Kalangan 24 - Kitab Injil and Kitab Awal-Jaman

Kalangan 24

Kalangan si Da'ud

¹ Suku' PANGHŪꞋ dunya itu sampay kapanyapanna. Suku'na alam itu sampay kabangsa-bangsahanna.

² Pinat'nna' e'na gintana'an ma t'ngnga' s'llang, pinahogot he'na ma t'ngnga' kas'llogan.

³ Sai bahā' makatukad ni būd PANGHŪꞋ? Sai bahā' makat'ngge ma deyom luma' pangarapan ni iya?

⁴ Luwal a'a ya asussi tanganna min dusa, ya apote' deyom pangatayanna. Luwal isab a'a ya mbal anumba ni ta'u-ta'u, maka mbal magsapa pagputingan.

⁵ Makasambut pahala' min PANGHŪꞋ bang a'a buwattē' kajarihanna. Tinungbasan iya kabontolan itikad e' Tuhan Manglalappas.

⁶ Buwattē' isab kahālan saga a'a ya angangut Tuhan, ya atuyu' paharap ni ka'a, O Tuhan si Yakub.

⁷ Bang pa'in paukab saga tambol! Bang pa'in paukab saga lawang awal-jaman, bo' supaya makasōd Sultan Sanglit-sahaya!

⁸ Sai sa Sultan Sanglit-sahaya itu? Si Yawe ko' itu, ya landu' akosog, landu' aesog. PANGHŪꞋ ko' itu, ya makaga'os ma pagbono'.

⁹ Bang pa'in paukab saga tambol! Bang pa'in paukab saga lawang awal-jaman, bo' supaya makasōd Sultan Sanglit-sahaya!

¹⁰ Sai sa Sultan Sanglit-sahaya itu? Si Yawe ko' itu, ya Sangat Kawasa. Ya na Sultan Sanglit-sahaya!