Room 14 - Gooti Toolluro Yogalokwono

Kevu Jisasolluro a'mwo abolo pubuurai, “Ma'no ma'no sadokwovo,” nuudumwalpiyokwe tovinokwono

¹ Jisasolluro a'mwo abolo pun kwolluno kuudo me'no kuubweyopogano. Toro kun kuruv kemoro kuudo uubweyodupudo su tov jurogudo mimo'nodupudogano. Su toro tonyu kevu neya wiyo'mwojopi kevuge mwallo'moneyokwe ilaiyo neya domollomarogaulo. Yopi a'mwo abolo jurogudo mimo'nodupudo su tobuuravuro kaiya'no kuudo yau'dupudo tooraino kevu yogalo miyoullajunpinono.

² Jisasolluro a'mwo abolo pun aro tovino kuudo uubweyodupudogano. Oo nevu yiuwi'nokai wosamujuko ton nokwo numwalanonogano. Aki Jisasolluro a'mwo abolo puno'gwowi jurogudo neya mimo'nodupudo su ton aro kuudo yau'dupudogano. Oo nevu yiuwi'nokai toga noonyumwonyu sa'ai kumako toorai manumwalanonogano. A'mwo abolo Gooti toolluno kuudo guureji muubweyodupudo ton su toro kuudo yau'dupudogano.

³ Toro te a'mwo abolo sa'aiyo nodupudo ton a'mwo abolo kumako mwalodupudo tonyuno aro nobwolomodomorumwogapiyapiyo. “Oo weyogworogano.” Toro nobwolomodomorumwogapiyapiyo. Aki kumako mwalodupudo ton a'mwo abolo yiuwi'nokai wosamujuko nodupudo su tonyuno aro nodupiyo. “Awi, Gooti toolluro sumdo tovi ma'no ma'no sadokwovo.” Su toro nodupiyo. Gooti tool Jisasolluro a'mwo abolo su tonyu ilaiyo me'no molloma'dowodogano. Toro tovino tov su toro nodupiyo.

⁴ Kuudo neya jaullulo. Kevu a'mwo pwolluro womdo wiyodowodo tekwojuno aro nodupiyo. “Oo a'mwo su tool kaiya'no yodowodekono.” A'mwo womdokwe su tekwoji su toro wuujo'mo tov kemi maikuuwoso. Yiuno gami womdo wiyodowodo aguto toolluro ato tovi kwoso. Toro te gami aguto toolno nokwo wuudonekono. “Oo guu kaiya'no sadokuuno oo ilaiyo sadokuuno tov.” Toro to'busuko kubalno Gooti Aguto tool gamoro womdo wiyodowado tonollu, “Oo kevu sugudo sadokwovo,” kuvinono anekudoneyokweyo'mo gavnokwe tool jurogudo danekullumwojumwalonekono.

⁵ A'mwo abolo pun lubullu doto yanyo'moneyokwe irukollovodeyo oo iruko Sabat tollovodeyo tonyuno aro kuudo yau'dupudogano. Oo iruko su tollovo aguto tollovogano. Kuudo yau'dupudogano. Aki puno'gwowi aro kuudo yau'dupudogano. Oo yiuwi'nokai iruko tollovo aval'nodollovogano. Kuudo yau'dupudogano. A'mwo abolo go'no go'no su toro kuudo yau'dupudo ton kuudo noullo maullo nyau'mwalpiyo. Toro kun kuruv kemi poowokalago tokwe aro kuudo saupi tov, Oo su toro tomgu'aro tov sugudo'mdeyo, toro kuudo saupi ton kuvinono neya uumjunmwalpinogano.

⁶ Toro te a'mwo abolo aro kuudo yau'dupudo ton, Oo iruko akallu agutollugwogano, Gooti toollu ilaiyo igollo'moneyokwe su toro kuudo yau'dupudogano. Aki a'mwo abolo yiuwi'nokai wosamujuko nodupudo ton Gooti toollu ilaiyo igollo'moneyokwe, “Nenoloo,” wuudopi nodupudogano. Aki su toro to'busuko kubalno wosamujuko punyuno kumako mwalodupudo kun kuruv Gooti toollu ilaiyo igollo'moneyokwe, “Nenoloo,” wuudopi kumako mwalodupudogano.

^7-8 Toro te nevu yiuwi'nokai a'mwo abolo tonol Aguto toolluronogano. Toro tonolluro aiyo somjomwekovlawa'ji tov nevnokwenollo'mo'maiyo. Nemi Aguto tool yovo aguto ma'mwalono'moneyokwe yomjomwekovla'mdowadonogano. Aki nevu abola'ji kuga kuruv nevnokwenollo'mo'maiyo. Nemi Aguto tool yovo aguto mallo'moneyokweyokwono.

