لوقا 11 - Sindhi Bible (India)

येशुअ जी सिख्या प्रार्थना जे बारे में

¹ हिकड़े डीं॒ह कें जग॒ऐ ते येशु प्रार्थना करे रयो हो। जड॒ऐं उहो प्रार्थना करे चुको, त हुन जे चेलन मां हिकअ ज॒णे संदस खे चयो, “हे प्रभु, जीअं यूहन्ना पांजे चेलन खे प्रार्थना करण सेखारयो आहे उअं हीं तूं असां खे बी सेखार।”

² येशुअ पांजे चेलन खे चयईं, “जड॒ऐं तवां प्रार्थना कयो त इंय चहे जोः ‘हे पिता, तुंजो नालो पवित्र मञयो वञे, तुंजो राज॒ अचे।

³ असां खे अज॒ जी रोजी रोटी डे॒ जेंजी असां खे ज़रूरतअ आहे।

⁴ असां जे पापन खे माफ़ कर, छोके त असां बी पांजे हर हिकअ गुनेहगारन खे माफ़ कंदा आयूं, ऐं प्रलोभन अचण जे वक़्त असां खे पाप करण खां बचाए’।”

प्रार्थना जे बारे में येशुअ जो मिसाल

⁵ तड॒ऐं येशुअ उनन खे चयो, “मञो, तवां मां कोई अध रात जो पांजे दोस्तअ वट वञी करे चहे, ‘हे दोस्तअ; मुखे टे रोटियूं उधारियूं डे॒।

⁶ छो त मुंजो हिक दोस्त मुसाफिरी कंदो मूं वट आयो आहे ऐं उन खे खाराएण जे लाए मूं वट कुछ बी कोने।’

⁷ परअ उहो तवां खे अंदरां खां इंय जवाब डे॒, ‘के मुखे परेशान न कर। हाणे त मां दरवाज़े खे तालो बी लगा॒ए छड॒यो आहे। मुंजा बा॒रअ मुसां गड॒ पलंगअ ते सुम प्या आइन। इन करे मां हाणे उथी करे तोखे कुछ नथो ड॒ई सगां।’

⁸ मां तवां खे चवां तो, भले ही हू दोस्तीअ जे करे, न बी उथे परअ हू पांजी इज़तअ जे करे, के उहा खराब न थे तवां जे बिना शर्म जे हड़ी घड़ी घुरण जे करे हू उथंदो ऐं तवां खे जेतरी ज़रूरतअ आहे ओतरो डी॒ंदो।

⁹ इन करे मां तवां खे चवां तो, घुरो त तवां खे डि॒नो वेंदो; गो॒ल्यो त तवां खे मिलंदो; ऐं दरवाज़ो खटखटायो त तवां जे लाए खोल्यो वेंदो।

¹⁰ छोके जेको घुरंदो, उन खे मिलंदो आहे; ऐं जेको गो॒लींदो, उन खे लब्जंदो आहे; ऐं जेको खटखटाईंदो, उन जे लाए दरवाज़ो खोल्यो वेंदो आहे।

¹¹ छा तवां मां कोई एड़ो पिता आहे के तवां जो बा॒र मछली घुरे त मछलीअ जे बदलां तवां उन खे नांग डि॒यो?

¹² यां बेदो घुरे त उन जे बदलां विछूं डि॒यो?

¹³ सो जड॒ऐं तवां बुरा थी करे बी पांजन बा॒रन खे सुठयूं शयूं डि॒यण जा॒णो ता, त पो भला तवां जो स्वर्गी॒य पिता पांजे घुरण वारन खे पवित्र आत्मा छो न डीं॒दो। ”

येशु ऐं बालज़बूल

¹⁴ हिकअ दफ़े येशु हिकअ गूंगे मांणूअ मां दुष्‍टआत्मा खे कढी रयो हो। जड॒ऐं उहा दुष्‍टआत्मा हुन मांणूअ मां निकरी वई त उहो गा॒लाएण लगो॒; इयो डि॒सी मांणुन खे ताजुब थ्यो।

¹⁵ परअ मांणुन मां कुछ ज॒णन इंय चयो, “हे त बालज़बूल नाले जे दुष्‍टआत्माउन जे सरदारअ जी मददअ सां दुष्‍टआत्माउन खे कढंदो आहे।”

