Room 10 - Gooti Toolluro Yogalokwono

¹ Toro te nuugeyobuuravoo, moro avalo Isuraiyolda'ai tonyuno kuudo yau'dumdonyugono. A'mwo abolo su ton Jisasolluno kuudo kuubwepi tonyu Gooti tool kemi ma'no ma'nodo tovuro kirumwallo tovida'ai abomollurolovomokalokwoneyokwe tovino moro poowokalago tokwe ilaiyo nyunodowodonyugono. Aki su toro neya wimo'noneyokwe tovino subusu'nyogalo wuudodumdonyugono.

² Isuraiyolda'ai su tonyuno kuudo me'no youroma'dumdogano. Toro tonyuno kuu'maiyo toru'no aro dodolukuurosumogano. A'mwo abolo su ton Gooti toollu uumjungovlaiyo'moneyokwe guureji wiyoganodupudo kun kuruv kuudo po'dogalo miyouroma'dupudogano.

³ Aki toro ton Gooti toolluro sumdo tovi sugudo wimo'nyo'moneyokwe gavnokweyolluro puuto tovi buulo uugunyumopiyodupu kevnokwenyuro kuudo tomgu'aro to'no uumjungovla'mdupudogano. Toro ton aro kuudo yau'dupudogano. Oo nevu loowo tovi'aro uumjungovlavowa'ji Gooti toolluro sumdo tovi sugudo nokwo wimo'nanonogano. Su toro kuudo yau'dupudo tov kuvimaiyo.

⁴ Nevu kuudo nyau'mwakuuwono. Krais tool nemi nekullo'mwojo'moneyokwe womdo tov me'no sopiyokaikono. Su toro sopiyoka toga loowo tovuro womdo tov abimwogapiyokakwono. Toro tovino tov aga'no'gwowi a'mwo abolo yiuno Krais toolluno kuudo kuubwepi ton Gooti toolluro sumdo tovi sugudo nokwo wimo'nupinogano.

Yiuwi'nokai a'mwo abolo kuudo kuubwepi tonyu kemi kirumwallo tovida'ai bomollurolovomokalokwono tovinokwono

⁵ Gooti toolluro sumdo tovi sugudo imo'nyo'moneyokwe aiyoga Moosesol loowo tovino puukwollo puruv aro me'no sakwollokaikono. “A'mwo pwol yiuwi'nokai Moosesolluro loowo tonyu kuumjungovlawo'ji toolno loowo su tonyu'aro aiyo yomjomwekovla'mwalonekono.” Sakwollokaikono.

⁶ Toro sakwolloka kuvi kuruv Krais toolluno kuudo uubweyopi Gooti toolluro sumdo tovi sugudo wimo'nyo'moneyokwe tovino'gwowi Gooti toolluro yogalo puruv aro sakwollungikokwono. “Kevu aro kuudo nyau'mwalpiyo. Oo nevu Gooti toolluro ago tomuuno ilowa'ji Krais toollu amokwolabwa'ji tov nemi nokwo nonekullo'mwojonekono. Krais tool me'no kwolaboka toolluno tov kevu su toro kuudo nyau'mwalpiyo.

⁷ Aki pugaikul aro kuudo nyau'mwalpiyo. Oo nevu kwako tovi dolago tomuu wolowa'ji Krais toollu aiyo aiko te amodukawa'ji tov nemi nokwo nonekullo'mwojonekono. Krais tool aiyo aiko te me'no adukavoka tovino tov kevu su toro kuudo nyau'mwalpiyo.”

⁸ Toro sakwollungiko kuvi kuruv Gooti toolluro sumdo tovi sugudo wimo'nyo'moneyokwe puuto tovino kuuguudo puru'gwowi aro sakwollungikokwono. “Gooti toolluro nebaikuuguudo tov kemi wobo toru wo'dowodokwono. Toro tov kemoro poowokalago kuunodo tonyu kuuluuwo'dowo aki kevnokweyogaikulluro mago tokwe modomollodupudokwono.” Su toro sakwollungikokwono. Toro te a'mwo abolo ton kuuguudo su tovino kuudo neya uubwepino'moneyokwe nevu aval'no moruudomollodowadonogano.

⁹ Toro moruudomollodowado tovida'ai kevu pugaikul kemi mago togai aro dodowiyoku'bworosunpinogaikikono. “Oo Jisasol nemi Agutekono.” Aki kemi poowokalago kuunodo togai aro kuudo kuubwepi tov, “Oo Gooti tool Jisasollu aiyo aiko te me'no amodukavokaikono.” Su toro kuudo kuubwepi tov Gooti tool kemoro ma'no ma'nodo tovuro kirumwallo tovida'ai nobomollurolovekumokalokwonekono.

¹⁰ Su tov aro tovinokwono. Nevu nemi poowokalago togai Jisasolluno kuudo kuubweya'ji tov Gooti toolluro sumdo tovi sugudo wimo'nodowa'jure tonolluno Gooti tool, “Sugudogano,” danekubweyonekono. Aki nevu nemi mago togai Jisasolluno kuu'maiyo toru'no adodowiyoku'bworosuna'ji tov nemi ma'no ma'nodo tovuro kirumwallo tovida'ai Gooti tool nobomollurolovonekumokalokwonekono.

