1 AMAKHOSI 1 - IsiNdebele 2012 Translation

U-Adoniya uzibeka ikosi

¹ Ikosi uDavida gade sele amdala, seyiphaphela phasi; iingazi zakhe bezingasatjhisi ngitjho nanyana bambhibha ngemikghadi.

² Iinceku zakhe zathi kuye: “Asifune intombi engakakhonjwa kobana izokutjheja ikosi, ibe mhlengikazayo, iyisingathe ukuze ikosethu ifuthumale.”

³ Bafuna isiphalaphala sentombi kiyo yoke imikhawulo yakwa-Israyeli, bathola u-Abitjhagi umTjhunemi, bamletha ekosini.

⁴ Kwakusiphalaphala sakanomhlekhabo, ngambala waba mhlengikazi wekosi, wayonga kodwana ikosi ayizange imeyame.

⁵ Kwasuka u-Adoniya indodana kaRhagithi wazibetha isifuba wathi: “Mina ngizakuba yikosi.” Wazilungisela iinjomani neenkarana wazifumanela namatjhumi amahlanu wamavulandlela.

⁶ U-Adoniya gade amhlamazana, alama u-Absalomu. Uyise gade amtotosa, azange akhe amkhalime nanyana ambuze athi: “Wenzelani into enje?”

⁷ U-Adoniya wazwana noJowabi umsa kaTseruya no-Abiyatari umphristi, bamsekela.

⁸ Kodwana umphristi uTsadokhi, uBhenaya umsa kaJehojada, uNathani umphorofidi, uTjhimeyi noReyi kanye neengorho zakaDavida azange bazibandakanye no-Adoniya.

⁹ U-Adoniya wenza umhlabelo ngezimvu, iinkomo kanye namathole anonisiweko elitjeni leZorhelethi eduze nomthombo weRogeli. Wamema boke abanakwabo, amadodana wekosi nabo boke abantu bakwaJuda ebegade baziinkhulu zekosini,

¹⁰ kodwana azange ameme umphorofidi uNathani, uBhenaya, iingorho ngitjho nomfowabo uSolomoni.

¹¹ UNathani wabuza uBhathi-Tjheba, unina kaSolomoni wathi: “Besele uzwile bonyana u-Adoniya indodana kaRhagithi sele azibeke ikosi ngaphandle kokwazisa ikosethu uDavida na?

¹² Nje-ke ngithi angikulume indlebe bonyana ungayisindisa njani ipilwakho kanye neyendodanakho uSolomoni.

¹³ Khamba uye ekosini uDavida ufese uthi, ‘Ikosami, azange ifunge kimi, mina ncekukazayo, bonyana nakanjani uSolomoni indodanami izakuba yikosi emva kwayo begodu ihlale esihlalweni sayo sobukhosi na? Alo, u-Adoniya sele ayikosi nakutheni?’

¹⁴ Uzakuthi nawusakhuluma nekosi njalo, mina ngivele; ngifakazele amezwakho.”

¹⁵ Yeke uBhathi-Tjheba wakhamba wayokubona ikosi. Ikosi beyingekumbenayo, iluphele khulu ihlengwa ngu-Abitjhagi umTjhunemi.

¹⁶ Wafika wakhothama uBhathi-Tjheba waguqa phambi kwayo. Ikosi yambuza yathi: “Ubekwa yini lapha?”

¹⁷ Waphendula wathi: “Ikosami yafunga yaqinisa kimi, incekukazayo, phambi kwakaSomnini uZimu yathi, ‘Ngithi uSolomoni indodanakho uzakuthatha iintambo zobukhosi emva kwami, abe ahlale esihlalweni sami sobukhosi.’

¹⁸ Kodwana u-Adoniya sele ayikosi ngaphandle kokwazisa ikosami,

¹⁹ bewenze nomhlabelo ongangobaba ngomhlambi weenkomo namathole anonisiweko kanye nezimvu. Umeme u-Abiyatari umphristi noJowabi induna yepi kanye nawo woke amadodanekosi, kodwana watjhiya uSolomoni incekwakho.

²⁰ Nje-ke ngithi, kazi amehlwabo boke kwa-Israyeli lapha aphezu kwekosami, balindele ukuzwa kiyo bonyana ngubani ozokuhlala esihlalweni sekosami emva kwayo.

²¹ Nakungasinjalo, ikosami ingakhothama la, mina nendodanami uSolomoni sizakukhonjwa ngomuno kuthiwe simavukelambuso.”

²² Kuthe asakhuluma nekosi njalo, kwangena uNathani umphorofidi.

²³ Babikela ikosi bathi: “Umphorofidi uNathani uyathokoza.” Bamngenisa, wafika phambi kwekosi waguqa wahloma ihloko phasi,

²⁴ wathi ekosini: “Ikosami ibeke u-Adoniya kobanyana abe yikosi emva kwayo nokobana ahlale esihlalweni sekosami na?

²⁵ Igidigidi ligidigidi ngaphandlapha namhlanjesi, bewenze nomhlabelo ngomhlambi weenkomo, namathole anonisiweko kanye nezimvu. Umeme woke amadodanekosi, wamema neenduna zepi kanye no-Abiyatari umphristi. Ngikhuluma nje bazinikelele ngokudla nangamarhamulo esithebeni sakhe baseze bathi, ‘Bayede ngwenyama Adoniya!’

²⁶ Kodwana mina ncekwakho, umphristi uTsadokhi, uBhenaya umsa kaJehojada kanye nencekwakho uSolomoni azange asimeme.

²⁷ Kghani kungaba sisenzo sekosami esenze ngaphandle kokwazisa iinceku zayo kobana ngubani ofanele ahlale esihlalweni sekosami emva kwayo?”

