Room 3 - Gooti Toolluro Yogalokwono

A'mwo abolo pun Gooti toolluro yogalo tovi kisuvolo kwipi kuvi kuruv Gooti toolno'gwowi gamoro yogalo tovi kuvinono uumjunodowodo tovinokwono

¹ Toro te nevu Juu lakulkulako do'nodowado toonogai'aro a'mwo Juu miyawosunodowado toorogai'aro toonol Gooti toolluro sumdo tovi aval'no wimo'nodowadonogano. Toro tovino tov yamuugojo puruval arokwono. Nevu Juu kuunodo imo'nodowado toonol sugudo pun ma'dowadonoldukono? Aki nemoro lakulkulako do'nugelabodowado su tov adadomgu'aro nekullo'mwojodowodo'mdukono?

² Tade, aro tomgu'aro nonekullo'mwojodowodokwono. Nevu Juu toonollu Gooti toolluro sugudo go'no go'nodo pun nekullabodowodonogano. Muudu'nodo tov arokwono. Gooti tool gamoro kuuguudo tovi mollomwallo'moneyokwe nevu Juu toonollu anekullabokaikono.

³ Toro anekullaboka tovi me'no ma'dowado kuvi kuruv Juu bwotonyago ton muumjunodupudogano. Toro muumjunodupudo kuvi kuruv Gooti toolno'gwowi gami yogalo ado'ji tovi kuvinono uumjunyokwekono.

⁴ Nebal'no ikudumo'mokwono. Yiuwi'nokai a'mwo abolo tonol kuunano yogalo jokwenogano. Toro kuvi kuruv yiuno Gooti judo toolno'gwowi kuunano yogalo majokwekono. Toro tool gamoro yogalo me'no ado'ji tovi kuvinono uumjunowo'ji yiuno nebal'nodo to'no jokwekono. Gooti toolluno kuuguudo sakwollungiko puruv arokwono. “Oo Gootoloo, guu kooti yogalo nekullodumdo tooku nebal'no kuunodekugono. Toro tookuji a'mwo pworo kooti yogalo adagujupi tov ku'nono maguuwolopinorogano.” Gooti toolluno yogalo sakwollungiko puruv torokwono. Gooti tool yiuwi'nokai toga gamoro yogalo tovi kuvinono uumjunodowodekono. Toro uumjunodowo'jure toollu a'mwo pworo wonopi aro dupinorogano. “Oo Gooti tool yiuno nebal'nodoldeyo.” Dupinorogano.

⁵ Toro te a'mwo kwako akavida'ai pworo kaiya'no kuudo aro yau'dupudorogano. Oo nevu ma'no ma'no sa'ji tov Gooti toolluro sugupasudo tovino aro bomollupto'nosonokwono. Gooti tool kwako akavi a'mwo abolo tonbusukolmaiyo. Toro kwol kuruv yiuno sugudo to'no mujumovla'mdowodekono. Nemoro ma'no ma'no sa'ji tov su toro tovino kuu'maiyo bomollupto'nosonokwono. Toro tovino tov Gooti tool nemoro ma'no ma'nodo tovino aironekumwallo'ji tov kaiya'no yonekono. A'mwo pworo kaiya'no kuudo su toro yau'dupudorogano.

⁶ A'mwo pworavuro su toro kuudo yau'dupudo tov kuvimaiyo. Gooti toolno'gwowi gavnokweyolluro kooti yogalo tovi ilaiyo to'no mollomwalokwekono. Toro toolluno tov yiuwi'nokai a'mwo abolo kwako akavi mwalodupudo tonyu kooti yogalo aduuwiyo'ji toga yiuno pi'mwono mollomwalonekono.

