁴⁰ USolomoni walinga ukubulala uJerobhowamu, kodwana uJerobhowamu wabalekela kuTjhitjhakhi ikosi yeGibhide, wahlala lapho uSolomoni bewakhothama.

Ikosi uSolomoni iyakhothama

⁴¹ Zoke ezinye zezehlakalo zakaSolomoni nakho koke akwenzako kanye nobuhlakani ayenabo kutlolwe encwadini yemilando kaSolomoni.

⁴² USolomoni wabusa woke u-Israyeli iminyaka ematjhumi amane eJerusalema.

⁴³ Ngemva kwalokho waya kiboyisemkhulu, wafihlwa eMzini kayise uDavida. URerhobhowamu indodanakhe yathatha iintambo zobukhosi emva kwakhe.