لوقا 6 - Sindhi Bible (India)

सबधअ जो प्रभु

¹ हिकअ दफ़े सबधअ जे डीं॒हं ते येशु ऐं संदस जा चेला, कणकअ जे खेतअ मां लंगे रया हुवा। उते चेला फल्युन खे तोडे़ करे पांजे हथन सां मेटे-मेटे करे खाएण लगा॒।

² तड॒ऐं कुछ फ़रीसी, हुन जे चेलन खां पुछण लगा॒, “तवां उहो कम छोता कयो जेको सबधअ जे डीं॒हं ते करण सही कोने?”

³ येशुअ उनन खे चयईं, “छा तवां इयो न पढ़यो आहे, के जड॒ऐं दाऊद ऐं संदस जे साथिन खे भुखअ लगी॒, त दाऊदअ छा कयो हो?

⁴ उन कीअं परमेश्वरअ जे तंबूअ में वञी, उहे पवित्र रोटियूं खादईं जेके मूसा जे नियमअ जे मुताबिक याजकन खां सिवाए केंजे लाए बी खाएण सही न हुयूं ऐं पांजे साथिन खे बी डि॒नईं?”

⁵ सो इन करे येशुअ उनन खे चयो, “मांणूअ जो पुट सबधअ जे डी॒ंहं जो बी प्रभु आहे।”

सुकल हथअ वारे मांणूअ खे ठीक करण

⁶ हिकअ दफ़े कें बे॒ सबधअ जे डीं॒हं ते येशु प्रार्थना-घरअ में वञी सिख्या ड॒ई रयो हो, उते हिक मांणू हो जेंजो साजो॒ हथ लकवे सां सुकल हो।

⁷ धर्मशास्त्री ऐं फ़रीसी इन मौके जी ताकअ में हुवा, के कीअं येशुअ जे मथां इल्ज़ामअ हणन, इन करे उहे हुन खे डि॒सन प्या, के उहो कें मांणूअ खे सबधअ जे डींहं ते ठीक करे तो यां न।

⁸ परअ येशुअ खे उनन जे विचारन जे बारे में खबरअ हुई, इन करे येशुअ उन मांणूअ खे जेंजो हथ लकवे सां सुकल हो, चयईंस, “उथ ऐं विचअ में अची बी।” उहो उथ्यो ऐं विचअ में अची बीठो।

⁹ येशुअ उनन खे चयो, “मुखे बु॒धायो सबधअ जे डीं॒हं ते छा करण सही आहे, भलो करण यां बुरो; केंजी जान खे बचाएण यां मारण?”

¹⁰ येशुअ चौधारी सबनिन खे डि॒ठईं ऐं उन मांणूअ खे चयईं, “पांजो हथ अग॒यां वधाए।” जड॒ऐं उन इंय हीं कयो, त संदस जो हथ ठीक थी वयो।

¹¹ परअ धर्मशास्त्री ऐं फ़रीसी गुस्से में अची वया ऐं पाण में सलाह-मश्वरो करण लगा॒, के असां येशुअ सां छा कयऊं?

बा॒रहन प्रेरितन खे चूंडण

¹² उनन डी॒ंहन में हीं येशु हिकअ पहाड़ीअ ते प्रार्थना करण वयो ऐं उहो सजी॒ रात परमेश्वरअ खां प्रार्थना कंदो रयो।

¹³ जड॒ऐं सुबू थी, त हुन पांजे सबनिन चेलन खे पाण वट सड॒ कयईं ऐं उनन मां बा॒रहन ज॒णन खे चूंडे करे उनन खे प्रेरित नालो डि॒नई।

¹⁴ उनन जा नाला इहे आइन, शमौन जेंजो नालो हुन पतरस बी रखयईं ऐं पतरसअ जो भा अन्द्रियास; याकूब ऐं यूहन्ना; फिलिप्पुस ऐं बरतुल्मै;

¹⁵ मत्ती ऐं थोमा; हलफईअ जो पुट याकूब ऐं शमौन जेको जेलोतेस चवाएजंदो आहे;

¹⁶ याकूबअ जो पुट यहूदा ऐं यहूदा इस्करियोती जेको येशुअ खे पकड़ाएण वारो ठयो।

सिख्या डि॒यण ऐं बीमारियुन मां ठीक करण

¹⁷ जड॒ऐं येशु प्रेरितन सां गड॒ पहाड़ीअ तां लई करे समतल ज़मीनअ ते बीठो, त उते हिकअ डा॒ढी वडी॒ भीड़अ अची गड॒ थी। हिन भीड़अ में हुन जा चेला ऐं ब्॒या बी घणाहीं मांणू हुया। इहे मांणू सजे॒ यहूदिया क्षेत्र, यरूशलेम शहेरअ, सूर ऐं सैदा जे सम्डअ जे किनारे तां आया हुवा।

