Room 15 - Gooti Toolluro Yogalokwono

Krais tool gavnokweyolluno mwinyajuko to'busuko kubalno ne kunol kuruv aval'no neya imwalano tovinokwono

¹ Toro te Jisasolluro a'mwo abolo kuudo jurogudo uubweyodowado tonol nevnokwenollu ilaiyo igollunyo'mo to'no kuudo nyau'mwala'jo. Toro kunol kuruv Jisasolluro a'mwo abolo jurogudo mimo'nodupudo tobuurai wiyo'mwojo'moneyokwe kemoro jul'nyo tonyu neya amollukwovogawano.

² Jisasolluro a'mwo abolo su tobuuro jurogudo daiyo'moneyokwe tov nevu yiuwi'nokai tonol ilaiyo neya igolmwalanobuurogano. Nevu su toro tomgu'aro igolowa'ji Jisasolluro a'mwo abolo su tobuuro jurogudo sumo'nupi tov sugudokwono.

³ Kevu kuudo neya jaullulo. Krais tool gavnokweyol ilaiyo igollunyo'moneyokwe miyajukekono. Toro tool burolyogalo wuudodopure kuga kuruv gavnokweyolluno kuudo miyau'dowo jul'nyo to'no amarokaikono. Su toro tovino Krais toolluro yogaimaguurai puruv aro ajakwollungikokwono. “Gootoloo, gumi burolyogalo gudodupudo jul'nyo su tov nuu kwonyu kuruv aval'no bwolanuwo'dowodokwono.” Ajakwollungikokwono.

⁴ Toro te kevu kuudo neya jaullulo. Gooti toolluro yogalo ton nemiyo'moneyokwe aiyoga me'no sokwollanekubweyajupogano. Yogalo su ton nemi yonekubwaso'moneyokweyogano. Aki nevu yogalo su togai jurogudo mollodavowa'ji nemi poowokalago tonyu nokwo duuwimwoju'numwalanonogano. Toro duuwimwoju'nowa'ji Gooti tooke ilomwallo'moneyokwe tovino sogwollo to'no kingovla'mwalanonogano. Gooti toolluro yogalo ton su toro tovino'mo sokwollanekubweyajupogano.

⁵ Aki kevu jurogudo da'mwalpino'moneyokwe Gooti tool kemoro poowokalago tonyu me'no daikumul'mwojodowodekono. Toro tool Krais Jisasolluro kuudo yau'dowodo to'busuko kuudo ton kemoro poowokalago tonyu nokwo ikubweyonekono. Su toro aikubweyo'ji tokwe kevu Jisasolluro tomgu'aro uumjunopi kemoro kuudo ton aval'no nokwo wosunmwalpinogaikikono.

⁶ Aki toro togaikulluro yogaimaguurai tov yiuno avalo puru'monodo to'busuko imo'nowo'ji nemi Aguto Jisas Kraisolluro Ganumiyago Gooti toolluno nokwo ilomodomoropimwolapinogaikikono.

Kuuguudo sugudo tov Juu togai'aro a'mwo abolo Juu miyawosunodupudo togai'aro yiuwi'nokai tonyu aval'no wiyo'mwojo'mokwono

⁷ Toro te kevu Gooti toolluro yovo tovi ilomodomoropiyo'moneyokwe aro neya imwalpinogaikikono. Krais tool kemi ilaiyo me'no amollekumaroka to'busuko kubalno kev kugaikul kuruv yiuwi'nokai Jisasolluro a'mwo abolo pubuurai ilaiyo aval'no neya domollomarogaulo.

⁸ Aki nuu aro ikudumo'mokwono. Gooti tool aiyoga Juu tonyuro kwikweyago toorai subuu'yamju pun me'no kwiyajukekono. Toro te subuu'yamju su ton kuvinono suwiyo imwojo'moneyokwe Krais tool Gooti toolluro womdokwe bwollumo'no'no a'mwo abolo Juu tonyu kwiyo'mwojokaikono. Su toro kwiyo'mwojoka toga Krais tool aro tovino kuuduuwallokaikono. Gooti tool gamoro subuu'yamju tonyu kuvinono uumjunyokwekono. Kuuduuwallokaikono.

