لوقا 17 - Sindhi Bible (India)

ठोकरअ जो कारण ठवण

¹ येशुअ पांजे चेलन खे चयईं, “इंय न थी सग॒ंदो आहे के पाप करण जो प्रलोभन मांणुन जे सामूं न अचे परअ हाय आहे उन मांणूअ ते जेंजे करे पाप करण जो प्रलोभन अचे तो।

² जेके बी मुंजे मथां विश्वास कन ता, उनन मां कें नंढे जे लाए बी अगर कोई पाप करण जो कारण ठए तो, त उन जे लाए इयो सुठो आहे, के हिक वडो॒ चक्‍कीअ जो पाट, उन जे गले में लटकाए उन खे सम्डअ में विधो वञे।

³ इन करे सावधान रहो; अगर तवां जो कोई बी विश्वासी भा यां भेण गुनाह करे, त उन खे मना कयो ऐं अगर उहो गुनाह मां तौबां करे, त संदस खे माफ़ कयोस।

⁴ अगर हू डी॒ंहं में सतअ दफ़ा बी तवां जे खिलाफ गुनाह करे ऐं तवां वट अची सतअ ही दफ़ा चहे मुखे माफ़ कर, त उन खे माफ़ कजो।”

विश्वासअ जे बारे में

⁵ प्रेरितन येशुअ खे चयो, “असां जे विश्वासअ खे वधाए।”

⁶ इन ते येशुअ उनन खे चयईं, “अगर तवां जो विश्वास राईअ जे धाणे जेतरो बी हुजे, त तवां इन तूतअ जे वण खे चवंदवअ, ‘के जड़अ खां निकरी सम्डअ में वञी लग॒’, त उहो बी तवां जी मञींदो।”

हिकअ दासअ जो फ़र्ज

⁷ “मञो तवां जो कोई दास हल काहे यां रिढुन खे चराए करे जड॒ऐं खेतअ मां मोटी अचे, त तवां मां एड़ो केर स्वामी आहे ‘जेको ओढी॒ मलई ही उन खे चहे, अच रोटी खाएण वई रहो’?

⁸ छा तवां उन खे इंय न चवंदव, ‘पहेरयों मुंजे लाए रोटी तैयार कर ऐं जेसताईं मां खाई-पी न वठां तेसताईं बीह करे मुंजी सेवा कर; उन खां पो तूं बी खाई-पी वठजैं’?

⁹ छा स्वामीअ खे पांजे दासअ जी इन गा॒ल जो धन्यवाद करण खपे, के उन पांजे स्वामीअ जो चयो मञयो आहे?

¹⁰ इंय हीं तवां बी जड॒ऐं उहे सब कमअ पूरा कयो जेके स्वामीअ जे तरफां तवां खे करण जे लाए चया वया आइन, त पांजे पाण खे चओ, ‘मां इन लायक न आयां, के परमेश्वर मुखे धन्यवाद करे यां मुंजी साराह करे; छोके मां खाली उहे ही कमअ कया आइन जेके मुखे चया वया हुवा।’ ”

ड॒हन कोढ़िन खे शुद्ध करण

¹¹ यरूशलेम वेंदें वक़्त जड॒ऐं येशु सामरिया ऐं गलील जे सीमा-क्षेत्रन मां थी वञी रयो हो,

¹² त इंय थ्यो, कें गामअ में दाख़िल थींदे वक़्त हुन खे ड॒ह कोढ़ी मिल्या। उनन परयां खां हीं बीह करे,

¹³ वडे॒ वाके सां हुन खे चयऊंस, “हे येशु, हे स्वामी, असां ते रहेम कर!”

¹⁴ येशुअ उनन खे डि॒सी करे चयईं, “वञो ऐं पांजे पाण खे याजकन खे डे॒खारयो।” उहे रस्ते में वेंदें वक़्त ही कोढ़अ मां शुद्ध थी वया।

¹⁵ तड॒ऐं उनन मां हिकअ ज॒णे इयो डि॒सी करे, के मां कोढ़अ मां शुद्ध थी वयो आयां वडे॒ आवाज़अ सां परमेश्वरअ जी स्तुति कंदे मोटयो।

¹⁶ उहो येशुअ जे पेरन ते मुंहं भर किरी हुन जो धन्यवाद करण लगो॒; ऐं हू हिक सामरी हुयो।

¹⁷ इन ते येशुअ चयईं, “छा ड॒हन जा ड॒ह ही ज॒णा कोढ़अ मां शुद्ध न थ्या? त पो बाकी नवअ किथे आइन?

¹⁸ छा इन सामरीअ जे अलावा बि॒यो केंखे बी इंय न थ्यो के मोटी करे परमेश्वरअ जी स्तुति करे?”

