لوقا 19 - Sindhi Bible (India)

जक्‍कई नाले जो हिक महसूल उॻाड़ींदड़

¹ येशु यरीहो नगरअ में दाख़िल थी करे उन मां लंगे रयो हो।

² उन नगरअ में हिक जक्‍कई नाले जो मांणू रवंदो हुयो, जेको महसूल उॻाड़ींदड़न जो सरदार हो ऐं उहो डा॒ढो शाहूकार हो।

³ उहो येशुअ खे डि॒सण प्यो चाहे, के उहो केर आहे। परअ भीड़अ जे करे उहो हुन खे डि॒सी न प्यो सगे॒, छोके उहो डेंडो हुयो।

⁴ सो येशुअ खे डि॒सण जे लाए जक्‍कई झट डुक पाए करे उन हीं रस्ते ते हिक गुलेरअ जे वण ते चढ़ी वयो, छोके येशु उन हीं रस्ते तां वञण वारो हो।

⁵ जड॒ऐं येशु उन जग॒ऐ जे पासे पौंतो, त उन मथे डि॒सी जक्‍कई खे चयईं, “हे जक्‍कई झट हेठ लई अच, छोके इयो ज़रूरी आहे के अज॒ मा तुंजे घर रवां।”

⁶ इयो बु॒धी जक्‍कई ओढी॒ मलई हेठ लथो ऐं आनंदअ सां येशुअ खे पांजे घर वठी वयो।

⁷ इयो डि॒सी सब मांणू कुड़कुड़ाए करे चवण लगा॒, “उहो त हिकअ पापी मांणूअ जो महेमान थी करे उन जे घर वयो आहे।”

⁸ थोड़ी देर खां पो जड॒ऐं उहे घरअ में ही हुवा, त उते जक्‍कई सबनिन जे सामूं उथी बीठो ऐं येशुअ खे चवण लगो॒, “प्रभु! डि॒स, मां पांजी मिलक्यतअ जो अध हिस्सो कंगालन खे ड॒ई छडी॒ंदुम ऐं जेकड॒ऐं मां केंजो कुछ बी ठगी॒ करे खणी छड॒यो आहे, त उन खे चओणा करे वापस मोटाए छडीं॒दुम।”

⁹ इन ते येशुअ उन खे चयईं, “अज॒ इन घरअ में उद्धार आयो आहे, छोके इयो बी अब्राहमअ जो वंशज आहे।

¹⁰ मांणूअ जो पुट, जेके भटक्यलअ आइन, उनन खे गो॒लण ऐं बचाएण जे लाए आयो आहे।”

ड॒हन सिक्‍कन जी मिसालअ

¹¹ जड॒ऐं मांणू इहे गा॒ल्यूं बु॒धन ही प्या, तड॒ऐं येशुअ हिक मिसाल डि॒नो, छोके उहो यरूशलेमअ जे वेझो हो ऐं मांणू इंय प्या समझन, के परमेश्वरअ जो राज॒ हाणे ही प्रघट थ्यण वारो आहे।

¹² येशुअ उनन खे चयईं, “हिक शाहूकार मांणू हो। उहो परे कें देशअ डा॒ं वयो ताकि उतां राज॒अ जो अधिकार वठी करे वापस मोटी अचे।

¹³ उन बा॒हिर वञण खां पहेरयों पांजे ड॒हन नौकरन खे सड॒ कयईं ऐं उनन खे हिक-हिक सोनअ जो सिक्‍को ड॒ई करे चयइन, ‘मुंजे मोटण ताईं इन सोनअ जे सिक्‍कन सां व्यापार कजो।’

¹⁴ उन जे देशअ जा मांणू उन शाहूकारअ सां नफरतअ कंदा हुवा। इन करे उतां जे देशवासिन उन शाहूकारअ जे पोयां दूतन जे द्वारा इयो चवाए मोकल्यो, ‘के असां नथा चायूं, के हे मांणू असां जे मथां राज॒ करे।’ ”

¹⁵ “जड॒ऐं हू राज॒अ जो अधिकार वठी मोटी आयो, तड॒ऐं उन नौकरन खे जेंखे संदस सोनअ जा सिक्‍का डि॒ना हुवा, पाण डा॒ं घुरायो ताकि हू डि॒से, के उनन व्यापार करे केतरो कमायो आहे।