⁹ Aki Krais tool a'mwo abolo Juu miyawosunodupudo kunyu kuruv wiyo'mwojo'mo kwolabokaikono. A'mwo abolo Juu tooravuro miyawosunodupudo su ton Gooti toolluro kalo mamwonyodowo'jure tovi kwonpi toga Gooti toolluno nokwo ilomoropiyapinogano. Su toro tovino puukwollo puruv aro sakwollungikokwono. “Nuu a'mwo abolo Juu tooravuro miyawosunodupudo togai aulomwalmi toga guu Gooti tookujuno ilomogwopimwolamonyugono. Aki gumino yovo tovi ilomodomoropiyo'moneyokwe dato dumwalmonyugono.”

¹⁰ Aki puruv aro sakwollungikokwono. “Oo kevu a'mwo abolo Juu tooravuro miyaikuuwosunodupudo togaikul Gooti toolluro a'mwo abolo kuunodo gabovo tonyu uuguro'mwonyopi yiuwi'nokai togaikul kemi poowokalago togai ilaiyo nokwo juloo.”

¹¹ Aki puruv aro sakwollungikokwono. “Oo kevu yiuwi'nokai a'mwo abolo Juu tooravuro miyaikuuwosunodupudo togaikul Aguto toolluno neya julomoropiyogaulo. Aki yiuwi'nokai a'mwo abolo kwako akavi mwalodupudo kugaikul kuruv kwolluno julomoropiyogaulo.”

¹² Aki Aisaiyalluro ajakwolloka puruv aro dodowodokwono. “Jesiyolluro jukweyago kwolaiyo abwo'ji pwol a'mwo abolo Juu tooravuro miyawosunodupudo tonyu mido mollomwallo'moneyokwe imo'nonekono. Toro toolluno a'mwo abolo Juu tooravuro miyawosunodupudo su ton kuudo uubweyopi adoga kuvinono imo'nono'mdukoneyokwe tovino sogwollo kinmwalpinogano.” Sakwollungikokwono.

¹³ Toro te kemi Gooti toolluro Kuullo tool jurogudo ikubweyodowo'jure tokwe kevu Gooti toolluro subuu'yamju su ton adoga kuvinono imo'nupinodukoneyokwe tovino sogwollo kingovla'mwalpinogaikikono. Aki Gooti tool kuvinono ikullo'mwojono su toolluno kuudo to'no duubweyogaulo. Gooti su tool kemi poowokalago togai ilaiyo yo'mo tokwe'aro sumwoluko ton kavo wosunyo'mo tokwe'aro ton kemi nokwo aikubweyono. Gooti tool tono tono ikubwemovla'mwalono tovino nuu ilaiyo anyunadopiyo.

Poolol gavnokweyolluro womdo yodowodo tovino ilaiyo subwosunyajuko tovinokwono

¹⁴ Miyobuuravoo, nuu kemino aro kuudo guureji yaikuu'dumdonyugono. “Oo a'mwo abolo su tobuuro sugudo mujumovlaiyo'moneyokwe kuudo ton me'no kuuluuwo'dowodogano. Aki Gooti toolluro yogalo tovida'ai yiuwi'nokai kuudo ton me'no youroma'dupudogano. Toro tonyuno tov kevuge avalo pubuurai nokwo yodubwasumwalpinogano.” Kemino su toro kuudo me'no yaikuu'dumdonyugono.

¹⁵ Toro kuvi kuruv kevu kavlo punyuno kuudo nyallulo'gwonmwalpiyokwe moro kuudo yau'dumdo pun kemiyo'mo puukwollo akavi sokwollaikubwemono. Gooti tool gavnokweyolluro yasuwa'wino sugumaluko tollugwo me'no nubweyodowodo tovino tov nuu moro kuudo yau'dumdo tonyuno yiulo puru'monodo kuruv miyoupuurosumonyugono. Toro kwonyu kuruv yiuwi'nokai ton kemiyo'mo puukwollo akavi sokwollaikubwemono.