⁷ Aki a'mwo pworavuro kuudo yau'dupudo puruv arokwono. “Oo moro kuunano yogalo soukuu'nuudumi tovi a'mwo abolo pun wonopi mino aro kuudo yanuupinogano. A'mwo akal kuunano yogalo joukuu'nanekudadopiyo. Toro kuudo yanuuropi kun kuruv yiuno Gooti toolno'gwowi nebal'no yogalo jokwekono. Su toro dopi ilomoropiyapinogano. Aki sulomoropiyapi su tovida'ai Gooti tool yovo aguto maronekono. Moro kuunano yogalo tovasuda'ai Gooti tool yovo aguto amaro'ji tovino tov Gooti tool aironumwallo'ji tov ilaiyo miyanyugolonekono.” A'mwo pworo kaiya'no kuudo su toro yau'dupudorogano.

⁸ Kuudo yau'dupudo su tov sugudo'mno'juki nevu aro nokwo adowa'jujukonogano. “Oo Gooti tool yovo aguto kuuno amo'movlawoneyokweyo'mo nevu ma'no ma'no bwotonyo amjumovlavogawano.” Toro kuvi kuruv kuudo su tov kaiya'no kuunodokwono. Kuudo kaiya'nodo su to kuvi'aro a'mwo pworo nuu Poolonyu bwolomonumwogapiyo'moneyokwe aro youkuu'nuudodupudorogano. “Kevu ma'no ma'no kuuno mujumovla'mdopure tovida'ai Gooti tool yovo agutokwe mo'movla'mwalonekono. Poolol su toro yodubwasokwekono.” Mino tov kuunano yogalo toro youkuu'nuudodupudorogano. Su toro youkuu'nuudodupudo tooro Gooti toolluro kooti yogalo tovi muuwolo'nopi kirumwallo tov yiuno'no nomapinorogano.

A'mwo pwolnodo kwol kuruv yiuno sugudo to'no yodowodo pwol mamwalodowodo tovinokwono

⁹ Toro te nevu Juu toonol Gooti toolluro loowo tovi kuumjunowa'jujuko'mno'mjuki a'mwo Juu miyawosunodowado toorai nokwo kuuwolowa'jujukonogano. Toro kuvi kuruv nevu Juu toonogai'aro a'mwo Juu miyawosunodowado kworogai'aro yiuwi'nokai toonol ma'no ma'nodo tovuro jurogudo tov nemi bu'duvolonekuma'dowodokwono. Su toro tovino nuu sumdomgu me'no sodekubwasonyugono.

¹⁰ Toro mwalodowado tonolluno Gooti toolluro yogalo sakwollungiko pun aro dodupudogano. “A'mwo sugudo yodowodo pwol nonagutomuugono. Yiuno pwolnodo kwol kuruv mamwallo.

¹¹ Aki kuudo pi'mwono yaullo'moneyokwe a'mwo pwolnodo kwol kuruv nonagutomuugono. Aki Gooti toollu yo'mgonomallo'moneyokwe puuto tovi a'mwo pwolnodo kwol kuruv po'dogalo muumjunodowodekono.

¹² Aki yiuwi'nokai a'mwo abolo ton Gooti toollu buulo me'no uugunyumopiyodupudogano. Yiuwi'nokai su ton puuto kaiya'nodo tovi uumjungovla'mdupudogano. Aki kwako akavida'ai a'mwo sugudo yodowodo pwolnodo kwol kuruv mamwallo. Yiuno pwolnodo kwol kuruv nonagutomuugono.” Aki Gooti toolluro yogalo puruv aro sakwollungikokwono.

¹³ “Kemoro mago tovida'ai yogalo lokabodowodo ton kaiya'no kuunodogano. Yogalo su ton a'mwo buuso tovida'ai buullujudo ilabodowodo to'busukogano.” Aki puruv aro sakwollungikokwono. “A'mwo su tooravuro mago tovi kuunano yogalo youkuu'nuujo'moneyokwe tov yo'mowopiyodowodokwono. Kemoro kuunano yogalo youkuu'nuudodupudo su ton gabakuto yaunanyo tooravuro kaiyako igollo'moneyokwe bulapto to'busukogano. Kemoro kuunano yogalo youkuu'nuudodopure tovida'ai a'mwo abolo punyu kaiyako igolamo'mdowodokwono.”

