Room 11 - Gooti Toolluro Yogalokwono

Gooti tool Isuraiyolda'ai a'mwo abolo tonyu yiunokuudo mamodukwopiyodowodo tovinokwono

¹ Toro te Isuraiyolda'ai bwotonyago ton Gooti toollu kisuvolo su toro wiyodopure kuvi kuruv Gooti toolno'gwowi gamoro a'mwo abolo su tonyu yiunokuudo mamodukwopiyajukekono. Nuu kwonyu kuruv Isuraiyol a'mwo pwonyugono. Toro toonyu nemi nellukweyago Eburaiyamolluda'ai abonyugono. Aki Bejamenolluro iko tovasuda'ai sumo'nonyugono.

² Gooti su tool Isuraiyolda'ai a'mwo abolo gavnokweyolluro me'no ajesoka tonyu yiunokuudo mamodukwopiyodowodekono. Kevu proofet Ilaijalluro kuuguudo puvi me'no mojagilodupudogaikikono. Aiyoga proofet Ilaijal Isuraiyolda'ai a'mwo abolo tonyuro ma'no ma'no yodopure tovino Gooti toollu deko kuujajukekono. Kuuguudo su tov Gooti toolluro buukiyo tovi aro sakwollungikokwono.

³ “Agutoloo, Isuraiyolda'ai gumi kisuvolo gujodupudo tooro gumoro yiuwi'nokai proofet toorai aromiyosajuporogano. Aki gumoro ilomogwopiyo'moneyokwe dukwagupto kunyu kuruv kaiyako me'no sugolmeyajuporogano. Toro te aga nuu judo tekwonyu kuuno amwakono. Toro mwalodore tekwonyu noromiyanubweyo'moneyokwe a'mgono yodupudorogano.” Sakwollungikokwono.

⁴ Ilaijal Gooti toollu deko toro kuudoka kuvi kuruv Gooti toolluro kuudoka to'gwowi aro sakwollungikokwono. “Awiyo, guu judo tookumaiyo. Isuraiyolda'ai bwotonyago tooro mi buulo nuugunyumopiyodupudo kuvi kuruv a'mwo 7,000 pworono'gwowi mi buulo manuugunyumopiyodupudorogano. A'mwo su tooro kuunano gooti, Belolo, dodupudo toollu milomoropiyodapudorogano.” Gooti tool Ilaijallu kuudoka tov toro sakwollungikokwono.

⁵ Su toro to'busuko kubalno aga kuga kuruv a'mwo abolo bwotonyago ton Gooti toollu buulo uugunyumopiyodupudogano. Toro kuvi kuruv nevu pwolno puru'monodo tonolluno'gwowi Gooti tool gamoro yasuwa'wino sugumaluko tov nonekullabiyo'moneyokwe me'no janekubweyodowodonogano.

⁶ Toro te kevu neya duu'nyulo. Gooti toolluro yasuwa'wino sugumaluko su tov nevnokwenolluro sugupasudo sa'ji tomgu'aro amarowa'jujuko'mno'juki nevu aro nokwo adowa'jujukonogano. “Oo yasuwa'wino sugumaluko akav yasuwa'no ama'mo'maiyo. Nuvnokwenyuro sugupasudo togai abiyoma'mokwono.” Su toro adowa'jujuko'mno'juki Gooti toolluro yasuwa'wino sugumaluko nekullabodowodo su tov yasuwa'no ku'nono mamarowa'jujukonogano. Toro kuvi kuruv a'mwo pwolnodo kwol kuruv gavnokweyolluro sugupasudo so'ji tomgu'aro Gooti toolluro yasuwa'wino sugumaluko ton mabiyomaronekono. Gooti gavnokwe tool gamoro yasuwa'wino sugumaluko tov nonekullabiyo'moneyokwe janekubweyodowodekono.

⁷ Toro te Isuraiyolda'ai yiuno pwolno puru'monodo tobuuro Gooti gavnokwe toolluro me'no ajesungiko su ton gamoro sumdo tovi sugudo wimo'nodupudogano. Toro kuvi kuruv Isuraiyolda'ai a'mwo abolo bwotonyago puno'gwowi sugudo imo'nyo'moneyokwe kevnokwe ton womdo bwotonyo yodupudogano. Toro yodupudo kuvi kuruv Gooti toolluro sumdo tovino'gwowi sugudo mwimo'nodupudogano. Aki toro tonyuro poowokalago kuudo tooro dogaipo'nyo kuumwiyo yiunokuudo imo'nodupudogano.

