لوقا 10 - Sindhi Bible (India)

बा॒तर चेलन खे मुकरर करे मोकलण

¹ उन खां पो प्रभुअ बि॒यन बा॒तर चेलन खे मुकरर कयईं ऐं संदन खे पांजे अग॒यां बि॒न-बि॒न जे जोड़े में उनन नगरअ ऐं गामड़न में मोकल्यईं, जिते हू पाण वञण वारो हो।

² येशुअ उनन खे चयईं, “पकल फसलअ त डा॒ढी आहे परअ उन खे कटणवारा मज़ूरअ थोड़ा ही आइन; इन करे फसलअ जे स्वामीअ खे विनती कयो, के हू पांजी फसलअ खे कटण जे लाए मज़ूरन खे मोकले।

³ वञो; परअ याद रखजो मां तवां खे रिढुन वांगुर भेड़ियन जे विचअ में तो मोकल्यां।

⁴ तवां पाण सां गड॒ ब॒टूं, थेलो ऐं जूता कुछ बी न खणी वञ जो ऐं न रस्ते में वेंदें वक़्त केंखे नमस्कार कजो।

⁵ तवां जैं बी घरअ में वञो त उते सबनिन खां पहेरयों ‘उन घरअ जे लाए सुख ऐं शांति घुरजो।’

⁶ अगर उते कोई एड़ो मांणू हुंदो जेको सुख ऐं शांति चाहींदड़ हुंदो, त तवां जी आसीसअ उन जे मथां रवंदी, न त तवां वट वापस मोटी ईंदी,

⁷ ऐं घर-घर न घुमजो परअ उन हीं घरअ में रहेजो ऐं उते जेको कुछ मिलेवअ उहो ही खाएजो-पीजो, छोके मज़ूरअ खे पांजी मज़ूरी मिलण खपे।

⁸ जैं बी नगरअ में तवां वञो ऐं अगर उतां जा मांणू तवां जो स्वागत कन, त जेको बी तवां जे सामूं रख्यो वञे उहो ही खाएजो।

⁹ उन नगरअ में जेके बी बीमारअ हुजन उनन खे ठीक कजो ऐं संदन खे इंय चहेजो, ‘परमेश्वरअ जो राज॒ तवां जे वेझो अची पौंतो आहे।’

¹⁰ परअ जैं नगरअ जां मांणू तवां जो स्वागत न कन, त उन नगरअ जे चौंकन में वञी करे चहे जो,

¹¹ ‘तवां जे नगरअ जी मिट्टी बी, जेकी असां जे जूतन ते लग॒ल आहे उन खे असां तवां जे सामूं छंडे ता छड॒यऊं; परअ त बी तवां इयो याद रखजो के परमेश्वरअ जो राज॒ तवां जे वेझो अची पौंतो आहे।’

¹² मां तवां खे चवां तो, के न्याय जे डीं॒हं ते उन नगरअ जा मांणू सदोम नगरअ जे मांणुन खां वधीकअ सजा भोगी॒ंदा।”

अविश्वासी नगरन ते धिक्‍कार

¹³ “हाय खुराजीन ऐं बेतसैदा जे मांणुन जे मथां! जेके सामर्थअ जा कमअ तवां में कया वया आइन जेकड॒ऐं उहे सूर ऐं सैदा में कया वञन हां, त उतां जां मांणू कडो॒ को टाटअ जो कपड़ो ओढ़े करे ऐं रखअ में वई करे पांजे पापन मां तौबां कन हां।

¹⁴ इन करे न्याय जे डीं॒हं ते तवां सूर ऐं सैदा जे नगरअ जे मांणुन खां वधीकअ सजा भोगी॒ंदव।

¹⁵ तवां जेके कफरनहुम में ता रहो, तवां खे छातो लगे॒, के तवां जो स्वर्ग॒अ में आदर कयो वेंदो? बिल्कुल न परअ तवां नर्ग॒अ में विधा वेंदव।”

¹⁶ येशुअ पांजे चेलन खे चयईं, “जेको तवां जी बु॒धे तो, समझो उहो मुंजी ही तो बु॒धे; ऐं जेको तवां खे ठुकराए तो, मञो उहो मुखे ही तो ठुकराए; ऐं जेको मुखे तो ठुकराए, मञो उहो मुंजे मोकलण वारे खे तो ठुकराए।”

