لوقا 8 - Sindhi Bible (India)

कुछ स्त्रियुन जो येशुअ जे पोयां हलण ऐं सेवा करण

¹ उन खां पो येशु परमेश्वरअ जे राज॒अ जी ख़ुशख़बरीअ जो प्रचार कंदे नगर-नगर ऐं गाम-गामअ में फिरंदो रयो ऐं उहे बा॒रहां प्रेरितअ बी हुन सां गड॒ हुवा,

² ऐं थोड़ियूं स्त्रीयूं बी येशुअ सां गड॒ हुयूं, जेके हुन जे द्वारा दुष्‍टआत्माउन ऐं बीमारियुन मां छडा॒ई वयूं हुयूं ऐं उहे इहे आइनः मरियम जेकी मगदलीनी चवाएजंदी आहे, जेमां सतअ दुष्‍टआत्माऊं निकत्यूं हुयूं,

³ ऐं योअन्ना जेकी हेरोदअ जे भण्डारी खूज़ा जी ज़ालअ हुई ऐं सूसन्नाह ऐं घणहीं बि॒यूं बी स्त्रीयूं हुन सां गड॒ हुयूं। इहे येशु ऐं हुन जे चेलन जी पांजन पैसन जे द्वारा सेवा कंदियूं हुयूं।

बि॒ज पोखण वारे जी मिसालअ

⁴ जड॒ऐं हिकअ वडी॒ भीड़अ अलग-अलग नगरन मां निकरी करे येशुअ वट अची इकट्ठी थी, त हुन भीड़अ खे इयो मिसाल डीं॒दे चयो।

⁵ “हिक बि॒ज पोखण वारो बि॒ज पोखण निकतो। पोखण जे वक़्त कुछ बि॒जअ रस्ते जे किनारे ते किरया ऐं लताड़िया वया ऐं उनन खे आकाशअ जा पखी अची खाई वया।

⁶ कुछ बि॒जअ पथरीली ज़मीनअ ते किरया ऐं उभरिया, परअ नमी न मिलण जे करे सुकी वया।

⁷ कुछ बि॒जअ कंडेदार जाड़िन में वञी किरया ऐं जाड़िन उनन सां गड॒-गड॒ वधी करे उनन खे दबा॒ए छड॒यो।

⁸ परअ कुछ बि॒जअ सुठी ज़मीनअ ते किरया ऐं उगजी करे सौ गुणा फल खणी आया।” इयो चई करे पो हुन वडे॒ आवाज़ सां चयईं, “जेको बी बु॒धो ता, उन खे समझो।”

मिसालुन जो मकसद

⁹ येशुअ जे चेलन संदस खां पुछो, के इन मिसालअ जो मतलब छा आहे?

¹⁰ येशुअ उनन खे चयईं, “तवां खे परमेश्वरअ जे राज॒अ जे रहस्यन जी सम्झअ डि॒नी वई आहे, परअ बा॒हिर वारन खे सब गा॒ल्यूं मिसालुन में बु॒धायूं वेंदियूं आइन। इन करे ‘के उहे डि॒सी करे बी डि॒सी न सग॒न ऐं बु॒धी करे बी न समझन।’”

बि॒ज पोखण वारे मिसालअ जो मतलब

¹¹ “इन मिसालअ जो मतलब इयो आहे, बि॒ज परमेश्वरअ जो वचन आहे।

¹² रस्ते जे किनारे जा किरयल बि॒जअ उनन मांणुन खे ता डे॒खारन जैं वचन बु॒धो; परअ किथे इंय न थे, के उहे विश्वास करे मुक्‍ती पाइन, इन करे शैतान अची उनन जे दिल मां वचनअ खे खणी तो वञे।

¹³ पथरीली ज़मीनअ ते किरयल बि॒जअ उनन मांणुन खे ता डे॒खारन जैं वचन बु॒धी आनंदअ सां मञी त वरतो परअ पांजे पाण में जड़ न रखण जे करे थोड़े वक़्तअ जे लाए विश्वास ता कन, परअ परीक्षा अचण जे वक़्त पोयां ता हटी वञन।

¹⁴ कंडेदार जाड़िन में किरयल बि॒जअ उनन मांणुन खे ता डे॒खारन जैं वचन बु॒धो परअ अग॒यां हली जीविका जी चिंता ऐं धन-दौलतअ ऐं दुनिया जे शयुन जूं खुवाहिशूं ऐं एशो-आरामअ में फासी ता पवन ऐं इन करे उहे फल नथा खणीं अचन।

