لوقا 22 - Sindhi Bible (India)

येशुअ जे खिलाफ साजिश

¹ अख़मीरी रोटीअ जो तहेवार जेको फसह जो तहेवार चवाएजंदो आहे, उहो वेझो अची रयो हो।

² मुख्ययाजकअ ऐं धर्मशास्त्री इन गा॒ल जी ताकअ में हुवा, के कीअं येशुअ खे माराए छडि॒न परअ उहे मांणुन खां ड॒कन पया।

यहूदा जो विश्वासघात

³ तड॒ऐं यहूदा नाले जे चेले में शैतान दाख़िल थ्यो। इयो चेलो बा॒रहन चेलन मां हिक हो ऐं उहो इस्करियोती बी चवाएजंदो हो।

⁴ उहो मुख्ययाजकन ऐं मंदरअ जे पहेरेदारन जे सरदारन वट वञी उनन खां सलाह-मश्वरो करण लगो॒, के कीअं येशुअ खे उनन जे हथां पकड़ाए।

⁵ तैंते उहे डा॒ढो ख़ुश थ्या ऐं यहूदा खे पैसा डि॒यण जे लाए राजी थी व्या।

⁶ सो यहूदा उनन जी गा॒ल मञी वरती ऐं उन खां पो यहूदा इन मौके जी ताकअ में रवण लगो॒, के जड॒ऐं भीड़अ न हुजे त उन वक़्त हू येशुअ खे उनन जे हथां पकड़ाए।

चेलन सां गड॒ फसह जो आख़री भोज॒न

⁷ अख़मीरी रोटीअ जे तहेवारअ जो डी॒ंह आयो। जेमें फसह जे तहेवारअ जे मेम्ने जो ब॒लीदान चढ़ाएण ज़रूरी हो।

⁸ येशु पतरस ऐं यूहन्ना खे इयो चई करे मोकल्यईं, “वञो ऐं असां जे लाए फसह जे तहेवारअ जे रोटीअ जी तैयारी कयो ताकि असां उहो खाई सगु॒ं।”

⁹ उनन येशुअ खां पुछो, “तूं छा तो चाईं? के असां किथे उन जी तैयारी कयऊं?”

¹⁰ तैंते येशुअ उनन खे जवाब डि॒नो, “शहेरअ में घिरंदे ही तवां खे हिक मांणू पाणीअ जो भरयल मटको खणी वेंदें मिलंदो। उन जे पोयां-पोयां वञजो ऐं जैं घरअ में उहो दाख़िल थे,

¹¹ उन घरअ जे मालिकअ डे॒ वञी करे चहे जो, ‘गुरूअ पुछो तईं के उहो महेमानखानो किथे आहे, जिते मां पांजे चेलन सां गड॒ फसह जे तहेवारअ जी रोटी खांवां?’

¹² उहो मालिक तवां खे घरअ जे मथे माड़े ते हिक वडो॒ सजो सजा॒यल कमरो डे॒खारींदो, उते रोटीअ जी तैयारी कजो।”

¹³ उहे चेला वया ऐं जीअं येशुअ उनन खे चयो हो, उनन उते सब कुछ उअं हीं पातो सो उते उनन फसह जे तहेवारअ जी रोटीअ जी तैयारी कई।

प्रभु-भोज॒

¹⁴ जड॒ऐं उहो वक़्त आयो, त येशु प्रेरितन सां गड॒ रोटी खाएण वेठो।

¹⁵ उन संदन खे चयईं, “मुंजी केडी॒ त दिल जी चाहत हुई, के तकलिफुन खे भोग॒ण खां पहेरयों मां फसह जे तहेवारअ जी इया रोटी तवां सां गड॒ खांवां,

¹⁶ छोके मां तवां खे चवां तो, जेसताईं के परमेश्वरअ जे राज॒अ में इन जो सही मतलब पूरो नथी वञे तेसताईं मां इन खे वरी न खाईंदुम।”

¹⁷ इन खां पो येशुअ कटोरो खणी परमेश्वरअ जो धन्यवाद करे इंय चयईं, “इन खे खणो ऐं पाण में विराए छड॒यो;

¹⁸ छोके मां तवां खे चवां तो, के अंगूरअ जो रस उन डी॒ंहं ताईं मां वरी न पियंदुम जेसताईं परमेश्वरअ जो राज॒ न अचे।”

