لوقا 9 - Sindhi Bible (India)

बा॒रहन प्रेरितन खे मोकलण

¹ येशुअ पांजे बा॒रहन हीं प्रेरितन खे गड॒ पाण वट सड॒ कयईं ऐं उनन खे सबनिन दुष्‍टआत्माउन खे कढण जो ऐं बीमारियुन खे ठीक करण जो सामर्थ ऐं अधिकार डि॒नईं,

² ऐं उनन खे परमेश्वरअ जे राज॒अ जो प्रचार करण जे लाए ऐं बीमारन खे ठीक करण जे लाए मोकल्यईं।

³ येशुअ उनन खे चयईं, “रस्ते जे लाए कुछ न खणजो, न त लठ, न झोली, न रोटी, न पैसा, न वधीकअ कपड़ा।

⁴ जैं बी घरअ में तवां रहो, त जेसताईं तवां उन नगरअ मां न निकरो तेसताईं उन हीं घरअ में रहेजो।

⁵ जैं नगरअ जा मांणू तवां जी बु॒धण न चाहिन, त उतां निकरंदे वक़्त उते पांजे पेरन जी मिट्टी छंडे छड॒जो ताकि उनन जे मथां गवाही थे।”

⁶ सो उहे उतां निकरी करे, हिकअ गामड़े खां बे॒ गामड़े में वञी ख़ुशख़बरी बु॒धाएण लगा॒ ऐं हर हंद मांणुन खे ठीक कंदा रया।

हेरोदअ जो परेशान थ्यण

⁷ हाकिम हेरोद इयो सब बु॒धी करे मुंझी प्यो, छोके कुछ मांणू चवन पया, के यूहन्ना बपतिस्मा डि॒यण वारो मुअलन मां जी उथ्यो आहे,

⁸ ऐं कुछ मांणू इंय प्या चवन के एलिय्याह भविष्यवक्‍ता प्रघट थ्यो आहे ऐं कुछ मांणू इंय बी प्या चवन के अग॒यन भविष्यवक्‍ताउन मां कोई हिक जी उथ्यो आह।

⁹ परअ हेरोदअ चयईं, “यूहन्ना जी सिसी त मां कटाए छडी॒ हुई, हाणे हे केर आहे जेंजे बारे में मां इहे गा॒ल्यूं बु॒धां तो?” सो उहो इन करे येशुअ सां मिलण जी कोशिश करण लगो॒।

पंजअ हज़ारन खे रोटी खाराएण

¹⁰ प्रेरितन वापस मोटी करे जेको कुछ उनन कयो हो उन जो सजो॒ हालहेवाल येशुअ खे डि॒नऊं; उन खां पो येशु चेलन खे बेतसैदा नाले जे नगरअ डा॒ं वठी वयो।

¹¹ परअ भीड़अ खे इन जे बारे में खबरअ पेजी वई सो उहे बी येशुअ जे पोयां हलण लगा॒। येशुअ उनन जो स्वागत कयो ऐं उनन खे परमेश्वरअ जे राज॒अ जे बारे में गा॒ल्यूं बु॒धाएण लगो॒ ऐं जिन मांणुन खे बीमारियुन मां ठीक थ्यण जी ज़रूरतअ हुई उनन खे हुन ठीक कयईं।

¹² जड॒ऐं शाम थी वई, त येशुअ जा चेला संदस वट अची करे चवण लगा॒, “भीड़अ खे हितां रवानो कर, त उहे आसे पासे जे गामड़न ऐं बस्तिन में वञी पांजे रवण जो ऐं खाएण जो बंदोबस्त कन छोके इया सुनसान जग॒ऐ आहे।”

¹³ येशुअ चेलन खे चयईं, “तवां हीं इनन खे कुछ खाएण जे लाए डि॒यो।” चेलन येशुअ खे चयो, “असां वट पंजअ रोटियुन ऐं बि॒न मछल्युन खे छडे॒ बि॒यो कुछ कोने परअ जेकड॒ऐं असां वञी करे इन भीड़अ जे लाए रोटी वठी अचऊं त थी सग॒ंदो आहे।”

¹⁴ उन भीड़अ में लगभग पंजअ हज़ारअ त मर्दअ हुवा। येशुअ पांजे चेलन खे चयो, “उनन खे पंजा-पंजा जे झुण्डअ में व्यारे छड॒यो।”

¹⁵ उनन इंय हीं कयो ऐं सबनिन खे व्यारे छड॒यऊं।

¹⁶ येशुअ उन पंजअ रोटियुन ऐं बि॒न मछल्युन खे खयों ऐं स्वर्ग॒अ डा॒ं डि॒सी करे परमेश्वरअ जो धन्यवाद कयईं ऐं रोटिन खे तोडे़-तोडे़ चेलन खे डी॒ंदो वयो, के उहे मांणुन में विराईंदा वञन।

