Kalangan 95 - Kitab Injil and Kitab Awal-Jaman

Kalangan 95

¹ Dai' na kam, magkalang kitam ni si Yawe kabowa kakōgan, Patanogtam suwalatam ni iya, ya pinagsambatan Batu-Lakit panglappasan.

² Sūng kitam anukbal pagsukulan ni iya, paheyatam iya labay min kalangan maka tarasul.

³ Sababna si Yawe ya Tuhan makaga'os, sultan abantug, alanga min katuhan-tuhanan kamemon.

⁴ Tinayak he'na po'onan dunya itu. Dapuna asal saga kapussukan būd.

⁵ Suku'na asal saga katahikan, sabab iya ya bay amapanjari. Iya na isab bay angompol gintana'an.

⁶ Dai' na kam, pasujud kitam amudji iya. Angōk-tu'ut kitam ma alopan PANGHŪꞋ Magpapanjari,

⁷ kalna' in iya pagtuhanantam, maka kitam saga a'ana, sapantun bili-bili ma pangipatanna. Na, ma llaw itu, bang takalebi bissala Tuhan, yukna,

⁸ “Da'a patuwasunbi kōkbi buwat bay ka'mbo'-mbo'anbi ma Meriba, buwat bay ma Massa isab, ma lahat paslangan.

⁹ Bay aku sinulayan maka tinukas he' ka'mbo'anbi, sinulayan aku he' sigām, minsan du bay kalabayan he' sigām kahinanganku.

¹⁰ Mpatpū' tahun bay kap'ddi' atayku ma pangkatan ina'an-i. Saga a'a itu,” yukku, “mbal makatotog ameya' ma aku. Halam tata'u e' sigām kaul-pi'il ya kabaya'anku.

¹¹ Bay akagit atayku ati pagsapahanku sigām,” yukku, “Saga a'a itu mbal to'ongan pasōd ni lahat pahalian bay tagamaku.”