बा॒तर चेलन जो मोटण

¹⁷ उहे बा॒तर चेला डा॒ढो आनंद सां मोटया ऐं येशुअ वट अची करे चवण लगा॒, “हे प्रभु, जड॒ऐं असां दुष्‍टआत्माउन खे तुंजे नाले सां हुकुम प्या डि॒यऊं त उहे बी असां जो मञन पयूं।”

¹⁸ येशुअ उनन खे चयो, “जीअं बिजली आसमानअ मां किरंदी आहे उअं हीं मां शैतानअ खे शिकस्त खाई किरंदे डि॒सी रयो हुम।

¹⁹ डि॒सो, मां तवां खे नांगन ऐं विछुन ऐं दुश्मनअ जे सजे॒ सामर्थअ खे कुचलण जो अधिकार डि॒नो आहे; ऐं काई बी शए तवां खे नुकसान न पहुंचाईंदी।

²⁰ त बी इन ते आनंद न मनायो के दुष्‍टआत्माऊं तवां जो मञनत्यूं, परअ इन ते आनंद मनायो के तवां जो नालो स्वर्ग॒अ में लिख्यो वयो आहे।”

येशुअ जो शु्क्र करण

²¹ येशु उन ही वक़्त पवित्र आत्मा जे द्वारा आनंदअ सां भरजी वयो ऐं चयईं, “हे पिता, स्वर्ग॒ ऐं धरतीअ जा प्रभु मां तुंजो शु्क्र-गुज़ार आयां, के तूं इन गा॒ल्युन खे उनन खां जेके पांजे पाण खे ज्ञानी ऐं होशियार ता समझन लिकाए रख्यो तई ऐं जेंजो स्वभाव बा॒रन वांगुर आहे उनन ते प्रघट कयो तई। हा हे पिता, छोके तोखे इयो ही वण्यो।

²² मुंजे पिता सब कुछ मुखे सौंपे छड॒यो तईं; ऐं पिता परमेश्वरअ खां सिवाए केंखे बी खबरअ कोने, के हकीकतअ में पुट केर आहे ऐं पुटअ खां सिवाए केंखे बी खबरअ कोने के पिता परमेश्वर कीअं आहे ऐं सिर्फ उन खे ही खबरअ पवंदी जैं ते पुट ज़ाहिर करण चाहींदो।”

²³ जड॒ऐं उहे अकेले में हुवा, त येशुअ पांजे चेलन डा॒ं मुड़ी करे उनन खे चयईं, “धन्य आयो तवां, के इहे सब गा॒ल्यूं डि॒सो ता।

²⁴ छोके मां तवां खे चवां तो, के डा॒ढन हीं भविष्यवक्‍ताउन ऐं राजाहुन इहे सब गा॒ल्यूं डि॒सण चायूं जेके तवां डि॒सो ता परअ उहे न डि॒सी सग॒या ऐं जेकी गा॒ल्यूं तवां बु॒धो ता उहे बी बु॒धन परअ उहे न बु॒धी सग॒या।”

सबनिन खां मुख्य आज्ञा

²⁵ हिक डीं॒ह येशु मांणुन खे सिख्या ड॒ई रयो हो, त उते हिक धर्म-शास्त्री येशुअ खे आज़माएण जे लाए संदस खां सवाल पुछण लगो॒, “हे गुरू, अनंत जीवनअ जो वारिस थ्यण जे लाए मां छा कयां?”

²⁶ तैंते येशुअ उन खे चयईं, “मूसा जे नियमन में छा लिख्यल आहे? उन में तूं छा पढ़यो तई?”