¹⁷ सबनिन मांणुन पेट भरे खादऊं ऐं चेलन जड॒ऐं बचलअ रोटिन जे टुकड़न खे खयों, त बा॒रहां टोकरियूं भरजी वयूं।

पतरसअ जो येशुअ खे मसीह कबूल करण

¹⁸ जड॒ऐं हिक डी॒ंह येशु अकेले में प्रार्थना करे रयो हो, त चेला बी हुन सां गड॒ हुवा उते येशुअ उनन खां पुछयईं, “मांणू मुंजे बारे में छाता चवन, के मां केर आयां?”

¹⁹ चेलन येशुअ खे जवाब डि॒नो, कोई चहे तो “यूहन्ना बपतिस्मा डि॒यण वारो; परअ कोई त चहे तो एलिय्याह ऐं कोई त इंय बी तो चहे अग॒यन भविष्यवक्‍ताउन मां कोई हिक भविष्यवक्‍ता जी उथ्यो आहे।”

²⁰ येशुअ उनन खां पुछयईं, “परअ तवां मुंजे बारे में छाता चओ?” इन ते पतरसअ हुन खे चयो, “तूं परमेश्वरअ जो मसीह आईं।”

²¹ इन ते येशुअ उनन खे चिताए करे चयो, इया गा॒ल केंखे बी न चहे जो।

पांजी मौत जे बारे में येशुअ जी भविष्यवाणी

²² येशुअ चेलन खे चयईं, “इयो ज़रूरी आहे के मांणूअ जो पुट डा॒ढो दुख सहे ऐं पुरनियां ऐं मुख्ययाजकअ ऐं धर्मशास्त्री हुन खे तुच्छ समझी करे ठुकराएन ऐं मारे छडि॒न परअ उहो टे डी॒ंहं ते मौतअ मां जी उथे।”

येशुअ जे पोयां हलण जो असली मतलब

²³ इन खां पो येशुअ सबनिन खे चयईं, “जेको बी मुंजे पोयां अचण चाहे तो उहो पांजे मंसुबन ऐं पांजी इच्छाउन खे छडे॒ करे ऐं हर रोज़ पांजो क्रूस खणी मुंजे पोयां हले।

²⁴ छोके जेको पांजी जान बचाएण चाहींदो उहो उन खे विञाईंदो परअ जेको मुंजे करे पांजी जान खे विञाईंदो उहो ही उन खे बचाईंदो।

²⁵ अगर मांणू सजे॒ संसारअ खे हासिल करे वठे परअ उहो पांजी जान विञाए छडे॒, त उन खे छा फ़ायदो?

²⁶ जेको बी मुखां ऐं मुंजी चयलअ गा॒ल्युन खां शर्मिंदो थींदो, त मांणूअ जो पुट बी जड॒ऐं पांजी ऐं पांजे पिता जी महिमा में ऐं पांजे पवित्र स्वर्ग॒दूतन सां गड॒ ईंदो त उहो बी उनन खां शर्मिंदो थींदो।”

²⁷ “मां तवां खे सच तो चवां जेके बी हिते बीठा आइन, इनन मां कोई कोई त एड़ा बी आइन, के जेसताईं परमेश्वरअ जे राज॒अ खे सामर्थअ सां गड॒ ईंदे न डि॒सी वठन, तेसताईं उहे न मरंदा।”

येशुअ जो रूपांतर

²⁸ इन गा॒ल्युन जे कुछ अठअ डी॒ंहन खां पो येशु पतरस, यूहन्ना ऐं याकूबअ खे पाण सां गड॒ प्रार्थना करण जे लाए हिकअ पहाड़अ ते वठी वयो।

²⁹ जींहईं उहो प्रार्थना करे रयो हो, त हुन जो चहेरो स्वर्ग॒अ जी महिमा में बदल जी वयो ऐं संदस जा कपड़ा सफेद थी करे चमकण लगा॒।

³⁰ अचानक चेलन बि॒न मांणुन खे येशुअ सां गड॒ गा॒लाईंदे डि॒ठो। उहे मूसा ऐं एलिय्याह हुवा।

³¹ उहे ब॒ई स्वर्ग॒अ जी महिमा में डि॒सण आया ऐं उहे येशुअ खां इन बारे में चर्चा करे रया हुवा, के उहो कें तरीके सां परमेश्वरअ जे मकसदअ खे पांजी मौतअ जे द्वारा पूरो कंदो जेकी यरूशलेम शहेरअ में थ्यण वारी हुई।