¹⁶ Gooti tool gavnokweyolluro sugudo tov mi me'no anubweyoka toonyuno tov nuu Krais Jisasolluro womdokwe wimo'nodumdonyugono. Toro toonyu Gooti toolluro kuuguudo sugudo tokwe a'mwo abolo Juu tooravuro miyawosunodupudo tonyu moruudomollodumdonyugono. Moro womdo yodumdo su tov pris tooravuro womdo sajupo to'busukokwono. Pris tooro Gooti toollu wiyo'moneyokwe sipsiporodeyo toorogai kwiroudapiyajuporogano. Toro kwiroudapiyajupo toga Gooti tool kemoro wiyodopure toorai ilaiyo amollomallajukekono. Su toro to'busuko kubalno nuu Jisasolluro kuuguudo tokwe a'mwo abolo Juu tooravuro miyawosunodupudo tobuurai moruudomollodumdonyugono. Su toro moruudomollodore tovi'aro a'mwo abolo pun kuudo uubweyodupudogano. Toro uubweyodopure tonyu Gooti tool ilaiyo molloma'dowodekono. Aki Gooti toolluro Kuullo tool a'mwo abolo su tobuurai ma'dowo Gooti toolluro kwoloraiyo kuunodo wimo'numwalpino'moneyokwe morumwallodowodogano.

¹⁷ Gooti toolluro womdo su tovi nuvnokwe judo toonyu miyodumdokwono. Toro kuvi kuruv nuu Krais Jisasollu me'no uuguro'mwonyodumdo tovino tov Gooti toolluro womdo su tovino ilaiyo to'no yo'mi mujumovla'mdumdonyugono.

¹⁸ Toro te nuvnokwenyuro womdo pworaino jo'mo manyunadopiyo. Toro kwonyu kuruv yiuno Krais gavnokwe toolluro womdo tovino to'no jo'mo anyunadopiyo. Krais toolluro womdo su tov numi'aro kuvinono sokaikono. Womdo su tov arokwono. A'mwo abolo Juu tooravuro miyawosunodupudo ton Gooti toollu neya uumjunpureyokwe moro yogalo togai pasudo togai kuvinono mollubworomokabodumdonyugono.

¹⁹ Aki toro toonyu womdo su tovi mujumovla'mdumdo toga duuwallo jurogudo judo'no judo'nodo togai'aro Gooti toolluro Kuullo toolluro jurogudo tokwe'aro togai wuuduuwollumovla'mdumdonyugono. Toro toonyu Krais toolluno kuuguudo sugudo su tokwe wagwolago Jeruusalem toru amoruudomollonyugono. Toro moruudomolluno sumoneyokwe toruda'ai yiuwi'nokai tomuu moruudomolluno moruudomolluno yodum yiuno kwako Ilirikam tomuu me'no moruudopiyodumdonyugono.

²⁰ Toro toonyu kuuguudo sugudo su tokwe kuuno moruudomollo'mo aro nyunodowodonyugono. A'mwo pworavuro me'no moruudomollodupudo su tomuu a'mwo abolo ton kuuguudo sugudo tovi me'no wuu'nodupudogano. Su toro tomuu nuu aki aiko te yodubwaso'mo manyunodowodonyugono. Toro kwonyu kuruv a'mwo abolo Krais Jisasolluno yovo tovi muu'nyodupudo su tonyuno'gwowi moruudomollo'mo to'no nyunodowodonyugono.

²¹ Gooti toolluro yogalo puruv Krais toolluno aro sakwollungikokwono. “A'mwo abolo punyu su toolluno yere mamoruudodupudo kun kuruv me'no kuu'nupi toga'no'gwowi yiuno'no wonomapinekono. Aki a'mwo abolo pun su toolluno yovo tovi muu'nyodupudo kun kuruv me'no kuu'nupi toga'no'gwowi kuudo nyouromapinekono.” Su toro sakwollungikokwono.

Poolol wagwolago Room'no plaiyo'mo kwinoka tovinokwono

²² Nuu go'no go'nodo toga kemi bekuru'mallo'mo nyunodowodo kwonyu kuruv go'no go'nodo tomuu kuuguudo sugudo tokwe moruudomollo'moneyokwe womdo su tov nuumjuku'dowodonyugono.

²³ Toro kuvi kuruv aga'no'gwowi womdo su tov akawai me'no yopiyodum kemi ikwonyo'mo anyunadopiyo. Toro toonyu kworomo bwotonyago toga kemi ikuru'mallo'mo anyunyajukonyugono.

²⁴ Aga kuga kuruv nuu kantri Spen'no puuto tovi avla'mi toga kemi ikuru'mallo'mo anyunadopiyo. Toro toonyu aro kuudo sau'mwakono. Nuu puuto tovi plavo'mi kemi bekuru'ma'monyugono. Kevuge iruko pwekwo me'no mwalo'mi lukomgu kantri Spen'no pla'monyugono. Su toro toga kevu nyo'mwojopi novla'mdo'mure toonyu yonuwapipinogaikikono. Su toro kuudo sau'mwakono.