¹⁶ परअ कुछ ज॒णन येशुअ जी परीक्षा करण जे लाए संदस खां स्वर्ग॒अ जी काई निशानी घुरी।

¹⁷ परअ हुन खे खबरअ हुई के उहे छा सोचे रया आइन। इन करे येशुअ उनन खे चयईं, “जैं राज॒अ में पाण में हीं फूट हुजे, त उहो राज॒ त खत्तम थी वेंदो आहे; ऐं फूट हुजण सां त घरअ जा घरअ बी तबाह थी वेंदा आइन।

¹⁸ सो अगर शैतान पांजो ही विरोधी थी वञे, त पो भला उन जो राज॒ कीअं टिक्यो रवंदो? छोके तवां मुंजे बारे में चओ ता के मां बालज़बूलअ जी मददअ सां दुष्‍टआत्माउन खे तो कढां।

¹⁹ अगर मां बालज़बूलअ जी मददअ सां दुष्‍टआत्माउन खे तो कढां, त पो भला तवां जा चेला केंजी मददअ सां कढंदा आइन? इन करे उहे ही तवां खे गलत ता साबित कन।

²⁰ परअ जेकड॒ऐं मां परमेश्वरअ जी सामर्थअ सां दुष्‍टआत्माउन खे तो कढां, त पो जा॒णे वठो परमेश्वरअ जो राज॒ तवां जे विचअ में अची पौंतो आहे।

²¹ जड॒ऐं कोई ताकतवार मांणू हथियारन सां गड॒ पांजे घरअ जी रखवाली कंदो आहे, त उन जो माल सामान सलामत रवंदो आहे।

²² परअ जड॒ऐं उन खां बी कोई वधीकअ ताकतवर मांणू उन ते चढ़ाई करे संदस खे हाराए छडे॒, त उहो उन जे हथियारन खे जेंजे मथां उन जो भरोसो हो फुरे छडी॒ंदो ऐं संदस जो माल सामान लूटे करे विराए छडी॒ंदो।”

²³ “जेको मुसां गड॒ कोने, उहो मुंजे खिलाफ आहे; जेको मांणुन खे गड॒ करण में मुंजी मददअ नथो करे, उहो हकीकतअ में उनन खे विखेरे तो।”

दुष्‍टआत्माउन जो वापस मोटी अचण

²⁴ “जड॒ऐं काई दुष्‍टआत्मा कें मांणूअ मां निकरी ती वञे, त उहा वीरान जगे॒हुन में वञी करे पांजे आराम करण जे लाए जग॒ऐ ती गो॒ले परअ जग॒ऐ न मिलण जे करे उहा इंय ती चहे, ‘मां उन हीं घरअ में वापस मोटी वेंदम जेमां मां निकती वम।’

²⁵ वापस मोटण ते उहा दुष्‍टआत्मा उन घरअ खे हिक दम साफ-सुथरो ऐं सजायल ती पाए।

²⁶ तड॒ऐं उहा वञी करे पाण खां बी वधीकअ सतअ बि॒यूं बुरी दुष्‍टआत्माउन खे वठी ती अचे ऐं उहे सब उन मांणूअ में अची वास त्यूं कन, इन करे उन मांणूअ जी हालत पहेरयों खां बी वधीकअ खराब ती थी वञे।”

धन्य केर आहे?

²⁷ येशु इहे गा॒ल्यूं करे ही प्यो, त भीड़अ मां कें हिकअ स्त्रीअ वडे॒ आवाज़अ सां चयईंस, “धन्य आहे उहा कोखअ जेमें तूं रहें ऐं उहा छाती जेकी तूं धाई।”

²⁸ इन ते येशुअ चयईं, “परअ वधीकअ धन्य उहे आइन जेके परमेश्वरअ जो वचन बु॒धंता ऐं उन ते हलन ता।”

स्वर्ग॒अ जी निशानी घुरण

²⁹ जड॒ऐं भीड़अ वधंदी पी वञे, त उहो चवण लगो॒, “इन पीढ़ीअ जा मांणू दुष्‍ट आइन। इहे मुखां स्वर्ग॒अ मां काई निशानी तां घुरन; परअ इनन खे योना भविष्यवक्‍ता जी निशानीअ खे छडे॒ बी॒ काई बी निशानी न डि॒नी वेंदी।

