Kalangan 63 - Kitab Injil and Kitab Awal-Jaman

Kalangan 63

Kalangan si Da'ud

¹ O Tuhan, ka'a ya Tuhanku, landu' aku angentom ma ka'a. Bang aku alawak min haddaratnu, ya sapantunna lahat paslangan halam aniya' bohe'na. Patay bohe' palnyawahanku, apanggang baranku ma sabab katuyu'ku ma ka'a.

² Bay ka ta'nda'ku ma deyom Luma' Pangarapan ka'a, bay ta'nda'ku kawasanu maka sahayanu.

³ Ahalga' lasanu, labi ahalga' min kallumku, angkan ka sanglitanku luwas min k'llongku.

⁴ Pudjiku ka sat'ggolku allum. Anangga aku hinabuku anabbut ōnnu.

⁵ Asalamat nyawaku, sapantun a'a asso he' kinakan ahāp lanabna, angkan aku angalang pamudji ka'a luwas min k'llongku.

⁶ Taentomku ka'a hinabuku palege ma pabahakanku, ati ka'a ya paghona'-hona'ku kahaba'-kahaba' sangom.

⁷ Ka'a ya anabangan aku, angkan aku tabowa angalang hinabuku pasindung ma pikpiknu, sali' manuk-manuk.

⁸ Pabalut pangatayanku ma ka'a, pinatotog aku he' tangannu sakap kowan.

⁹ Bang pa'in palurus ni kalaloman ahirat saga a'a ya magisun amapatay aku.

¹⁰ Bang pa'in sigām tinugutan binono' patay kalis bo' pinagkakan he' saga ero' paslangan.

¹¹ Pagubus, magkalasigan sultan ma Tuhan. Sinanglitan isab Tuhan e' sasuku anganjanji' ma ōnna. Malaingkan pinakittup bowa' saga a'a magputing.