⁸ Su toro tonyuno Gooti toolluro yogalo puruv aro sakwollungikokwono. “Gooti toolluro molloduke tovida'ai kemoro poowokalago ton dogaipo'nyo kuumwiyo imo'nodupudogano. Aki Gooti toolluro yoduke tovida'ai sumnowojo kadu'nollukullokwe tonbusuko imo'nodupudogano. Tono tono imo'nugelabodupu aga kuga kuruv kuuno sumo'nadokwopogano.” Gooti toolluro yogalo sakwollungiko puruv su toro dodowodokwono.

⁹ Aki aiyoga a'mwo aguto kig Devitol yogalo su to'busuko puruv aro ajakwollokaikono. “Isuraiyolda'ai tooro Gooti toollu ilomoropiyo'moneyokwe lubullu doto ton sanyajupo kworo kuruv kaiya'no aro ajunyajuporogano. “Oo nevu Gooti toolluro sumdo tovi sugudo me'no wimo'nodowado tonolluno tov wosamujuko bwotonyago akav donekullamwallo.” Toro junodupu lubullu doto sanyajupo kuvi kuruv Gooti toolluno'gwowi yiuno suvlo to'no sulomavollajuporogano. Toro sulomavollajupo toorai Gooti tool nerumwallonekono. Su toro airomwallo'ji toga kemoro ma'no ma'nodo tovuro mubiyo tov kuvinono mapinorogano. Isuraiyolda'ai lubullu doto sanyajupo su tooraino yovekurajo puruv arokwono. Dokato tooro yiuno wosamujuko tonyu nonyo'mo to'no winopi abi'bwo'nupi tov wuulo tovibusuko yiuno'no pwaropi nobolpinorogano. Isuraiyolda'ai toorai su toro to'busuko wimo'nonorogano.

¹⁰ Aki toro ton sumdo noonpiyokwe kemoro sumdo tonyu dugumwuulo tov yiunokuudo bu'duvolomaronokwono. Aki Gooti tool tagunyo kuubweyo'ji toga kemoro buulo ton yiunokuudo duptowopiyopi kaiya'no yomjomwekovla'mwalpinogano.” A'mwo aguto kig Devitol su toro ajakwollokaikono.

Gooti tool a'mwo abolo Juu tooravuro miyawosunodupudo tonyu wiyo'mwojodowodo tovinokwono

¹¹ Toro te Isuraiyolda'ai a'mwo abolo bwotonyago ton Gooti toolluro puuto tovi'aro mabodupu buulo kuugunyumopiyajupogano. Su toro kuugunyumopiyajupo tonyu Gooti tool yiunokuudo amodukwopiyokaldukono? Awiyo, yiunokuudo mamodukwopiyokaikono. Kemoro buulo kuugunyumopiyajupo su tov Jisasolluro kuuguudo sugudo tovi a'mwo abolo Juu tooravuro miyawosunodupudo ton wuu'nupino'moneyokwe kudo'aiko to'busuko ausubweyokakwono. Toro te Gooti tool a'mwo abolo Juu tooravuro miyawosunodupudo tonyu ma'no ma'nodo tovuro kirumwallo tovida'ai me'no abomollurolovomokalokwokaikono. Gooti tool aro tomgu'aro winyokwekono. “Moro abomollurolovomokalokuumi su tovida'ai Isuraiyolda'ai a'mwo abolo ton wonopi a'mwo abolo Juu miyawosunodupudo tonyuno kwekuullu saupi tov miyomno kuudo nyouragunyumo'nupinogano.” Gooti tool su toro winodowodekono.

