Taitos 1 - Gooti Toolluro Yogalokwono

¹ Nuu Poolonyugono. Toro toonyu Gooti toolluro ki'nato womdo tovi wiyodumdonyugono. Aki Jisas Kraisolluro kuurotokwe pwonyugono. Toro toonyu a'mwo abolo Gooti toolluro jesodowodo tonyomno amonuwopiyabokaikono. A'mwo abolo su ton yiuno Gooti toolluno to'no kuudo neya uubwepureyokwe tovino amonuwopiyabokaikono. Aki Gooti toolluro a'mwo abolo jesodowodo su ton gamoro ilaiyo winodowo'jure tovi neya uumjungovlaiyo'moneyokwe nebaikuuguudo tokwe yodubwasodumdonyugono. Toro tovino kuudo youromaropi Gooti toolluro ilaiyo winodowodo tonyu kuvinono uumjungovlapinogano.

² Su toro uumjungovlavopi aiyo yiunokuudo mujomwekovlaiyo'moneyokwe tov kuvinono mallo'mo sogwollo to'no kingovla'mwalpinogano. Aiyo mujomwekovlaiyo'moneyokwe su tovino aiyoga yiuwi'nokai ton yere mimo'nyodopure toga Gooti tool subuu'yamju me'no kwiyajukekono. Aki subuu'yamju kwiyajuko Gooti su tool kuunano yogalo puru'monodo kuruv miyoukuu'najokwekono.

³ Toro tovino tov Gooti toolluro me'no ajesungiko toga gamoro subuu'yamju tov suwiyo imwojuno sumaiyokwe Gooti nekullo'mwojokwe tool gamoro kuuguudo tokwe a'mwo abolo tonyu modomollo'moneyokwe mi amonuwopiyabokaikono. Su toro amonuwopiyaboka tool mino aro kuudo me'no sanuurokaikono. “Oo a'mwo akal moro kuuguudo tokwe nokwo modomollonoldeyo.” Su toro kuudo yanuu'no sumaiyokwe anubweyokaikono.

⁴ Pas akav Taitosekujo'mo sokwollagubwemono. Guu kuuguudo sugudo modomollodumdo tovi kuudo aval'no kuubweyodekugono. Toro tookujuno tov moro kwolaiyo kuunodo toolbusuko imo'nodumdekugono. Toro tookujuno nuu aro nyunodowodonyugono. Nemi Nellunumiyago Gooti tooke'aro ma'no ma'nodo tovuro kirumwallo tovida'ai mollurolovonekumallokwe Aguto Krais Jisaseke'aro tooral aro gubwemwalbullunekugono. Yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo gubwemwalbullunekugono.

Taitosol a'mwono moduvomwallokwe toorai molludapiyo'mo tovinokwono

⁵ Nuu aku'momdo Krit tomuu gumi soguuwapiyo tov moro womdo yogallu'mo'mdumdo tonyu neya mollopimwalbino'moneyokwe soguuwapiyekugono. Toro tooku wagwolago go'no go'nodo tomuuda'ai Jisasolluro mollu'bwoto mwalodupudo tonyu a'mwono moduvomwallo'moneyokwe toorai neya molludapimwalbinekugono. Guu a'mwo su toro toorai molludapiyo'mo tooku moro kuuguudo me'no sodogubwasajo tomgu'aro neya uumjuno'bi molludapimwalbinekugono.

⁶ Toro te a'mwono moduvomwallo'moneyokwe imo'nyo'mo toorai aro neya jenyubworomarogawono. Guu Jisasolluro a'mwo toorai wonomollo'bi a'mwo pwol, “Oo pasudo akanyu me'no molludo'movla'mdowodoldeyo,” adubi toollu nokwo molludapibinekugono. A'mwo nomolludapibino su tool Jisasolluro a'mwo abolo tonyuro sumdo tovi kaiya'no puru'monodo kuruv miyodowodekono. Aki toro tool abolo yiuno puru'monodokwekono. A'mwo su toolluro kwoloraiyo ton Jisasolluno kuudo neya uubweyodupudogano. Aki kwoloraiyo su tonyuno a'mwo abolo pun aro neya dodupudogano. “Oo a'mwo su toolluro kwoloraiyo ton kaiya'no mairoungovla'mdupu aki kemi kuunum kwolabolo tovallu kisuvolo mwiyodupudogano.” Su toro dodupudo tooraino to'no jenyubworomarogawono.

⁷ A'mwono moduvomwallokwe ajesubi su tool Gooti toolluro womdo tovi mollomwalono toolluno tov a'mwo abolo ton kwolluno, “Oo a'mwo akal kaiya'no miyodowodekono,” to'no neya dumwalpinekono. Aki toro tool a'mwo aguto yovokwe toorobusuko imo'nowo'ji a'mwo abolo tobuurai madumuuroleyokwekono. Aki a'mwo su tool sumwoluko su'mno yere mimo'nyokwekono. Aki amomo yo'moneyokwe wain wonyo bwotonyago manyokwekono. Aki magu'nyo miyokwekono. Aki nuugwiyo bwotonyago ki'nomallo'moneyokwe mwinodowodekono.

⁸ Toro kwol kuruv a'mwo abolo pun gamoro ago tovi abuuru'mapi su tonyu po'dogalo mollomwalodowodekono. Aki sugupasudo to'no imovlaiyo'moneyokwe kuulolukumowopiyodowodekono. Aki toro tool pi'mwo kuudo tovi neya uumjungovlavowo'ji sugudo to'no imo'nodowodekono. Aki Gooti toolluro ilaiyo winodowo'jure tonyu uumjungovla'mdowodekono. Aki gavnokwe tool gami pasudo tobuurai po'dogalo neya mollomwalnodowodekono.

