لوقا 12 - Sindhi Bible (India)

फ़रीसिन जे पाखंडअ खां सावधान

¹ इन विचअ में उते हज़ारन मांणुन जी भीड़अ एतरे हदअ ताईं गड॒ थी वई, के मांणू हिकअ-बे॒ जे मथां किरण लगा॒, तड॒ऐं येशु पहेरयों पांजे चेलन खे चवण लगो॒, “फ़रीसिन जे पाखंडरूपी ख़मीरअ खां सावधान रहेजो।

² छोके काई बी शए लिक्यल कोने, जेकी ज़ाहिर न थींदी ऐं कोई राज़ एड़ो कोने जेको खोल्यो न वेंदो।

³ इन करे जेको बी तवां गुप्‍त में गा॒लायो आहे, उन खे खुल्‍ले में बु॒धायो वेंदो; ऐं जेको तवां बंद कमरन में मांणुन जे कनन में सुसपुस कई आहे, उहा वडे॒ आवाज़अ सां दाबे॒ तां बु॒धायूं वेंदियूं।”

केंखां ड॒कण घुरजे?

⁴ “मुंजा दोस्तओ मां तवां खे तो चवां, उनन खां न ड॒को जेके सिर्फ शरीरअ खे ता मारे सग॒न परअ उन जे अलावा बि॒यो कुछ बी नथा करे सग॒न।

⁵ मां तवां खे बु॒धायां तो, त तवां खे केंखां ड॒कण घुरजे। हुन खां ड॒को जेंखे मरण खां पो तवां खे नर्ग॒अ में विझण जो अधिकार आहे। हा, मां तवां खे चवां तो, हुन खां ही ड॒को।

⁶ छा बि॒न सिक्‍कन में पंज झिड़क्यूं न थ्यूं विकामजन? त बी परमेश्वर उनन मां हिकअ खे बी न विसारींदो आहे।

⁷ सचअ में, तवां जे मथे जा वारअ बी ग॒णयल आइन। ड॒को न। तवां परमेश्वरअ जे लाए केत्रन ही झिड़क्युन खां बी वधीकअ कीमती आयो।”

येशुअ खे अपनाएण यां ठुकराएण

⁸ “मां तवां खे तो चवां, जेको बी ज़ाहिरअ में सबनिन मांणुन जे सामूं मुखे स्वीकार कंदो, त मांणूअ जो पुट बी परमेश्वरअ जे स्वर्ग॒दूतन जे सामूं उन खे स्वीकार कंदो।

⁹ परअ जेको बी मांणुन जे सामूं मुंजो इन्कार कंदो, त परमेश्वरअ जे स्वर्ग॒दूतन जे सामूं उन जो बी इन्कार कयो वेंदो।”

¹⁰ “जेको बी मांणूअ जे पुटअ जे विरोधअ में कुछ चहे, त उहो माफ़ कयो वेंदो परअ जेको बी पवित्र आत्मा जी निंदा तो करे, उन खे कड॒ऐं बी माफ़ न कयो वेंदो। ”

¹¹ “ जड॒ऐं तवां खे प्रार्थना-घरन में ऐं न्याय करण वारन ऐं अधिकारिन जे सामूं पेश कयो वञे, त इया चिंता न कजो के तवां खे कीअं ऐं केड़ो जवाब डि॒यणो आहे ऐं तवां खे छा चवणो आहे।

¹² छोके ओढी॒ मलई पवित्र आत्मा तवां खे सेखारींदी, के तवां खे छा चवण खपे।”

हिकअ मूरख शाहूकारअ जो मिसाल

¹³ तड॒ऐं भीड़अ मां कें मांणूअ येशुअ खे चयो, “हे गुरू, मुंजे भा खे चओ के मुंजे पिता जी मिलक्यतअ मां मुंजो हिस्सो मुखे डे॒।”

¹⁴ येशुअ उन खे चयईं, “हे मुंजा प्यारा, कें मुखे तवां जो जज यां मिलक्यतअ जो बटवारो करण वारो मुकरर कयो आहे?”

