لوقا 21 - Sindhi Bible (India)

हिकअ ग़रीब विधवा जो दान डि॒यण

¹ जड॒ऐं येशु मंदरअ में हो, त उते हुन शाहूकार मांणुन खे मंदरअ जी दान-पेटीअ में पांजो-पांजो दान विझंदे डि॒ठईं।

² उते हुन हिकअ ग़रीब विधवा खे बी दान-पेटीअ में ॿ नंढा टामे जा सिक्‍का विझंदे डि॒ठईं।

³ तैंते येशुअ पांजे चेलन खे चयईं, “मां तवां खे सच तो चवां, मंदरअ जी दान-पेटीअ में इन ग़रीब विधवा सबनिन खां वधीकअ दान विधो आहे।

⁴ छोके बि॒यन सबनिन खे जाम धन आहे ऐं उनन पांजे जाम धनअ मां थोड़ो विधो आहे। परअ इन ग़रीब विधवा पांजी तंगीअ में रवंदे बी, उहो सब विझी छड॒यईं जेको कुछ उन वट हुस, मतलब पांजी सजी॒ जीविका विधी तईं।”

मंदरअ जे नाश थ्यण जी भविष्यवाणी

⁵ येशुअ जा कुछ चेला इंय चवण लगा॒, के मंदर केडे॒ त सुहिणे पथरन सां ऐं मांणुन जे तरफां डि॒नल सुहीणी सौगातुन सां सिंगारियल आहे। इन ते येशुअ चयईं,

⁶ जेको कुछ तवां हाणे डि॒सो ता, ईंदड़ समय में हिते हिकअ पथरअ ते पथर बी न रवंदो जेको ढायो न वेंदो।

आफ़तुन जी शुरूआत

⁷ उनन येशुअ खां पुछो, “हे गुरू, इयो सब कड॒ऐं थींदो? ऐं जड॒ऐं इहे सब गा॒ल्यूं पूरियूं थ्यण ते हुंदियूं, त उन समय जूं निशानियूं छा आइन?”

⁸ येशुअ उनन खे जवाब डि॒नईं, “सावधान रहेजो, ताकि तवां केंजे बहेकावे में न अची वञो। छोके डा॒ढा मांणू मुंजे नाले सां ईंदा ऐं चवंदा, ‘त मां मसीह आयां’ ऐं ‘उहो समय अची पौंतो आहे।’ परअ तवां उनन जे पोयां हल्या न वञजो।

⁹ जड॒ऐं तवां लड़ाईयुन ऐं बग़ावतन जूं खबरूं बु॒धो, त घबराएजी न वञजो; छोके इनन जो पहेरयों थ्यण ज़रूरी आहे परअ उन वक़्त अंत न थींदो।”

¹⁰ येशुअ उनन खे चयो, “जाति-जातिअ सां विरंदी ऐं राज॒-राज॒अ जे मथां चढ़ाई कंदो,

¹¹ ऐं केत्रन हीं जगे॒हुन ते वडा॒-वडा॒ भूकम्पअ थींदा; जिते-किथे डु॒कड़ पवंदो ऐं महामारियूं फैलजंदियूं। इन जे अलावा आसमानअ में खौफ़नाक गा॒ल्यूं ऐं वडि॒यूं निशानियूं डि॒सण में ईंदियूं।

¹² परअ इयो सब कुछ थ्यण खां पहेरयों मांणू तवां खे पकड़ींदा ऐं सताईंदा। तवां खे प्रार्थना-घरन जे सरदारन जे हवाले कयो वेंदो ऐं जेलअ में विधो वेंदो। मुंजे नाले जे करे तवां खे राज्यपालन ऐं राजाहुन जे सामूं पहुंचायो वेंदो।

¹³ परअ इन जी वजह सां तवां खे इयो मौको मिलंदो, के तवां मुंजे बारे में ख़ुशख़बरी उनन खे बु॒धाए सगो॒।

¹⁴ सो तवां पांजे दिल में इयो पको इरादो करे छड॒यो, के तवां इन गा॒ल जी कोई बी चिंता न कंदव, के तवां खे पांजे बचावअ में छा चवणो आहे।

¹⁵ छोके मां तवां खे एड़ा शब्दअ ऐं बु॒द्धि डी॒ंदुम जेंजो सामनो ऐं खंडन तवां जो कोई बी दुश्मन न करे सगं॒दो।

¹⁶ तवां जा माता-पिता, भावरअ-भेनर, रिश्तेदारअ ऐं दोस्तअ बी तवां खे पकड़ाईंदा ऐं तवां मां केत्रन हीं खे सरकारी अधिकारिन जे द्वारा मारे छड॒यो वेंदो।

¹⁷ मुंजे नाले जे करे सब मांणू तवां सां नफरतअ कंदा।

¹⁸ परअ तवां जे मथे जो हिक वार बी वाकों न थींदो।

¹⁹ इनन गा॒ल्युन में मुंजे प्रति ईमानदारीअ सां अंत ताईं कायम रवण जे करे, तवां अनंत जीवनअ खे पाईंदव।”

