لوقا 14 - Sindhi Bible (India)

फ़रीसीअ जे घरअ में येशु

¹ हिकअ सबधअ जे डी॒ंहं ते येशु कें फ़रीसी अधिकारीअ जे घर रोटी खाएण वयो; ऐं हर कोई हुन खे डा॒ढो ध्यान सां डि॒से प्यो।

² उते हिक मांणू येशुअ जे सामूं आयो जेंजियूं टंगूं ऐं बा॒ंहूं सुज॒यल हुयूं।

³ इन ते येशुअ धर्मशास्त्रिन ऐं फ़रीसिन खां पुछयईं, “छा असां जी व्यवस्था में सबधअ जे डीं॒हं ते बीमारअ खे ठीक करण सही आहे के न?”

⁴ परअ उहे चुप रया। तड॒ऐं येशुअ उन मांणूअ जे मथां हथअ रखी संदस खे ठीक कयईं ऐं उन खे मोकले छड॒यईं।

⁵ तड॒ऐं येशुअ उनन खे चयईं, “अगर तवां जो पुट यां ढगो॒ सबधअ जे डीं॒हं ते कें खडे॒ में किरी पए, त तवां मां एड़ो केर आहे जेको उन खे ओढी॒ मलई बा॒हिर न कढंदो?”

⁶ परअ उहे इन जो कोई जवाब न ड॒ई सग॒या।

निविड़तअ ऐं महेमाननवाज़ी

⁷ जड॒ऐं येशुअ इयो डि॒ठो, के आयल महेमानअ कीअं पांजे लाए अग॒यां-अग॒यां मुख्य जगे॒हुन खे ता चूंडिन, तड॒ऐं येशुअ उनन खे इया मिसालअ ड॒ई चयो,

⁸ “जड॒ऐं कोई तवां खे शादीअ जी दावतअ में अचण जो न्योतो डे॒, त उते तवां कें मुख्य जग॒ऐ ते न वेझो, छोके थी सगं॒दो आहे, के उन तवां खां बी कें वधीकअ मानअ वारे मांणूअ खे न्योतो डि॒नो हुजईं,

⁹ ऐं जैं मांणूअ तवां बि॒निन खे न्योतो डि॒नो आहे उहो तो वट अची करे चहे, ‘के इन खे हिते व्यण डे॒’। त पो तोखे शर्मसार थी करे पोयां वञी व्यणो पवंदए।

¹⁰ परअ जड॒ऐं तोखे न्योतो मिले, त उते सबनिन खां पोयां वञी वेझां, त जैं तोखे न्योतो डि॒नो आहे उहो अची करे तोखे चहे, ‘मुंजा दोस्तअ, हल अग॒यां हली वे।’ इन सां जेके बि॒या महेमानअ तोसां गड॒ वेठा आइन उनन जे अग॒यां तुंजो मान थींदो।

¹¹ छोके जेको पांजे पाण खे वडो॒ तो सडा॒ए उहो नंढो कयो वेंदो; ऐं जेको पांजे पाण खे नंढो तो करे उहो वडो॒ कयो वेंदो।”

¹² इन खां पो येशुअ पांजे न्योतो डि॒यण वारे खे बी चयईं, “जड॒ऐं बी तूं दावतअ जो न्योतो डी॒ं, त पांजे दोस्तन, भावरन, मिट-माइटन ऐं शाहूकार पाड़ेवारन खे न सड॒ कराए जैं। किथे इंय न थे, के उहे बी तोखे न्योतो डि॒यन इंय करण सां तूं जेको कुछ कयो आहे उन जो कोई फायदो न रवंदो।

¹³ परअ जड॒ऐं तूं दावतअ डी॒ं, त कंगालन, लूलन, लंगड़न ऐं अंधन खे न्योतो डि॒जऐं।

¹⁴ तड॒ऐं तूं धन्य थींदे, छोके उनन वट तोखे वापस मोटाएण जे लाए कुछ बी कोने ऐं पो धर्मिन जे मौतअ मां जी उथण ते तोखे इन जो ईनाम मिलंदए।”

वडी॒ दावतअ जो मिसाल

¹⁵ येशुअ सां गड॒ रोटी खाएण वारन मां कें हिकड़े मांणूअ इयो बु॒धी हुन खे चयईं, “धन्य आहे उहो जेको परमेश्वरअ जे राज॒अ में रोटी खाईंदो।”

¹⁶ येशुअ उन खे इयो मिसाल डी॒ंदे चयईं, “कें मांणूअ हिकअ डा॒ढी वडी॒ दावतअ डि॒यण जी तैयारी कई ऐं उन डा॒ढन हीं मांणुन खे न्योतो डि॒नईं।

¹⁷ पो जड॒ऐं रोटी तैयार थी वई, त उन पांजे कें दासअ जे हथां जेंखे उन न्योतो डि॒नो वईं उनन खे चवाए मोकल्यईं, ‘अचो, हाणे रोटी तैयार आहे।’

