لوقا 18 - Sindhi Bible (India)

अन्यायी न्यायधीश ऐं हिकअ विधवा

¹ येशुअ पांजे चेलन खे इयो समझाएण जे लाए के हर वक़्त प्रार्थना करण खपे ऐं हिम्मतअ न हारण खपे, हिक मिसाल डि॒नईं।

² “कें नगरअ में हिक न्यायधीश रवंदो हो, जेंखे न परमेश्वरअ जो डप हो ऐं न हीं हू कें मांणूअ जी परवाह कंदो हो।

³ उन नगरअ में हिकअ विधवा रवंदी हुई। उहा हरी-घड़ी उन वट अची मिंथूं करे चवंदी हुई, महेरबानी करे ‘मुंजो इंसाफ कर, मुसां मुंजा विरोधी गलत ता कन, मुखे उतां बचाए।’

⁴ डा॒ढे समय ताईं त उहो न्यायधीश उन खे मना कंदो रयो। परअ आखिरकार उहो पांजे पाण खे दिल ही दिल में चवण लगो॒, के ‘भले ही मां न त परमेश्वरअ खां ड॒कंदो आयां ऐं न हीं कें मांणूअ जी परवाह कंदो आयां;

⁵ परअ त बी इया विधवा हड़ी-घड़ी अची मुखे परेशान ती करे, इन जे करे मां हाणे इंय कंदुम के इन खे इंसाफ मिले, किथे इंय नथे के इया हड़ी-घड़ी अची करे मुंजे नकअ में दम करे’।”

⁶ प्रभुअ चयईं, “बु॒धव, इन अन्यायी न्यायधीशअ छा चयईं?

⁷ इन करे छा परमेश्वर पांजे चूंडयलन जो न्याय न चुकाईंदो, जेके रात-डी॒ंह हुन खां दुआ ता कन? छा उहो उनन जी मददअ करण में देर कंदो?

⁸ मां तवां खे चवां तो, उहो उनन जो न्याय चुकाएण में बिल्कुल देर न कंदो परअ त बी जड॒ऐं मांणूअ जो पुट वापस मोटंदो, त छा इन धरतीअ ते एड़े विश्वासअ खे पाईंदो?”

फ़रीसी ऐं हिकअ महसूल उॻाड़ींदड़अ जो मिसाल

⁹ कुछ मांणू जेके पांजे पाण खे धर्मी ऐं बि॒यन खे तुच्छ प्या समझन, येशुअ उनन जे लाए इया मिसालअ डि॒नईं।

¹⁰ “ब॒ मांणू मंदरअ में प्रार्थना करण जे लाए वया; उनन मां हिक फ़रीसी हो ऐं बि॒यो महसूल उगा॒ड़ींदड़ हो।

¹¹ फ़रीसी बीह करे पांजे दिल में इंय प्रार्थना करण लगो॒, ‘हे परमेश्वरअ, मां तुंजो धन्यवाद तो कयां, के मां बि॒यन मांणुन वांगुर लूटमार करण वारो, अन्यायी ऐं व्‍यभिचारी कोन आयां ऐं न हीं इन महसूल उगा॒ड़ींदड़अ वांगुर आयां।

¹² मां हफ्ते में ब॒ दफ़ा विर्त रखंदो आयां; ऐं पांजी सजी॒ कमाईअ जो ड॒हों हिस्सो बी डी॒ंदो आयां।’

¹³ उहो महसूल उगा॒ड़ींदड़ थोड़ो परते बीठो हो ऐं उन जी एतरी बी हिम्मतअ न थी, के उहो स्वर्ग॒अ जी तरफ डि॒से। उहो पांजी छाती पिटींदे इंय चवण लगो॒, ‘हे परमेश्वरअ, मूं पापीअ जे मथां दया कर!’

¹⁴ येशुअ उनन खे चयईं, मां तवां खे चवां तो परमेश्वरअ जी नज़रअ में उहो फ़रीसी न परअ हे महसूल उगा॒ड़ींदड़ धर्मी थी करे पांजे घर वयो, छोके जेको बी पांजे पाण खे वडो॒ कंदो, उहो नंढो कयो वेंदो परअ जेको बी पांजे पाण खे नंढो कंदो, उहो वडो॒ कयो वेंदो।”

बा॒रन खे आसीसअ डि॒यण

¹⁵ उन खां पो मांणू पांजे नंढड़े बा॒रन खे येशुअ वट वठी आया ताकि उहो उनन जे मथां पांजा हथअ रखी उनन खे आसीसअ डे॒ परअ जड॒ऐं चेलन इयो डि॒ठो, त उहे मांणुन खे दड़का डि॒यण लगा॒।

¹⁶ तैंते येशुअ बा॒रन खे पाण वट सड॒ कयो ऐं चेलन खे चयईं, “बा॒रन खे न रोक्यो उनन खे मूं वट अचण डि॒यो, छोके परमेश्वरअ जो राज॒ हेड़न जो ही आहे।

¹⁷ मां तवां खे सच तो चवां जेको बी परमेश्वरअ जे राज॒अ खे बा॒रन वांगुर ग्रहण न कंदो तेसतांई उहो उन में दाख़िल न थी सग॒ंदो आहे।”

शाहूकार मांणू ऐं अनंत जीवन

¹⁸ हिकअ दफ़े, कें यहूदी सरदारअ येशुअ खां पुछो, “हे नेक गुरू, अनंत जीवनअ जो वारिस थ्यण जे लाए मां छा कयां?”

