Room 13 - Gooti Toolluro Yogalokwono

Nevu gavman mido mollomwalokwe toorai dolago tomuu neya mujomwekovla'mwalano tovinokwono

¹ Yiuwi'nokai a'mwo abolo ton gavman tooravuro mido mollomwalo tonyu dolago tomuu neya mwalopi aki kemoro yogalo tonyu neya uumjunmwalpinogano. Kevu kuudo neya jaullulo. Gavman mido mollomwalokwe su tooro kevnokwe tooro mamolludapinodupudorogano. Toro kuvi kuruv Gooti toolluro molludapiyodowodorogano. Nemi mido mollonekumwalmwalpino'moneyokwe Gooti gavnokwe toolluro molludapiyodowodorogano.

² Toro tooraino tov a'mwo pworo mido mollomwalokwe su toorai kisuvolo kwipi tov Gooti gavnokwe toollu kisuvolo wipinorogano. Su toro kwipi tooro Gooti toolluro kirumwallo tov nomapinorogano.

³ A'mwo abolo ton yiuno sugudo to'no amjumovlapi tov gavman mido mollomwalokwe tooraino luko mimwalpinorogano. Toro kuvi kuruv a'mwo abolo pun ma'no ma'no amjumovlapi su tono'gwowi mido mollomwalokwe tooraino luko yopi aro dupinogano. “Awi, nemi neronekumwallupiyo.” Dupinogano. Toro te kevu gavman mido mollomwalokwe tooraino luko yo'mo maikulluno'ji tov yiuno sugudo to'no neya domjumovlavogaulo. Kevu su toro supi togaikullu gavman mido mollomwalokwe kworo kuruv kemi ilaiyo mollekumapinorogano.

⁴ Kevu ilaiyo yomjomwekovla'mwalpino'moneyokwe Gooti tool gavman mido mollomwalokwe su toorai molludapiyodowodorogano. Toro tooravuro yogalo tonyu kevu kisuvolo yopi ma'no ma'no supi tov luko neya jogaulo. Su tov aro tovinokwono. Gooti tool gavman mido mollomwalokwe su toorai molludapiyodowodo tov yasuwa'nodo'moromaiyo. Toro kworo kuruv a'mwo abolo ma'no ma'no yodopure tonyu kirumwallo'moneyokwe molludapiyodowodorogano.

⁵ Toro tovino tov kevu gavman mido mollomwalokwe su toorai dolago tomuu neya jomjomwekovlavogaulo. Su toro yomjomwekovla'mwalpino tov kavlo puruval tovallunokwono. Kavlo puruv gavman tooro kemi nerekumwallo'jokwe tovinokwono. Aki puruv kuudo sugudo pun kemi poowokalago tovi me'no kuulaikwo'dupudo tonyu kuvinono uumjunyo'moneyokwe gavman su toorai kisuvolo nuuwimwalpiyo. Kavlo su toro tovalluno kevu dolago tomuu neya jomjomwekovlavogaulo.

⁶ Aki kavlo su tovalluno tov kevu takis nuugwiyo neya uubimwalpinogaikikono. Gavman mido mollomwalokwe su toorai Gooti toolluro molludapiyoduke tovida'ai womdo momjumovla'mdupudorogano. Toro tovino tov kevu takis nuugwiyo nokwo uubimwalpinogaikikono.

⁷ Aki gavman tooro buro'nyo buro'nyodeyo tonyuno, donekubilo, aikudupi tov kuvinono neya duuwiyogaulo. Aki takis nuugwiyo uubiyo'moneyokwe aikudupi kuruv kuvinono neya duubiyogaulo. Aki gavman mido mollomwalokwe toorai kwako tomuu'aro neya wiyopi a'mwo su tooravuro yovo tonyu nobwolomoropiyapiyo.

Kalo buuropino winyo'moneyokwe tov Gooti toolluro yiuwi'nokai loowo tonyu bu'duvoloma'dowodo tovinokwono

⁸ Kevu a'mwo abolo punyuro dinau tov amapi toga lukomgu aro nuudupiyo. “Oo nuu dinau su tov aikomgu yere maikullamonyugono. Dinau su tov nuuge kuuno wo'donokwono.” Kevu su toro nuudupiyo. Toro kuvi kuruv yiuwi'nokai toga kemi dinau to'busuko ikwo'mwalono to'gwowi arokwono. Kevu a'mwo abolo tonyuno kalo buuropino neya domollogaulo. Kevu a'mwo abolo tonyuno su toro tomgu'aro kwipi tov Gooti toolluro yiuwi'nokai loowo go'no go'nodo tonyu uumjunodupudo togaikulbusuko imo'nupinogaikikono. Yiuno su to'gwowi yiuwi'nokai tonollu dinau to'busuko nekwo'dowodokwono.