¹⁶ उनन मां पहेरें नौकरअ अची करे संदस खे चयो, ‘हे राजा! तुंजे डि॒नल सोनअ जे सिक्‍के सां मां ड॒ह सोनअ जा सिक्‍का बि॒या कमाया आइन।’

¹⁷ इन ते राजा उन खे चयो, ‘शाबास, मुंजा प्यारा नौकरअ! तूं थोड़े में ही विश्वासयोग्य निकते, इन करे तूं ड॒हन शहेरन ते अधिकार रख।’

¹⁸ बे॒ नौकरअ चयईं, ‘हे राजा, तुंजे डि॒नल सोनअ जे सिक्‍के सां, मां पंजअ सोनअ जा सिक्‍का बि॒या कमाया आइन।’

¹⁹ राजा उन खे चयो, ‘तूं बी पंजन शहेरन ते अधिकार रख।’

²⁰ टें नौकरअ राजा खे चयो, ‘हे राजा, डि॒स तुंजो इयो सोनअ जो सिक्‍को, मां अंगोछे में बधी॒ रख्यो हो।

²¹ मां तोखां ड॒कां प्यो, छोके तूं ज़ालिम मांणू आईं, जेको बे॒ जी दौलतअ बी खणी तो वठीं जेकी तुंजी जी कोने, जीअं त कोई किसान बे॒ जे खेतअ मां फसलअ कटे करे खणे, जेकी उन न पोखी आहे।’

²² राजा उन खे चयो, ‘हे दुष्‍ट नौकरअ, मां तुंजे चहे ते ही तोखे डो॒ही तो क़रार कयां। मुंजे बारे में तोखे खबरअ हुई के मां ज़ालिम मांणू आयां, जेको मां न रख्यो आहे, उहो मां खणंदो आयां ऐं जेको मां न पोख्यो आहे उहो कटींदो आयां;

²³ त तूं मुंजो सोनअ जो सिक्‍को बैंक में छो न रखयई? ताकि मां वापस अची करे उन खे व्याजअ सूधो वठां वां।’

²⁴ पो राजा उते बीठल मांणुन खे चयो, ‘इयो सोनअ जो सिक्‍को इन खां वठी करे जैं नौकरअ वट ड॒ह आइन उन खे ड॒ई छड॒यो।’

²⁵ तैंते उनन राजा खे चयो, ‘हे राजा, उन वट पहेरयों हीं ड॒ह सिक्‍का त आइन।’

²⁶ ‘राजा उनन खे चयो, जैं वट बी आहे उन खे अञा डि॒नो वेंदो परअ जैं वट कोने, उन खां उहो बी वापस वरतो वेंदो जेको उन वट आहे।

²⁷ हाणे मुंजे उनन दुश्मनन खे, जेके न प्या चाइन के मां उनन जे मथां राज॒ कयां उनन खे हिते वठी अचो ऐं मुंजे सामूं उनन खे मारे छड॒यो’।”

यरूशलेम में येशुअ जो शानअ सां दाख़िल थ्यण

²⁸ इहे सब गा॒ल्यूं चई करे, येशु चेलन जे अग॒यां-अग॒यां यरूशलेमअ डा॒ं वञण लगो॒।

²⁹ जड॒ऐं येशु जैतून पहाड़ीअ ते बेतफगे ऐं बेतनिय्याह गामअ जे पासे पौंता, त हुन पांजे बि॒न चेलन खे इंय चई करे मोकल्यो,

³⁰ “सामूं वारे गामड़े में वञो, उन में दाख़िल थींदे ही उते तवां खे गड॒हअ जो हिक ब॒चो जेंजे मथां कड॒ऐं कोई बी न वेठो आहे तवां खे ब॒ध्यल मिलंदो। उन खे खोले करे खणी अचो।

³¹ अगर कोई तवां खां पुछे, ‘इन ब॒चे खे तवां छोता खोल्यो?’ त उनन खे चहे जो, ‘प्रभुअ खे इन जी ज़रूरतअ आहे।’ ”

³² सो उहे उन गामअ में वया ऐं उनन सब कुछ उते उअं हीं पातो जीअं येशुअ उनन खे चयो हो।

³³ जड॒ऐं उहे गड॒हअ जे ब॒चे खे खोले रया हुवा, तड॒ऐं उन जे मालिकन उनन खे चयो, “तवां इन ब॒चे खे छो खोले रया आयो?”