¹⁴ Aki puruv aro sakwollungikokwono. “Toro tooro a'mwo abolo punyuno surodo wuunopi yiuwi'nokai toga kemoro mago tovida'ai yiuno magu'nyogalo to'no dodupudorogano.”

¹⁵ Aki puruv aro sakwollungikokwono. “A'mwo tooro yiuwi'nokai toga a'mwo abolo punyu yoromiyoso'mo to'no kano kano pla'mdupudorogano.

¹⁶ Toro tooro gomno gomno pla'mdupu a'mwo abolo pubuurai kaiyako igolodupudorogano. Toro igolodopure tovida'ai a'mwo abolo su tobuuro tabunyuwuulo tovi anakuuto tomuu yomjomwekovla'mdupudobuurogano.

¹⁷ Aki toro tooro a'mwo abolo pugai sumwoluko aval'no wosunyo'mo mwinodupudorogano.” Aki puruv aro sakwollungikokwono.

¹⁸ “A'mwo su toro yodupudo tooro Gooti toolluno luko miyodupu kemi kuudo tooraida'ai to'no kiroungovla'mdupudorogano.” Gooti toolluro yogalo sakwollungiko tovida'ai pun su toro dodupudogano.

¹⁹ Kevu kuudo neya jaullulo. Moosesolluro loowo sakwollungiko ton yiuwi'nokai loowo su tovi dolago tomuu mwalodowado Juu tonollu danekullodowodokwono. Toro tovino tov yiuwi'nokai a'mwo abolo, “Oo nevu sugudonogano,” dodopure tonyuro mago tovi Gooti toolluro loowo tov uubuto'mdowodogano. Aki toro tovida'ai yiuwi'nokai a'mwo abolo kwako akavi mwalodupudo ton Gooti toolluro sumdo tovi jul'nyo kurukwe wimo'nodupudogano.

²⁰ Su toro aikudumo tov aro tovinokwono. A'mwo pwolnodo kwol kuruv loowo tovi kuumjuno'ji tomgu'aro Gooti toolluro sumdo tovi sugudo mwimo'nonekono. Toro kuvi kuruv loowo su to'gwowi nemoro ma'no ma'no mujumovla'mdowado tonyuno kuu'maiyo toru'no nekuduuwallo'moneyokweyokwono. Toro nekuduuwallodowo'jure tovida'ai nemi ma'no ma'nodo tonyuno kuu'maiyo toru'no yainyunodowadonogano. Gooti toolluro loowo su tov toro tovino'mokwono.

Krais Jisasolluno kuudo kuubwepi ton Gooti toolluro sumdo tovi sugudo wimo'nodupudo tovinokwono

²¹ Toro te a'mwo abolo ton loowo tovi'aro Gooti toolluro sumdo tovi sugudo ku'nono mimo'nupinogano. Toro kuvi kuruv aga'no'gwowi gamoro sumdo tovi sugudo wimo'nyo'moneyokwe puuto gabovo puruv Gooti gavnokwe tool me'no anekuduuwallokaikono. Puuto su tovino aiyoga Mooseseke'aro proofet toorogai'aro tooro me'no ajakwollajuporogano.

²² A'mwo abolo ton yiuno Jisas Kraisolluno kuudo kuubwepi tonyu Gooti tool ilaiyo mollomarowo'ji, “Moro a'mwo abolo sugudoganoo,” donekono. Gooti toolluro sumdo tovi sugudo wimo'nyo'moneyokwe puuto puru'monodo su tov me'no soulosoka tovino tov puuto gabovo puruv mwoso.

²³ Kuudo neya jaullulo. Nevu yiuwi'nokai a'mwo abolo kwako akavi mwalodowado tonol ma'no ma'nodokwe imo'nodowadonogano. Toro tonol Gooti toolluro muunyu kai'muuda'ai bako bwotonyo tovi anakuuto tomuu kuulomwallo'mo tov supto kuuno iwapiyodowadonogano.

