لوقا 7 - Sindhi Bible (India)

हिकअ सूबेदारअ जो विश्वास

¹ जड॒ऐं येशु मांणुन खां इहे सब गा॒ल्यूं करे चुको, त उहो कफरनहुम नगर में आयो।

² उते कें हिकअ रोमी सूबेदारअ जो दास हो, जेको हुन जो डा॒ढो प्यारो हुयो ऐं उहो बीमारीअ सां मरण ते हो।

³ जड॒ऐं सूबेदारअ येशुअ जी चर्चा बु॒धी, त हुन यहूदिन जे चग॒ंन हीं पुरनियन खे येशुअ डे॒ मिंथूं करण जे लाए मोकलियईं, के महेरबानी करे मुंजे दासअ खे अची करे ठीक कर।

⁴ उहे येशुअ वट आया ऐं संदस खे डा॒ढियूं मिंथूं करे चवण लगा॒, “उहो सूबेदार इन लायक आहे के तूं उन जे लाए इयो करीं,

⁵ छोके उहो असां यहूदिन सां प्यार कंदो आहे ऐं उन असां खे प्रार्थना-घर बी ठाराए डि॒नो तईं।”

⁶ येशु उनन सां गड॒ वयो ऐं जड॒ऐं उहो उन जे घरअ जे वेझो ही हो, त उन सूबेदारअ पांजे कुछ दोस्तन जे हथां चवाए मोकलियईंस, “हे प्रभु, तकलीफअ न खण, छोके मां इन लायक कोन आयां के तूं मुंजे घर अचीं।

⁷ इन करे मां पांजे पाण खे इन लायक बी न समझो के मां तो वट अचां, परअ तूं रुगो॒ उतां खां हीं चई छडी॒ंदे के ठीक थी वञ, त मुंजो दास ठीक थी वेंदो।

⁸ छोके मां पाण बी कें अधिकारअ जे हेठां आयां ऐं सिपाही बी मुंजे अधिकारअ जे हेठां आइन; ऐं जेकड॒ऐं मां कें हिकअ खे चवंदो आयां, ‘वञ,’ त उहो हली वेंदो आहे; ऐं जेकड॒ऐं बे॒ खे चवंदो आयां, ‘अच,’ त उहो ईंदो आहे; ऐं पांजे कें दासअ खे इयो चवंदो आयां, ‘के इयो कम कर,’ त उहो कंदो आहे।”

⁹ इयो बु॒धी येशुअ खे ताजुब थ्यो ऐं हुन पोयां मुड़ी करे जेकी भीड़अ संदस जे पोयां हली रई हुई उनन खे चयईं, “मां तवां खे चवां तो, के मां हेड़ो विश्वास त इज़राएल में बी किथे न पातो आहे।”

¹⁰ सो जड॒ऐं सूबेदारअ जे तरफां मोकल्यल मांणू घर मोटी आया, त संदन उन दासअ खे जेको बीमार हो, बिल्कुल ठीक पातऊं।

येशुअ जो हिकअ मुरदे खे जिंदो करण

¹¹ थोड़न डी॒ंहन खां पो येशु नाईन नाले जे नगरअ में वयो। संदस जा चेला ऐं हिकअ वडी॒ भीड़अ हुन सां गड॒ हली रही हुई।

¹² जड॒ऐं उहो नगरअ जे फाटकअ जे पासे पौंतो, त उते मांणू हिकअ मुरदे खे नगरअ मां बा॒हिर खणीं प्या वञन। उहो पांजी माता जो इकलौतो पुट हो ऐं उहा स्त्री पाण विधवा हुई। नगरअ जा चंगा॒ हीं मांणू उन सां गड॒ हुवा।

¹³ उन विधवा स्त्रीअ खे डि॒सी प्रभुअ जो दिल दया सां भरजी वयो ऐं हुन संदस खे चयईंस, “रो न।”

¹⁴ तड॒ऐं उहो अरथीअ जे पासे वयो ऐं उन खे हथ लगा॒यईं, इन ते कांधी उते ही बीह रया। येशुअ चयईं, “हे जवानअ, मां तोखे चवां तो त उथ!”

¹⁵ तैंते उहो मुरदो उथी वेठो ऐं गा॒लाएण-बो॒लाएण लगो॒। येशुअ उन जवानअ खे संदस जी माता जे हवाले करे छड॒यईं।

¹⁶ इयो डि॒सी सब ड॒की वया ऐं उहे परमेश्वरअ जी स्तुति करे चवण लगा॒, “असां जे विचअ में हिक डा॒ढो वडो॒ भविष्यवक्‍ता आयो आहे ऐं परमेश्वरअ पांजे मांणुन जे मथां दया कई आहे।”

¹⁷ येशुअ जे बारे में इया गा॒ल सजे॒ यहूदिया क्षेत्रन में ऐं आसे-पासे जे सबनिन इलाकन में फैल जी वई।

यूहन्ना बपतिस्मा डि॒यण वारे जो सवाल

¹⁸ यूहन्ना खे संदस जे चेलन इन सबनिन गा॒ल्युन जी खबरअ डि॒नी, तड॒ऐं यूहन्ना पांजे चेलन मां बि॒न ज॒णन खे पाण वट घुरायईं,

¹⁹ ऐं उनन खे प्रभुअ वट इयो पुछण जे लाए मोकल्यईं, “अचण वारो मसीह तूं हीं आईं, यां असां बे॒ केंजो इंतज़ार कयऊं?”

