لوقا 23 - Sindhi Bible (India)

पिलातुसअ जे सामूं येशु

¹ तड॒ऐं सजी॒ यहूदी महासभा उथी ऐं उहे येशुअ खे रोमी राज्यपाल पिलातुसअ डा॒ं वठी वया।

² उते उहे येशुअ ते इंय इल्ज़ामअ हरण लगा॒, “के असां इन मांणूअ खे असां जी जातिअ खे गुमराह कंदे, रोमी महाराजा खे महसूल डि॒यण खां मना कंदे ऐं पांजे पाण खे मसीह, याने राजा चवंदे बु॒धो आहे।”

³ इन ते पिलातुसअ येशुअ खां पुछो, “छा तूं यहूदिन जो राजा आईं?” येशुअ संदस खे जवाब डि॒नो, “हे त तूं पाण हीं तो चईं।”

⁴ तड॒ऐं पिलातुसअ मुख्ययाजकन ऐं भीड़अ खे चयईं, “मां इन मांणूअ में एड़ो कुछ न पातो आहे, के जेंजी वजह सां मां इन खे डो॒ही ठहेरायां।”

⁵ परअ उहे अञा बी ज़ोर भरे करे इंय चवण लगा॒, “के इन सजे॒ यहूदिया क्षेत्रन जे मांणुन खे पांजी सिख्या ड॒ई भड़कायो तईं। इन गलील क्षेत्रन खां शरूआत कई हुई ऐं हाणे हेसताईं पौंतो आहे।”

⁶ इयो बु॒धी पिलातुसअ उनन खां पुछो, “छा हे मांणू गलीली आहे?”

⁷ जड॒ऐं पिलातुसअ खे खबरअ पई त, येशु गलील क्षेत्र जे हाकिम हेरोद अंतीपास जी हदअ जो आहे, तड॒ऐं उन संदस खे उन डा॒ं मोकल्यो ऐं उन वक़्त हेरोद यरूशलेम शहेरअ में हीं हो।

हेरोदअ जे सामूं येशु

⁸ हेरोदअ जड॒ऐं येशुअ खे डि॒ठो, त उहो डा॒ढो ख़ुश थ्यो, छोके उहो घणे हीं वक़्तअ खां संदस खे डि॒सण प्यो चाहे। उन येशुअ जी चर्चा बु॒धी हुई ऐं हुन जे तरफां कोई चमत्कार डि॒सण जी आशा प्यो रखे।

⁹ सो हेरोद हुन खां घणाहीं सवालअ कंदो रयो परअ येशुअ उन खे कुछ बी जवाब न डि॒नो।

¹⁰ उते मुख्ययाजकअ ऐं धर्मशास्त्री बी हुन जे पासे में बीठा हुवा; उहे सख़्तीअ सां येशुअ ते डो॒ह हरण लगा॒।

¹¹ तड॒ऐं हेरोदअ पांजन सैनिकन सां गड॒ मिली करे येशुअ जी ठठोली करे संदस जी बेइज़ती कयईंस ऐं हुन खे शाही वगो॒ पाराए करे वापस पिलातुसअ डा॒ं मोकले छड॒यईंस।

¹² उन डी॒ंहं ते हेरोद ऐं पिलातुस पाण में दोस्तअ थी वया। इन खां पहेरयों बि॒नी में दुश्मनी हुई।

येशुअ जे लाए मौतअ जी सज़ा जो हुकुम डि॒यण

¹³ पिलातुसअ मुख्ययाजकन, यहूदी सरदारन ऐं मांणुन खे सड॒ करायईं,

¹⁴ ऐं उनन खे चयईं, “तवां इन मांणूअ जे मथां इयो डो॒ह हणी करे मूं वट वठी आया आयो, के हे मांणुन खे भड़काए तो। मां तवां जे सामूं इन जी जांचअ कई आहे; परअ जिन गा॒ल्युन जो डो॒ह तवां इन मांणूअ जे मथां हणी रया आयो उन जे बारे में, मां त इन में कोई बी डो॒ह न पातो आहे,

¹⁵ ऐं इन जे अलावा हेरोदअ बी इन में कोई डो॒ह न पातो आहे; सो हेरोदअ इन खे मूं वट वापस मोकले छड॒यो आहे। इन एड़ो कोई बी गुनाह न कयो आहे, के इन खे मौतअ जी सज़ा डि॒नी वञे।

¹⁶ सो मां इन खे खाली कुटाए करे छडे॒ तो डि॒यांस।”

¹⁷ [पिलातुसअ खे हर साल फसह जे तहेवारअ जे मौके ते पांजी रीतीअ मुजुब मांणुन जी विनतीअ ते कें हिकअ कैदीअ खे रिहा करणो पवंदो हो।]

¹⁸ तैंते सजी॒ भीड़अ रड़यूं करण लगी॒, “त येशुअ खे मारे छड॒यो ऐं असां जे लाए बरअब्बा खे छडे॒ डि॒यो!”

