Apokalupo 15 - Ginitago Variguna

Aneru imaima ruarua (7) ḡeri ai vevaḡa-midigumidigu dagarari rakavari 7

¹ Benamo gubai vetoḡa baregona ta, nuḡa-farevaḡi dagarana aḡitaiato: Aneru 7 aḡitarito, ḡeri ai tu dagara rakava kwaikwairi 7, tarimarima vaḡa-midigumidiguri dagarari. Mo tu dagara rakavari magona. Korana moḡeri na Barau ḡena baru bevaḡa-kori ginikauani.

² Ma davara ta veḡia kavana ma karavana aḡitaiato. Mo davara sevinai tu mo tarimarima, vevaḡa-rakava dagarana ema ḡia laulauna dagarana ema ḡia arana ekiraḡiani numerana ḡevaḡa-ketorito tarimari, ḡeruḡa taḡoto-ḡoi aḡitarito. Ḡia ḡimari ai tu Barau na evinirito hapiri ḡeḡabi-taḡorito-ḡoi,

³ ma Barau ḡena vetuḡunaḡi tarimana, Mose, ḡena mari ema Mamoe Natuna ḡena mari ḡemariato-ḡoi, “Vereḡauka o, ḡoi tu Iaru-korokoro Barauna, ḡemu ḡauvei tu barego, asi tau vaḡa-ilailana ema namo vedaurea. Ḡuru mabarari ḡeri Vere o, ḡoi ḡemu dabara tu iobukaiobuka ema moḡoni veḡata.

⁴ Vereḡauka o, deikara na ḡoi asi begari-vinimuni, ma ḡoi aramu asi bevaḡa-raḡeani? Korana tu ḡoi moḡo ḡereḡamu veaḡa. Tanobara mabarari tarimari beḡe iaḡomani, benamo ḡoi beḡema toma-rakariḡo vinimuni. Korana tu ḡemu veiḡa iobukaiobukari varau beḡema fofori.”

⁵ Maiḡa murinai au aboḡe-iaḡoto, benamo gubai Rubu Veaḡa, mo tu Barau na ḡena guruḡa moḡoniri evaḡa-foforirini farai numana veaḡana, evekeoto aḡitaiato.

⁶ Mo aneru imaima ruarua (7), ḡeri ai tu tarimarima vaḡa-midigumidiguri dagarari rakavari; farai numana veaḡana na ḡeraka-rosito, dabuḡa gwaḡiḡiri namori ema veḡia-veḡiari na ḡevedabuḡato, ema kobari ai tu golo beletari ḡetore-ḡeḡeraḡirito.

⁷ Benamo mo maḡuri dagarari vasivasi vekaravari ai ta na mo aneru 7 golo diḡuri 7 evinirito. Mo golo diḡuri tu tanu-vanaḡivanaḡi Barauna ḡena baru na evaḡa-vonu fokafokarito.

⁸ Benamo mo Rubu Veaḡa tu Barau marevana goḡuna ema seḡukana goḡuna na evaḡa-vonuato. Tarima ta Rubu Veaḡa nuḡanai asi roḡo beraka-toḡani riba, beiaḡoni mo, tarimarima vaḡa-midigu-midiguri dagarari rakavari 7 beḡe korini vau.