¹⁸ परअ उहे सब मांणू हिकअ-बे॒ जे पोयां बहानो करण लगा॒। पहेरें ज॒णे उन दासअ खे चयो, ‘मां हिक खेत वरतो आहे ऐं ज़रूरी आहे के मां वञी पहेरयों उन खे डि॒सां; इन करे मां तोखां विनती तो कयां तूं मुंजे तरफां उन खां माफ़ी घुरी छड॒जैं।’

¹⁹ बे॒ ज॒णे उन दासअ खे चयो, ‘मां ढग॒न जा पंजअ जोड़ा वरता आइन ऐं मां उनन खे जांचण तो वञा। इन करे मां तोखे विनती तो कयां तूं मुंजे तरफां उन खां माफ़ी घुरी छड॒जैं।’

²⁰ टें ज॒णे उन दासअ खे चयो, ‘मां हाणे अञा नईं-नईं शादी कई आहे तैं करे मां न अची सगं॒दुम।’

²¹ उन दासअ मोटी करे, उहे सबही गा॒ल्यूं पांजे मालिकअ खे चई बु॒धायूं। इयो बु॒धी मालिकअ गुस्से में अची पांजे दासअ खे चयईंस, ‘जल्दी वञी नगरअ जे बज़ारुन ऐं घिटियुन मां कंगालन, लूलन, अंधन ऐं लंगड़न खे हिते वठी अचो।’

²² उहो दास वयो ऐं मोटी अची पांजे मालिकअ खे चयईं, जीअं तूं आज्ञा डि॒नी हुई असां इंय हीं कयो परअ तैं हुंदे बी अञा जग॒ऐ बची आहे।

²³ इन ते मालिकअ पांजे दासअ खे चयईं, ‘रोडन ऐं फुटफाटन ते वञो ऐं मांणुन खे मनाए करे वठी अचो जेसां मुंजो घर भरजी वञे।

²⁴ छोके मां तवां खे चवां तो, के जेंखे बी पहेरयों दावतअ में न्योतो डि॒नो वयो हो उनन मां कोई बी मुसां गड॒ रोटी न खाई सग॒ंदो’।”

चेलो ठवण जी कीमतअ

²⁵ हिकअ दफ़े वडी॒ भीड़अ येशुअ सां गड॒ हली रई हुई तड॒ऐं हुन पोयां मुड़ी करे उनन खे चयईं,

²⁶ “अगर कोई मुंजो चेलो ठवण चाहे ऐं मुखां वधीकअ पांजी जान ऐं पांजे माता-पिता ऐं ज़ालअ, बा॒रअ ऐं भावरअ ऐं भेनरुन खे तो प्यार करे त उहो मुंजो चेलो ठवण जे लाएक कोने;

²⁷ ऐं जेको बी पांजो क्रूस खणी करे मुंजे पोयां न हले उहो बी मुंजो चेलो न थी सग॒ंदो आहे।”

²⁸ “तवां मां एड़ो केर आहे जेको मिनार ठाराएण चाहे ऐं पहेरयों वई करे खर्चअ जो हिसाब-किताब न करे, के मां उन खे पूरो करे सग॒ंदुम, यां न?

²⁹ छोके अगर हिसाब-किताब करे बिना मिनारअ जी बुनियाद विझे तो ऐं उन खे पूरो नथो करे सगे॒, त इन ते सब डि॒सणवारा उन जी ठठोली करे चवण लग॒ंदा,

³⁰ ‘हिन मांणूअ बुनियाद त विधी परअ मिनारअ खे पूरो न करे सग॒यो।’

³¹ यां एड़ो केर राजा आहे जेको बे॒ राजा सां लड़ाई करण वञे परअ उन खां पहेरयों पांजे सलाहकारन सां गड॒ वई करे सोच-विचार न कंदो, के जेको राजा वीअ हज़ार सैनिकअ खणी असां जे मथां चढ़ाई करण जे लाए अची रयो आहे, त छा असां पांजे ड॒हन हज़ारन सैनिकन सां उन जो सामनो करे सग॒ंदासीं यां न?

³² अगर उहो विचार करण खां पो इन नतीजे ते पहुचें, के मां उन जो सामनो न करे सगं॒दुम, त उहो उन राजा जे डा॒ढो परते हुंदे ही पांजन राज-दूतन खे उन राजा वट मोकले करे संदस खां मेल-मिलाप करण जूं शरतूं पुछंदो।

³³ सो इंय हीं जेको बी तवां मां पांजो सब कुछ त्यागे॒ न छडे॒, त उहो मुंजो चेलो न थी सग॒ंदो आहे। ”

बेस्वादी लूण जो मिसाल

³⁴ “लूण त सुठो आहे, परअ जड॒ऐं हू पांजो स्वाद विञाए तो छडे॒, त पो भला तवां उन खे वरी केड़ी शए सां स्वादिष्‍ट कंदव?

³⁵ छोके बेस्वादी लूण न त ज़मीनअ जे ऐं न हीं भाण जे कम ईंदो आहे। उन खे त मांणू बा॒हिर फिटी करे छडी॒ंदा आइन। जेको बु॒धोता उन खे समझो।”