¹⁹ बरअब्बा उहो मांणू हुयो जेंखे यरूशलेम शहेरअ में कें फ़सादअ ऐं खून करण जे करे जेलअ में विधो वयो हो।

²⁰ पिलातुसअ येशुअ खे रिहा करण जी इच्छा सां वरी भीड़अ खे मनाएण जी कोशिश कयईं,

²¹ परअ उहे रड़यूं करे इंय चवण लगा॒, “इन खे क्रूस ते चाढ़यो! इन खे क्रूस ते चाढ़यो!”

²² उन खां पो पिलातुसअ टियों दफ़ो भीड़अ खे चयईं, “छो? इन केड़ो गुनाह कयो आहे? मां इन मांणूअ में मौत जी सजा डि॒यण जे लायक कोई डो॒ह न पातो आहे। इन करे मां इन खे कुटाए करे छडे॒ डी॒ंदुम।”

²³ परअ भीड़अ ज़ोर-ज़ोर सां रड़ियूं करे इंय चवण लगी॒, के येशुअ खे क्रूस ते चाढ़यो! आखिरकार उनन जूं रड़यूं करण सफल थ्यूं।

²⁴ तड॒ऐं पिलातुसअ उनन जी गा॒ल मञी वरती ऐं उन खे पूरो करण जो फ़ेसलो कयईं।

²⁵ सो पिलातुसअ संदन जी इच्छा ते बरअब्बा खे जेको फ़सादअ ऐं खून करण जे करे जेलअ में हो, उन खे त रिहा करे छड॒यईं परअ उन येशुअ खे भीड़अ जी इच्छा जे मुजुब सैनिकन जे हवाले करे छड॒यईं।

येशुअ खे क्रूस ते चढ़ायो वञण

²⁶ जड॒ऐं सैनिकअ येशुअ खे वठी प्या वञन, तड॒ऐं उनन शमौन नाले जे हिकड़े कुरेनी वासीअ खे पकड़यो, जेको पांजे नगरअ मां यरूशलेम शहेरअ डा॒ं अचे प्यो। सैनिकन शमौन जे मथां क्रूस रखी छड॒यऊं, के उहो येशुअ जे पोयां-पोयां खणी हले।

²⁷ मांणुन जी वडी॒ भीड़अ उनन जे पोयां-पोयां हली रही हुई। उन भीड़अ में स्त्रीयूं बी हुयूं जेके येशुअ जे लाए रोवन पयूं ऐं अफ़सोस पयूं कन।

²⁸ येशुअ मुड़ी करे उनन स्त्रियुन खे चयईं, “हे यरूशलेम जूं धीअरियूं मुंजे लाए न रोओ, परअ पांजे लाए ऐं पांजे बा॒रन जे लाए रोओ।

²⁹ छाकाण त उहे डी॒ंहं अची रया आइन जड॒ऐं मांणू चवंदा, ‘धन्य आइन उहे स्त्रीयूं, जेके बेऔलाद आइन; धन्य आइन उहे कोखूं जैं जनम न डि॒नो ऐं धन्य आइन उहे थञअ जैं खीर न प्यारो!’

³⁰ उन वक़्त मांणू पहाड़न खे चवंदा, ‘त असां जे मथां किरी पओ’ ऐं पहाड़ियुन खे चवंदा, ‘त असां खे ढके छड॒यो’;

³¹ छोके अगर उहे मूं जेड़े साहे-ताजे वण सां इंय ता कन, त तवां जेड़े सुकल वण सां छा-छा न कंदा?”

³² सैनिकअ बि॒यन बि॒न मांणुन खे बी येशुअ सां गड॒ मारण जे लाए वठी प्या वञन। उहे ब॒ई मांणू गुनेहगारअ हुवा।

³³ जड॒ऐं उहे खोपड़ी नाले जी जग॒ऐ ते पौंता, त उते सैनिकन येशुअ खे क्रूस ते चाढ़यऊं ऐं इंय हीं संदन उन बि॒न गुनेहगारन खे बी क्रूस ते चाढ़यऊं, हिकअ खे येशुअ जे साजे॒ पासे ऐं बे॒ खे हुन जे खाबे॒ पासे।

³⁴ [येशुअ चयो, “ हे पिता परमेश्वर, इनन खे माफ़ कर, छोके इनन खे खबरअ कोने, के हे छा करे रया आइन।”]। तड॒ऐं सैनिकन येशुअ जे कपड़न खे पाण में विराए छड॒ण जे लाए चिठियूं विधऊं।

³⁵ मांणू उते बीह करे इयो सब डि॒सन पया। यहूदी सरदारअ इयो चई करे येशुअ जी ठठोली करण लगा॒, “इन बि॒यन खे बचायो। अगर हे परमेश्वरअ जे तरफां मसीह आहे ऐं हुन जे द्वारा चूंडयल आहे, त हाणे पांजे पाण खे बचाए।”

³⁶ सैनिकअ बी येशुअ जी ठठोलियूं करण लगा॒ ऐं संदस वट अची करे सस्तो खटो दाखरस डी॒ंदे चयऊंस,