¹² Toro te Isuraiyolda'ai a'mwo abolo ton buulo uugunyumopiyodopure tovida'ai Jisasolluro kuuguudo sugudo tov kuu'maiyo toru'no abomollolupto'nosokakwono. Aki kuuguudo sugudo su tov kwako akavuro yiuwi'nokai do'gwapiyo tomuu me'no abomje'nugoulokakwono. Su tov sugudokwono. Toro kuvi kuruv kevu kuudo neya jaullulo. Lukomgu Isuraiyolda'ai su ton Gooti toollomno kuudo souragunyumo'nupi tov Gooti toolluro a'mwo abolo kuunodo nuuwimo'nupinogano. Su toro kwimo'nupi tovida'ai Gooti toolluro noonyumwonyu sugumaluko ton a'mwo abolo gabovo bwotonyago kun kuruv nomapinogano. Toro mapino su tono'gwowi sugudo kuunodo tonyuno tov sumdomguda'ai tovi nuuwolopinogano.

¹³ Aga a'mwo abolo Juu tonolluro miyaikuuwosunodowado togaikullu kuuguudo akav ikudumo'mokwono. Nuu Jisasolluro kuuguudo tokwe kemi yodekubwosomollo'moneyokwe Gooti tool me'no amonuwopiyabokanyugono. Toro toonyu kuurotokwe womdo akavi yo'mo tov ilaiyo to'no nyunodowo guureji momjumovla'mdumdonyugono.

¹⁴ Su tov aro tovinokwono. Moro avalo Juu ton kemi ikwonopi kwekuullu kuudo aro neya yaupinogano. Oo a'mwo abolo Juu tonolluro miyawosunodowado su tonyu Gooti tool kwiyo'mwojadopiko to'busuko kubalno ne kunollu kuruv neya anekullo'mwojono. Su toro kuudo yauropi ma'no ma'nodo tovuro kirumwallo tovida'ai abirolo'nugolokuupi tov ilaiyo kuunodokwono.

¹⁵ Toro te kevu neya duu'nyulo. Sumdomgu Isuraiyolda'ai a'mwo abolo ton Jisasolluro kuuguudo tovi muu'nyubusuko yo'mno Gooti toollu buulo kuugunyumopiyopogano. Toro uugunyumopiyodopure tonyu Gooti tool amodukwopiyokaikono. Toro amodukwopiyoka tovino tov Jisasolluro kuuguudo tov kwako akavuro yiuwi'nokai do'gwapiyo tomuu me'no abomje'nugoulokakwono. Toro bomje'nugouloduke tovida'ai aga a'mwo abolo bwotonyago ton Gooti toolluro ibwoto'nyo me'no wimo'nodupudogano. Toro kuvi kuruv nuuge avalo Isuraiyolda'ai tobuurono'gwowi Gooti toolluro sumdo tovi me'no abollungopo tonbusuko wimo'nodupudogano. A'mwo abolo su tonyu aiyo aiko te imo'nupino'moneyokwe lukomgu Gooti tool domarowo'ji ilaiyo nomollomaronekono.

¹⁶ Gooti tool a'mwo abolo tonyu ilaiyo molloma'dowodo su tovino nuu yovekurajo kuuguudo akaval ikudumo'mokwono. A'mwo pwol gami bret bwotonyo pwol buudeno sumaiyokwe kula'nyo pwekwo Gooti toollu kwiyokaikono. Su toro toga bret yiuno kula'nyo su tekwono Gooti toolluro mwimo'nokakwono. Toro kuvi kuruv yiuwi'nokai bret bwotonyo kwol kuruv Gooti toolluro kwimo'nokaikono. Yovekurajo puruv su torokwono. Aki puruv arokwono. Iko pwolluro puluko ton Gooti toolluro kuunodo kwimo'no'ji tov gamoro yiuwi'nokai pilato kun kuruv Gooti toolluro wimo'nupinogano.

¹⁷ Toro te iko pwolluno yovo tov oolipolekono. Oolip iko su toolluro kavlo tovida'ai wonyo ma'dowodo tov gamoro yiuwi'nokai pilato kun kuruv ma'dupudokwono. Toro kuvi kuruv puga Gooti tool oolip iko su toolluro pilato pun modovodukwopino sumaiyokwe ipilato yasuwa'nodo pun dovomokabo'no oolip ikavlo su toollu abomomunyutowosokaikono. Toro abomomunyutowosoka toga oolip ikavlo su toolluro wonyo ma'dowodo tov ipilo yasuwa'nodo kunyu kuruv kwiyo'mwojajukokwono. Toro wiyo'mwojoduke tovida'ai jurogudo sumo'nyajupogano. Yovekurajo su tovuro kavlo tov arokwono. Gooti tool Juu a'mwo abolo punyu molleru'mdeyomwalluno sumaiyokwe amodukwopiyokaikono. Toro modukwopiyo'no kevu Juu tooravuro miyaikuuwosunodupudo togaikul ipilato yasuwa'nodo togaikullubusuko ikumokabo'no ikavlo kuunodo toollu abomomunyutovaikubweyokaikono. Toro tovino tov kevu Juu tooravuro miyaikuuwosunodupudo kugaikul kuruv Juu tooravuro ikavlo kuunodo toolluro jurogudo tov ikubwemovla'mdowodekono.