⁹ Toro te nevu aiyo mwalodowado tonogai'aro me'no bolodupudo kugai'aro yiuwi'nokai tonollu Krais tool nemi Aguto neya nekullumo'nyo'moneyokwe bolo'no aiyo aiko te me'no adukavokaikono.

¹⁰ Toro te kevu Jisasolluro a'mwo abolo pubuuraino, “Oo ma'no ma'no yokweyogano,” dodupudo tov ilaiyo'maiyo. Aki su toro tobuuravuro kuudo yau'dupudo tovino, “Oo junorukuudo yaullokweyogano,” dodupudo kuruv ilaiyo'maiyo. Kevu kuudo neya jaullulo. Gooti tool nevu yiuwi'nokai tonollu domdukuuranekubweyo'moneyokwe gamoro kooti yogalo tovuro sumdollu toru nomonekudapiyononogano.

¹¹ Su toro tovino Gooti toolluro yogalo puruv aro sakwollungikokwono. “Aguto tool dodowodekono. Nuu Gooti aiyo mujomwekovla'mdumdo toonyu nebal'no yogalo to'no jokwenyugono. Yiuwi'nokai a'mwo abolo pwolno puru'monodo ton moro sumdollu toru suduko binuguto'nopi kemi mago tokwe mino aro dupinogano. Oo Gooti tooku yiuno nebal'nodekugono. Kuu'maiyo toru'no su toro ilomodomonuwopiyapinonyugono.” Sakwollungikokwono.

¹² Toro tovino tov nevu aro kuudo me'no youroma'dowadonogano. Lukomgu nevu yiuwi'nokai tonol Gooti toolluro sumdollu toru nodavowanonogano. Toro davowa'ji nonekudoganodowo'jure toga nevnokwe pwolno puru'monodo tonolluro yomjomwekovla'mdowado tovino kuu'maiyo toru'no dodowiyoku'bworosunanonogano.

Jisasolluro a'mwo abolo pubuurai nobwolo'mwolapiyokwe wako neya kuu'numwalano tovinokwono

¹³ Toro te nevu Jisasolluro a'mwo abolo pubuuravuro yodupudo tovino, “Oo ma'no ma'no sadokwovo,” dodowado su tov akaro'aro neya imwogapiyowa'ji aro kuudo neya yaurogawano. Nemoro buro'nyo buro'nyo'mdeyo sa'ji tovasuda'ai nevuge avalo pubuuro ma'no ma'no yopi nobwolorapiyokwe wako neya au'nogawano. Kuudo yaurogawano.

¹⁴ Kevu neya duu'nyulo. Nuu Aguto Jisasollu me'no uuguro'mwonyodumdo tovino tov nuu aro kuudo me'no yau'dumdonyugono. Gooti toolluro sumdo tovi wosamujuko kaiyako mollugolameyo'moneyokwe pun nonagutokwono. Toro kuvi kuruv a'mwo pwol aro kuudo sauro'ji tov, Oo wosamujuko su tov Gooti toolluro sumdo tovi kaiyako mollugolamo'mdowodokwono. Toro kuudo sauro'ji su toollu wosamujuko su tov kaiyako wimo'nonokwono. Toro tovino tov wosamujuko su tovi nono'jo.

¹⁵ Aki a'mwo su toro kuudo yau'dowodo tekwojuro sumdo tovi kevu jurogudo imo'nodupudo togaikul gamoro wosamujuko kumako wimo'nodowodo su tovi nonpiyo. Kevu kuvinono anpi tov a'mwo su tekwojuro kuudo yau'dowodo tovi kaiyako nyugolpinogaikikono. Su toro sugolpi tov kevu a'mwo su tekwojuno kalo buuropino mwinpinogaikikono. A'mwo su tekwoji wiyo'mwojo'moneyokwe Krais tool me'no aboloka toolluno tov kemoro wosamujuko togai a'mwo su tekwoji kaiyako nyugolpiyo.

¹⁶ Toro te kevu wosamujuko tonyuno, sugudodeyo, kuudo yau'dupudo togaikul a'mwo kumako mwalodowodo toolluro sumdo tovi anpi tov a'mwo su tekwo nobwolorawonekono. Toro abwolorawo'ji toollu kwa'mguda'ai pun wonopi kemino kaiya'no yogalo aro dupinogano. “Oo a'mwo abolo su ton ma'no ma'no sadokwovo.” Kemino su toro nodumwalpiyokwe tovino wako neya dou'nogaulo.

