Room 16 - Gooti Toolluro Yogalokwono

Poolol Roomda'ai Jisasolluro a'mwo abolo tonyomno, “Ilaiyokwonoo,” yogalo tov kuuwapiyoka tovinokwono

¹ Nevu Jisasolluro a'mwo abolo tonolluro nello'mwo Fibiyov kemiyomno nobwonokwono. Abolo su tov wagwolago Senkriyada'ai Jisasolluro mollu'bwoto tonyu wiyo'mwojodowodokwono. Toro tov kemi abekuru'maro'ji toga kevu ilaiyo neya mollomapinogaikikono. Su toro amollomapi tovino nuu ilaiyo imonyugono.

² Abolo su tov nemi Aguto toolluro kwoloraiyo me'no kwimo'nokakwono. Toro tovino tov kevu yiuwi'nokai Gooti toolluro a'mwo abolo gabovo tonyu ilaiyo molloma'dupudo to'busuko kubalno aval'no neya mollomapinokwono. Aki abolo su tov a'mwo abolo bwotonyago togai'aro nuuge'aro tonollu nekullo'mwojodowodokwono. Toro tovino tov abolo su tovuro buro'nyo buro'nyodeyo tonyuno supto so'ji tov kevu duuwiyo'mwojogaulo.

³ Aki nuu Prisilakwe Akwila'weke teyaullu, “Ilaiyokwonoo,” adopiyamono. A'mwo kwolabolo su teyaul Krais Jisasolluro womdo tovi nuuge aval'no yodubuleyaukono.

⁴ Aki toro teyaul mi nyo'mwojo'mo womdo sajulo tomuu me'no abolo'bullujukeyaukono. Toro teyaulluno yiuwi'nokai Jisasolluro mollu'bwoto Juu tooravuro miyawosunodupudo togai'aro nuuge'aro tonol, “Nenoloo,” wuujo'mo anekullunadopiyo.

⁵ Aki a'mwo kwolabolo su teyaulluro ago tovida'ai Jisasolluro mollu'bwoto i'bwo'nodupudo su tonyuno nuu, “Ilaiyokwonoo,” adopiyamono. Aki moro ibwoto'nyo kuunodo Epainetosollu, “Ilaiyokwonoo,” adopiyamono. Kwako Esiya tomuuda'ai ton Krais toolluno kuudo yere muubweyodopure toga a'mwo su tool kwolda'ai kuubweyokaikono.

⁶ Aki kemi ikullo'mwojo'moneyokwe womdo guureji yodowodo Mariyaviyomno nuu, “Ilaiyokwonoo,” kuuwopiyamono.

⁷ Aki moro iko avalo tovasuda'ai Adroonikoseke Juuniyaseke tooral nuuge wuulo killo'mo ago tovi aule'nallajuuwolorakono. A'mwo su tooral yovo ilaiyo kurukweyorakono. Toro tooral nuu Krais toolluno kuudo yere muubweyodore toga kworalda'ai me'no kuubweyajulorakono. Aki toro tooralluno Jisasolluro kuurotokwe tooro kuudo me'no youroma'dupudorakono. Toro toorallomno moro, “Ilaiyokwonoo,” tov kuuwopiyamono.

⁸ Aki moro ibwoto'nyo Ampliyatosol nemi Aguto toolluro kuunodo me'no wimo'nodowodo su toollomno moro, “Ilaiyokwonoo,” tov kuuwopiyamono.

⁹ Aki nevuge Krais toolluro avaiwomdokwe Uurbanoseke'aro moro ibwoto'nyo kuunodo Stakiseke'aro toorallomno, “Ilaiyokwonoo,” kuuwopiyamono.

¹⁰ Aki Krais toollu nebal'no uumjunyokwe yovo me'no ma'dowodo Apelesollomno moro, “Ilaiyokwonoo” tov kuuwopiyamono. Aki a'mwo Aristabuulosolluro avalo tonumdotaiyomno moro, “Ilaiyokwonoo,” tov kuuwopiyamono.

¹¹ Aki moro iko avalo tovasuda'ai Heroodiyonolluno, “Ilaiyokwonoo,” kuuwopiyamono. Aki a'mwo Nasisosolluro avalo tonumdotavuro pun Aguto toolluro kuunodo me'no wimo'nodupudo su tonyomno, “Ilaiyokwonoo,” kuuwopiyamono.