¹¹ Su toro tovino Gooti toolluro yogalo puruv aro sakwollungikokwono. “Yiuwi'nokai a'mwo abolo ton Krais toolluno kuudo kuubwepi tonyu Gooti tool kuvinono nuuwiyo'mwojonogano. Su toro kwiyo'mwojo'ji su tonyuda'ai puru'monodo kuruv wogulo mibwosunpinogano.” Sakwollungikokwono.

¹² Toro te nevu Juu tonogai'aro Juu tonolluro miyawosunodowado togai'aro tonol go'no go'nodonolmaiyo. Yiuwi'nokai tonol Gooti toollu aval'no wimo'nodowadonogano. Gooti tool yiuno pwolnodekono. Su tool nemi aguto nekullumo'nodowo yanyagekono. Toro toollu nevu, “Donekullo'mwojonoo,” kuuda'ji tov yiuwi'nokai tonollu gamoro sugumaluko bwotonyago tollovo nonekubwemovla'mwalonekono.

¹³ Su toro tovino Gooti toolluro yogalo puruv aro sakwollungikokwono. “A'mwo abolo ton Gooti toollu aro kuudupi tov, “Nemi Agutoloo, nemi ma'no ma'nodo tovuro kirumwallo tovida'ai domollurolovonekumokalokwonoo,” yiuwi'nokai kuudupi su tonyu Gooti tool kuvinono bomollurolovomokalokwonogano.” Su toro sakwollungikokwono.

¹⁴ Gooti tool a'mwo abolo deko kuudupi su tonyu kuvinono nuuwiyo'mwojonekono. Toro kuvi kuruv a'mwo abolo ton Aguto toollu, “Donekullo'mwojonoo,” yere muudodopure toga sumdomgu gamino kuudo neya uubwepuro. Aki kuudo yere muubweyodopure toga sumdomgu Aguto toolluno kuuguudo tovi neya wuu'nupuro. Aki kuuguudo su tovi yere muu'nodopure toga sumdomgu a'mwo pwol neya amoruudono.

¹⁵ Aki yere mamoruudodowo'jure toga sumdomgu Gooti tool a'mwo pwollu neya amorapiyono. Su toro tovino Gooti toolluro yogalo sakwollungiko puruv aro dodowodokwono. “A'mwo abolo pun ilaiyo bwotonyo yopi aro modomapinogano. “Oo a'mwo kuuguudo sugudo tokwe amoruudomolladokwopo su tooravuro suvlo ton sugumalukogano.” Modomapinogano.” Gooti toolluro yogalo sakwollungiko puruv su toro dodowodokwono.

¹⁶ Kuuguudo su tovi me'no wuu'nodupudo kuvi kuruv a'mwo abolo puno'gwowi muu'nyubusuko to'no yodupudogano. Su toro tovino aiyoga proofet Aisaiyal puukwollo puruv aro ajakwollokaikono. “Agutoloo, nevu gumoro kuuguudo sugudo tov moruudomollodowado kuvi kuruv kuudo muubweyodopudokwono.” Ajakwollokaikono.

¹⁷ Toro te kuudo neya jaullulo. Krais toolluno kuudo uubweyo'moneyokwe puuto tov yiuno gamoro kuuguudo sugudo moruudomollodopure tovi neya wuu'nupuro. Toro tovi me'no kuu'nupi tomgu'aro to'no kuudo nokwo uubwepinokwono.

¹⁸ Toro kuvi kuruv yamuugojo puruv arokwono. Isuraiyolda'ai ton kuuguudo sugudo su tovi me'no kuu'nopodukono? Tade, yiuno kaduko tokwe to'no me'no kuu'nopogano. Gooti toolluro yogalo puruv aro sakwollungikokwono. “Kemoro kuuguudo amoruudomollopo tov kwako akavuro yiuwi'nokai do'gwapiyo kumuu kuruv me'no abomje'nugoulokakwono.” Sakwollungikokwono.

¹⁹ Toro te Isuraiyolda'ai ton kuuguudo su tovi kuu'nopo kun kuruv kuuguudo su tovi suvlo to'no ilomavolodupudogano. Aiyoga Gooti toolluro yogalo puruv Moosesol aro ajakwollokaikono. “Nuu Juu tooravuro miyawosunodupudo junorukuudokwe tonyu moro sugudo pun nuubwemonyugono. Moro su toro uubweyodo'mure tovi kevu Isuraiyol togaikul kwekuullu kuudo yauropi surodo ipinogaikikono.” Sakwollungikokwono.

²⁰ Aki Juu tooravuro miyawosunodupudo su tonyu Gooti tool ilaiyo mollomarono tovino Aisaiyal kuuguudo jurogudo puruv aro ajakwollokaikono. “A'mwo abolo gabovo ton nuu Gooti toonyu nuwonyo'mo manyudoganyajupo kuvi kuruv nuvnokwe toonyu me'no wiyalo'nodumdonyugono. Aki mino a'mgono miyajupo kuvi kuruv me'no so'mgononumaroponyugono.” Aisaiyal Juu tooravuro miyawosunodupudo tonyuno su toro sakwolloka

²¹ kuvi kuruv Isuraiyolda'ai tonyuno'gwowi aro ajakwollokaikono. “Yiuwi'nokai toga Isuraiyolda'ai tonyu nuu Gooti toonyomno abupureyokwe deko doma'dumdogano. Toro doma'do'mure kun kuruv muu'nyubusuko to'no yopi kisuvolo nyodopudogano.” Ajakwollokaikono.