UDavida ubeka uSolomoni bonyana abe yikosi

²⁸ Ikosi uDavida yathi: “Ngibizelani uBhathi-Tjheba loya.” Yeke wangena wajama phambi kwekosi.

²⁹ Ikosi yenza isifungo yathi: “Ngifunga uSomnini owangisindisa kiyo yoke inyakanyaka,

³⁰ ngithi namhlanje ngizakuphumelelisa engakuthembisa khona ngakufungela ngoSomnini uZimu ka-Israyeli: USolomoni indodanakho uzakuba yikosi emva kwami begodu uzakuhlala esihlalweni sami sobukhosi.”

³¹ UBhathi-Tjheba waguqa phambi kwekosi wahloma ihloko phasi wathi: “Inga ikosami ingwenyama uDavida ingaphila isiphelani!”

³² Ikosi uDavida yathi: “Ngenisani umphristi uTsadokhi, umphorofidi uNathani kanye noBhenaya umsa kaJehojada.” Kuthe lokha nabafika phambi kwekosi,

³³ yathi kibo: “Thathani iinsebenzi zami bese nithatha indodanami uSolomoni niyikhweze phezu kwemeyila niyehlisele eGihoni.

³⁴ Nanifika lapho, wena mphristi Tsadokhi nawe mphorofidi Nathani zesani uSolomoni bona abe yikosi phezu kwaka-Israyeli. Nivuthele ipalapala nirhuwelele nithi, ‘Bayede ngwenyama Solomoni!’

³⁵ Nanisuka lapho, nikhuphuke naye ukuze azokuhlala esihlalweni sami sobukhosi. Nguye okufanele abuse esikhundleni sami. Ngibeke yena bonyana abe mbusi phezu kwaka-Israyeli noJuda.”

³⁶ UBhenaya umsa kaJehojada wathi ekosini: “Akube njengokutjho kwekosi! Inga uSomnini uZimu wekosami angakuzalisekisa lokho.

³⁷ Njengombana uZimu waba nekosami, inga angenza njalo nakuSolomoni enze umbuswakhe bonyana udlondlobale udlule wekosami ingwenyama uDavida!”

³⁸ Yeke umphristi uTsadokhi, umphorofidi uNathani, uBhenaya umsa kaJehojada, amaKereti namaPeleti behla bakhweza uSolomoni phezu kwemeyila yekosi uDavida banqomba naye eGihoni.

³⁹ Umphristi uTsadokhi wathatha iphondo lamafutha etendeni elicwengileko wazesa uSolomoni. Bavuthela ipalapala abantu boke barhuwelela bathi: “Bayede ngwenyama Solomoni!”

⁴⁰ Boke abantu benyuka bamlandela, babetha amafludu bajekezela bahlaba iinsondo bekwadengezela iphasi ngebanga lomdumo.

⁴¹ U-Adoniya nabo boke abamenywa egade banaye balizwa itjhadelo lokha nabaqedelela umnyanyabo. Kuthe lokha uJowabi nezwa kulila ipalapala, wabuza wathi: “Litjhada lani elisedorobheneli?”

⁴² Kuthe asakhuluma njalo, kwafika uJonathani umsa ka-Abiyatari umphristi. U-Adoniya wathi: “Ngena! Indoda eyazisa njengawe nje ifuze bona iza nezimnandi.”

⁴³ UJonathani wathi: “Ubethe phasi! Ikosethu ingwenyama uDavida ibeke uSolomoni bona abe yikosi.

⁴⁴ Ikosi ithumele umphristi uTsadokhi, umphorofidi uNathani, uBhenaya umsa kaJehojada, amaKereti namaPeleti bona bamkhweze imeyila yekosi.

⁴⁵ Nje-ke umphristi uTsadokhi nomphorofidi uNathani bamzese eGihoni bona abe yikosi. Nabasuka lapho benyuka beza edorobhenapha bakhamba bajekezela, idorobho loke lahlokoma. Litjhada lakhona-ke enilizwakweli.

⁴⁶ Ngaphezu kwalokho, uSolomoni selahlezi esihlalweni sobukhosi.

⁴⁷ Godu neenduna zebukhosini sezifikile ukuzokuthokozisa ikosethu ingwenyama uDavida zithi, ‘Inga uZimakho angenza bona ibizo lakaSolomoni lazeke khulu kunelakho nobukhosi bakhe bunabe kunebakho!’ Ikosi yakhothama yadumisa isembhedenayo

⁴⁸ yathi, ‘Akudunyiswe uSomnini uZimu wakwa-Israyeli, ovumele bonyana amehlwami abone loyo ongilandelako ebukhosini bami namhlanje.’ ”

⁴⁹ Nabezwa lokhu, boke abamenywa baka-Adoniya baba nevalo baphuma ngesibuya.

⁵⁰ Kodwana u-Adoniya, ngokwesaba uSolomoni, wakhamba wayokukakarela iimpondo ze-aldari.

⁵¹ USolomoni watjelwa bona u-Adoniya ukakarelene neempondo ze-aldari ngombana wesaba ikosi uSolomoni. Uthi ikosi uSolomoni ayifunge kuye namhlanje kobana angeze abulala incekwayo ngesabula.

⁵² USolomoni wathi: “Nange angazibonakalisa bonyana umumuntu othembekileko, angeze adliwa mkhonto; kodwana nange kungatholakala ubukhohlakali kuye, ngiqinisile ngithi uzakufa.”

⁵³ Ikosi uSolomoni yathumela amadoda afese amnamathulula e-aldarini ehla naye. U-Adoniya wafika waguqa wahloma ihloko phasi phambi kwekosi uSolomoni. USolomoni wathi kuye: “Khamba uye kwakho.”