³² पतरस ऐं उन जा साथी भारी निंडअ में हुवा; जड॒ऐं उहे पूरी तरह सुजा॒ग थ्या, त उनन येशुअ जी महिमा खे ऐं उन बि॒न मांणुन खे हुन सां गड॒ बीठल डि॒ठऊं।

³³ जड॒ऐं मूसा ऐं एलिय्याह येशुअ वटां रवाना थी रया हुवा, त पतरसअ येशुअ खे चयो, “हे गुरू, इयो असां जे लाए केडो॒ सुठो आहे के असां हिते आयूं। असां टे तंबू ता ठायूं; हिक तुंजे लाए, हिक मूसा जे लाए ऐं हिक एलिय्याह जे लाए।” उन खे खबरअ न हुई के उहो छा तो चहे।

³⁴ उहो इंय चहे ही प्यो, त हिकअ बादलअ अची उनन खे घेरे छड॒यईं ऐं बादलअ सां घिरण जे करे उहे डा॒ढो ड॒की वया।

³⁵ उन बादलअ मां परमेश्वरअ जी इया आवाज़ आई, “इयो मुंजो पुट आहे, जेंखे मां चूंडयो आहे हिन जी बु॒धो।”

³⁶ जड॒ऐं परमेश्वर उनन सां गा॒लाए चुको, त उनन येशुअ खे उते अकेलो पातो; ऐं उहे इन विषय जे बारे में उन वक़्त चुप रया ऐं उनन जेको कुछ डि॒ठो हुयो उनन डी॒ंहन में इन विषय जे बारे में केंखे कुछ बी न बु॒धायऊं।

येशुअ हिकअ दुष्‍टआत्मा जे वसअ मां छोकरे खे आज़ाद कयईं

³⁷ बे॒ डी॒ंह जड॒ऐं उहे पहाड़अ तां लथा, त हिकअ वडी॒ भीड़अ येशुअ सां अची मिली।

³⁸ उन भीड़अ मां हिकअ मांणूअ येशुअ खे पुकारे करे चयो, “हे गुरू, मां तोखे मिंथूं तो कयां के मुंजे पुटअ जे मथां दया करे उन जी मददअ कर, छोके उहो मुंजो इकलौतो पुट आहे।

³⁹ उन खे हिकअ दुष्‍टआत्मा ती पकड़ेस जेंजी वजह सां उहो ओचतो रड़यूं तो करण लगे॒। उहा उन खे एड़ो ती मरोड़ेस जेंजे करे संदस जे मुंहं में गज ती भरजी अचे; ऐं उहा उन खे डा॒ढी पीड़ा डी॒ंदी तस ऐं उन खे डा॒ढो मुश्किल सां छडी॒ंदी तस।

⁴⁰ मां तुंजे चेलन खे चयो, के उहे मुंजे पुटअ मां इन दुष्‍टआत्मा खे कढन परअ उहे उन खे न कढी सग॒या।”

⁴¹ इयो बु॒धी येशुअ चयईं, “हे अविश्वासी ऐं भ्रश्ट पीढ़ी मां केसताईं तवां सां गड॒ रवंदुम? ऐं केसताईं तवां जी सवंदुम? पो येशुअ छोकरे जे पिता खे चयो, पांजे पुटअ खे हिते मूं वट वठी अचेस।”

⁴² उहे जड॒ऐं उन छोकरे खे येशुअ वट वठी ही प्या अचन, त दुष्‍टआत्मा उन छोकरे खे ज़मीनअ ते किराए करे मरोड़ियईंस परअ येशुअ उन दुष्‍टआत्मा खे दड़को डि॒नईं ऐं छोकरे खे बिल्कुल ठीक करे उन जे पिता खे सौंपे छड॒यईं।

⁴³ तड॒ऐं सब मांणू परमेश्वरअ जो एड़ो सामर्थ डि॒सी ताजुब करण लगा॒। जड॒ऐं मांणू येशुअ जे सबनिन कमन खे डि॒सी ताजुब प्या कन, त उहो पांजे चेलन खे चवण लगो॒,

पांजी मौत जे बारे में येशुअ जी बि॒यों दफो भविष्यवाणी करण

⁴⁴ “तवां मुंजी इन गा॒ल्युन खे ध्यान सां बु॒धो ऐं उन खे याद रखो त मांणूअ जो पुट मांणुन जे हवाले कयो वेंदो।”

⁴⁵ परअ चेलन खे येशुअ जी इया गा॒ल सम्झअ में न आई, छोके उनन खे इन गा॒ल खे समझण जे लाए कें रोक्यो हुयो। उहे येशुअ खां इन विषय जे बारे में पुछण खां डिज॒न प्या।

सबनिन खां वडो॒ केर?

