لوقا 24 - Sindhi Bible (India)

येशुअ जो मौतअ मां जी उथण

¹ हफ्ते जे पहेरें डी॒ंह सुबूअ जो सवेलअ सिजअ जे निकरंदे ही, उहे स्त्रीयूं तैयार कयल ख़ुशबूदार शयूं खणी करे क़बरअ ते आयूं।

² उते पहुंची करे उनन डि॒ठो, के पथर क़बरअ तां हटयल आहे।

³ उहे क़बरअ जे अंदर वयूं परअ उनन खे उते प्रभु येशुअ जी लाश न मिली।

⁴ इन ते उहे हैरतअ में पेजी वयूं ऐं एतरे में हीं उते उनन बि॒न मांणुन खे डि॒ठो, जिन खे एड़ा कपड़ा पातल हुवा जेके बिजलीअ वांगुर चमकन प्या।

⁵ इयो डि॒सी करे उहे डा॒ढो ड॒की वयूं ऐं पांजो सिर हेठ झुकाए छड॒यऊं। हुनन मांणुन स्त्रिन खे चयो, “त जेको जिंदो आहे तेंखे तवां मुअलन में छो त्यूं गो॒ल्यो?

⁶ उहो हिते कोने परअ उहो मौतअ मां जिंदो थी वयो आहे। याद कयो, के हुन गलील में रवंदे वक़्त तवां खे छा चयो हो,

⁷ इयो ज़रूरी आहे, के मांणूअ जो पुट पापिन जे हथां पकड़ायो वञे, क्रूस ते चढ़ायो वञे ऐं टें डी॒ंहं ते मौतअ मां जिंदो थी वञे।”

⁸ तड॒ऐं उन स्त्रिन खे येशुअ जी इहे गा॒ल्यूं याद आयूं।

⁹ पो जड॒ऐं उहे क़बरअ खां मोटी आयूं, त उनन यारहन प्रेरितन ऐं उनन सबनिन खे जेके येशुअ जे पोयां हलण लगा॒ हुवा, अची करे इहे गा॒ल्यूं बु॒धायऊं।

¹⁰ जिन स्त्रिन प्रेरितन खे इहे गा॒ल्यूं बु॒धायऊं उहे इहे आइन, मरियम मगदलीनी, योअन्ना ऐं याकूब जी माता मरियम ऐं बि॒यूं स्त्रीयूं बी जेक्यूं संदन सां गड॒ हुयूं।

¹¹ परअ प्रेरितन इनन सबनिन गा॒ल्युन ते विश्वास न कयऊं, छोके उनन खे संदन जी इहे गा॒ल्यूं फालतू पयूं लग॒न।

¹² तैं हुंदे बी पतरस उथ्यो ऐं क़बरअ डा॒ं वठी डुक्यो। उते उन झुकी करे डि॒ठईं, के सोटी कपड़े खां सिवाए बि॒यो कुछ कोने ऐं इयो डि॒सी करे उहो ताजुब कंदे वापस मोटी आयो।

इम्माउस जे रस्ते ते बि॒न ज॒णन खे येशुअ जो दर्शन

¹³ उन हीं डी॒ंहं ते ब॒ ज॒णा जेके येशुअ जे पोयां हलंदा हुवा। उहे इम्माउस नाले जे गामड़े डा॒ं वञन पया, जेको यरूशलेमअ खां यारहां किलोमीटरअ परते हो।

¹⁴ उहे पाण में जेको कुछ थ्यो हो, उन गा॒ल्युन जी चर्चा कंदा प्या वञन।

¹⁵ जड॒ऐं उहे पाण में गा॒लाएन ऐं बहस कन हीं प्या, त येशु पाण अची करे संदन सां गड॒ हलण लगो॒।

¹⁶ परअ उहे हुन खे सुञाणे न सग॒या, छोके उनन खे इन गा॒ल खां रोक्यो वयो हुयो।

¹⁷ येशुअ उनन खां पुछो, “तवां पाण में इयो हलंदे केड़ियूं गा॒ल्युन जूं चर्चा करे रया आयो?” तैंते उहे उदास थी करे बीह रया।

¹⁸ तड॒ऐं उनन मां हिकअ ज॒णे जेंजो नालो किल्युपास हो, चयईंस, “छा यरूशलेम में रुगो॒ तूं हीं हिक एड़ो मांणू आईं जेंखे न खबर आहे, के इनन डी॒ंहन में छा-छा थ्यो आहे?”