¹² Aki Aguto toolluro womdo yodubulo puruval Traifenakwe Traifoosakwe tovallomno moro, “Ilaiyokwono,” tov kuuwopiyamono. Aki moro ibwoto'nyo kuunodo Pesisov Aguto toolluro womdo tovi guureji wimovla'mdowodokwono. Su toviyomno moro, “Ilaiyokwonoo,” tov kuuwopiyamono.

¹³ Aki Aguto toolluro adomaroka Ruufosollomno, “Ilaiyokwonoo,” kuuwopiyamono. Aki gamoro ganeyago tov mi nyuneyago to'busuko anyumo'nyajukokwono. Su toro toviyomno moro, “Ilaiyokwonoo,” tov kuuwopiyamono.

¹⁴ Aki moro, “Ilaiyokwonoo,” tov a'mwo abolo akanyomno kuuwopiyamono. Asinkritoseke'aro Flegoneke'aro Hemeseke'aro Patroobaseke'aro Hemaseke'aro tonyomno kuuwopiyamono. Aki su togai Jisasolluro a'mwo abolo gabovo i'bwo'nomwalodupudo kunyuno kuruv kuuwopiyamono.

¹⁵ Aki Filoologoseke Juuliyakwe tovake'aro Nereyoseke tonyo'mwolake'aro Oolimpaseke'aro aki yiuwi'nokai Gooti toolluro a'mwo abolo pun su togai i'bwo'nomwalodupudo tonyomno moro, “Ilaiyokwonoo,” tov kuuwopiyamono.

¹⁶ Kevu Jisasolluro a'mwo abolo tonyu kuuru'mapi toga kemi poowokalago togai wiyo'mo tov suuwado tonyu molluduuduulo duuwiyogaulo. Aki yiuwi'nokai Krais toolluro mollu'bwoto ton kemiyomno, “Ilaiyokwonoo,” aikwopiyamavo.

A'mwo pworo Jisasolluro mollu'bwoto togaikullu molloru'dovekwapiyo'mo winodupudo tovinokwono

¹⁷ Miyobuuravoo, kevu wako neya kuu'numwalpino'moneyokwe nuu guureji aro ikudumo'mokwono. A'mwo pworo kevu Jisasolluro a'mwo abolo tobuurekullu kaiyako molleru'mdovekwapiyo'mo winodupudorogano. A'mwo su tooro nemoro kuuguudo sugudo yodubwasodowado tovi muu'nyubusuko to'no yopi kisuvolo mujumovla'mdupudorogano. Kevu su toro toorai manyu toru'aro neya duuwiyogaulo.

¹⁸ Su tov aro tovinokwono. A'mwo su tooro nemi Aguto Krais toollu womdo mwiyodupudorogano. Toro kworo kuruv yiuno kevnokwero ilaiyo igollunyo'mo to'no mujumovlavopi a'mwo abolo wako mau'nodopure tonyu aro molloguulludapiyodupudorogano. Kevnokweravuro yogalo sugumaluko togai'aro kemi jolukuulovomallo'mo yogalo togai'aro togai a'mwo abolo tonyuro poowokalago tonyu youkuu'nuujokwerogano.

¹⁹ Kevu kuudo neya jaullulo. Yiuwi'nokai tomuuda'ai Jisasolluro a'mwo abolo ton kemino aro kuudo me'no yaikuu'dupudogano. Oo a'mwo abolo su tobuuro kuuguudo sugudo tovi me'no uumjunodupudodeyo. Kuudo yaikuu'dupudogano. Kemino su toro kuudo yaikuu'dupudo tovino nuu ilaiyo yodumdonyugono. Toro te sugupasudo tonyuno kevu pi'mwo kuudokwe neya jumo'nogaulo. Toro kuvi kuruv ma'no ma'no pasudo tooraino'gwowi yiuno kuudo maiyokwe to'no jumo'nogaulo. Nuu kemino tov su toro tomgu'aro neya imo'nupureyokwe nyunodowodonyugono.