¹⁹ येशुअ उन खे चयईं, “छा कारण आहे, के तूं मुखे नेक तो चईं? छोके परमेश्वरअ खां सिवाए कोई बी नेक कोने।

²⁰ तोखे आज्ञाऊं त खबर आइन। ‘व्यभिचार न करणो, हत्या न करणी, चोरी न करणी, कूड़ी गवाही न डि॒यणी ऐं पांजे माता-पिता जो आदर करणो’।”

²¹ उन येशुअ खे चयो, “इन सब आज्ञाउन जो पालन त मां नंढे हुंदे खां हीं कंदो आयो आयां।”

²² इयो बु॒धी येशुअ उन खे चयईं, “तोमें अञा बी हिकअ गा॒ल जी घटताई आहे। वञ ऐं जेको कुछ तो वट आहे उन खे विकणी करे ग़रीबन में दान करे छड॒, त तोखे स्वर्ग॒अ में ख़ज़ानो मिलंदए। उन खां पो मुंजे पोयां हल्यो अच।”

²³ इयो बु॒धी उहो डा॒ढो दुखी थी वयो, छोके त उहो डा॒ढो शाहूकार हुयो।

²⁴ येशुअ उन खे डि॒सी करे चयो, “शाहूकारन जो परमेश्वरअ जे राज॒अ में दाख़िल थ्यण केडो॒ मुश्किल आहे!

²⁵ परमेश्वरअ जे राज॒अ में शाहूकारन जे दाख़िल थ्यण जे मुकाबले, उठअ जो सुईअ जे टुंगअ मां निकरण सोहलो आहे।”

²⁶ इन ते बु॒धण वारन इंय चयो, “त पो भला केंजो उद्धार थी सग॒ंदो आहे?”

²⁷ येशुअ उनन खे चयईं, “जेको मांणुन खां न थी सग॒ंदो आहे, उहो परमेश्वरअ खां थी सग॒ंदो आहे।”

²⁸ इयो बु॒धी पतरसअ येशुअ खे चयईं, “डि॒स, असां त पांजो सब कुछ छडे॒ करे तुंजे पोयां हलण लगा॒ आयूं।”

²⁹ येशुअ उनन खे चयो, “मां तवां खे सच तो चवां एड़ो कोई कोने जैं परमेश्वरअ जे राज॒अ जे लाए पांजो घर ऐं ज़ालअ ऐं भावरअ ऐं माता-पिता ऐं बा॒रन खे छड॒यो हुजे;

³⁰ ऐं इन वक़्त केतराही त वधीकअ गुणा न पाए ऐं मरण खां पो परमेश्वरअ सां गड॒ अनंत जीवन बी।”

पांजी मौतअ जे बारे में येशुअ जी टियों दफ़ो भविष्यवाणी करण

³¹ येशुअ पांजे बा॒रहन हीं प्रेरितन खे अलग वठी वञी करे चयईं, “डि॒सो, असां यरूशलेम हली रया आयूं ऐं उते जेतरियूं बी गा॒ल्यूं मांणूअ जे पुटअ जे बारे में भविष्यवक्‍ताउन जे तरफां लिखियूं वयूं आइन उहे सब पूरियूं थींदियूं।

³² उहो गैरयहूदिन जे हथन में सौप्यो वेंदो ऐं उहे हुन जो मज़ाक उडा॒ईंदा; हुन जी बेइज़ती कंदा ऐं संदस खे थुकूं हणंदा।

³³ उहे हुन खे चाबुक हणंदा ऐं संदस खे मारे छडीं॒दा परअ टें डी॒ंहं ते हू वापस मौतअ मां जी उथंदो।”

³⁴ परअ उनन खे येशुअ जी काई बी गा॒ल सम्झअ में न आई। इनन गा॒ल्युन जो मतलब उनन खां लिक्यल रयो ऐं जेकी गा॒ल्यूं उनन खे चयूं वयूं, उहे हो सम्झी न सग॒या।

अंधे भिखारीअ खे ठीक करण

³⁵ जड॒ऐं येशु यरीहो नगरअ जे वेझो पौंतो, त उते हिक अंधो भिखारी रस्ते जे किनारे ते वई करे भीखअ घुरी रयो हो।

³⁶ जड॒ऐं उन भिखारीअ भीड़अ जे हलण जी आवाज़ बु॒धी, त उहो पुछण लगो॒, “हे छा थी रयो आहे?”

³⁷ मांणुन उन खे बु॒धायो, “येशु नासरी तो हितां लंगे।”

³⁸ तड॒ऐं उहो जोर जोर सां रड़ियूं करे चवण लगो॒, “हे येशु दाऊदअ जा पुटअ, मुंजे मथां रहेम कर!”

³⁹ इन ते जेके मांणू अग॒यां-अग॒यां हली रया हुवा, उहे उन खे दड़को ड॒ई चवण लगा॒ के चुप कर; परअ उहो अञा बी वधीकअ जोर जोर सां रड़ियूं करण लगो॒, “हे दाऊद जा पुटअ! मुंजे मथां रहेम कर!”

⁴⁰ इयो बु॒धी येशु उते बीह रयो ऐं मांणुन खे चयईं, उन खे मूं वट वठी अचो। जड॒ऐं उहो अंधो हुन वट आयो, तड॒ऐं येशुअ उन खां पुछो,

⁴¹ “तूं छा तो चाहीं के मां तुंजे लाए कयां?” अंधे येशुअ खे चयो, “हे प्रभु, इयो कर के मां डि॒सण लगा॒ं।”

⁴² येशुअ उन खे चयो, “डि॒सण लग॒; तुंजे विश्वासअ तोखे ठीक कयो आहे।”

⁴³ उहो अंधो ओढी॒ मलई डि॒सण लगो॒ ऐं परमेश्वरअ जी स्तुति कंदो हुन जे पोयां हलण लगो॒; ऐं इयो डि॒सी करे सब मांणू परमेश्वरअ जी स्तुति करण लगा॒।