¹⁵ इन ते येशुअ मांणुन खे चयो, “डि॒सो! हर हिकअ तरीके जी लालचअ खां सावधान रहो; छोके जीवन, मिलक्यतअ जी घणाहींअ सां माप्यो न वेंदो आहे।”

¹⁶ तड॒ऐं येशुअ उनन खे हिकअ मिसाल डी॒ंदे चयो, “कें शाहूकारअ जे खेतअ में डा॒ढी फसलअ थी।

¹⁷ उहो दिल में विचार करण लगो॒, ‘मां हाणे छा कयां? छोके मूं वट एतरी जग॒ऐ कोने के मां एडी॒ फसलअ खे रखी सगा॒ं।’

¹⁸ पो उहो चवण लगो॒, ‘मां हाणे इंय कंदुम, के पांजा गोदामअ तोड़ाए करे अञा वडा॒ कराईंदुम; ऐं उते पांजो सब अनाज ऐं पांजी मिलक्यतअ रखंदुम,

¹⁹ ऐं पांजे पाण खे चवंदुम, प्यारा, हाणे तो वट घणहीं सालन जे लाए डा॒ढो अनाज ऐं मिलक्यतअ अथई; सो आराम कर, खा-पी, ऐं मौजअ कर।’

²⁰ परअ परमेश्वरअ उन खे चयईं, ‘हे बेवकूफअ! अज॒ रात जो ही तूं मरी वेंदें; पो जेको कुछ तूं गड॒ करे रख्यो तई उहो केंजो थींदो?’

²¹ सागी॒ ही हालतअ उन मांणुन जी थींदी जेके संसारअ में पांजे लाए धन ता इकट्ठो कन, परअ परमेश्वरअ जी नज़रअ में धनी कोनन।”

परमेश्वरअ ते विश्वास रखण

²² येशुअ पांजे चेलन खे चयईं, “इन करे मां तवां खे चवां तो, के जीवन जीयण जे लाए इया चिंता न कयो, के छा खाईंदासीं; ऐं न हीं पांजे शरीरअ जे लाए, के छा पाईंदासीं।

²³ छोके त जीवन खादे खां ऐं शरीर कपड़न खां वधीकअ कीमती आहे।

²⁴ कांवन खे डि॒सो। उहे न हीं पोखिन ता ऐं न हीं कटिन ता; ऐं न हीं उनन जा कोई गोदामअ हुंदा आइन; त बी परमेश्वर उनन खे खाराईंदो आहे। तवां त पख़िन खां वधीकअ कीमती आयो।

²⁵ तवां मां एड़ो केर आहे जेको चिंता करे पांजे जीवनअ जो हिक पल बी वधाए सग॒ंदो आहे?

²⁶ जड॒ऐं चिंता करे तवां एतरो नंढो कम नथा करे सगो॒, त बाकी बि॒युन गा॒ल्युन जी चिंता छोता कयो?”

²⁷ “जंगली गुलन खे डि॒सो। उहे कीअं ता वधन! उहे पाण खे सींगारण जे लाए काई महेनतअ नथा कन। त बी मां तवां खे चवां तो, के राजा सुलैमान बी पांजी सजी॒ शानो-शोकतअ में इनन गुलन मां कें हिकअ वांगुर बी कपड़ा पातल न हुयो।

²⁸ जेकड॒ऐं परमेश्वर मैदानअ जी गाह खे जेकी अज॒ आहे ऐं सुभाणे बाहे में फिटी कई वेंदी, पाराए तो; त हे अल्पविश्‍वासियो! उहो तवां खे छो न पाराईंदो?