¹⁹ तड॒ऐं येशुअ उन खे चयईं, “उथी करे हल्यो वञ; तुंजे विश्वासअ तोखे ठीक कयो आहे।”

परमेश्वरअ जे राज॒अ जो अचण

²⁰ हिक डीं॒ह फ़रीसिन येशुअ खां पुछो, के परमेश्वरअ जो राज॒ कड॒ऐं ईंदो, इन ते येशुअ उनन खे चयईं, “परमेश्वरअ जो राज॒ कुछ एड़ो कोने, के उन खे इन अखियुन सां डि॒सी सग॒जे।

²¹ मांणू इंय न चई सग॒ंदा आइन, डि॒सो, परमेश्वरअ जो राज॒ ‘हिते आहे’, यां ‘उते आहे’। छोके परमेश्वरअ जो राज॒ तवां जे विचअ में आहे।”

²² उन खां पो येशुअ पांजे चेलन खे चयईं, “उहे डी॒ंहं अचण वारा आइन, जेमें तवां मांणूअ जे पुटअ जे डी॒ंहन मां हिकअ डीं॒हं खे डि॒सण जे लाए सिकंदव परअ हुन खे डि॒सी न सग॒ंदव।

²³ मांणू तवां खे चवंदा, डि॒सो मांणूअ जो पुट ‘हिते आहे!’ यां डि॒सो, ‘उते आहे!’ परअ तवां उनन जी गा॒ल्युन ते विश्वास करे उनन जे पोयां न हली वञ जो।

²⁴ छोके जीअं बिजली आसमानअ जे हिकअ छेडे़ खां वठी बे॒ छेड़े ताईं चमकंदी आहे, उअं ही मांणूअ जो पुट बी पांजे डी॒ंहन में प्रघट थींदो।

²⁵ परअ हा पहेरयों इयो ज़रूरी आहे, के उहो डा॒ढिन तकलिफुन मां वञे ऐं इन पीढ़ीअ जा मांणू हुन खे तुच्छ समझी करे ठुकराएन।”

²⁶ “जीअं नूहअ जे डीं॒हन में थ्यो हो, उअं हीं मांणूअ जे पुटअ जे प्रघट थ्यण जे डीं॒हन में बी थींदो।

²⁷ जेसताईं नूह जहाजअ में न चढ़यो, तेसताईं मांणू खाईंदा-पीअंदा हुवा ऐं उनन जे विचअ में शादियूं थींदियूं हुयूं। परअ नूहअ जे जहाजअ में चढ़ण खां पो जल-प्रलय अची करे बाकी सबनिन मांणुन खे खत्तम करे छड॒यईं,

²⁸ ऐं सागे॒ तरीके सां हीं जीअं लूतअ जे डीं॒हन में बी थ्यो हो, के मांणू खाईंदा-पीअंदा हुवा, डे॒-वठ कंदा हुवा, वण लगा॒ईंदा ऐं घरअ ठाईंदा हुवा।

²⁹ परअ जैं डीं॒हं ते लूत सदोम नगरअ मां बा॒हिर निकतो, त उन हीं डीं॒हं ते आकाशअ मां बाहे ऐं गंदरफअ जी बरसात उन नगरअ जे मथां अची पई ऐं उन सबनिन मांणुन खे नाश करे छड॒यईं।

³⁰ उअं हीं मांणूअ जे पुटअ जे प्रघट थ्यण जे डी॒ंहन में बी थींदो। ”

³¹ “उन डींहं ते जेको दाबे॒ ते हुजे, उहो पांजे घरअ मां कुछ खरण जे लाए हेठ न लए; ऐं जेको खेतअ में हुजे उहो घरअ डां॒ न मोटे।

³² याद रखजो, लूतअ जी ज़ालअ सां छा थ्यो हो!

³³ जेको बी पांजी जान बचाएण चाहे उहो उन खे विञाईंदो ऐं जेको उन खे विञाईंदो उहो ही उन खे बचाईंदो।

³⁴ मां तवां खे चवां तो, उन रात जो ब॒ ज॒णा हिकअ खटअ ते सुम पया हुंदा; हिकअ खे खंयों वेंदो ऐं बे॒ खे छड॒यो वेंदो।

³⁵ ब॒ स्त्रीयूं गड॒ मिली करे रोटी ठाईंदी हुंदियूं, हिकअ खे खंयों वेंदो ऐं बी॒अ खे छड॒यो वेंदो।

³⁶ [ब॒ ज॒णा खेतअ में कम कंदा हुंदा, हिकअ खे खंयों वेंदो ऐं बे॒ खे छड॒यो वेंदो।]”

³⁷ इयो बु॒धी चेलन येशुअ खां पुछो, “हे प्रभु हे सब किथे थींदो?” येशुअ उनन खे चयो, “जिते लाशूं हुंदियूं उते ही गिद्धअ बी इकट्ठा थींदा।”