Room 7 - Gooti Toolluro Yogalokwono

Nevu kuudo muuduko tovi uumjunmwalano tovinokwono

¹ Nuuge avalobuuravoo, kevu Gooti toolluro loowo tonyuno kuudo me'no youroma'dupudogaikikono. Toro togaikulluno tov moro kuuguudo akan ikudodo'mure kugai'aro nokwo youromapinogaikikono. A'mwo abolo ton yere mabolodopure toga Gooti toolluro loowo tovi dolago tomuu mwalodupudogano. Toro kuvi kuruv a'mwo abolo ton me'no abolpi toga'no'gwowi loowo su tovi dolago tomuu mamwalodupudogano.

^2-3 Kavlo su tovino po'dogalo youromapino'moneyokwe kevu yovekurajo akavi duu'nyulo. Abolo puruv a'mwo pwollu kuuma'no'ji toga yiuwi'nokai teyaul kwolabolo ton nyeru'mdeyapinpiyokwe loowo tovi dolago tomuu mwalmwalbulluneyaukono. Toro mwalodo'bule toga abolo tov gami kwolo toollu ru'mdowapiyowo'ji a'mwo muuduko pwollu kuuma'no'ji tov abolo tov loowo su tovi kisuvolo wiyonokwono. Toro tov kwonyalo abolo imo'nonokwono. Toro kuvi kuruv gami kwolo tool me'no abolo'ji toga'no'gwowi abolo tov nyeru'mdeyapinyo'moneyokwe loowo tovida'ai birolo'nugolokwowo'ji yasuwa'no nokwo mwalonokwono. Su toro toga a'mwo muuduko pwollu kuuma'no'ji tov loowo tovi kisuvolo miyonokwono. Aki toro tov kwonyalo abolo mimo'nonokwono.

⁴ Toro te nuugeyobuuravoo, su toro to'busuko kubalno loowo tov kemi kwolo sumdomguda'ai toolbusuko aikullumo'nyajukekono. Toro ikullumo'noduke toga nyeru'mdeyapinpiyokwe loowo tov yiuwi'nokai togaikullu wuulo aikugullajukokwono. Toro ikugulloduke kuvi kuruv kevu Krais tooke me'no abollungopo sumo'nopo toga'no'gwowi Gooti toolluro loowo tovuro jurogudo tovida'ai abirolo'nugolokwopogaikikono. Toro birolo'nugolokwino sumaveyokwe aiyo aiko te adukavoka Krais toollu abilguro'mwonyopogaikikono. Toro abilguro'mwonyopo toga Jisasol kemi kwolo muuduko toolbusuko aikullumo'nokaikono. Aki kevu Krais tooke me'no aguro'mwonyopo togaikul Gooti toolluro ilaiyo winodowo'jure tomgu'aro yomjomwekovlaiyo'moneyokwe sumo'nopogaikikono.

⁵ Sumdomgu nemoro kwako akavida'ai kuudo toorai kuumjungovlaiyajuuwo toga Gooti toolluro loowo tonyu kisuvolo sajuwonogano. Aki loowo su tonyu wuu'nodowado tonolluno tov nemoro suvlato togai ma'no ma'no yo'moneyokwe kuudo tooro nemoro poowokalago tovi aullo'movanekwopiyajuporogano. Toro kuullo'movanekwopiyodopure tovida'ai nemoro poowokalago ton me'no abollungopo to'no sumo'nyajupogano.

⁶ Aki su toro toga Gooti toolluro loowo ton wuulo nekugullodopure tovi ki'nato womdo kwiyajuwonogano. Toro kuvi kuruv nevu Jisasollu uuguro'mwonyowono kweke abolowo toga'no'gwowi loowo su tovida'ai me'no abirolo'nugolokwowonogano. Toro tonolluno tov aga loowo tonyuro puukwollo sakwollungiko tomgu'aro ki'nato womdo mwimovla'mwalanonogano. Toro kunol kuruv Gooti toolluro Kuullo tool muuduko tomgu'aro mollubworonekumokavla'mdowo'jure tovino'gwowi nokwo uumjungovla'mwalanonogano.

