Kalangan 61 - Kitab Injil and Kitab Awal-Jaman

Kalangan 61

Kalangan si Da'ud

¹ Ya Tuhan, kalehun panangisku, taima'un pangamu'-ngamu'ku.

² Angalingan aku ni ka'a min lahat ya katapusan alawak pagka halam aniya' holatanku. Malimin aku ni batu alanga ya mbal ta'abutku.

³ Sabab ka'a ya bay patapukanku, ibarat kuta' mbal tasōd e' saga bantaku.

⁴ Landu' aku bilahi pat'nna' ma Luma' Pangarapan ni ka'a bo' magluma' mailu sat'ggolku allum, ati pasindung aku ma deyo' kepetnu sapantun anak manuk.

⁵ Ya Tuhanku, tasambutnu bay janji'ku ma ka'a, ati kabuwanan aku kahāpan ya pamusaka'nu ma sasuku magmatāw ma ōnnu.

⁶ Bang pa'in pataha'nu umul sultan, bang pa'in pahogotnu pagsultanna sampay ma panubu'na.

⁷ Mura-murahan, bang pa'in iya magsultan ma matahannu salama-lama tahun. Hampanin iya pahāp ma sabab lasanu maka janji'nu ya mbal magkapinda.

⁸ Jari aku itu angalang na pa'in pamudjiku ōnnu, ati suhulku ai-ai bay panganajalku ma ka'a, tukbalanku ni ka'a kahaba' llaw.