²⁰ उहे येशुअ वट आया ऐं हुन खे चयऊंस, “यूहन्ना बपतिस्मा डि॒यण वारे असां खे तो वट इयो पुछण जे लाए मोकल्यो आहे के अचण वारो मसीह तूं हीं आईं, यां असां बे॒ केंजो इंतज़ार कयऊं?”

²¹ उन हीं वक़्त येशुअ डा॒ढन बीमारन खे ऐं जेके पीड़ाउन में हुवा उनन खे ठीक कयईं ऐं जेंजे अंदर दुष्‍टआत्माऊं हुयूं उनन खे संदन जे वसअ मां छडा॒यईं; ऐं डा॒ढन हीं अंधन जूं अख्यूं ठीक कयईं;

²² येशुअ उनन खे चयईं, “जेको तवां डि॒ठो ऐं बु॒धो तव उहो वञी यूहन्ना खे बु॒धायो; के अंधा डि॒सन ता, लगड़ा हलन-फिरन ता, कोढ़ी शुद्ध ता कया वञन, बो॒रा बु॒धंता ऐं मुरदा जिंदा ता कया वञन ऐं ग़रीबन खे ख़ुशख़बरी बु॒धाई ती वञे।

²³ धन्य आहे उहो, जेंखे मुंजे बारे में कोई शक न हुजे।”

²⁴ जड॒ऐं यूहन्ना जा चेला उतां हली वया, त येशु यूहन्ना जे बारे में मांणुन खां पुछण लगो॒, “तवां जंगलअ में छा डि॒सण वया हुयवअ? छा हवा सां हिलंदर गाह जी डा॒ंडीअ खे?

²⁵ त पो भला छा डि॒सण वया हुयवअ? छा सुठा महेंगा कपड़ा पातलअ मांणूअ खे? न, डि॒सो, जेके चमकदार ऐं महेंगा कपड़ा पाईंदा आइन उहे मजे ऐं एशो-आरामअ सां महेलन में रवंदा आइन।

²⁶ त पो भला छा डि॒सण वया हुयवअ? छा कें भविष्यवक्‍ता खे? हा, मां तवां खे चवां तो परअ भविष्यवक्‍ता खां बी वडे॒ खे।

²⁷ हे उहो ही आहे जेंजे बारे में पवित्रशास्त्र में लिख्यल आहे, परमेश्वर चहे तो, ‘डि॒सो, मां पांजे दूतअ खे तुंजे अग॒यां मोकल्यां तो, जेको मांणुन खे तुंजे अचण जे लाए तैयार कंदो।’

²⁸ मां तवां खे चवां तो, स्त्रियुन जे पेटअ मां ज॒म्यल सबनिन मांणुन मां यूहन्ना बपतिस्मा डि॒यण वारे खां वडो॒ कोई बी कोने। परअ परमेश्वरअ जे राज॒अ में जेको बी नंढे खां नंढो आहे, उहो यूहन्ना बपतिस्मा डि॒यण वारे खां बी वडो॒ आहे।”

²⁹ सबनिन मांणुन ऐं एतरे हद ताईं के महसूल उगा॒ड़ींदड़न बी जड॒ऐं इयो बु॒धो, त उनन यूहन्ना खां बपतिस्मा वठण जे करे परमेश्वरअ खे सचार करे मञयऊं।

³⁰ परअ फ़रीसिन ऐं धर्मशास्त्रिन यूहन्ना खां बपतिस्मो न वठी करे, पांजे बारे में परमेश्वरअ जे मकसदअ खे ठुकराए छड॒यऊं।

³¹ “सो इन पीढ़ीअ जे मांणुन जी भेटअ मां कैंसां कयां, के उहे कें वांगुर आइन?

³² उहे उनन बा॒रन वांगुर आइन जेके बज़ारअ में वई हिकअ बे॒ खे सड॒ करे चवन ता, ‘असां तवां जे लाए बांसरी वजा॒ई, परअ तवां न नच्यवअ; असां मातमअ जो गीत गा॒यो, परअ तवां न रुनवअ!’