¹⁹ उन खां पो येशुअ रोटीअ खे खणी करे परमेश्वरअ जो धन्यवाद कयईं ऐं रोटीअ खे तोड़े करे चेलन खे डी॒ंदे इंय चयईं, “इयो मुंजो शरीर आहे जेको तवां जे लाए डि॒नो तो वञे। मुंजी याद में इंय हीं कंदा कयो।”

²⁰ सागे॒ ही तरीके सां येशुअ रोटीअ खां पो कटोरो खणी करे इंय चयईं, “इयो कटोरो मुंजे खूनअ खे तो डे॒खारे, इयो कटोरो मुंजे खूनअ जे द्वारा स्थापना कयल नईं वाचा आहे ऐं इयो तवां जे लाए वहायो तो वञे।

²¹ परअ डि॒सो, मुखे पकड़ाएण वारो मुसां गड॒ रोटी खाएण वेठो आहे।

²² मांणूअ जे पुटअ जे बारे में पवित्रशास्त्र में जीअं लिख्यल आहे उहो त हुन सां थींदो ही; परअ हाय उन मांणूअ ते जेको हुन खे धोखे सां पकड़ाए तो!”

²³ सो चेला हिकअ-बे॒ खां पुछण लगा॒ असां मां उहो केर आहे, जेको इयो कम करण वारो आहे।

वडो॒ केर आहे? इन ते बहस

²⁴ चेलन जे विचअ में इन गा॒ल ते बी बहस थे पई, के असां सबनिन मां केंखे वडो॒ समझ्यो वञण खपे।

²⁵ येशुअ उनन खे चयईं, “जेके राजा ऐं अधिकारी परमेश्वरअ खे नथा सुञारन उहे पांजी प्रजा जे मथां हुकुम हलाईंदा आइन परअ उन खां पो बी पांजे पाण खे ‘भलो कंदड़’ सडा॒ईंदा आइन।

²⁶ परअ तवां में इंय न हुजण खपे। जेको तवां मां वडो॒ आहे, उहो नंढे वांगुर ठहे ऐं जेको नेता आहे, उहो सेवकअ वांगुर ठहे।

²⁷ भला, वडो॒ केर आहे? जेको खाएण वेठो आहे यां उहो जेको संदस जी सेवा तो करे? छा उहो न जेको खाई रयो आहे? परअ मां तवां जे विचअ में नौकरअ वांगुर आयां।”

²⁸ “तवां उहे आयो जेके मुंजी तकलीफुन में मुसां गड॒ रया आयो।

²⁹ जीअं मुंजे पिता मुखे मुकरर कयो आहे, के अधिकारअ सां गड॒ राज॒ कयां, उअं हीं मां बी तवां खे मुकरर तो कयां,

³⁰ ताकि तवां मुंजे राज॒अ में मुसां गड॒ वई करे मेजअ ते खाओ-पीओ ऐं सिंघासनअ ते वई करे तवां इज़राएल जे बा॒रहन हीं कुलन जा फैसला कयो।”

पतरसअ जे इन्कार करण जी भविष्यवाणी

³¹ “शमौनअ, हे शमौनअ! बु॒ध, शैतानअ तवां जी परीक्षा करण जे लाए इज़ाजतअ वरती आहे, के जीअं कणकअ खे फटक्यो वेंदो आहे इंय हीं तवां खे फटके।

³² परअ शमौनअ मां तुंजे लाए प्रार्थना कई आहे, के तूं किथे विश्वासअ खां मुकरी न वञी। सो जड॒ऐं तूं मूं डा॒ं मोटी अचीं, त पांजे भावरन खे बी संभालजैं।”

³³ इन ते पतरसअ येशुअ खे जवाब डि॒नईंस, “प्रभु मां तोसां गड॒ जेलअ में वञण जे लाए ऐं मरण जे लाए बी तैयार आयां।”

³⁴ येशुअ पतरसअ खे चयईंस, “मां तोखे चवां तो अज॒ रात जो कुकड़अ जे बां॒ग डि॒यण खां पहेरयों तूं टे दफ़ा इंय इन्कार करे चवंदे के तूं मुखे न सुञाणी।”

ब॒टूं, थेल्हो ऐं तलवारअ

³⁵ येशुअ चेलन खां पुछयईं, “जड॒ऐं मां तवां खे ब॒टूं, थेलो ऐं जेके जूता पातल हुयव उन जे अलावा बि॒यन जूतन जे बिना मोकल्यो हो, त छा तवां खे काई शए जी कमी थी?”