¹⁸ Toro kuvi kuruv kevu ilomoropunyu yapi aro kuudo nyaupiyo. Oo nevu a'mwo abolo Juu tonyu me'no uuwolo'mdowado tonyuro aiko toru me'no ma'dowado tovino tov a'mwo abolo su ton nemi dolago tomuu yonekwapiyodupudogano. Kevu su toro kuudo nyaupiyo. Kuudo neya jaullulo. Kevu ipilo yasuwa'nodo to'busuko togaikullu Gooti tool ikumokabo'no Juu tonyuro ikavlo toollu abomomunyutovaikubweyokaikono. Toro te kevu ikavlo su toollu wonyo tov mwiyodupudogaikikono. Toro kuvi kuruv ikavlo su toolno'gwowi kemi wonyo ton ikullabodowodekono.

¹⁹ Kevu Juu tooravuro miyaikuuwosunodupudo pugaikul aro dupinogaikikono. “Oo nevu gabovo tonol a'mwo abolo Juu tonyuro aiko toru mallo'moneyokwe Gooti tool a'mwo abolo su tonyu me'no amodukwopiyokaikono. Ipilo tonyu modovodukwopiyodupudo to'busuko kubalno amodukwopiyokaikono.”

²⁰ Pugaikul su toro adupi tov kuvi kuuno dupinogaikikono. Su tov aro tovinokwono. Juu a'mwo abolo ton Jisasolluro kuuguudo tovino kuudo muubweyopogano. Toro tonyuno tov Gooti tool amodukwopiyokagano. Toro kuvi kuruv kevu Juu tooravuro miyaikuuwosunodupudo togaikulno'gwowi Jisasolluro kuuguudo tovino kuudo kuubweyopogaikikono. Toro togaikul guureji da'mdupudogaikikono. Kemi su toro ikullumo'nodowodo tovino ilomoropunyu nyapiyokwe luko neya jogaulo.

²¹ Kevu kuudo neya jaullulo. Juu a'mwo abolo su ton ikavlo toolluro pilato kuunodo tonbusuko kwimo'nyajupogano. Toro kun kuruv gami buulo uugunyumopiyodopure tonyu Gooti tool me'no amodukwopiyokagano. Toro tovino tov kevu ipilo yasuwa'nodo tonbusuko imo'nodupudo kugaikullu kuruv Gooti tool yiunokuudo nomaikudukwopiyo'jokwe tovino luko neya jogaulo.

²² Gooti toolluro womdo yodowodo tovino aro kuudo neya jouromarogaulo. Oo Gooti tool a'mwo abolo punyu ilaiyo igolodowodekono. Toro kwol kuruv a'mwo abolo punyuno'gwowi kaiya'no igolodowodekono. Kevu kuudo neya jaullulo. Juu a'mwo abolo ton Gooti toollu buulo uugunyumopiyodopure tonyu amodukwopiyokaikono. Toro kuvi kuruv kevno'gwowi Gooti toolluro sugudo yaikullugolodowodo tovino kuudo uubweyodopure togaikullu ilaiyo kuuno yaikullugolmwalonekono. Toro yaikullugolodowodo kuvi kuruv Juu tooravuro miyaikuuwosunodupudo kugaikul kuruv Gooti toollu buulo kuugunyumopipi to'gwowi nomaikudukwopiyonekono.

²³ Aki Juu a'mwo abolo ton lukomgu Gooti toollomno kuudo youragunyumo'nopi kuudo kuubwepi tonyu Gooti tool mokabowo'ji kemi ikavlo kuunodo toollu aiko te nomomunyutowosonekono. Toro momunyutowoso'moneyokwe tov Gooti toollu jurogudo mwimo'nonokwono.