³⁰ जीअं योना भविष्यवक्‍ता नीनवे जे मांणुन जे लाए निशानी ठयो, उअं हीं मांणूअ जो पुट बी इन पीढ़ीअ जे लाए निशानी ठवंदो।

³¹ न्याय जे डी॒ंहं ते ड॒खण देशअ जी राणी शीबा इन पीढ़ीअ जे मांणुन सां गड॒ बीह करे, उनन खे डो॒ही ठहेराईंदी, छोके उहा सुलैमानअ जो ज्ञान जेको बु॒द्धिअ जो ज्ञान आहे, उन खे बु॒धण जे लाए डा॒ढो परतां खां आई हुई ऐं डि॒सो हिते उहो आहे जेको सुलैमानअ खां बी महान आहे।

³² न्याय जे डी॒ंहं ते नीनवे जा मांणू इन पीढ़ीअ जे मांणुन सां गड॒ बीह करे उनन खे डो॒ही ठहेराईंदा; छोके उनन योना भविष्यवक्‍ता जो प्रचार बु॒धी करे पांजे पापन खां तौबां कयऊं ऐं डि॒सो हिते उहो आहे जेको योना खां बी महान आहे। ”

डी॒ए जी मिसालअ

³³ “कोई बी मांणू डी॒ओ बा॒रे उन खे लिकाए करे यां कें कटोरे जे हेठां न रखंदो आहे परअ ज्॒यारीअ ते रखंदो आहे, के जेंसां बा॒हिरां खां अंदर अचण वारन खे रोशनी मिले।

³⁴ तवां जी अख डी॒ए वांगुर आहे, जेका तवां जे शरीरअ खे रोशनी डी॒ंदी आहे। अगर तवां जी अख्यूं साफ़ आइन, त तवां जो सजो॒ शरीर बी रोशनी में आहे। परअ अगर उहे साफ कोनन, त तवां जो शरीर बी अंधेरे में आहे।

³⁵ इन करे ध्यान रखजो, के जेकी रोशनी तवां में आहे उहा अंधेरो न थी वञे।

³⁶ अगर तवां जो सजो॒ शरीर रोशनीअ में हुजे ऐं शरीरअ जी कें बी कुंडअ में अंधेरो न हुजे, त तवां जो सजो॒ शरीर उअं हीं रोशनीअ में हुंदो, जीअं डी॒ओ पांजी चमकअ सां तवां खे रोशनी डी॒ंदो आहे।”

फ़रीसिन ऐं धर्म-शास्त्रिन ते हाय

³⁷ जड॒ऐं येशु इहे गा॒ल्यूं सेखारे चुको, त उते हिकड़े फ़रीसीअ हुन खे पाण सां गड॒ रोटी खाएण जो न्योतो डि॒नईंस। सो उहो उन सां गड॒ वञी रोटी खाएण वेठो।

³⁸ परअ उहो फ़रीसी इयो डि॒सी हैरान थ्यो के येशुअ रोटी खाएण खां पहेरयों हथअ न धोतईं।

³⁹ तड॒ऐं प्रभुअ उन खे चयो, “तवां फ़रीसी, कटोरे ऐं थालीअ खे बा॒हिरां-बा॒हिरां खां त साफ धोओ ता परअ तवां जे अंदरअ में लालच ऐं दुष्‍टता भरयल आहे।

⁴⁰ हे बेसम्झओ, जैं असां जो बा॒हिरयों भाग॒ मतलब शरीर ठायो आहे, छा हुन ही असां जो अंदरअ जो भाग॒ बी न ठातो तईं?