यरूशलेमअ जे नाश थ्यण जी भविष्यवाणी

²⁰ जड॒ऐं तवां डि॒सो के यरूशलेम खे लश्करन घेरे वरतो आहे, तड॒ऐं जा॒णे वठजो के उन जो नाश वेझो अची पौंतो आहे।

²¹ उन वक़्त जेके बी यहूदा जे क्षेत्रन में हुजन उहे पहाड़न ते भजी॒ वञन; जेके यरूशलेमअ में हुजन उहे शहेरअ खां बा॒हिर भजी॒ वञन ऐं जेके गामड़न में हुजन उहे शहेरअ में अंदर न वञन।

²² छोके उहे डी॒ंहं सजा जा हुंदा ताकि जेको कुछ पवित्रशास्त्र में लिख्यल आहे उहे सब गा॒ल्यूं पूरियूं थ्यन।

²³ उहे डीं॒हं उन स्त्रियुन जे लाए भयानक हुंदा जेके पेटअ सां हुंदियूं यां जिन खे थञ धाईंदड़ बा॒रअ हुंदा, छोके इज़राएल देशअ जे मथां वडी॒ मुसीबतूं ईंदियूं ऐं इन में रवण वारन मांणुन जे मथां परमेश्वरअ जो क्रोध अची पवंदो।

²⁴ उनन मांणुन मां केत्रन हीं खे त तलवारअ सां मारयो वेंदो। ऐं बि॒यन खे कैद करे अलग-अलग चगं॒न हीं देशन में वठी वयो वेंदो ऐं यरूशलेमअ खे गैरयहूदिन देशन जे द्वारा तेसताईं लताड़ियो वेंदो जेसताईं के उनन जो समय पूरो न थींदो।

मांणूअ जे पुटअ जो मोटी अचण

²⁵ “सिज,चंड ऐं तारन में निशानियूं प्रघट थींदियूं। सम्डअ जी छोल्युन जे वडे॒ आवाज़अ सां ऐं उन जी लहेरुन सां धरतीअ जे देश-देशअ जा मांणू घबराएजी वेंदा।

²⁶ डा॒ढा मांणू ईंदड़ आफ़तुन जे बारे में सोचींदे-सोचींदे एतरे हदअ ताईं ड॒की वेंदा के बेंहोश थी वेंदा, छोके आसमानअ जूं ताकतूं हिलायूं वेंदियूं।

²⁷ उन वक़्त हर हिक ज॒णो, मांणूअ जे पुटअ खे सामर्थ ऐं वडी॒ महिमा सां गड॒ बादलअ ते ईंदे डि॒संदो।

²⁸ जड॒ऐं इहे सब गा॒ल्यूं थ्यण लग॒न, त उथी खड़ा थिजो ऐं मथे डि॒सजो, छोके तवां जो छुटकारो वेझो हुंदो।”

अंजीरअ जे वण मां सबक

²⁹ येशुअ चेलन खे हिक मिसाल डि॒नईं, “के अंजीरअ जे वण खे ऐं बि॒यन वणन खे डि॒सो।

³⁰ जड॒ऐं उनन में पत्ता ईंदा आइन, त तवां पाण हीं जा॒णे वठंदा आयो के उनारो वेझो आहे।

³¹ सागे॒ तरीके सां हीं जड॒ऐं तवां इनन गा॒ल्युन खे थींदे डि॒सो, त जा॒णे वठजो के परमेश्वरअ जो राज॒ वेझो आहे।

³² मां तवां खे सच तो चवां के तेसताईं इन पीढ़ीअ जो अंत न थींदो, जेसताईं इहे सब गा॒ल्यूं पूरियूं न थींदियूं।

³³ आसमान ऐं धरती खत्तम थी वेंदा परअ मुंजी चयलअ गा॒ल्यूं सदाहीं जे लाए अटल रवंदियूं।”

जाग॒ंदा रहो

³⁴ “इन करे पांजे बारे में सावधान रहो। किथे इंय नथे, के तवां जो दिल दुनिया जे एशो-आराम, नशे ऐं इन जीवनअ जी चिंताउन खां सुस्त थी वञे ऐं ओचतो ही मांणूअ जे पुटअ जे अचण जो डी॒ंह हिकअ फंदे वांगुर तवां जे मथां अची पए।

³⁵ छोके उन डी॒ंहं जो असर सजी॒ धरतीअ जे सबनिन मांणुन जे मथां अची पवंदो।

³⁶ इन करे हमेशा जागं॒दा रहो ऐं प्रार्थना कंदा रहो, जेंसां तवां इन अचण वारिन सबनिन गा॒ल्युन खां बचण ऐं मांणूअ जे पुटअ जे सामूं बीहण जे लायक ठही सगो॒।”

³⁷ येशु रोजानो डी॒ंहं जो मंदरअ में सिख्या डी॒ंदो हुयो ऐं रात जो उहो शहेरअ खां बा॒हिर वञी करे जैतून पहाड़ीअ ते सजी॒ रात गुज़ारींदो हो।

³⁸ रोज सुबुअ साण सवेलअ मांणू येशुअ जी गा॒ल्यूं बु॒धण जे लाए मंदरअ में ईंदा हुवा।