²⁴ Toro kuvi kuruv Gooti tool yiuno Krais Jisasollu'aro nemoro ma'no ma'nodo tovuro kirumwallo tovi amobiyodukwopiyokaikono. Aki gamoro yasuwa'wino sugumaluko tov nekubweyoduke tovida'ai to'no nevu gamoro sumdo tovi sugudo wimo'nodowadonogano.

^25-26 Sumdomgu Gooti sugudo to'no yodowodo tool aro me'no ajesokaikono. Jisasol neya bolowo'ji gamoro kulako tovida'ai mujako tov bwolawonokwono. Toro abwolawo'ji tovida'ai yiuwi'nokai Jisasolluno kuudo kuubwepi tonyuro ma'no ma'nodo tov nokwo mollol'movodukwopiyonekono. Aiyoga Jisasol yere mabwolaboloduke toga a'mwo abolo pun ma'no ma'no mujumovla'mdopure tonyu Gooti tool nokwo wonyapino to'no sajukekono. Gooti toollomno kuudo neya youragunyumo'nupureyokwe tovino sogwollo kwinyajukekono. Gooti tool aiyoga toro sajuko kwol kuruv aga'no'gwowi Jisasollu me'no kwolomonekwopiyabokaikono. Toro tovino tov, Oo Gooti tool sugudo kuunodoldeyo, kuudo yau'dowadonogano. Aki yiuwi'nokai a'mwo abolo Jisasolluno kuudo kuubwepi ton Gooti toolluro sumdo tovi sugudo wimo'nupinogano. Aki toro tonyuno Gooti tool, “Oo moro a'mwo abolo sugudogano,” nokwo modomaronekono. Gooti toolluro pasudo idopto'nodo tonyu su toro tomgu'aro wonodowadonogano.

²⁷ Toro te nevu loowo tonyu uumjunodowa'jure tomgu'aro Gooti tool ilaiyo amollonekumarowo'jujuko'mno'juki nevnokwe tonol ilomoropunyu nokwo sowa'jujukonogano. Toro kuvi kuruv Gooti tool su toro tomgu'aro ilaiyo mamollonekumallokwekono. Yiuno Jisasolluno kuudo kuubweya'ji tomgu'aro to'gwowi ilaiyo mollonekuma'dowodekono.

²⁸ Toro te aga nevu aro kuudo souroma'mwakuuwono. Oo a'mwo abolo ton loowo tovuro dodowo'jure tomgu'aro kuumjungovlapi tov Gooti tool ilaiyo ku'nono mamollomaronekono. Toro kuvi kuruv yiuno Jisasolluno kuudo kuubwepi tomgu'aro to'gwowi Gooti toolluro sumdo tovi sugudo nokwo wimo'nupinogano. Kuudo souroma'mwakuuwono.

²⁹ Aki puruv arokwono. Gooti tool yiuno nevu Juu tonollo'mo Gootolmaiyo. Toro kuvi kuruv a'mwo abolo Juu tonolluro miyawosunodowado kunyuda'aiyo'mo Gootekono.

³⁰ Toro tovino tov a'mwo tooro kemi lakulkulako ton ado'nupiyorodeyo oo mado'nupiyorodeyo kworo kuruv yiuno Jisasolluno kuudo kuubwepi toorono'gwowi Gooti toolluro sumdo tovi sugudo nokwo wimo'nupinorogano. Gooti pwolnodo tool su toro toorai puuto judo'no judo'nodo tomgu'aro mamolloma'dowodekono. Toro kwol kuruv yiuno aval'nodo tomgu'aro mollomarowo'ji gamoro sumdo tovi sugudo wimo'nodopudorogano.

³¹ Toro te nevu Jisasolluno kuudo kuubweya'ji toga Gooti toolluro sumdo tovi sugudo me'no wimo'nodowadonogano. Toro tovino tov nevu aro kuudo nyau'mwala'jo. Oo loowo tov womdo nonaguto tovino tov neya amodukwopiyano. Kuudo nyau'mwala'jo. Toro kuvi kuruv nevu Jisasolluno kuudo kuubweya'ji toga'no'gwowi loowo tovuro womdo tovi suwiyo guureji imwojonokwono.