²⁹ इन करे तवां इन गा॒ल्युन जे ही सोच में न रहो, के छा खाईंदासीं ऐं छा पीअंदासीं ऐं न हीं इन गा॒ल्युन जी चिंता कयो।

³⁰ छोके संसारअ जा जेके बी मांणू परमेश्वरअ खे नथा सुञारन उहे सब इन गा॒ल्युन जी ही गो॒ला में रवंदा आइन; परअ तवां जे स्वर्गी॒य पिता खे खबरअ आहे के तवां खे इन शयुन जी ज़रूरत आहे।

³¹ इन करे तवां परमेश्वरअ जे राज॒अ जी गो॒ला में रहो, त इहे सब शयूं बी तवां खे मिली वेंदियूं।”

स्वर्ग॒अ में खज़ानो इकट्ठो करण

³² “हे नंढा झुण्डअ, ड॒को न; छो के तवां जे पिता खे इयो ही वण्यो, के तवां खे पांजे राज॒अ में शामिल करे।”

³³ तवां पांजी मिलक्यतअ विकणे, उन मां उनन खे ज़रूर दान कयो जेके ज़रूरतमंदअ आइन; इंय करण सां तवां पांजे लाए एड़ा ब॒टूं तैयार कंदव जेके जूना नथा थ्यन। स्वर्ग॒अ में एड़ो खज़ानो इकट्ठो कयो जेको घटजंदो कोने। उते कोई चोर न उन जे वेझो ईंदो ऐं न हीं कोई कीड़ो उन खे बिगाड़े सग॒ंदो आहे।

³⁴ छोके जिते तवां जो ख़ज़ानो आहे, उते ही तवां जो दिल बी लगो॒ प्यो हुंदो।

जाग॒ंदा रहो

³⁵ येशुअ पांजे चेलन खे चयईं, “तवां जी कमर हमेशा कस्यल रहे ऐं तवां जा डी॒आ ब॒रंदा रवन।

³⁶ तवां उनन दासन वांगुर ठहो जेके पांजे मालिकअ जी राह प्या डि॒सन, के उहो कड॒ऐं शादीअ मां वापस मोटी ईंदो, ताकि जड॒ऐं उहो दरवाज़े खे खटखटाए, त उहे ओढी॒ मलई उन जे लाए दरवाज़ो खोलिन।

³⁷ धन्य आइन उहे दासअ जेंजो मालिक वापस अचण ते उनन खे जाग॒ंदो डि॒से; मां तवां खे सच तो चवां, के उहो हिकअ दासअ वांगुर कपड़ा पाए करे उनन खे भोज॒न खाराएण जे लाए व्यारींदो ऐं उनन खे पाण रोटी पाए डी॒ंदो।

³⁸ धन्य आइन उहे दासअ जेंखे मालिक रात जे बे॒ यां टें पहेरअ जे अचण ते बी इंय हीं जाग॒ंदो डि॒से।

³⁹ परअ इयो सम्झी वठो अगर घरअ जे मालिकअ खे इया खबरअ हुजे आं, के चोर केडी॒ मेलह ईंदो, त उहो जाग॒ंदो रहे आं ऐं पांजे घरअ में चोरी थ्यण न डे॒आं।

⁴⁰ इन करे तवां बी तैयार रहो; छोके जैं वक़्त तवां सोच्यो बी न हुंदव, उन हीं वक़्त मांणूअ जो पुट अची वेंदो।”

ईमानदार ऐं बईमान भण्डारी

⁴¹ पतरसअ येशुअ खां पुछो, “हे प्रभु, छा इयो मिसाल तूं असां जे लाए तो चईं यां सबनिन जे लाए?”

⁴² प्रभुअ जवाबअ में चयईं, “केर एड़ो विश्वासयोग्य ऐं बु॒द्धिमान भण्डारी आहे? जेंखे उन जो मालिक पांजे दास-दासियुन जे मथां मुकरर करे ताकि उहो उनन खे सही वक़्तअ ते खादो डे॒।

⁴³ धन्य आहे उहो दास जेंखे उन जो मालिक वापस अचण मेलह इंय हीं कंदो डि॒से।

⁴⁴ मां तवां खे सच तो चवां उहो उन दासअ खे पांजी सजी॒ मिलक्यत जे मथां अधिकारी मुकरर कंदो।

⁴⁵ परअ अगर उहो दास पांजे दिल में विचार करण लगे॒, के मुंजो मालिक अचण में देर करे रयो आहे ऐं उहो दास-दासियुन खे मारण-कुटण लगे॒ ऐं खाएण-पीअण ऐं नशेबाजी करण लगे॒,