⁹ Gooti toolluro loowo pun aro dodupudogano. Kevu a'mwo kwolabolo me'no yoma'nodupudo togaikul a'mwo abolo pugai kwonyalo mipinono. Aki kevu a'mwo abolo punyu maromiyosupinono. Aki kuuko mipinono. Aki a'mwo pworavuro buro'nyo buro'nyodeyo tonyuno kwanyu sumdo mainuwipinono. Gooti toolluro loowo togai'aro aki yiuwi'nokai loowo pugai'aro su tonyu yogalo yiuno puru'monodo akav bu'duvoloma'dowodokwono. Yogalo su tov arokwono. Kevu yiuwi'nokai a'mwo abolo pwolno puru'mono kuuru'mapi su tonyu kalo buuropino neya domollogaulo. Kevnokweyogaikulluno ikullunodowodo to'busuko kubalno aval'no neya domollogaulo. Yogalo puru'monodo su tov Gooti toolluro yiuwi'nokai loowo tonyu bu'duvoloma'dowodokwono.

¹⁰ Toro te kevu a'mwo abolo punyuno kalo buuropino aikulluno'ji tov a'mwo abolo su tonyu kaiya'no puru'monodo kuruv migolpinogaikikono. Kevu kalo buuropino aikullunpi su tov Gooti toolluro yiuwi'nokai loowo tonyu uumjunodupudo tonbusuko imo'nupinogaikikono.

Nevu pi'mwono neya yomjomwekovla'mwalano tovinokwono

¹¹ Toro te moro aikudumo su tonyu tono tono neya domjumovlavogaulo. Su tov aro tovinokwono. Kevu nemoro amwakuuwo akaga'no aro kuudo me'no youroma'dupudogaikikono. Nevu Jisasolluno kuudo muudu'no kuubweyowo toga Gooti tool nemi yiunokuudo mollurolovonekumorabiyo'moneyokwe tov yere mabai'meyajukokwono. Toro kuvi kuruv aga'no'gwowi wobo togakono. Toro tovino tov aga sa wollo'moga'maiyo. Pugaikul sa kuuno kwokopo togaikul neya dodukaiyulo.

¹² Kevu yovekurajo akanyu duu'nyulo. Surakuuto akav nobawiyo'mo wobo toru sadopiyo. Aki iruko tollugwo nyullouroso'mo wobo togakono. Toro te surakuuto togasuro ma'no ma'no pasudo tooro neya mollurolodukwopiyowa'ji molo yo'moneyokwe youro jurogudo toul neya amollosano. Toro amollosa'ji su tonol bako tovi anakuuto tomuu kuulomwalowa'ji ma'no ma'no pasudo toorai molo wimovla'mwalanonogano.

¹³ Toro tonol iruko tollugwojuro bako tovi anakuuto tomuu yomjomwekovla'mdupudo tonbusuko kubalno ne kunol kuruv aval'no neya yomjomwekovlavogawano. Aro tomgu'aro yomjomwekovla'mwalanonogano. Nevu ma'no ma'no pasudo toorai mamjeroungovla'mwalanonogano. Aki imo'wonyo bwotonyago ana'ji tovida'ai amomo nyumwala'jo. Aki nevu kwonyalo pasudo toorogai'aro julpasudo toorogai'aro toorai mimwalanonogano. Aki a'mwo abolo pugai molo minmwalanonogano. Aki toro tonyuno kwekuullu kuudo miyau'mwalanonogano.

¹⁴ Toro kuvi kuruv kevu Jisas Kraisolluno kuudo me'no kuubweyopo togaikul kweke me'no guro'mwonyodupudogaikikono. Toro togaikulluro molo'mo youro jurogudo ikullumo'nodowodo toul nemi Aguto Jisas Kraisol kwekono. Toro tovino tov kevu kwako akavida'ai kuudo toorai muu'nyubusuko to'no neya domjumovlavogaulo.