²⁷ उन येशुअ खे जवाब डि॒नो, “तूं पांजे प्रभु परमेश्वरअ खे, पांजे पूरे दिल सां ऐं पांजे प्राण सां प्रेम कर। ऐं पांजी सजी॒ ताकतअ सां प्रेम कर ऐं पांजी बु॒द्धिअ सां प्रेम कर। ऐं तूं पांजे पाड़ेसिरीअ सां उअं हीं प्रेम कर जीअं तूं पांजे पाण सां तो करीं।”

²⁸ येशुअ उन खे चयईं, “तूं बिल्कुल सही जवाब डि॒नो तई। इंय हीं कर, त तूं अनंत जीवनअ जो वारिस थींदे।”

²⁹ परअ उन पांजे पाण खे सही साबित करण जे लाए येशुअ खां पुछो, “त पो मुंजो पाड़ेसिरी केर आहे?”

दयालू सामरीअ जो मिसाल

³⁰ येशुअ उन खे इन जो जवाब हिक मिसाल ड॒ई करे चयईं, “हिक मांणू यरूशलेम शहेरअ खां यरीहो नगरअ डा॒ं वञी रयो हो, त रस्ते में डाकुन उन खे घेरे छड॒यो ऐं संदस जा कपड़ा लाए छड॒यऊं ऐं उन खे मारे-कुटे अधमुअल करे छडे॒ व्यस।

³¹ ऐं इंय थ्यो, के उन हीं रस्ते तां हिक याजक लंगे पयो परअ उहो उन मांणूअ खे डि॒सी करे नजरअंदाज करे हली वयो।

³² इंय हीं हिक लेवी बी उन रस्ते तां लंग्यो परअ उहो बी उन खे डि॒सी नजरअंदाज करे हली वयो।

³³ पो हिक सामरी उतां मुसाफिरी कंदे लंगे पयो उन जड॒ऐं इन मांणूअ खे डि॒ठईं, त संदस खे उन जे मथां दया आई।

³⁴ उहो उन वट वयो ऐं उन जे जख़्मन ते तेल ऐं दाखरस मखे करे पट्टियूं ब॒धयईंस ऐं पांजे गड॒हअ ते चाढ़े करे उन खे मुसाफिरखाने में वठी वयो ऐं संदस जी सेवा कयईं।

³⁵ पो बे॒ डीं॒हं ते उन सामरीअ ब॒ दिनारअ कढी मुसाफिरखाने जे मालिकअ खे ड॒ई करे चयईंस, ‘इन जी सेवा कंदो रहेजें ऐं अगर उन खां पो बी अञा वधीकअ खर्च थ्यई, त उहो बी मां तोखे वापस अची करे डी॒ंदो में।’ ”

³⁶ येशुअ उन धर्म-शास्त्री खां पुछो, “हाणे बु॒धाए जैं मांणूअ खे डाकुन मारयो हो, इन टिनिन मां उन जो पाड़ेसिरी केर थ्यो?”

³⁷ तैंते उन येशुअ खे चयो, “उहो, जैं उन जे मथां दया कई।” येशुअ उन खे चयईं, “वञ पो तूं बी इंय हीं कर।”

मार्था ऐं मरियम जे घर येशु

³⁸ येशु ऐं संदस जा चेला जड॒ऐं यरूशलेमअ डा॒ं वञन पया, त रस्ते में उहे हिकअ गामअ में पौंता जिते मार्था नाले जी हिकअ स्त्रीअ उनन जो पांजे घरअ में स्वागत कयईं।

³⁹ मार्था जी हिकअ भेण हुई जेंजो नालो मरियम हो। उहा येशुअ जे पेरन ते वई करे संदस जी सिख्या बु॒धी रई हुई।

⁴⁰ परअ मार्था कम कंदे-कंदे हैरान थी वई, सो इन करे उहा येशुअ वट अची करे चवण लगी॒, “ हे प्रभु छा तोखे कुछ बी चिंता कोने के मुंजी भेण मुखे सेवा करण जे लाए अकेलो छडे॒ डि॒नो आहे? इनलाए उन खे चओ के मुंजी मदद करे।”

⁴¹ इन ते येशुअ उन खे चयईं, “मार्था, हे मार्था; तूं डा॒ढिन गा॒ल्युन जी चिंता ती करीं ऐं परेशान ती थीं।

⁴² परअ हिकड़ी गा॒ल जेका डा॒ढी ज़रूरी आहे मरियम उन उत्तम भाग॒अ खे चूंडे वरतो आहे, जेको उन खां कड॒ऐं बी खस्यो न वेंदो। ”