³⁴ चेलन उन खे चयो, “प्रभुअ खे इन जी ज़रूरतअ आहे।”

³⁵ उहे ब॒चे खे येशुअ वट वठी आया ऐं पांजा कपड़ा उन ब॒चे जे मथां विधऊं ऐं येशुअ खे उन जे मथां व्यारे छड॒यऊं।

³⁶ जीअं-जीअं येशु अग॒यां वधी रयो हो, त मांणू पांज्यूं चादरूं रस्ते ते विछाईंदा रया।

³⁷ जड॒ऐं येशु जैतून पहाड़ीअ जी लाहीअ ते पौंतो, त संदस जे चेलन जी सजी॒ मंडली उन सामर्थ जे कमन जे कारण, जेके उनन डि॒ठा हुवा आनंदअ सां भरजी करे वडे॒ आवाज़अ सां परमेश्वरअ जी साराह करे इंय चवण लगी॒,

³⁸ “धन्य आहे उहो राजा जेको प्रभुअ जे नाले सां तो अचे! स्वर्ग॒अ में शांति ऐं परमेश्वरअ जी महिमा थे।”

³⁹ उन भीड़अ मां कुछ फ़रीसी हुन खे चवण लगा॒ “हे गुरू, पांजे चेलन खे रोक।”

⁴⁰ तैंते येशुअ उनन खे चयईं, “जेकड॒ऐं इनन माठ कई, त इहे पथरअ पुकारण लग॒ंदा।”

येशुअ जो यरूशलमअ जे लाए रोएण

⁴¹ जड॒ऐं येशु यरूशलेम जे वेझो पौंतो, त शहेरअ खे डि॒सी करे उन ते रोई पयो,

⁴² ऐं चवण लगो॒, “केडो॒ त सुठो हुजे आं के तूं, हा तूं, अगर अज॒ जे डी॒ंहं खे समझी सगी॒ं आं, के तुंजी शांति केड़िन गा॒ल्युन में आहे! परअ हाणे इहे गा॒ल्यूं तुंजी अखियुन खां लिक्यल आइन।

⁴³ परअ उहे डी॒ंहं तुंजे मथां ईंदा जड॒ऐं तुंजा दुश्मनअ तोखे चौधारी मोर्चो ब॒धी घेरींदा ऐं चैनी पासन खां तोते हमलो कंदा।

⁴⁴ उहे तोखे ऐं तोमें रवण वारन खे मिट्टीअ में मिलाए छडीं॒दा ऐं तोमें हिक पथरअ ते पथर बी रवण न डी॒ंदा; छोके तो उन वक़्तअ खे न सुञातो तई जड॒ऐं परमेश्वर तोखे बचाएण जे लाए कृपा जी नज़रअ कई हुई।”

मंदरअ मां वापारियुन खे कढयो वञण

⁴⁵ येशु मंदरअ जे अंदर वयो; ऐं उतां वापारिन खे ऐं लेन-देन करण वारन खे बा॒हिर कढण लगो॒,

⁴⁶ ऐं उनन खे चवण लगो॒, “पवित्रशास्त्र में लिख्यल आहे, ‘के मुंजो घर प्रार्थना जो घर हुंदो,’ परअ तवां इन खे डाकुन जी गुफ़ा ठाए छड॒यो आहे।”

⁴⁷ येशु रोज मंदरअ में वञी सिख्या डी॒ंदो हुयो। मुख्ययाजकअ, धर्मशास्त्री ऐं यहूदी सरदारअ येशुअ खे नाश करण जो मौको गो॒लींदा हुवा।

⁴⁸ परअ उनन खे कोई मौको न प्यो मिले, के येशुअ खे कीअं नाश कयूं; छोके सब मांणू डा॒ढी चाह सां संदस जी बु॒धंदा हुवा।