1 AMAKHOSI 10 - IsiNdebele 2012 Translation

Indlovukazi yeTjheba ithekela uSolomoni

¹ Kwathi bona indlovukazi yeTjheba izwe ngendumela kaSolomoni ayiphiwa nguZimu, yeza yazomrareja ngeenrarejo ezibudisi.

² Yafika eJerusalema nedwendwe elikhulu, ikhamba namakamela athwele iinungo, umhlumba wegolide namatje aligugu. Yakhuluma noSolomoni ngakho koke eyayikucabanga.

³ USolomoni waphendula yoke imibuzwayo, akunalitho elalibukhuni ekosini bona yayingabhalelwa kuliphendula endlovukazini.

⁴ Kuthe lokha indlovukazi yeTjheba nayibona ubuhlakani bakaSolomoni kanye nesigodlo asakhileko,

⁵ ukudla okwakusetafuleni lakhe, ihlelo lokuhlala kweenkhulu zakhe, ukukhuthala kweensebenzi zakhe zesigodlweni nevunulwazo, abaphathikapho bakhe kanye nemihlabelo yokutjhiswa ayenza ethempelini lakaSomnini, yaphelelwa mamandla.

⁶ Yathi ekosini: “Umbiko engiwuzwe ngisenarhenami ngawe kanye nobuhlakani bakho kutjho bona uliqiniso.

⁷ Uyazi azange ngikholwe, kufikela bengifike ngizozibonela mina ngamehlwami. Awa, ngambala lokho engitjelwe khona akwenzi ngitjho nengcenye yalokhu engikubonako. Ukuhlakanipha nomnotho onawo kudlula umbiko engiwuzwileko kude.

⁸ Agu! Abantu bakho bayajekezela uyazi! Maye zinetjhudu kangangani iinsebenzi zakho ezihlala ziza kuwe zizokuzwa ukuhlakanipha kwakho!

⁹ Akudunyiswe uSomnini uZimakho, okarekileko ngawe bewakubeka esihlalweni sobukhosi bakwa-Israyeli. Ngebanga lethando elingapheliko uSomnini athanda ngalo u-Israyeli, ukwenze waba yikosi bona ulethe ukulunga nobulungiswa.”

¹⁰ Yanikela ikosi igolide elimakhilogremu angaphezu kweenkulungwana ezine, umhlumba weenungo namatje aligugu. Godu azange khekube neenungo ezinengi kangako njengalezo indlovukazi yeTjheba eyazipha ikosi uSolomoni.

^11-13 Ikosi uSolomoni yanikela indlovukazi yeTjheba izipho zebukhosini. Ngaphezu kwalokho yayinikela nalokho ebegade ikufisa nekubawileko. Yasuka yagoduka-ke ikhamba nedwendwe layo yabuyela enarhenayo. Iinthayamanzi zakaRhiramu zaletha igolide zisuka nayo e-Ofira, ukusuka lapho zaletha imithwalo emikhulu yeengodo ze-almugi kanye namatje aligugu. Ikosi yasebenzisa iingodo ze-almugi ukwenza ilihla elingaphezulu ebodeni lethempeli lakaSomnini kanye nesigodlo, nokwenzela ababhini imihlobohlobo yamaharibha. Azange khekuthathwe ngaphandle namkha kubonwe iingodo ezingakaya ze-almugi bekube kunamhlanje.

Umnotho kaSolomoni

¹⁴ Ubudisi begolide elalifunyanwa nguSolomoni minyaka yoke lalimakhilogremu aziinkulungwana ezimatjhumi amabili nantathu.

¹⁵ Lokho bekungafaki okulethwa barhwebi nenzuzo efunyanwa bathengisi, nalokho okulethwa makhosi woke we-Arabhiya kanye nabaphathi benarha.

¹⁶ Ikosi uSolomoni yenza amakhulu amabili weenhlangu ezikhandwe ngegolide elisipara. Isihlangu ngasinye besenziwe pheze ngamakhilogremu alikhomba wegolide.

¹⁷ Godu wakhanda namakhulu amathathu wamakhande ngegolide elisipara. Ikhande ngalinye belingaba makhilogremu amabili wegolide. Ikosi yawabeka esigodlweni seHlathi leLibhanoni.

¹⁸ Ikosi yenza isihlalo sobukhosi esikhulu yasikghabisa ngamazinyo wendlovu godu yasembesa ngegolide ecolisiweko.

¹⁹ Isihlalo sobukhosi sasineentepisi ezithandathu, umgogodlho waso gade unehloko eyindulungu. Ngemaqadi kwesihlalo bekunalapha ubeka khona imikhono bese ngapha nangapha kwakhona kujame ibhubezi.

²⁰ Kwakujame amabhubezi alitjhumi nambili eentepisini ezithandathu, kujame linye ngapha nangapha komqoqo wesitepisi. Akunabukhosi obakhe benzelwa into efana nale.

²¹ Zoke iinqoko zekosi uSolomoni gade zenziwe ngegolide, nazo zoke iinsetjenziswa ebezisesigodlweni seHlathi leLibhanoni gade ziyigolide etsengileko. Akunalitho ebegade lenziwe ngesiliva ngombana ngeenkhathi zakaSolomoni isiliva gade lingakaqakatheki.

²² Ikosi gade inemijeje yemikhumbi yokurhweba elwandle ikhambisana neyakaRhiramu. Njalo ngemva kweminyaka emithathu beyibuya ithwele igolide nesiliva, amazinyo wendlovu, iimfene neenkghabu.

²³ Ikosi uSolomoni gade injinge khulu godu inobuhlakani obukhulu ukudlula woke amakhosi wephasi.

²⁴ Iphasi loke lafuna ukuzokulotjhisa uSolomoni nokuzwa ngobuhlakani uZimu abubeke emkhumbulwenakhe.

²⁵ Omunye nomunye wabantwabo gade eza nesibiko, okuyipahla yesiliva negolide, izambatho, amakha neenungo kanye neenjomani neemeyila. Lokhu bekwenzeka umnyaka nomnyaka.

²⁶ USolomoni wabuthelela iinkarana zepi neenjomani. Gade anamakhulu alitjhumi nane weenkarana zepi neenkulungwana ezilitjhumi nambili zeenjomani agade azibeke emadorobheni weenkarana zepi nendawenakhe eJerusalema.

²⁷ Ikosi yenza bonyana eJerusalema isiliva lijayeleke libe linengi njengamatje, nomsedari ube mnengi njengemithi yamakhiwani wommango eentatjaneni zenarha.

²⁸ Iinjomani zakaSolomoni zazithethwe eGibhide, khulukhulu eKewe. Zazithengwa barhwebi bekosini eKewe ngentengo ephasi.

²⁹ Bathenga ikarana yepi eGibhide ngesiliva elingaphasi kwamakhilogremu alikhomba, nenjomani ngesiliva elingaphasi kwamakhilogremu amabili. Godu bazithengisa kiwo woke amakhosi wamaHite newama-Aramiya.