¹⁹ येशुअ उनन खां पुछो, “छा थ्यो आहे?” उनन जवाब डि॒नो, “इहे गा॒ल्यूं येशु नासरीअ जे बारे में आइन। उहो परमेश्वर ऐं सबनिन मांणुन जे अग॒यां वचनअ ऐं कमन में सामर्थी भविष्यवक्‍ता हुयो।

²⁰ हुन खे असां जे मुख्ययाजकन ऐं सरदारन पकड़ाए करे मौतअ जी सजा डि॒यारायऊं ऐं क्रूस ते चाढ़यऊं।

²¹ असां खे त इया आशा हुई, के इयो ही इज़राएल खे छुटकारो डि॒यारींदो, परअ हाणे इन गा॒ल खे बी अज॒ टियों डी॒ंह थ्यो आहे।

²² असां मां किन स्त्रिन त अज॒ असां खे ताजुबअ में विझी छड॒यो आहे। जड॒ऐं उहे सुबूअ सवेलअ क़बरअ ते वयूं हुयूं,

²³ त उनन खे उते येशुअ जी लाश न मिली। पो उहे वापस मोटी आयूं ऐं असां खे बु॒धायऊं के संदन खे स्वर्ग॒दूतअ डि॒सण आया, जैं उनन खे बु॒धायो के येशु जिंदो आहे।

²⁴ इन ते असां जा कुछ साथी क़बरअ ते वया ऐं उनन खे उते सब कुछ उअं हीं मिल्यो जीअं स्त्रिन चयो हो; परअ उनन खे येशु डि॒सण न आयो।”

²⁵ तड॒ऐं येशुअ उनन खे चयईं, “हे मूरखओ, जेको भविष्यवक्‍ताउन पवित्रशास्त्र में लिख्यो आहे उनन गा॒ल्युन ते विश्वास करण जे लाए तवां जो दिल छो नथो मञे?

²⁶ छा इयो मसीहअ जे लाए ज़रूरी न हुयो, के उहो इहे सब तकलीफ़ूं भोगे॒ करे पांजी महिमा में दाख़िल थे?”

²⁷ उन खां पो येशुअ, मूसा ऐं सबनिन भविष्यवक्‍ताउन खां शरूआत खां वठी करे सजे॒ पवित्रशास्त्र मां पांजे बारे में लिख्यल सबनिन गा॒ल्युन खे खोले करे उनन खे सम्झायईन।

²⁸ एतरे में ही उहे उन गामड़े जे पासे पौंता जिते उहे वञन प्या ऐं येशुअ जे हलण सां इंय प्यो लगे॒, मञो के उहो अञा उनन सां गड॒ अग॒यां वञण प्यो चाहे।

²⁹ परअ इन ते उनन येशुअ खे विनती करे चयो, “असां सां गड॒ रहो, छोके हाणे शामअ थ्यण वारी आहे ऐं डी॒ंह बी लई वयो आहे।” सो उहो संदन सां रवण जे लाए घरअ में अंदर वयो।

³⁰ पो जड॒ऐं येशु उनन सां गड॒ रोटी खाएण वेठो, त हुन रोटी खणी करे धन्यवाद कयईं ऐं तोड़े करे उनन खे डि॒नई।

³¹ इन ते संदन जूं अख्यूं खुली वयूं ऐं उनन येशुअ खे सुञाणे वरतो परअ येशु उनन जूं नज़रुन खां ओझल थी वयो।

³² तड॒ऐं उनन पाण में हिकअ-बे॒ खां पुछो, “जड॒ऐं रस्ते में उहो असां सां गा॒लाए प्यो ऐं पवित्रशास्त्र समझाए प्यो, त छा उन वक़्त असां जो दिल आनंद ऐं उत्साह सां न भरजी वयो?”