¹⁵ सुठी ज़मीनअ ते किरयल बि॒जअ उनन मांणुन खे ता डे॒खारन जैं वचन बु॒धी करे उन खे पांजे सच्‍चे ऐं साफ दिल में संभाले रख्यो ऐं सबुर रखण जे करे फल ता खणीं अचन।”

डी॒ए जी मिसालअ

¹⁶ “कोई बी डी॒ओ बा॒रे करे बासण सां न ढकींदो आहे ऐं न हीं खटअ जे हेठां रखंदो आहे, परअ डी॒ए खे उहो ज्॒यारीअ ते रखंदो आहे ताकि अंदर अचण वारन खे रोशनी मिले।

¹⁷ कुछ बी एड़ो लिक्यल कोने जेको ज़ाहिर न थींदो ऐं न हीं कोई एड़ो रहस्य आहे जेको जा॒ण्यो ऐं खोल्यो न वेंदो।

¹⁸ इन करे सावधान रहो जेको कुछ बु॒धो ता उन खे ध्यानअ सां बु॒धो, छो त जैं वट बी आहे उन खे अञा बी डि॒नो वेंदो परअ जैं वट कोने उन खां उहो बी वापस वरतो वेंदो जेको उन वट आहे, जेंखे उहो पांजो तो समझे।”

येशुअ जी माता ऐं भावरअ

¹⁹ येशुअ जी माता ऐं भावरअ संदस वट आया परअ भीड़अ जे करे संदस सां मिली न सग॒या।

²⁰ कुछ मांणुन येशुअ खे चयो, “तुंजी माता ऐं तुंजा भावरअ बा॒हिर बीठा तई, उहे तोसां मिलण ता चाहिन।”

²¹ इन ते येशुअ उनन खे चयईं, “मुंजी माता ऐं मुंजा भावरअ त इहे आइन जेके परमेश्वरअ जो वचन बु॒धनता ऐं उन ते हलन ता।”

येशुअ जो तूफानअ खे शांत करण

²² हिक डी॒ंह येशुअ पांजे चेलन खे चयईं, “हलो, असां झील जे उन पार हलऊं।” सो उहे बे॒ड़ीअ में वई करे उन पार वञण जे लाए निकता।

²³ जड॒ऐं उहे रस्ते में ही हुवा त येशु सुम पयो हो ऐं इंय थ्यो के उन झील में हिक वडो॒ तूफान आयो ऐं बे॒ड़ी पाणीअ सां भरजण लगी॒ ऐं उनन जी जान ख़तरे में पेजी वई।

²⁴ तड॒ऐं चेला येशुअ जे अग॒यां वञी हुन खे उथारे करे चवण लगा॒ त, “गुरू! हे गुरू! असां बु॒डी॒ रया आयूं।” तड॒ऐं येशुअ उथी करे तूफानअ खे ऐं पाणीअ जी लहेरुन खे दड़को डि॒नईं। सो तूफान बिल्कुल शांत थी वयो ऐं उते राहतअ थी वई।

²⁵ इन ते येशुअ उनन खे चयो, “केडा॒ं वयो तवां जो विश्वास?” परअ उहे डा॒ढो ड॒की वया ऐं पाण में हिकअ बे॒ खे ताजुब करे चवण लगा॒, “हे केर आहे के तूफान ऐं पाणी बी हुन जो हुकुम ता मञन?”

दुष्‍टआत्माउन खां सतायलअ हिकअ ज॒णे खे छुटकारो डि॒यण

²⁶ उहे उन पार गिरासेनियों जे इलाके में पौंता, जेको झील जे उन पार गलील क्षेत्र जे सामूं आहे।

²⁷ जीअंईं येशु बे॒ड़ीअ मां किनारे ते लथो, त उन नगरअ जो हिक मांणू जेमें दुष्‍टआत्माऊं हुयूं उहो हुन सां अची मिल्यो। उन मांणूअ डा॒ढन हीं डी॒ंहन खां न कपड़ा पाता वईं ऐं न हीं उहो घरअ में रवंदो हो, परअ उहो क़ब्रुन में रवंदो हो।