³³ छोके यूहन्ना बपतिस्मा डि॒यण वारो न रोटी खाईंदो हो, न दाखरस पीअंदो हो, परअ तवां उन जे बारे में चओ ता ‘उन में दुष्‍टआत्मा आहे।’

³⁴ मांणूअ जो पुट आयो। जेको साधारण मांणूअ वांगुर खाए-पीए प्यो तो, परअ तवां हुन जे बारे में चओ ता, ‘डि॒सो, हे त पेटू ऐं पीयक्‍कड़ आहे ऐं महसूल उगा॒ड़ींदड़अ ऐं पापिन जो दोस्त बी आहे।’

³⁵ परअ ज्ञान पांजे सब बा॒रन जे हलण जे द्वारा सच्‍चो ठहेरायो वयो आहे।”

येशुअ जो हिकअ फ़रीसीअ जे घर रोटी खाएण

³⁶ हिक डी॒ंह, कें फ़रीसीअ येशुअ खे पांजे घर रोटी खाएण जे लाए न्योतो डि॒नई, सो उहो उन जे घर वयो ऐं रोटी खाएण वेठो।

³⁷ उन नगरअ जी हिकड़ी पापिन स्त्रीअ खे जड॒ऐं इया खबरअ पई, के येशु फ़रीसीअ जे घरअ में रोटी खाएण वेठो आहे, त उहा उते संगमरमर जे अत्‍तुरधानीअ में अत्‍तुर खणी आई।

³⁸ उहा रोईंदी रोईंदी येशुअ जे पोयां हुन जे पेरन जे पासे में अची बीठी। उन स्त्रीअ जा गो॒ड़ा येशुअ जे पेरन ते किरी रया हुवा ऐं उहा पांजे वारन सां हुन जा पेरअ उगी रई हुई। उहा येशुअ जे पेरन ते हरी-घड़ी चुमी ड॒ई संदस जे पेरन ते अत्‍तुर मलण लगी॒।

³⁹ इयो डि॒सी जैं फ़रीसीअ येशुअ खे रोटीअ ते घुरायो हो उहो पांजे दिल में सोचण लगो॒, “अगर हे मांणू भविष्यवक्‍ता हुजे आं, त इन खे खबरअ पेजी वञे आं, के इया स्त्री जेकी हुन खे हथ लगा॒ए रही आहे, उहा केर ऐं केड़े किस्मअ जी आहे, इया त पापिन स्त्री आहे।”

⁴⁰ येशुअ उन खे जवाब डि॒नईंस, “हे शमौनअ, मुखे तोखे कुछ चवणो आहे।” उन येशुअ खे चयईंस, “हा गुरू, चओ।”

⁴¹ येशुअ उन खे चयईं, “हिकड़े लेणेदारअ जा ब॒ कर्जदारअ हुवा। उनन मां उन लेणेदारअ जो हिकअ ते पंसओ दिनारअ ऐं बे॒ जे मथां पंजा दिनारअ जो कर्ज हुयो।

⁴² जड॒ऐं उनन कर्जदारन वट चुकाएण जे लाए कुछ बी न बचो, त उन लेणेदारअ उनन बि॒निन खे माफ़ करे छड॒यईं। सो हाणे बुधाए बि॒निन कर्जदारन मां केर उन लेणेदारअ खां वधीकअ प्यार कंदो?”

⁴³ शमौनअ हुन खे जवाब डि॒नो, “मुंजे सम्झअ जे मुताबिक, उहो वधीकअ प्यार कंदो जेंजो कर्ज वधीकअ माफ़ थ्यो आहे।” येशुअ उन खे चयईं, “तुंजो जवाब हिक दम सही आहे।”

⁴⁴ उन खां पो येशुअ उन स्त्रीअ डा॒ं मुड़ी करे शमौनअ खे चयईं, “छा तूं डि॒ठए के इन स्त्रीअ मुसां छा कयो आहे? मां तुंजे घर आयुम, परअ तूं मुखे पेरअ धोहण जे लाए पाणी बी न डि॒नए, परअ इन स्त्रीअ मुंजा पेरअ पांजे गो॒ड़न सां धोता तईं ऐं पांजे वारन सां उग्या तईं।

⁴⁵ तो मुंजे आदर-सत्कार में मुखे चुम्यो बी न, परअ जड॒ऐं खां मां हिते आयो आयां इन स्त्रीअ मुंजे पेरन खे चुमण न छड॒यो तईं।

⁴⁶ तो त मुंजे मथे ते तेल बी न मख्यो, परअ इन मुंजे पेरन ते अत्‍तुर मल्यो तईं।

⁴⁷ मां तोखे चवां तो इन स्त्रीअ जा पापअ जेके डा॒ढा हुवा, उहे माफ़ थ्या आइन, तैं करे इन घणो प्यार कयो आहे। परअ जेंखे थोड़ी माफ़ी मिली आहे, उहो थोड़ो ही प्यार कंदो।”

⁴⁸ येशुअ उन स्त्रीअ खे चयईं, “तुंजा पापअ माफ़ थ्या।”

⁴⁹ इयो बु॒धी करे जेके मांणू येशुअ सां गड॒ रोटी खाएण वेठा हुवा, उहे हिकअ बे॒ खे चवण लगा॒, “हे केर थींदो आहे, पापन खे माफ़ करण वारो?”

⁵⁰ इन खां पो येशुअ उन स्त्रीअ खे चयईं, “सुकुन सां हली वञ, छोके तुंजे विश्वासअ तोखे बचायो आहे।”