¹⁸ इहे मांणू येशुअ जी बु॒धण जे लाए ऐं पांजी बीमारियुन मां ठीक थ्यण जे लाए संदस वट आया हुवा। हुन दुष्‍टआत्माउन खां सतायल मांणुन खे बी ठीक कयईं।

¹⁹ सबही मांणू येशुअ खे छुहण जी कोशिश प्या कन, छोके हुन मां सामर्थ निकरी करे सबनिन खे ठीक कंदी हुई।

धन्य ऐं शोक वचनअ

²⁰ येशुअ पांजे चेलन जी तरफ डि॒सी करे चयईं, “धन्य आयो तवां जेके ग़रीब आयो, छोके परमेश्वरअ जो राज॒ तवां जो आहे।

²¹ धन्य आयो तवां जेके हाणे भुखअ ते आयो, पो तवां जो पेट भरयो वेंदो। धन्य आयो तवां जेके हाणे रोओ ता, पो तवां आनंद मनाईंदव।

²² धन्य आयो तवां, जड॒ऐं मांणूअ जे पुटअ जे करे तवां सां नफरतअ कई वञे, तवां खे कढयो वञे ऐं तवां जी बेइज़ती कई वञे ऐं तवां खे खराब समझी करे ठुकरायो वञे।

²³ परअ तवां उन डीं॒हं ते आनंदअ सां टिपा डि॒जो, छोके तवां जे लाए स्वर्ग॒अ में वडो॒ ईनाम आहे। याद रखजो उनन जे अबन-डा॒ड॒न बी भविष्यवक्‍ताउन सां गड॒ इंय ही कयो हुयो।”

²⁴ “परअ हाय तवां ते जेके शाहूकार आयो, छोके तवां पांजी शांति पाए वरतव।”

²⁵ “हाय तवां ते छोके हाणे तवां जो पेट भरयल आहे, पो तवां भुखअ ते रवंदव।” “हाय तवां ते जेके हाणे आनंद ता मनायो, पो तवां मातम कंदव ऐं रोईंदव।”

²⁶ “हाय तवां ते, जड॒ऐं सब मांणू तवां जी साराह कन, छोके उनन जे अबन-डा॒ड॒न बी कूड़न भविष्यवक्‍ताउन सां गड॒ इंय ही कयो हुयो।”

दुश्मनन सां प्यार कयो

²⁷ “परअ मां तवां खे तो चवां जेके मुंजी बु॒धी रया आयो, पांजे दुश्मनन सां प्यार कयो ऐं जेके तवां सां वेर ता रखन उनन जो भलो कयो।

²⁸ जेके तवां खे पिटिन ता उनन खे तवां आसीसअ डि॒यो; जेके तवां जी बेइज़ती ता कन उनन जे लाए प्रार्थना कयो।

²⁹ जेको तवां जे हिकअ गि॒टे ते लाफो हणे; उन जी तरफ ब्॒यो बी फेरे छड॒यो; ऐं जेकड॒ऐं कोई तवां जो कोट फुरे, त उन खे पांजी बुशेटअ डि॒यण जे लाए बी तैयार रहो।

³⁰ जेको तवां खां कुछ घुरे त उन खे डि॒यो; ऐं अगर कें तवां जी कोई शए फुरी हुजे, त उन खां वापस न घुरो।

³¹ जीअं तवां चायो ता के मांणू तवां सां कन, तवां बी उनन सां उअं हीं कयो।”

³² “अगर तवां उनन सां हीं ता प्यार कयो जेके तवां सां ता प्यार कन, त तवां केड़ो वडो॒ कम ता कयो? छोके पापी बी पांजे प्यार करण वारन सां हीं प्यार कंदा आइन।

³³ अगर तवां उनन सां हीं ता भलाई कयो जेके तवां सां ता भलाई कन, त तवां केड़ो वडो॒ कम ता कयो? छोके पापी बी पांजे भलाई करण वारन सां हीं भलाई कंदा आइन।

³⁴ अगर तवां उनन खे ही ता ओधर डि॒यो जेंखां तवां वापस वठण जी उम्मीदअ ता रखो, त तवां केड़ो वडो॒ कम ता कयो? छोके पापी बी पापिन खां वापस वठण जी उम्मीदअ सां हीं ओधर डी॒ंदा आइन।

³⁵ परअ तवां पांजे दुश्मनन सां प्यार कयो, उनन सां भलाई कयो ऐं वापस पाएण जी उम्मीदअ सां ओधर न डि॒यो; तड॒ऐं तवां खे परमेश्वरअ जे तरफां वडो॒ ईनाम मिलंदो ऐं तवां परमप्रधान परमेश्वरअ जी संतान थींदव, छोके परमेश्वर उनन जे मथां बी दया तो करे जेके बेशुक्रा आइन ऐं बुराई ता कन।