²⁴ Su tov aro to'busukokwono. Kevu Juu tooravuro miyaikuuwosunodupudo togaikul oolip ipilo yasuwa'nodo tonbusukogaikikono. Toro togaikullu Gooti tool ikumokabo'no ikavlo kuunodo toollu abomomunyutovaikubweyokagaikikono. Toro togaikul ikavlo su toolluro jurogudo tovida'ai da'mdupudogaikikono. Toro kuvi kuruv Juu a'mwo abolo tono'gwowi ikavlo kuunodo toolluro ipilo kuunodo tonbusuko kwimo'nyajupogano. Su tonyu Gooti tool aki aiko te mokabowo'ji momunyutowoso'mo kwino'ji tov womdo bwotonyo miyonekono. Kaveno aki aiko te momunyutowosonekono.

Gooti tool Isuraiyolda'ai tonyuno kalo kuuno winodowodo tovinokwono

²⁵ Toro te miyobuuravoo, nuu yiulo yogalo puruv ikudumo'mokwono. Yiulo yogalo aikudumi su tovi kevu wuu'nopi aro nyulomodomoropinapiyo. “Oo nevu pi'mwo kuudokwe me'no imo'nodowadonogano. Aki toro tonol a'mwo abolo Juu tonyuro aiko toru ma'dowadonogano.” Su toro nyulomodomoropinapiyokwe yiulo yogalo akavi neya duu'nyulo. Aga Isuraiyolda'ai pun kemoro poowokalago kuudo tov lumdo me'no kuulopiyodupudogano. A'mwo abolo su tonyuro lumdo kuulopiyodupudo su tov yiunokuudo'maiyo. Lukomgu Juu tooravuro miyawosunodupudo pun Jisasolluro kuuguudo tovino kuudo kuubwepi ton Gooti toollomno nobumwalpinogano. Toro bodopure tonyu Gooti tool jagilno jagilno yowo'ji, Me'nodeyo, donekono. Toro ado'ji su toga'no'gwowi Isuraiyolda'ai a'mwo abolo kun kuruv Gooti toollomno kuudo youragunyumo'nupi Jisasolluno kuudo nuubwepinogano.

²⁶ Yiuwi'nokai Isuraiyolda'ai su toro kuudo kuubwepi tonyu ma'no ma'nodo tovuro kirumwallo tovida'ai Gooti tool nobomollurolovomokalokwonogano. Gooti toolluro su toro bomollurolovomokalokwono tovino gavnokweyolluro yogalo puruv aro sakwollungikokwono. “Ma'no ma'nodo tovuro kirumwallo tovida'ai bomollurolovomokalokwono tool wagwolago Jeruusalem toru ki'movowo'ji nobolonekono. Su tool Jekoopolluro kwikweyago ton kisuvolo sajupo su tonyuro ma'no ma'nodo tov nomodukwopiyonekono.

²⁷ Aki nuu kwonyu kuruv a'mwo abolo su togai aiyoga subuu'yamju imgu amgu me'no sajunyajuwonyugono. Toro te nuu subuu'yamju su tovi kuvinono uumjuno'mi kemoro ma'no ma'nodo tonyu nomodukwopimonyugono.” Gooti gavnokwe toolluro yogalo puruv su toro sakwollungikokwono.

²⁸ Toro te Isuraiyolda'ai a'mwo abolo ton Jisasolluro kuuguudo sugudo tovi kisuvolo wiyodupu Gooti toolluro ikomago wimo'nodupudogano. Isuraiyolda'ai su tonyuro toro yodopure tovi'aro Jisasolluro kuuguudo sugudo tov bomje'nugoulodawo kevu Juu tooravuro miyaikuuwosunodupudo togaikul ilaiyo to'no me'no ma'dupudokwono. Toro kuvi kuruv kevu kuudo neya jaullulo. Gooti tool aiyoga Isuraiyolda'ai su tonyuro kwikweyago tonyu gamiyo'moneyokwe me'no ajesajukogano. Toro tovino tov agasuro Isuraiyolda'ai a'mwo abolo kisuvolo yodopure kunyuno kuruv Gooti toolno'gwowi kalo buuropino kuuno wingovla'mdowodekono.