⁴¹ इन करे जेकी बी मिलक्यतअ तवां वट आहे उन खे ग़रीबन में दान करे छड॒यो, त तवां जो अंदरअ जो भाग॒ परमेश्वरअ जी नज़रअ में शुद्ध ऐं हुन खे स्वीकारयोग्य हुंदो।”

⁴² “हे फ़रीसियो, तवां ते हाय! तवां फूदीने ऐं सुदाब ऐं हर तरीके जी भाजि॒युन जी कमाईअ जो ड॒हों हिस्सो डि॒यण में ध्यान त रखो ता परअ न्याय ऐं परमेश्वरअ जे प्रति प्यार खे नजरअंदाज करे छड॒यो तव; तवां जे लाए सही इयो हो, के इन खे बी कंदा रहो आं ऐं नजरअंदाज न कयो आं।

⁴³ हे फ़रीसियो, तवां ते हाय! छोके तवां खे प्रार्थना-घरन में मुख्य-मुख्य आसनअ ते व्यण ऐं मांणू तवां खे बज़ारुन में नमस्कार कन इयो वणंदो आहे।

⁴⁴ हे फ़रीसियो, तवां ते हाय! छोके तवां उन लिक्यल क़ब्रुन वांगुर आयो जेंजे मथां काई निशानी लग॒लअ कोने ऐं मांणू अंजाने में तवां जे मथां हलन-फिरन प्या ता।”

⁴⁵ तड॒ऐं हिकअ धर्मशास्त्रीअ येशुअ खे चयईं, “हे गुरू, इंय चई करे तूं असां जी बी बेइज़ती करे रयो आईं।”

⁴⁶ इन ते येशुअ चयईं, “हे धर्मशास्त्रीयो, तवां ते बी हाय! छोके तवां मांणुन जे मथां एडो॒ वडो॒ भार ता विझो जेंखे खरण डा॒ढो मुश्किल आहे परअ उन भारअ खे खरण में तवां मांणुन जी कुछ बी मददअ नथा कयो।

⁴⁷ हाय तवां ते! छोके तवां उन भविष्यवक्‍ताउन जी क़ब्रुन खे ठायो ता जेंखे तवां जे अबन-डा॒ड॒न मारे छड॒यो हुयो।

⁴⁸ सो तवां इयो करे साबित ता कयो, के जेको तवां जे अबन-डा॒ड॒न कयो उन सां तवां सहेमत आयो; छोके तवां जे अबन-डा॒ड॒न त, उनन खे मारे छड॒यो हो ऐं तवां उनन जूं क़ब्रूं ता ठायो।

⁴⁹ इन करे परमेश्वरअ जेको बु॒द्धिमान आहे, हुन चयो आहे, ‘मां उनन वट भविष्यवक्‍ताउन ऐं प्रेरितन खे मोकलींदुम परअ उहे उनन मां केत्रन हीं खे मारे छडीं॒दा ऐं केत्रन हीं खे सताईंदा।’

⁵⁰ छोके जेतरन बी भविष्यवक्‍ताउन जो खून सृष्‍टिअ जी शुरूआत खां वठी हाणे ताईं वहायो वयो आहे उनन सबनिन जे खूनअ जो जिम्मेदार इन पीढ़ीअ खे मञयो वेंदो।

⁵¹ इन जो मतलब आहे हाबिलअ जी हत्या खां वठी करे भविष्यवक्‍ता जकरयाह जी हत्या ताईं जेंखे मंदरअ में वेदी ऐं पवित्र-जाय जे विचअ में मारयो वयो हो। मां तवां खे चवां तो इन सबनिन जो जिम्मेदार इन पीढ़ीअ खे ही मञयो वेंदो।

⁵² हाय आ तवां ते धर्मशास्त्रीयो, छोके तवां उहा ज्ञानअ जी कूंजी जेकी परमेश्वरअ जे रस्ते खे ती डे॒खारे मांणुन वटां हटाए छडी॒ आहे ऐं इंय करे न तवां पाण परमेश्वरअ जे रस्ते खे सुञातो आहे ऐं न मांणुन खे सुञारण डि॒यो ता।”

⁵³ जड॒ऐं येशु उतां निकतो, त उहे धर्मशास्त्री ऐं फ़रीसी डा॒ढो बुरी तरीके सां हुन जो विरोध करण लगा॒ ऐं संदस खां डा॒ढिन गा॒ल्युन जे बारे में सवाल करण लगा॒।

⁵⁴ उहे इन मौके जी फिराकअ में हुवा, के संदस जी काई गा॒ल खे पकड़े करे हुन खे फासाएन।