⁴⁶ चेला पाण में बहेस करण लगा॒, त असां मां वडो॒ केर आहे।

⁴⁷ परअ येशुअ उनन जे दिल जे विचारन खे जा॒णे वरतईं। इन करे हुन हिक बा॒रअ खे खणी करे पांजे पासे में बियारियईं,

⁴⁸ ऐं चेलन खे चयईं, “जेको बी मुंजे नाले सां हेड़े बा॒रन मां कें हिकअ जो बी स्वागत तो करे उहो मुंजो स्वागत तो करे; ऐं जेको बी मुंजो स्वागत तो करे उहो खाली मुंजो न परअ उहो हुन जो बी स्वागत तो करे जैं मुखे मोकल्यो आहे, छोके जेको तवां मां पांजे पाण खे नंढे मां नंढो कंदो उहो ही वडो॒ आहे।”

जेको तवां जे खिलाफ काने, उहो तवां सां गड॒ आहे

⁴⁹ यूहन्ना येशुअ खे चयईं, “हे गुरू, असां हिक मांणूअ खे तुंजे नाले सां दुष्‍टआत्माउन खे कढंदे डि॒ठो, त असां उन खे मना करण लगा॒ सीं, छो त उहो तुंजे पोयां असां सां गड॒ नथो हले।”

⁵⁰ येशुअ उनन खे चयईं, “उन खे न रोक्यो छोके जेको तवां जे खिलाफ कोने उहो तवां सां गड॒ आहे।”

सामरिया जे मांणुन द्वारा येशुअ जो विरोध

⁵¹ जड॒ऐं येशुअ जे स्वर्ग॒अ में खणाएजी वञण जा डी॒ंहं वेझा आया, त हुन यरूशलेम वञण जो पको इरादो कयईं।

⁵² येशुअ पांजे कुछ मांणुन खे पहेरयों हीं पांजे अग॒यां मोकल्यईं के उहे सामरिया जे हिकअ गामड़े में वञी हुन जे लाए जग॒ऐ तैयार कन।

⁵³ परअ उते मांणुन येशुअ जो स्वागत न कयो, छोके उहो यरूशलेम डा॒ं प्यो वञे।

⁵⁴ जड॒ऐं येशुअ जे चेलन याकूब ऐं यूहन्ना इयो डि॒ठो, तड॒ऐं उनन संदस खे चयऊं, “हे प्रभु, छा तूं चाहीं तो, के असां हुकुम डि॒यऊं के आसमानअ मां बाहे अची उनन खे साड़े छडे॒?”

⁵⁵ परअ येशुअ मुड़ी करे उनन खे दड़को डि॒नईं [ऐं चयईं, “तवां खे खबरअ कोने के तवां केड़ी आत्मा जा आयो। छोके मांणूअ जो पुट मांणुन खे नाश करण न परअ उनन खे बचाएण आयो आहे।”]

⁵⁶ सो येशु ऐं संदस जा चेला बे॒ गामड़े डा॒ं हली वया।

येशुअ जो चेलो ठवण जी कीमतअ

⁵⁷ जड॒ऐं उहे रस्ते तां वञन हीं प्या, त कें हिकअ मांणूअ येशुअ खे चयो, “जिते-जिते तूं वेंदें, मां तुंजे पोयां-पोयां हलंदुम।”

⁵⁸ येशुअ उन खे चयईं, “लोमड़िन खे त गुफ़ाऊं ऐं पखिन खे त आखेरा हुंदा आइन, परअ मांणूअ जे पुटअ खे त पांजो सिर ढकण जी बी जग॒ऐ कोने।”

⁵⁹ येशुअ कें बे॒ मांणूअ खे चयईं, “मुंजे पोयां हल्यो अच।” परअ उन येशुअ खे चयो, “हे प्रभु, पहेरयों मुखे वञण डे॒ के मां पांजे पिता खे दफनाए अचां।”

⁶⁰ येशुअ उन खे चयईं, “मुअलन खे पांजा मुरदा दफ़नाएण डे॒ परअ तूं वञी करे परमेश्वरअ जे राज॒अ जे बारे में बुधाए।”

⁶¹ हिकड़े बे॒ ज॒णे बी येशुअ खे चयो, “हे प्रभु, मां तुंजे पोयां हलंदुम; परअ पहेरयों मुखे इज़ाजतअ डे॒ के पांजे परिवारअ खां मोकलाए अचां।”

⁶² येशुअ उन खे चयईं, “जेको बी पांजो हथ हलअ ते रखी करे पोयां तो डि॒से, उहो परमेश्वरअ जे राज॒अ में सेवा करण जे लायक कोने।”