Ma'no ma'nodo tov nemi kaiyako amollugolanekumeyajuko tovinokwono

⁷ Toro te kevu moro kuuguudo sodekubwasumo su tovi wuu'nopi aro kuudo nyaupiyo. Oo Gooti toolluro loowo tov ma'no ma'nodokwono. Kevu su toro kuudo nyaupiyo. Gooti toolluro loowo su tov ma'no ma'nodo'maiyo. Kevu kuudo pun jaullulo. Loowo su tov nonaguto'mno'juki nuu ma'no ma'no sumi tovino aro kuudo miyouroma'monyugono. Oo ma'no ma'no jadokwono. Toro kuvi kuruv loowo tov moro ma'no ma'nodo tonyuno kuu'maiyo toru'no bomollolupto'nanubweyodowodokwono. Loowo puruv aro dodowodokwono. “Kevu a'mwo pworavuro noonyumwonyu punyuno kwanyu sumdo mainuwipinono.” Loowo su tov nonaguto'mno'juki nuu kwanyu sumdo ainuwimi tovino, Oo ma'no ma'no jadokwono, kuudo miyouroma'monyugono.

⁸ Toro te Gooti toolluro loowo aro dodowodo tov, “Kevu a'mwo pworavuro noonyumwonyu punyuno kwanyu sumdo mainuwipinono,” su toro dodowodo tov ilaiyokwono. Toro kuvi kuruv nuu yogalo su tovi wuu'nodumdo toga kwanyu sumdo kinuwiyo'moneyokwe tov moro poowokalago tovi womdo bwotonyo anyajukonyugono. Toro toonyu kwanyu sumdo ainuwiyajonyugono. Toro tovino tov loowo tov nonaguto'mno'juki ma'no ma'no pasudo gavnokwe tov me'no abollungiko to'busuko nyumo'nowo'ji ku'nono mame'nonumokavlavowo'jujukokwono.

⁹ Aiyoga nuu Gooti toolluro loowo tovino kuudo yere miyouroma'dore toga ilaiyo somjomwekovlaiyajonyugono. Toro kwonyu kuruv lukomgu loowo su tovuro doduke tovi wuu'nono toga'no'gwowi ma'no ma'no pasudo tov moro kuudo tovi bwotonyo anyumo'nokakwono. Toro toonyu ma'no ma'nodo toorai mujeroungovlaiyo'moneyokwe anyumo'nokakwono.

¹⁰ Su toro toga aro kuudo sauronyugono. Oo nuu loowo tovuro dodowodo tonyu kuumjuno'mujuko'mno'juki aiyo yiunokuudo mujomwekovlaiyo'moneyokwe tovi amaro'mujukonyugono. Toro kuudo yau'dumdo kwonyu kuruv loowo tonyu ku'nono muumjunono aro kuudo souromaronyugono. Oo nuu ma'no ma'no kuumwiyo tekwonyu nobolmekwonyudeyo. Kuudo souromaronyugono. Loowo tov yiuno bolnodo'moneyokwe toru'no abomanyu'meyajukokwono.

¹¹ Toro te ma'no ma'nodo tov mi yoromiyanubweyo'mo tov loowo tovi'aro amolloguuronyudapiyajukokwono. Ma'no ma'nodo tov kuunano aro soukuu'nanyujajukokwono. “Guu loowo tonyu'aro kuumjunbi tov aiyo yiunokuudo mujomwekovlaiyo'moneyokwe tovi noma'binekugono.” Toro nyudoduke kuvi kuruv ku'nono muumjunyajonyugono. Ma'no ma'nodo tov su toro tomgu'aro seromiyanubweyajukokwono.

¹² Toro seromiyanubweyajuko kuvi kuruv loowo su tov Gooti toolluda'ai abokakwono. Toro tovino tov yiuno sugudo to'nodokwono. Aki nevu ilaiyo tomgu'aro yomjomwekovlaiyo'moneyokwe kuuguudo tov loowo su to kuvi wo'dowodokwono.

¹³ Toro te nevu aro kuudo saura'ji tov, Loowo sugudo tov nemi romiyanekubweyodowodokwono, saura'ji tov kuvidukono? Awiyo, loowo gavnokwe tov ku'nono maromiyanekubweyodowodokwono. Toro kuvi kuruv ma'no ma'nodo to'gwowi loowo sugudo su tovi'aro youpuu'na'dowo romiyanekubweyodowodonogano. Ma'no ma'nodo tov toro romiyanekubweyoduke toga Gooti toolluro loowo tov kuu'maiyo toru'no abomollolupto'nanekubweyokakwono. Toro abomollolupto'nanekubweyoka tovida'ai aro kuudo youroma'dowadonogano. Oo ma'no ma'nodo tov womilo to'busuko bwotonyo youllumelodawodo'mdeyo, kuudo youroma'dowadonogano.