²⁵ Toro kuvi kuruv aga toga sumdomgu wagwolago Jeruusalemda'ai Gooti toolluro a'mwo abolo tonyu wiyo'mwojo'moneyokwe nuu wagwolago su tomuuno avla'mono.

²⁶ Wiyo'mwojo'mo su tov aro tovinokwono. Kwako Masedooniyake Akaiyake tovalluda'ai Jisasolluro mollu'bwoto ton noonyumwonyu nuugwiyodeyo kuto ivitodeyo pun me'no su'bworosopogano. Su ton Jeruusalemda'ai Gooti toolluro a'mwo abolo supto yodopure tobuurai wiyo'mwojo'moneyokwe su'bworosopogano.

²⁷ Jisasolluro a'mwo abolo su ton noonyumwonyu su togai mamollu'bworosopujuko'mno'juki ilaiyo'maiyo. Toro kuvi kuruv kevnokwe ton me'no su'bworosopo tov ilaiyokwono. Su tov aro tovinokwono. Muudu'nodo toga kwako Masedooniyake Akaiyake tovalluda'ai a'mwo abolo Juu miyawosunodupudo ton Gooti toolluro sugumaluko tollovo yere mamallajupogano. Toro kun kuruv Juu tonyuro ato tovi'aro Gooti toolluro sugumaluko su tollovo me'no maro'mno ilaiyo yodupudogano. Toro ton aro dodupudogano. “Oo a'mwo abolo su tobuuravuro ato tovida'ai ma'dowado tonol nemi dinau to'busuko anekwoso. Toro tobuurai nevu kwako akavida'ai kuto ivito togai kwiya'ji tov ilaiyokwono.” Toro dodupudo tovino tov kemoro kuto ivito ton su'bworosopogano.

²⁸ Toro te nuugwiyodeyo su'bworosopo su togai nuvu mokavlavo'mi Jeruusalemda'ai Jisasolluro a'mwo abolo supto yodopure tobuurai wimonyugono. Me'no wiyo'mi toga kemi tomuu'aro bo'mi kantri Spen'no pla'monyugono.

²⁹ Toro toonyu aro kuudo sau'mwakono. Nuu kemi abekuru'ma'mi toga Krais toolluro sugudo togai ikumokabodo'mure tovino kemoro poowokalago tonyu ilaiyo tov aiyowomno kuullo'movaikwopiyonokwono.

³⁰ Oo miyobuuravoo, nemi Aguto Jisas Kraisolluno aval'no kuudo uubweyodowa aki Gooti toolluro Kuullo tool kalo buuropino winyo'moneyokwe pasudo tov ikullabodowodekono. Toro tovino tov kemi guureji aro ikudoganmo'mokwono. Kevu mi sobanyo mollonyudavopi Gooti tool mi nyo'mwojo'moneyokwe subusu'nyogalo neya duudogaulo.

³¹ Subusu'nyogalo su tov aro tonyuno wuudumwalpinogaikikono. Nuu kwako Juudiyada'ai a'mwo abolo Jisasolluno kuudo muubweyodupudo su tonyu kuuguudo sugudo tokwe moruudomollodumdonyugono. Su toro moruudomollodo'mure toga a'mwo abolo Jisasolluno kuudo muubweyodupudo pun mi kaiyako nyanyugolpiyokwe tovino kevu subusu'nyogalo duudogaulo. Aki nuvu wagwolago Jeruusalemda'ai Gooti toolluro a'mwo abolo tonyu womdo wimwalmonyugono. Moro womdo wiyodo'mure su tovino ilaiyo neya amollomapureyokwe tovino subusu'nyogalo duudogaulo.

³² Aki puruv nuu kemi bekuru'mallo'moneyokwe tovino kevu Gooti toollu subusu'nyogalo neya duudogaulo. Gooti tool ilaiyo kwino'ji tov moro poowokalago tovi ilaiyo bwotonyo tokwe mokabo'mi kevuge iruko pwekwo nokwo mwalanonyugono.

³³ Oo sumwoluko kavo wosunyo'moneyokwe nekullabodowodo Gooti su tool kevuge nokwo mujomwekovla'mwalonekono. Nebal'nodokwono.