³⁷ “अगर तूं यहूदिन जो राजा आईं, त पांजे पाण खे बचाए।”

³⁸ येशुअ जे क्रूस जे मथां बी लिख्यल हुयो, “हे यहूदिन जो राजा आहे।”

येशुअ खे स्वीकार करण वारो गुनेहगार

³⁹ जेके ब॒ गुनेहगारअ येशुअ सां गड॒ क्रूस ते चाढ़या वया हुवा, उनन मां हिकअ ज॒णे हुन जी बेइज़ती करे इंय चयईंस, “तूं मसीह आईं न? त हाणे पांजे पाण खे ऐं असां खे बी बचाए।”

⁴⁰ इन ते बे॒ गुनेहगारअ उन खे दड़का ड॒ई करे चयईंस, “छा तोखे परमेश्वरअ जो डप कोने? तूं बी त सागी॒ सजा ही तो भोगीं॒।

⁴¹ असां खे जेकी सजा मिली रई आहे उहा वाजिबी आहे, छो त असां जेको कयो आहे, उन जो फ़ल भोगे॒ रया आयूं; परअ येशुअ त कोई बी गुनाह न कयो तईं।”

⁴² तड॒ऐं उन येशुअ खे चयो, “हे येशु, जड॒ऐं तूं पांजे राज॒अ में अचीं, त मुखे याद कजैं।”

⁴³ तैंते येशुअ उन खे चयईंस, “मां तोखे सच तो चवां तूं अज॒ ही स्वर्ग॒लोकअ में मुसां गड॒ हुंदे।”

येशुअ जी मौत

⁴⁴ इयो लगभग मंझंद जो वक़्त हो ऐं उन वक़्तअ खां वठी करे टीं बजे ताईं सजे॒ मुल्कअ में ऊंदए छायल रही।

⁴⁵ सिजअ जी रोशनी हली वई। ऐं मंदरअ जो परदो विचअ मां फाटी करे ब॒ टुकड़ा थी वयो।

⁴⁶ येशुअ वडे॒ आवाज़अ सां पुकारे करे चयईं, “हे पिता परमेश्वर, मां पांजी आत्मा खे तुंजे हथन में तो सौप्या”, एतरो चई करे हुन पांजो साह छडे॒ डि॒नईं।

⁴⁷ रोमी सूबेदार जेको उते बीठो हुयो जड॒ऐं उन इयो सब डि॒ठो, त उहो परमेश्वरअ जी स्तुति करे इंय चवण लगो॒, “बेशक ही, इयो हिक धर्मी मांणू हुयो।”

⁴⁸ डा॒ढा ही मांणू इयो किस्सो डि॒सण जे लाए गड॒ थ्या हुवा। सो उहे इयो सब डि॒सी करे पांजी छाती पिटींदे घर डा॒ं मोटी वया।

⁴⁹ परअ उहे सबही ज॒णा जेके येशुअ खे जाती तोर ते सुञाणींदा हुवा, जेमें उहे स्त्रीयूं बी शामिल हुयूं जेके गलील क्षेत्रन मां आयूं हुयूं। उहे परयां खां बीह करे इयो सब डि॒सन पयूं।

येशुअ खे क़बरअ में रख्यो वञण

⁵⁰ उते यूसुफ़ नाले जो हिकड़ो मांणू हुयो जेको यहूदी महासभा जो हिक सदस्य हो। उहो भलो ऐं नेक मांणू हो।

⁵¹ यूसुफ़अ महासभा जे फैसले ऐं कमन में पांजो मत न डि॒नो। उहो यहूदिया क्षेत्र जे अरिमतिया नगरअ में रवंदो हो ऐं परमेश्वरअ जे राज॒अ जे इंतज़ारअ में हो।

⁵² उन पिलातुसअ वट वञी करे येशुअ जी लाश घुरयईंस।

⁵³ उन लाश खे क्रूस तां हेठ लाथईं ऐं उन खे सोटी कपड़े जे कफ़नअ में वेरे करे हिकअ क़बरअ में रखी छड॒यईं, जेकी चट्टानअ खे कटे करे खोदी वई हुई ऐं जेमें कड॒ऐं केंखे बी न रख्यो वयो हो।

⁵⁴ उहो जुम्मे जो ॾींह हो, मतलब यहूदिन जी तैयारीअ जो ॾींह ऐं सबध शुरू थ्यण वारो हो।

⁵⁵ जेके स्त्रीयूं येशुअ सां गड॒ गलील मां आयूं हुयूं, उनन यूसुफ़अ जे पोयां-पोयां वञी करे क़बरअ खे डि॒ठऊं ऐं इयो बी, के कीअं येशुअ जी लाश खे उन में रख्यो वयो आहे।

⁵⁶ इन खां पो उहे मोटी करे वापस शहेरअ में आयूं ऐं लाश ते हरण जे लाए ख़ुशबूदार शयूं ऐं अत्‍तुर तैयार कयऊं। तड॒ऐं उनन नियमअ जे मुताबिक सबधअ जे डी॒ंहं ते आराम कयऊं।