²⁸ उहो येशुअ खे डि॒सी करे रड़यूं करण लगो॒ ऐं पांजे घोड॒न ते अची हुन जे पेरन ते किरी पयो ऐं वडे॒ आवाज़अ सां संदस खे चयईं, “हे परमप्रधान परमेश्वरअ जा पुटअ येशु! मुसां तूं छा तो करण चाहीं? मां तोखे मिंथूं तो कयां मुखे तकलीफअ न डे॒।”

²⁹ छोके येशुअ दुष्‍टआत्मा खे उन मांणूअ मां निकरी वञण जो हुकुम डि॒नो वईं। दुष्‍टआत्मा उन मांणूअ जे मथां अक्सर कब्जो कंदी हुई। सो इन जे करे मांणू संदस खे वसअ में रखण जे लाए जंजीरुन सां ब॒धंदा हुया परअ उहो उनन खे बी तोड़े छडीं॒दो हो। दुष्‍टआत्मा उन खे अक्सर जंगलन में गीले वेंदी हुई।

³⁰ येशुअ उन खां पुछो, “तुंजो नालो छा आहे?” उन येशुअ खे जवाब डि॒नो, “मुंजो नालो लश्कर आहे,” छोके डा॒ढियूं दुष्‍टआत्माऊं उन में समायल हुयूं।

³¹ उनन येशुअ खे मिंथूं करे चयो, असां खे अथाह खडे॒ में वञण जो हुकुम न डे॒।

³² उते थोड़ो ही परते पहाड़ीअ ते हिक वडो॒ सूअरन जो झुण्ड चरे रयो हो। दुष्‍टआत्माउन येशुअ खे मिंथूं करे चयो, के उहो उनन खे सूअरन जे अंदर घिरी वञण जी इज़ाजतअ डे॒। सो येशुअ उनन खे इन जी इज़ाजतअ डि॒नी।

³³ तड॒ऐं दुष्‍टआत्माऊं उन मांणूअ मां निकरी करे सूअरन में घिरी वयूं ऐं सूअरन जो उहो झुण्ड पहाड़ीअ जी चोटीअ तां झील में वञी किरयो ऐं बु॒डी॒ मरयो।

³⁴ इयो डि॒सी करे सूअरन जा चढ़ाएण वारा उतां भजी॒ वया ऐं उनन आसे-पासे जे नगरन ऐं बस्तिन में वञी इन सजे॒ किस्से जी खबरअ डि॒नऊं।

³⁵ जेको कुछ उते थ्यो हो मांणू उहो डि॒सण जे लाए निकरी आया। जड॒ऐं उहे येशुअ वट आया, त उनन जेमां दुष्‍टआत्माऊं निकत्यूं हुयूं उन मांणूअ खे कपड़ा पातल, शांत ऐं पूरे होशअ में येशुअ जे पेरन ते वेठल डि॒सी करे ड॒की वया।

³⁶ जिन मांणुन इयो किस्सो डि॒ठो हुयो उनन आयल मांणुन खे चई बु॒धायऊं, के कीअं इयो मांणू जेमें दुष्‍टआत्माऊं हुयूं ठीक थ्यो आहे।

³⁷ तड॒ऐं गिरासेनियों जे आसे-पासे जे सबनिन मांणुन येशुअ खे मिंथूं करे चयो, महेरबानी करे असां जे इलाके मां हली वञ; छोके उहे डा॒ढो ड॒की वया हुवा। इन करे उहो बे॒ड़ीअ ते चढ़ी वापस मोटी वयो।

³⁸ जैं मांणूअ मां दुष्‍टआत्माऊं निकत्यूं हुयूं उहो येशुअ खे मिंथूं करे चवण लगो॒, के मुखे पाण सां गड॒ वठी हल परअ येशुअ हुन खे वापस मोकले करे चयो,

³⁹ “पांजे घर हल्यो वञ ऐं मांणुन खे वञी बु॒धाए, के परमेश्वरअ तोसां केडी॒ वडि॒यूं भलायूं कयूं आइन।” उहो सजे॒ नगरअ में वञी बु॒धाएण लगो॒, के येशुअ उन सां केडी॒ वडि॒यूं भलायूं कयूं तईं।

याईरअ जी मुअल धीअ ऐं हिकअ बीमार स्त्री

⁴⁰ जड॒ऐं येशु वापस मोटी आयो, त मांणुन हुन जो स्वागत कयो, छोके उहे सब संदस जो इंतज़ार करे रया हुवा।

