Yunus 2 - Kitab Injil and Kitab Awal-Jaman

Angamu'-ngamu' si Yunus

¹ Ma deyom b'ttong daing pa'in si Yunus, angamu'-ngamu' iya ni si Yawe ya Tuhanna.

² Yukna, “Pagka aku ma deyom kasigpitan bay lingananku PANGHŪꞋ ati kasambungan aku e'na. Pagka aku ma lahat kamatayan, bay aku angamu' tabang, ati takalenu pangamu'ku.

³ Bay aku larukannu pehē' ni s'llang ni lalom tegob-tegoban, ni buliluk s'llog. Bay aku tabowa e' abalnu, Bay aku kasampoyakan e' goyaknu.

⁴ Ya pangannalku, ‘In aku palawaknu min matahannu.’ Magniyat aku mbal na maka'nda' pabalik ma langgalnu sussi.

⁵ Agon-agon aku alembo ma tahik, Alimun aku ma tahik tegob-tegoban, Kaleboran aku e' sagmot tahik.

⁶ Pat'nde aku sampay ni deyo' katapusan. Pa'abut aku ni lahat kamatayan, ni lahat atambol lawangna salama-lama. Daipara ka'a Tuhan, ka'a Panghū'ku, bay angalappasan aku min deyo' katobtoban.

⁷ Song pa'in ab'kkat napasku, taentomku ka'a, O PANGHŪꞋ. Bay sabbutku ōnnu, bay pasampayku panganduwa'aku ni ka'a, ni deyom langgalnu sussi.

⁸ Sai-sai ameya'an tuhan-tuhan halam pūsna alungay pangandolna ma ka'a.

⁹ Sagō' aku itu anukbalan kulban ni ka'a hinabu angalang pamudji. Tumanku bay najalku ni ka'a, sabab ka'a ya si Yawe ya PANGHŪꞋ maglalappas.”

¹⁰ Puwas e', in daing aheya tasoho' e' PANGHŪꞋ angutta'an si Yunus pehē' ni bihing tampe.