²⁹ Su tov aro tovinokwono. Gooti tool gamoro yasuwa'wino pullovo wiyo'moneyokwe a'mwo abolo punyu me'no adomaro'ji tonyuno kuudo muuduko miyaullokwekono. Aki toro tool gamoro me'no wiyodowodo tonyu mo'mweyado miyomaronekono. Toro tovino tov Gooti tool Isuraiyolda'ai gamiyo'mo me'no ajesungiko su tonyu kuvinono nomaronekono. Su toro tovinokwono.

³⁰ Muudu'nodo toga Isuraiyolda'ai ton Gooti toolluro kalo winoduke tovi ilaiyo amallajupogano. Toro kun kuruv lukomgu Gooti toollu kisuvolo wiyodupu gamoro kalo tovi mallo'mo ilaiyo mwinopogano. Toro mwinodopure tovino tov Gooti tool kevu gabovo togaikullo'mo kudo'aiko ausaikubweyokaikono. Toro togaikul Isuraiyolda'ai tonbusuko kubalno Gooti toollu kisuvolo kwiyajupo kuvi kuruv gamoro kalo mamwonyodowodo tovi ama'mwakopogaikikono.

³¹ Kevu Juu tooravuro miyaikuuwosunodupudo togaikul Gooti toolluro kalo mamwonyodowodo tovi mallo'moneyokwe kudo'aiko ausaikubweyokaikono. Toro to'busuko kubalno agasuro Isuraiyolda'ai kisuvolo wiyodupudo su tonyu Gooti tool gamoro kalo mamwonyodowodo tovi mallo'moneyokwe lukomgu kudo'aiko nousubweyonekono.

³² Su tov aro to'busukokwono. Yiuwi'nokai a'mwo abolo ton Gooti toollu kisuvolo wiyodopure tonyu Gooti tool kuulomerosodowodogano. Kevnokwenyuro kisuvolo yodupudo su tov wuulo killo'mo ago tovi anakuuto tomuubusuko Gooti tool kuulomerumwallodowodekono. Toro ton anakuuto su tomuu kuule'na'dupudogano. Gooti toolluro su toro kuulomerumwallodowodo tovino kavlo tov aro tovinokwono. Gooti tool yiuwi'nokai kuule'na'dupudo su tonyu abomollurolovomokalokwo'ji toga gavnokweyolluro kalo mamwonyodowodo tovino kuu'maiyo toru'no nobomollolupto'nosonekono.

Nevu Gooti toolluno neya ilomoropimwolowano tovinokwono

³³ Aiyoo, Gooti toolluro ilaiyo igolmovla'mdowodo ton sugudo bwotonyoganoo. Gamoro pi'mwo kuudo togai'aro nevu gamino kuudo youroma'dowado togai'aro su ton bwotonyo kuunodogano. Aki toro tool buro'nyo buro'nyodeyo pun yo'mo kwino'ji tov kaveno yonekono. Toro toolluno nevu kwako akavida'ai tonol kuudo supto iwapiyanonogano. Aki gamoro yomjumovla'mdowodo tonyuno kavlo kuruv nevu ku'nono miyouromaranonogano.

³⁴ Su toro tovino Gooti toolluro yogalo puruv aro sakwollungikokwono. “Aguto toolluro kuudo yau'dowo'jure tovi a'mwo pwolnodo kwol kuruv ku'nono miyouroononekono. Aki a'mwo pwolnodo kwol kuruv Aguto toollu ku'nono miyodubwasonekono.” Sakwollungikokwono.

³⁵ Aki puruv aro sakwollungikokwono. “A'mwo pwol Gooti toolluro noonyumwonyu punyu mallo'mo tool gamoro noonyumwonyu pugai nokwo yodolovomaronoldukono? Awiyo, a'mwo pwolnodo kwol kuruv Gooti toollu dinau ku'nono muubweyonekono.” Su toro sakwollungikokwono.

³⁶ Kuudo neya jaullulo. Gooti su tool muudu'nodo toga yiuwi'nokai noonyumwonyu tonyu yokwolloso'no gavnokwe tool mollomwalodowodogano. Toro sokwollosoka toolluno tov yovo aguto neya ma'mwalono'moneyokwekono. Toro te ne kunol kuruv gamino yovo tov yiunokuudo neya ilomoropimwolowanekono. Nebal'nodokwono.