³⁶ तवां दयालू ठहो, जीअं तवां जो पिता परमेश्वर दयालू आहे।”

इल्ज़ाम न हणो

³⁷ “इल्ज़ाम न हणो, त तवां ते बी परमेश्वर इल्ज़ाम न हणंदो। डो॒ही न ठहेरायो, त तवां खे बी परमेश्वर डो॒ही न ठहेराईंदो। माफ़ कयो, त तवां खे बी परमेश्वर माफ़ कंदो।

³⁸ डि॒यो, त तवां खे बी परमेश्वर डी॒ंदो। जीअं मांणू दबा॒ए-दबा॒ए ऐं हिलाए-हिलाए काई शए जेसताईं बासण मां न हारजे तेसताईं भरींदा आइन उअं हीं तवां जी झोलीअ में विधो वेंदो, छोके जैं मापअ सां तवां मापींदओ उन हीं मापअ सां तवां जे लाए बी माप्यो वेंदो।”

³⁹ पो येशुअ उनन खे हिकअ मिसालअ डी॒ंदे चयो, “के छा हिक अंधो बे॒ अंधे खे रस्तो डे॒खारे सगं॒दो आहे? जेकड॒ऐं इंय कंदा त ब॒ई वञी खडे॒ में किरंदा।”

⁴⁰ कोई बी चेलो पांजे गुरूअ खां वडो॒ न थी सग॒ंदो आहे, अगर उहो उन खां सब कुछ सिखी बी वठे, त बी उहो पांजे गुरूअ वांगुर ही थींदो।

⁴¹ तूं छो पांजे भा जी अख में कख़ तो डि॒सीं, जड॒ऐं तुंजे पांजी अख में पाटिये जेड़ी वडी॒ शए पई आहे ऐं उहा तोखे न थी डि॒सण अचई?

⁴² तूं कीअं पांजे भा खे चई सग॒ंदो आईं, “हे भा, अच मां तुंजी अख मां कख़ कढां”? जड॒ऐं तुंजे पांजे अख में पाटिये जेड़ी वडी॒ शए पई आहे, हे पाखंडी, पहेरयों पांजी अख मां पाटिये जेड़ी वडी॒ शए खे कढ, त तूं सुठी तरां डि॒सी करे पांजे भा जी अख मां कख़ खे कढी सग॒ंदे।

जेड़ो वण तेड़ो फल

⁴³ “कोई बी सुठो वण खराब फल न डींदो आहे ऐं न हीं कोई खराब वण सुठो फल डीं॒दो आहे।

⁴⁴ हर हिक वण पांजे फलअ सां हीं सुञाण्यों वेंदो आहे। छोके कोई बी मांणू कंडेदार जाड़िन मां अंजीरअ ऐं अंगूरअ न पटींदा आइन।

⁴⁵ सुठो मांणू पांजे दिल जे सुठे खजाने मां सुठियूं गा॒ल्यूं कढंदो आहे ऐं जेको बुरो आहे उहो पांजे दिल जे बुरे खजाने मां बुरियूं गा॒ल्यूं कढंदो आहे; छोके जेको दिल में भरयल आहे उहो ही त उन जी ज़िबानअ मां निकरंदो आहे। ”

होशियार ऐं मूर्ख

⁴⁶ “येशुअ उनन खे चयो, जड॒ऐं तवां मुंजे चवण ते नथा हलो, त मुखे ‘हे प्रभु, हे प्रभु,’ छोता चओ?

⁴⁷ जेको बी मूं वट अची करे मुंजी गा॒ल्यूं बु॒धे तो ऐं उनन जे मथां हले तो, मां तवां खे बु॒धायां तो के उहो मांणू कें वांगुर आहे।

⁴⁸ उहो उन मांणूअ वांगुर आहे, जैं पांजो घर ठाएण वक़्त ज़मीनअ खे गहेरो खोटयो ऐं मजबूत पथरअ जे मथां उन जो पायो विधईं ऐं जड॒ऐं बो॒ड॒ आई ऐं छोल्यूं उन घरअ सां टकरायूं, त उन घरअ खे हिलाए न सगि॒यूं; छोके उन जो पायो मजबूत हुयो।

⁴⁹ परअ जेको बी मुंजी गा॒ल्यूं बु॒धी करे उनन जे मथां नथो हले, उहो उन मांणूअ वांगुर आहे, जैं पांजे घरअ जो पायो मिट्टीअ ते रख्यो आहे ऐं जड॒ऐं उन घरअ सां छोल्यूं टकरायूं, त उहो घर ओढी॒ मलई किरी पयो ऐं सत्यानाश थी वयो।”