³³ उहे उन हीं वक़्त उथ्या ऐं यरूशलेम शहेरअ डे॒ मोटी आया। उते उनन यारहन प्रेरितन खे ऐं जेके येशुअ जे पोयां हलण लगा॒ हुवा इकट्ठो पातऊं।

³⁴ उहे पाण में इयो चई रया हुवा, “प्रभु सचअ में मौतअ मां जी उथ्यो आहे ऐं शमौन पतरसअ खे डि॒सण आयो आहे।”

³⁵ तड॒ऐं उनन बि॒निन ज॒णन बी इयो उनन खे बु॒धायो, के इम्माउस जे रस्ते में संदन सां छा-छा थ्यो ऐं कीअं उनन येशुअ खे रोटी तोड़ींदे वक़्त सुञाणे वरतो।

यारहन चेलन खे येशु डि॒सण आयो

³⁶ उहे इहे सब गा॒ल्यूं कन हीं प्या, त अचानक येशु पाण उनन जे विचअ में अची बीठो ऐं संदन खे चयईं, “परमेश्वर तवां खे शांति डे॒।”

³⁷ परअ उहे इयो डि॒सी हैरतअ में पेजी वया ऐं ड॒की वया ऐं इंय सोचण लगा॒ के असां कोई आत्मा खे ता डि॒सूं।

³⁸ इन ते येशुअ उनन खे चयईंन, “तवां छोता घबरायो ऐं छो तवां जे दिलुन में शकअ तो जागे॒?

³⁹ मुंजे हथन ऐं पेरन खे डि॒सो, के इयो मां हीं आयां। मुखे हथ लगा॒ए जांचअ कयो, छाकाण त आत्मा में हडि॒यूं ऐं मांस न हुंदो आहे। जीअं तवां मूं में ता डि॒सो।”

⁴⁰ इंय चई करे येशुअ उनन खे पांजा हथअ ऐं पेरअ डे॒खारया।

⁴¹ पो जड॒ऐं चेलन खे आनंदअ जी वजह सां विश्वास न प्यो थे, ऐं उहे अञा अचरजअ में हीं हुवा, तड॒ऐं येशुअ उनन खां पुछो, “छा हिते तवां वट खाएण जे लाए कुछ आहे?”

⁴² इन ते उनन येशुअ खे पकलअ मछलीअ जो टुकड़ो डि॒नऊंस,

⁴³ ऐं हुन उहो खणी करे उनन जे सामूं खादईं।

⁴⁴ येशुअ उनन खे चयईं, “मां तवां सां गड॒ रहंदे ही तवां खे इयो चयो हो, ज़रूरी आहे, के जेक्यूं गा॒ल्यूं मुंजे बारे में मूसा जे नियमन, भविष्यवक्‍ताउन ऐं भज॒न-संहिता जी किताबुन में लिख्यल आइन, उहे सब पूरियूं थ्यन।”

⁴⁵ तड॒ऐं येशुअ उनन खे पवित्रशास्त्र में लिख्यल गा॒ल्युन जो मतलब खोले करे समझाए छड॒यईं,

⁴⁶ ऐं उनन खे चयईं, “पवित्रशास्त्र में इंय लिख्यल आहे, के मसीह तकलीफ़ूं भोगी॒ंदो ऐं मरी वेंदो ऐं उहो मरण खां पो टें डी॒ंहं ते मुअलन मां जी उथंदो,

⁴⁷ ऐं हुन जे नाले सां हीं यरूशलेमअ खां वठी करे सबनिन देशन में पापन जी माफ़ीअ जे लाए तौबां करण जो प्रचार कयो वेंदो।

⁴⁸ तवां पाण इन सबनिन गा॒ल्युन जा गवाह आयो।

⁴⁹ डि॒सो, मां तवां जे लाए पवित्र-आत्मा खे मोकलींदुम, जेंजो वायदो मुंजे पिता परमेश्वरअ कयो आहे। परअ जेसताईं स्वर्ग॒अ मां उन जी सामर्थ तवां जे मथां न लहे, तेसताईं इन यरूशलेम शहेरअ में ही रहेजो।”

येशुअ जो स्वर्ग॒अ में खणाएजी वञण

⁵⁰ उन खां पो येशु पांजे चेलन खे यरूशलेम शहेरअ खां ॿाहिर बेतनिय्याह गामड़े जे वेझो वठी वयो ऐं उते हुन पांजा हथअ खणी उनन खे आसीसअ डि॒नईंन।

⁵¹ आसीसअ डी॒ंदे-डी॒ंदे ही उहो संदन खां अलग थी वयो ऐं स्वर्ग॒अ में खणाएजी वयो।

⁵² तड॒ऐं चेलन झुकी करे येशुअ जे अग॒यां पांजो सीस नवायऊं ऐं वडे॒ आनंदअ सां यरूशलेम शहेरअ डा॒ं मोटी वया,

⁵³ ऐं उहे मंदरअ में लगा॒तार वञी परमेश्वरअ जी स्तुति कंदा रया।