¹⁷ Su tov aro tovinokwono. Aguto kig Gooti toolluro mido mollomwalo tovi dolago tomuu mujomwekovlaiyo'moneyokwe tov wosamujuko tokwe wonyo tokwe toval aguto mimo'nodubulovakono. Toro kuvi kuruv Gooti toolluro mido mollomwalo tovi dolago tomuu mujomwekovlaiyo'moneyokwe aguto imo'nodupudo tono'gwowi arokwono. Nevu pasudo idopto'nodo yomjomwekovlaiyo'mo tokwe'aro sumwoluko puru'mono wosunyo'mo tokwe'aro a'mwo abolo punyuno kalo buuropino mollo'mo tokwe'aro su tono'gwowi aguto imo'nodupudogano. Pasudo su ton Gooti toolluro Kuullo tool nemi nekubweyodowodogano.

¹⁸ Toro te kevu pwolno puru'monodo togaikul su toro tomgu'aro uumjunopi Krais toolluro womdo kwimovlapi tov Gooti toollu ilaiyo igolpinogaikikono. Aki toro togaikullu a'mwo abolo pun ilaiyo nokwo mollekumapinogano.

¹⁹ Toro tovino tov nevu yiuwi'nokai toga a'mwo abolo pubuurogai sumwoluko aval'no wosungovlaiyo'mo tomgu'aro to'no neya yomjomwekovlavogawano. Aki toro tonol Jisasolluro a'mwo abolo pubuurai jurogudo duuwimwojo'moneyokwe womdo to'no neya amjumovlavogawano.

²⁰ Kevu wosamujuko tonyuno to'no kuudo yauropi Gooti toolluro a'mwo pworaino womdo me'no sopingiko tovi kaiyako nomollugolamo'mwalpiyo. Yiuwi'nokai wosamujuko ton nonyo'moneyokweyogano. Toro kuvi kuruv gumoro nodo'bure tovida'ai a'mwo pwekwo bwolorawo'ji ma'no ma'no nyo'jo. Toro te gumoro anbi tovasuda'ai a'mwo pwol ma'no ma'no so'ji tov guu kweku kuruv ma'no ma'no me'no suguno.

²¹ Toro te kevu aro kuudo saupi tov, Oo nuu noonyumwonyu sa'aiyorodeyo oo wain wonyorodeyo oo moro buro'nyo buro'nyo pasudorodeyo sumi tooraida'ai Jisasolluro a'mwo abolo pubuuro nobwolorapiyokwe nuu ku'nono mimwalmonyugono. Su toro kuudo yauropi kuudo su toorai kuumjunpi tov sugudo ipinogaikikono.

²² Toro te kevu yiuwi'nokai wosamujuko tonyuno aro kuudo yau'dupudo togaikul, Oo yiuwi'nokai ton nokwo mujonugovla'mwalanonogano. Su toro kuudo yau'dupudo togaikul kemi kuudo su tov yiuno kevnokwe togaikulluno to'no neya jomullosogaulo. Aki Jisasolluro a'mwo abolo punyu kemoro kuudo su tonyu neya uumjunpino'moneyokwe madumuurolopinogaikikono. Toro kuvi kuruv yiuno guvnokwe judo tookuge'aro Gooti tooke'aro toorakullu ikwo'mwalonokwono. Toro te a'mwo pwol yiuwi'nokai wosamujuko tonyu nonyo'moneyokwe kuudo kwolallo miyourukwapiyowo'ji aro ado'ji tov, “Oo Gooti tool maironumwallononyugono,” su toro ado'ji tool ilaiyo to'no nokwo mujonugovla'mwalonekono.

²³ Toro kuvi kuruv a'mwo pwolno'gwowi yiuwi'nokai wosamujuko tonyu nonyo'moneyokwe kuudo noullo maullo yau'dowodo su tool ano'ji tov ma'no ma'no yonekono. Su tov gavnokweyolluro kuudo yau'dowodo tovi kuvinono muumjunodowodo tovino tov Gooti tool nerumwallonekono. Aki toro tool gami kuudo uubweyodowodo tomgu'aro pasudo punyuno, sugudodeyo, kuudo yau'dowodo su tonyu kuumjuno'ji tov ilaiyo yonekono. Toro kwol kuruv muumjuno'ji to'gwowi ma'no ma'no yonekono.