⁴⁶ तड॒ऐं उन दासअ जो मालिक एड़े डीं॒हं ते ईंदो जड॒ऐं उहो दास हुन जी राह न डि॒संदो हुंदो ऐं एड़े वक़्तअ ते जेंजे बारे में उन खे खबरअ न हुंदी। उहो मालिक उन दासअ खे डा॒ढी सख़्त सजा डी॒ंदो ऐं उन जो अंत बी उअं हीं थींदो जीअं अविश्वासिन जो थींदो आहे।

⁴⁷ उहो दास जेको पांजे मालिकअ जी इच्छा खे जा॒ण्ण खां पो बी, तैयार न रयो ऐं न ही उन जी मरज़ीअ जे मुजुब कम कयईं, उहो डा॒ढी मारअ खाईंदो।

⁴⁸ परअ जेको दास मालिकअ जी इच्छा न जा॒णे करे मारअ खाएण जो कम करे उन दासअ खे थोड़ी ही मारअ मिलंदी। इन करे जेंखे वधीकअ डि॒नो वयो आहे, उन खां वधीकअ वरतो वेंदो; ऐं जेंखे डा॒ढो सौंप्यो वयो आहे उन खां वधीकअ घुरयो वेंदो।”

येशुअ जे अचण जो अंजाम

⁴⁹ मां धरतीअ ते बाहे लगा॒एण आयो आयां; ऐं काश इया पहेरयों खां ही ब॒रयल हुजे आं।

⁵⁰ मुखे हिक बपतिस्मो वठणो आहे, परअ जेसताईं उहो पूरो न थे तेसताईं, मां केतरोही त परेशान रवंदुम।

⁵¹ “छा तवां इंय ता समझो, के मां धरतीअ ते सुलेह कराएण आयो आयां? मां तवां खे चवां तो के; न, मां त अलग कराएण आयो आयां।

⁵² छोके हाणे खां अगर हिकअ घरअ में पंजअ बाती हुंदा, त उहे पाण में हिकअ बे॒ जे खिलाफ थींदा। टे बि॒न जे खिलाफ ऐं ब॒ टिन जे खिलाफ थींदा।

⁵³ उहे हिकअ बे॒ जो विरोध कंदा। पिता पांजे पुटअ जे खिलाफ थींदो ऐं पुट पांजे पिता जे। माता पांजी धीअ ऐं धीअ पांजी माता जे। सस पांजी नूअं जे खिलाफ थींदी ऐं नूअं पांजी सस जे।”

वक़्तअ खे सुञारण

⁵⁴ येशुअ भीड़अ खे इयो बी चयईं, “जड॒ऐं तवां ओलहा जी दिशा खां बादलअ ता ईंदे डि॒सो, त ओढी॒ मेलह चओ ता, ‘बरसात पवण वारी आहे’ ऐं इंय हीं थे बी तो।

⁵⁵ जड॒ऐं ड॒खण दिशा खां हवा ती लगे॒, त तवां चओ ता, के गरमी थींदी ऐं वाकए में इंय थे बी तो।

⁵⁶ हे पाखंडीयो, तवां धरती ऐं आसमानअ जी निशानियुन खां मौसमअ खे सुञाणे ता वठो, त पो छो इन वक़्त जेको थी रयो आहे, उन खे नथा सम्झी सगो॒?”

फ़रीयादीअ सां सुलेह करण

⁵⁷ “तवां पाण हीं फैसलो छो नथा कयो, के सही छा आहे?

⁵⁸ जेकड॒ऐं कोई फ़रियादी तोते केस करे ऐं तोखे अदालतअ में वठी वञे, त रस्ते में ही उन सां सुलेह करण जी कोशिश कर। इंय न थे के हू तोखे घसीटे करे जजअ डा॒ं वठी वञे ऐं जज तोखे सिपाहीअ जे हवाले करे ऐं सिपाही तोखे जेल में विझी छडे॒।

⁵⁹ मां तोखे चवां तो, के जेसताईं तूं पाई-पाई न भरे छडी॒ंदे तेसताईं तूं उतां न छडा॒एजंदे।”