²⁰ Oo Gooti tool nemi sumwoluko kavo wosunyo'moneyokwe tov nekullabodowodekono. Gooti su tool Satanyolluro jurogudo tovi kaiyako mollounapiyo'mo wobo togakono. Su toro me'no amollounapiyo'ji toga kevu Satanyollu suvlo ilomavekupinekono. Nemi Aguto Jisas Kraisolluro yasuwa'wino sugumaluko wiyodowodo tov kemi nokwo ikubwemovla'mwalonogaikikono. Nuu su toro tovino ilaiyo anyunadopiyo.

Poololluro avaiwomdokwe tooro Roomda'ai Jisasolluro a'mwo abolo tonyu, “Ilaiyokwonoo,” kuudopo tovinokwono

²¹ Nuuge avaiwomdo yodowolo Timootiyol gamoro, “Ilaiyokwonoo,” tov kemiyomno aikwopiyamokaikono. Aki moro iko avalo tovasuda'ai Luusiyoseke Jesooneke Soosipatereke kworo kuruv kemiyomno, “Ilaiyokwonoo,” aval'no aikwopiyamaporogano.

²² Aki nuu Tetiyosolonyu Poololluro mago tovida'ai molloda'mdum pas akavi sakwollumo kwonyu kuruv Aguto toolluro yovo tovida'ai kemi, “Ilaiyokwonoo,” aikudumono.

^23-24 Aki Gaiyosol kemiyomno, “Ilaiyokwonoo,” aikwopiyamokaikono. A'mwo su tool gamoro ago tovi mi ilaiyo to'no mollonumwalodowodekono. Toro tool akawaida'ai yiuwi'nokai Jisasolluro mollu'bwoto kunyu kuruv mollomwalodowodekono. Aki Erastosol gamoro, “Ilaiyokwonoo,” tov kemiyomno aikwopiyamokaikono. A'mwo su tool wagwolago akavuro gavman nuugwiyo tonyu mollomwalodowodekono. Aki Jisasolluro a'mwo pwekwo nemi nellugwai'yago toolbusuko nekullumo'nodowodo Kwartosol kwol kuruv kemiyomno, “Ilaiyokwonoo,” aikwopiyamokaikono.

Kuuguudo aiyowo'mo akav Gooti toollu ilomoropimwolowano tovinokwono

²⁵ Aga nevu yiuno Gooti toolluno to'no neya ilomoropimwolowanonogano. Gooti su tool kuuguudo sugudo nuu modomollodumdo tovi'aro kemi jurogudo nokwo daikullumwojumwalonekono. Kuuguudo sugudo su tov aiyoga manyu kuunodo togada'ai yiulo yogalo mujumo'nugelabino mujumo'nugelabino sumaiyokwe kworomo bwotonyago kuuwolo'nyajukokwono. Toro kuvi kuruv aga'no'gwowi yiuno kuu'maiyo toru'no me'no abiyanekulo'nadopikokwono. Kuuguudo sugudo su tov yiuno Jisas Kraisollunokwono. Toro te kevu kuuguudo sugudo su tovino kuudo neya uubwemovlavopi jurogudo nokwo yogullumovla'mwalpinogaikikono.

²⁶ Nevu yiulo yogalo sumo'nyajuko su tovi yiuwi'nokai a'mwo abolo tonyu kuu'maiyo toru'no moruudomollodowadonogano. Yiuwi'nokai a'mwo abolo Juu tooravuro miyawosunodupudo kunyu kuruv Jisasolluno kuudo neya uubwepino'moneyokwe nevu proofet tooravuro puukwollo sakwollajupo togai yodubwasodowadonogano. Su toro yodubwasodowore tovi'aro yiulo yogalo sumo'nyajuko su tov yiuno kuu'maiyo toru'no bomollupto'nubweyodowadonogano. Aki Gooti aiyo yiunokuudo mujomwekovla'mdowodo toolluro yogalo nekudodowo'jure tomgu'aro kuvinono moruudomollodowadonogano.

²⁷ Gooti pwolnodo su tool yiuwi'nokai pi'mwo kuudo ton kurukwekono. Toro tool Jisas Kraisolluro nekullo'mwojo'moneyokwe womdo sopiyoka tovi'aro yovo aguto mallokwekono. Toro toolluno nevu yiuwi'nokai tonol yiunokuudo neya ilomoropimwolowanekono. Su tov nebal'nodokwono.