³⁶ उनन येशुअ खे चयो, “काई शए जी न।” इन ते येशुअ उनन खे चयो, “परअ हाणे मां तवां खे चवां तो अगर तवां वट ब॒टूं हुजे त खणो ऐं थेलो बी ऐं अगर तवां वट तलवारअ न हुजे त पांजा कपड़ा बी विकणे करे उन खे खरीद कयो।

³⁷ छोके मां तवां खे चवां तो, इयो ज़रूरी आहे के पवित्रशास्त्र जो इयो लेख मूंमे पूरो थेः ‘के उन जी ग॒णप पापिन सां गड॒ थी।’ हा, जेको कुछ मुंजे बारे में लिख्यल आहे उहो सब ज़रूर पूरो थींदो।”

³⁸ तैंते चेलन येशुअ खे चयऊंस, “प्रभु! डि॒स, हिते असां वट ब॒ तलवारूं आइन।” हुन चेलन खे जवाब डि॒नो, “काफी आइन।”

जैतूनअ जे पहाड़अ ते येशुअ जी प्रार्थना

³⁹ येशु शहेरअ खां बा॒हिर वञी करे पांजी आदतअ मुजुब जैतूनअ जे पहाड़अ ते वयो। संदस जा चेला बी हुन सां गड॒ वया।

⁴⁰ येशुअ उते पहुंची करे उनन खे चयईं, “प्रार्थना कयो ताकि, तवां प्रलोभन अचण जे वक़्त किथे उन में किरी न पओ।”

⁴¹ उन खां पो येशु थोड़ो ही परते चेलन खां अलग थी वयो ऐं घोड॒न भर अची करे प्रार्थना में इंय चवण लगो॒ के,

⁴² “हे पिता, अगर तूं चाहीं त इयो दुखअ जो कटोरो मूं वटां हटाए छड॒। परअ त बी मुंजी न तुंजी इच्छा पूरी थे।”

⁴³ [एतरे में स्वर्ग॒अ जो हिक दूत येशुअ वट अची प्रघट थ्यो, जैं हुन खे सामर्थ डि॒नई।

⁴⁴ येशु उन पीड़ा जी वजह सां अञा बी लगनअ सां प्रार्थना करण लगो॒ ऐं हुन जो पसीनो ज॒ण रतअ जे टेपन वांगुर ज़मीनअ ते किरण लगो॒।]

⁴⁵ जड॒ऐं येशु प्रार्थना करे उथ्यो ऐं पांजे चेलन डा॒ं मोटी आयो, त उनन खे दुखअ जे करे सुमंदे डि॒ठईं।

⁴⁶ येशुअ उनन खे चयईं, “तवां छो सुमी रया आयो? उथो ऐं प्रार्थना कयो ताकि तवां प्रलोभन अचण जे वक़्त किथे किरी न पओ।”

येशुअ जो धोखे सां पकड़ायो वञण

⁴⁷ येशु अञा गा॒लाए ही प्यो, त उते हिकअ भीड़अ अची पौंती ऐं उनन जे अग॒यां-अग॒यां यहूदा इस्करियोती हली रयो हो जेको बा॒रहन चेलन मां हिक हो। उहो येशुअ जे पासे में आयो ताकि उहो हुन खे चुमी डे॒।

⁴⁸ इन ते येशुअ उन खे चयईं, “हे यहूदा, छा तूं चुमी ड॒ई करे मांणूअ जे पुटअ खे धोखे सां पकड़ाएण आयो आईं?”

⁴⁹ जड॒ऐं चेलन इयो डि॒ठो, के भीड़अ येशुअ खे गिरफ़्तार करण ती अचे, त संदस खां पुछयऊं, “प्रभु! छा असां तलवारूं हलायूं?”

⁵⁰ पो चेलन मां हिकड़े त महायाजकअ जे दासअ जे मथां वार करे उन जो साजो॒ कन कटे छड॒यईं।

⁵¹ तैंते येशुअ चयईं, “बस, घणहीं थ्यो।” ऐं हुन उन दासअ जे कनअ खे छूही करे ठीक कयईंस।

⁵² उन खां पो मुख्ययाजकअ, मंदरअ जे पहेरेदारन जा सरदारअ ऐं पुरनियां जेके येशुअ खे पकड़ण जे लाए आया हुवा, संदस उनन खे चयो, “छा तवां मुखे डाकू सम्झी करे तलवारूं ऐं लठूं खणी गिरफ़्तार करण निकता आयो?