⁴¹ एतरे में हीं याईर नाले जो हिक मांणू जेको प्रार्थना-घरअ जो सरदार हुयो, उते आयो ऐं येशुअ जे पेरन ते किरी हुन खे मिंथूं करे चवण लगो॒, के मुंजे घर हल,

⁴² छोके याईरअ जी लगभग बा॒रहें सालें जी इकलौती धीअ हुई ऐं उहा मरण ते हुई। जड॒ऐं येशु उन सां गड॒ वञी रयो हुयो, त रस्ते में चौतरफां खां मांणू हुन जे मथां किरण लगा॒, छोके त वडी॒ भीड़अ संदस सां गड॒ हुई।

⁴³ हिकअ स्त्री हुई जेंखे बा॒रहन सालन खां रत वहण जी बीमारी हुई। उन पांजे इलाज़अ में पांजो सब कुछ डाक्टरन खे ड॒ई छड॒यो वईं परअ उहा किथां बी ठीक न थी हुई।

⁴⁴ उन पोयां खां अची करे येशुअ जे कपड़न जे किनारे खे हथ लगा॒यईं ऐं ओढी॒ मलई उन जो रत वहण बंद थी वयो।

⁴⁵ इन ते येशुअ चयो, “मुखे कें हथ लगा॒यो?” जड॒ऐं सब मना करण लगा॒, त पतरसअ हुन खे चयईं, “हे गुरू, तूं त मांणुन सां घिरयल आईं! ऐं मांणू तुंजे मथां किरी रया आइन।”

⁴⁶ परअ येशुअ चयईं, “कें त मुखे हथ लगा॒यो आहे, छोके मां जा॒णे वरतो आहे के मुंजे अंदरां सामर्थ निकती आहे।”

⁴⁷ जड॒ऐं उहा स्त्री समझी वई के मां लिकी न थी सगा॒ं, तड॒ऐं उहा डिज॒ंदे येशुअ जे सामूं आई ऐं हुन जे पेरन ते किरी करे सबनिन मांणुन खे चई बु॒धायईं, के मां छो येशुअ खे हथ लगा॒यो ऐं कीअं मां ओढी॒ मलई ठीक थी वयम।

⁴⁸ येशुअ उन खे चयईं, “पुटरी, तुंजे विश्वासअ तोखे ठीक कयो आहे इन करे सुकुन सां हली वञ।”

⁴⁹ येशु इयो सब चहे ही प्यो, त एतरे में प्रार्थना-घरअ जे सरदारअ याईरअ जे घरअ मां कुछ मांणुन अची करे, उन खे खबरअ डि॒नी, “तुंजी धीअ त मरी वई तई इन करे हाणे गुरूअ खे तकलीफअ न डे॒।”

⁵⁰ येशुअ इयो बु॒धी करे उन खे चयईं, “ड॒क न। खाली विश्वास रख त उहा बची वेंदी।”

⁵¹ पो येशु जड॒ऐं याईरअ जे घर पौंतो, त हुन पतरस, यूहन्ना, याकूब ऐं छोकरीअ जे माता-पिता खे छडे॒ बि॒यो केंखे बी पाण सां गड॒ अंदर अचण न डि॒नईं।

⁵² सब उन छोकरीअ जे लाए रोवन-पिटन प्या परअ येशुअ उनन खे चयईं, “रोओ न; छोके उहा मरी कोने परअ सुम पई आहे।”

⁵³ इन ते उहे सब येशुअ जो मजाक उडा॒एण लगा॒, छोके उनन खे खबरअ हुई के उहा मरी वई आहे।

⁵⁴ परअ येशुअ उन छोकरीअ जो हथ पकड़े करे जोर सां वडे॒ आवाजअ सां चयईंस, “हे छोकरी उथ!”

⁵⁵ इयो चवंदे ही, छोकरीअ जी आत्मा वापस उन में मोटी आई ऐं उहा उथी वेठी। पो येशुअ उनन खे चयो, इन खे कुछ खाएण जे लाए डि॒यो।

⁵⁶ इयो सब कुछ डि॒सी करे उन छोकरीअ जे माता-पिता खे ताजुब थ्यो परअ येशुअ उनन खे चिताए करे चयो, के जेको कुछ हिते थ्यो आहे उहो केंखे बी न बु॒धाए जो।