⁹ A'mwo su tool namoro yogalo yodubwasodowolo sugudo kuunodo tovi guureji neya gudupola'mwalonekono. Yogalo su tovino guureji agudupolaro'ji tov a'mwo abolo tonyu Gooti toolluno yodubwasowo'ji aki kuuguudo idopto'nodo tokwe jurogudo nokwo duuwimwojumwalonekono. Aki toro agudupolaro'ji tov a'mwo abolo pun kuuguudo idopto'nodo tovi kisuvolo wiyodopure tonyu po'dogalo yovo'dogallo'moneyokwe yogalo nokwo mojurugolmwalonekono.

¹⁰ Neya duu'nono. Guu Jisasolluro a'mwo abolo tonyuda'ai a'mwono moduvomwallokwe toorai neya molludapimwalbino tov aro tovinokwono. Aku'momdo Kritda'ai Jisasolluro a'mwo bwotonyago tooro nuumjungovlaiyo'moneyokwe kuuguudo tonyu kisuvolo to'no yokwerogano. A'mwo su tooro yogalo kavlo nonagutokwe toorogai'aro kuunano yogalo toorogai'aro su toorogai youkuu'nuujo'moneyokwe modomollodupudorogano. A'mwo su tooraida'ai bwotonyago tooro Juuworogano. Toro tooro a'mwo gabovo toorai aro wuudodupudorogano. “Kevu nevu Juu toonolbusuko kemi lakulkulako ton neya dodo'nogaulo.” Modomollodupudorogano.

¹¹ A'mwo su toro modomollodupudo tooro nuugwiyo bwotonyo ki'nomallo'moneyokwe kuudo yauropi yodubwasodupudorogano. Aki su toro yodubwasodopure tovida'ai a'mwo pworogai'aro kemi yiuwi'nokai julkwolaiyo togai'aro tonumdoto kemoro kuudo uubweyodupudo tovi kaiyako me'no mollugolamo'mdupudorogano. Toro te yogalo su tooro nyodubwaso'moneyokweyoromaiyo. Toro tovino tov guu a'mwo su tooravuro mago tonyu neya duubutovogawono.

¹² Aku'momdo Kritda'ai a'mwo midokwe pwol aiyoga kevnokwe tooraino yogalo puruv aro adokaikono. “Yiuwi'nokai Kritda'ai a'mwo abolo ton kuunano yogalo to'no youkuu'nuudopi aki ibesa'aiyo kuulludaiyo toorobusuko kiroungovla'mdupudogano. Aki toro ton wosamujuko to'no nyuno nyuno yopi kun kuruv nonugollu'meyo'mo mwinodupudogano. Aki toro ton womdo yo'mo tovino yiuno biyolo to'no winodupudogano.” Kritda'ai a'mwo abolo tonyuno toro adokaikono.

¹³ Yogalo adodoluwosoka su tov nebal'nodokwono. Toro tovino tov kemoro kuudo Gooti toolluno uubweyodupudo su tov jurogudo yogullumwojapiyo'moneyokwe guu guureji neya domojurugologawono.

¹⁴ Aki aku'momdo Kritda'ai Jisasolluro a'mwo abolo ton Juu pworavuro jupweyo kuuguudo toorai kaduko nuuwimwalpiyo. Aki a'mwo pworo nebaikuuguudo tovi buulo uugunyumopiyodupudo su tooravuro yogalo kunyu kuruv kaduko nuuwimwalpiyo.

¹⁵ Neya duu'nyulo. A'mwo abolo pun Gooti toolluro sumdo tovi kaiya'no nonagutokwe me'no wimo'nodupudogano. Toro ton kuudo yau'dupudogano. Oo buro'nyo buro'nyo wosamujukodeyo oo noonyumwonyu puru'monodo kuruv nemi kaiyako mamollugolanekumopinonogano. Kuudo yau'dupudogano. Toro kuvi kuruv Gooti toolluro sumdo tovi a'mwo abolo kaiya'no kuumwiyo wimo'nodupudo tono'gwowi Krais Jisasolluno kuudo ku'nono muubweyodupudogano. A'mwo abolo su ton kuudo yau'dupudogano. Oo yiuwi'nokai ton nemi kaiyako nomollugolanekumopinonogano. Kuudo yau'dupudogano. Su toro tonyuro kuudo toorogai'aro aki kemi poowokalago tonyu dumul'mwojo'moneyokwe kuudo kuuluuwo'dupudo toorogai'aro su tooro kaiyako me'no igolamo'nodupudogano.

¹⁶ A'mwo abolo su ton yiuno kemi mago tokwe to'no aro dodupudogano. “Nevu Gooti toolluno kuudo me'no youroma'dowadonogano.” Su toro dodupudo kuvi kuruv kemoro yomjomwekovla'mdupudo to'gwowi kemi yogalo su tovi muumjunodupudo tovino kuu'maiyo toru'no aro wuuduuwallunodupudogano. Gooti toollu ku'nono muumjunmwakuuwono. Kuu'maiyo toru'no su toro wuuduuwallunodupudogano. Toro te a'mwo abolo su ton kisuvolo yodupudogano. Aki toro ton sugupasudo yo'moneyokwe kuruv ku'nono mipinogano. Gooti tool a'mwo abolo su toro yodopure tonyuno kwoda'molo sumdo to'no yodowodekono.