⁵³ मां त रोज तवां सां गड॒ मंदरअ में हुंदो हुम ऐं उन वक़्त त तवां मुखे गिरफ़्तार न कयव। परअ हाणे इयो तवां जो समय आहे ऐं इन जे मथां अंधकारअ जो राज॒ आहे।”

पतरसअ जो येशुअ खे सुञारण खां इन्कार करण

⁵⁴ तड॒ऐं उनन येशुअ खे गिरफ़्तार कयो ऐं हुन खे महायाजकअ जे घरअ में वठी आया ऐं पतरस परभरो उनन जे पोयां हलण लगो॒।

⁵⁵ उते कुछ मांणू पदरअ जे विचअ में बाहे बा॒रे करे उन जे चौधरी वेठा हुवा। सो पतरस बी उनन सां गड॒ अची करे वेठो।

⁵⁶ उते हिकअ दासीअ पतरसअ खे बाहे जी रोशनीअ में वेठल डि॒ठईं ऐं उन खे ध्यानअ सां डि॒सी करे चवण लगी॒, “इयो बी येशुअ सां गड॒ हो।”

⁵⁷ इयो बु॒धी पतरस इन्कार करे इंय चवण लगो॒ त, “भेण! मां उन खे न सुञाणा।”

⁵⁸ थोड़ी देर खां पो, हिकड़े बे॒ ज॒णे पतरसअ खे डि॒सी करे चयईं, “तूं बी त उनन मां हिक आईं।” पतरसअ उन खे जवाब डि॒नईंस, “न भा! मां न आयां।”

⁵⁹ कलाक खन खां पो हिकड़े बे॒ मांणूअ पूरे यक़ीनअ सां चयो त, बेशक हे मांणू बी त येशुअ सां गड॒ हुयो, छोके हे मांणू बी त गलीली आहे।

⁶⁰ परअ पतरसअ उन खे जवाब डि॒नईंस, “अरे भा! मुखे न खबरअ आहे के तूं छा तो चईं।” उहो अञा इयो चहे ही प्यो, त ओढी॒ मलई कुकड़अ बा॒ंग डि॒नी।

⁶¹ उन वक़्त प्रभुअ मुड़ी करे पतरसअ डां॒ निहारियो। तड॒ऐं पतरसअ खे उहा गा॒ल याद आई, के प्रभुअ उन खे चयो हो, “के अज॒ कुकड़अ जे बा॒ंग डि॒यण खां पहेरयों तूं टे दफ़ा मुंजो इन्कार कंदे।”

⁶² उन खां पो पतरस उतां बा॒हिर निकरी वयो ऐं वञी ज़ोर-ज़ोर सां रोवण लगो॒।

येशुअ जी बेइज़ती

⁶³ जेके पहेरेदारअ येशुअ जी निगराणी करे रया हुवा, उहे हुन जी ठठोली करण लगा॒ ऐं उन खे मारण-कुटण लगा॒।

⁶⁴ उहे येशुअ जी अखियुन ते पट्टी ब॒धी करे संदस खां पुछण लगा॒, “भविष्यवाणी कर! असां मां कें तोखे मारयो?”

⁶⁵ उहे येशुअ जे विरोधअ में डा॒ढियूं बुरियूं गा॒ल्यूं चई करे, हुन जी बेइज़ती कंदा रया।

यहूदी महासभा जे सामूं येशु

⁶⁶ जीअं हीं सिज निकतो, त पुरनियां, मुख्ययाजकअ ऐं धर्मशास्त्री पाण में अची गड॒ थ्या ऐं उनन येशुअ खे यहूदी महासभा जे अग॒यां पेश कयऊं।

⁶⁷ उनन येशुअ खे चयो, “अगर तूं मसीह आईं, त असां खे बु॒धाए।” तैंते येशुअ उनन खे जवाब डि॒नो, “अगर मां तवां खे चवंदुम बी के मां आयां, त बी तवां मुंजी गा॒ल जो विश्वास न कंदव,

⁶⁸ ऐं अगर मां तवां खां सवाल पुछंदुम, त तवां उन जो जवाब न डी॒ंदव।

⁶⁹ परअ हाणे खां मांणूअ जो पुट सर्वशक्‍तिमान परमेश्वरअ जे साजे॒ पासे व्यंदो।”

⁷⁰ तैंते सबनिन ज॒णन चयो, “छा तूं परमेश्वरअ जो पुट आईं?” हुन जवाबअ में चयईंन त, तवां पाण हीं ता चओ के मां आयां।

⁷¹ इयो बु॒धंदे ही उनन चयो, “हाणे असां खे ब्॒यन गवाहुन जी छा ज़रूरतअ आहे? असां त पाण हीं इन जे मुंहं मां इयो बु॒धो आहे।”