Ma'no ma'nodo tovi dolago tomuu wuulo ki'na'dowado tovinokwono

¹⁴ Nevu aro kuudo me'no youroma'dowadonogano. Gooti toolluro loowo tov Gooti gavnokwe toolluda'ai aboka tovino tov sugudokwono. Kuudo youroma'dowadonogano. Toro kuvi kuruv nuu kwako akavida'ai tekwonyuno'gwowi jurogudo nonagutokwe toonyu ma'no ma'nodo tov wuulo to'busuko kironumwallodowodonyugono. Toro kironumwallodowo'jure tovi ki'nato womdo wimovla'mdumdonyugono.

¹⁵ Toro te buro'nyo buro'nyo womdodeyo pun ilaiyo yo'mo nyunodowodo su tonyu ku'nono miyodumdonyugono. Toro kwonyu kuruv kaiya'no womdo pworono'gwowi nuu nyo'moneyokwe ilaiyo manyunodowodo su toorai yodumdonyugono. Moro su toro yomjumovla'mdumdo tovino kavlo tov miyouroma'dumdonyugono.

¹⁶ Moro kaiya'no mujumovla'mdumdo su tov loowo tovuro tovasuda'aiyo'maiyo. Gooti toolluro loowo su to'gwowi yiuno sugudo to'nodokwono. Loowo su tovino nuu kwonyu kuruv aro kuudo yau'dumdonyugono. Oo loowo su tov sugudo'mdeyo, kuudo yau'dumdonyugono.

¹⁷ Toro te moro kaiya'no mujumovla'mdumdo su tooro nuvnokwe toonyu miyodumdorogano. Toro kuvi kuruv moro poowokalago tovida'ai ma'no ma'no kuulanuwo'dowodo su tov mollerovonyudapiyodowo'jure to'gwowi mujumovla'mdumdonyugono.

¹⁸ Su tov aro tovinokwono. Moro poowokalago tovi kwako akavida'ai kuudo tooro kuulanuwo'dupudorogano. Toro kuulanuwo'dupudo su tomuu noonyumwonyu sugudo puru'monodo kuruv nonagutokwono. Toro tovino tov nuu sugudo pun yo'mo nyunodowo'jure ton kuvinono yo'moneyokwe jurogudo tov nonaguto imo'nodumdonyugono.

¹⁹ Toro toonyuno tov noonyumwonyu sugudo yo'mo nyunodowo'jure tonyu ku'nono miyodumdonyugono. Toro kwonyu kuruv kirovanyuvanyu toorai yo'mo biyolo nuu'nodowodo tooraino'gwowi kuvinono mujumovla'mdumdonyugono.

²⁰ Kaiya'no mujumovla'mdumdo su toorai nuvnokwe toonyu kuvinono yo'mo manyunodowodorogano. Toro manyunodowo'jure kuvi kuruv ma'no ma'nodo tov moro poowokalago tovi kuulanuwo'dowodo tovida'ai to'no yodumdonyugono.

²¹ Mi su toro tomgu'aro nonyumo'nodowodo tovino aro kuudo me'no youroma'dumdonyugono. Oo nuu sugudo yo'mo nyunodowo'jure tovi ma'no ma'nodo kuulanuwo'dowodo su tov nuumjuku'dowodo'mdeyo, kuudo youroma'dumdonyugono.

²² Aki moro poowokalago tovi Gooti toolluro loowo tovino ilaiyo nyunodowodonyugono.

²³ Toro nyunodowo'jure kuvi kuruv moro poowokalago tovida'ai kuudo uumdo kuulanuwo'dupudo toorono'gwowi kuudo ilaiyo yau'do'mure su tovi molo wiyodowodokwono. Toro wiyowo'ji kuuwolowo'ji toga ma'no ma'nodo tov mi wuulo kironumwallodowodokwono.

²⁴ Oo kalekwonyugono. Ma'no ma'nodo su tov nuu kwako akavida'ai kulakokwe toonyu kuulanuwo'dowodokwono. Toro toonyu bolnodo tov nubweyodowodonyugono. Toro toonyu yiuno ala'mwolno nokwo bomollurolovonumokalokwononyudukono?

²⁵ Nokwo bomollurolovonumokalokwono tool yiuno nemi Aguto Jisas Kraisolnodokwono. Toro toolluno nuu Gooti toollu, “Nenyoo,” wuudumovla'mwalmonyugono. Toro te nuu Gooti toolluro loowo tovi uumjunyo'mo ilaiyo nyunodowo'jure kuvi kuruv kwako akavida'ai kuudo kuulanuwo'dupudo su tooro uumjuku'dupudorogano. Toro uumjuku'dopure tovida'ai nuu ma'no ma'nodo tovuro ki'nato womdo wimovla'mdumdekwonyugono.