Room 1 - Gooti Toolluro Yogalokwono

Poolol pas akav yakwollo'no gamoro kuurotokwe womdo amjumovlaiyajuko tonyuno kuudoka tovinokwono

¹ Nuugeravoo, mino yovo tov Poololenyugono. Toro toonyu Krais Jisasolluro ki'nato womdokwe pwonyugono. Jisasol gavnokwe tool gamoro kuurotokwe wimo'nyo'moneyokwe mi donumaro'no Gooti toolluro kuuguudo sugudo tokwe moruudomollo'moneyokwe ajanubweyokanyugono.

² Kuuguudo sugudo su tov Gooti tool aiyoga gamoro proofet toorai subuu'yamju me'no kwiyajukekono. Toro wiyoduke tovi proofet tooro puukwollo sakwollajuporogano. Toro te kuuguudo sugudo su tov Gooti toolluro buukiyo tovi nooso.

³ Gooti toolluro kuuguudo sugudo su tov gamoro Kwolaiyo toollunokwono. Gooti toolluro Kwolaiyo su tool wolabo'no kwako akavida'ai a'mwo kuunodo imo'no'no a'mwo aguto kig Devitolluro iko tovasuda'ai abokaikono.

⁴ Toro tool me'no aboloka toga Gooti tool aiyo aiko te amodukavokaikono. Toro amodukavoka tovino jurogudo kuunodo tomgu'aro Gooti toolluro Kuullo tool kuu'maiyo aro anekuduuwalladopiyo. Nemi Aguto Jisas Kraisol Gooti toolluro Kwolaiyo kuunodekono.

⁵ Toro toolluno yovo tovi ilomoropiyo'moneyokwe nuu gamoro kuuguudo sugudo tokwe moruudomollodo'mure tovida'ai yiuwi'nokai a'mwo abolo pumuuda'ai ton Jisasolluno kuudo uubweyopi kwollu nokwo uumjunmwalpinogano. Toro tovino'mo Gooti gavnokwe tool gamoro Kwolaiyo Jisasollu'aro yasuwa'wino sugumaluko tov anubweyokanyugono. Toro toonyu kuurotokwe imo'nodum gamoro womdo tov yomjumovlaiyo'moneyokwe ajanubweyokanyugono.

⁶ Aki kevu Roomda'ai kugaikullu kuruv Gooti tool gamoro a'mwo abolo kuunodo wimo'numwalpino'moneyokwe me'no ajaikubweyokagaikikono. Toro togaikul Jisas Kraisolluno kuudo kuubwemwakopo togaikullu gamoro a'mwo abolo kuunodo me'no wimo'nodupudogaikikono.

⁷ Gooti tool kevu Roomda'ai togaikulluno kalo buuropino wino'no gamoro a'mwo abolo kuunodo wimo'nyo'moneyokwe me'no adekumarokagaikikono. Toro te nuugebuuravoo, nuu kemi pas akav yakwollodum aro ikudumo'monyugono. Gooti toolluro yasuwa'wino sugumaluko ton nekubwemwalonekono. Nemi Nellunumiyago Gooti tooke'aro Aguto Jisas Kraiseke'aro tooralluda'ai yasuwa'wino sugumaluko su ton kuvinono noma'mwalpinogaikikono. Toro amapi tovida'ai kemoro sumwoluko ton kavo wosopi ilaiyo nokwo yomjomwekovla'mwalpinobuurekikono.

Poolol a'mwo abolo Roomda'ai tonyu wuuru'mallo'mo kwinoka tovinokwono

⁸ Nuu sumdomgu aro ikudumo'monyugono. Yiuwi'nokai kwako akavi kemino tov aro me'no bomje'nugoulodawodokwono. “Oo a'mwo abolo su ton Jisasolluno kuudo me'no uubweyodupudogano.” Kemino toro bomje'nugouloduke tovi a'mwo abolo bwotonyago ton me'no wuu'nopiyodupudokwono. Toro te nuu kemino su toro kuudo yaikuu'dumdo toonyu Jisas Kraisolluro yovo tovida'ai Gooti toollu, “Nenyoo,” subusu'nyogalo wuudodumdonyugono.

⁹ Toro tovino tov nuu Gooti toollu subusu'nyogalo wuudodum kemino kuudo miyaikullulo'gwonodumdonyugono. Moro su toro yodumdo tovino Gooti tool kuudo me'no youronuma'dowodekono. Toro me'no youronuma'dowodo toolluno tov gamoro womdo tovi yo'moneyokwe mi poowokalago kuunodo tokwe wiyodumdonyugono. Toro toonyu gamoro Kwolaiyo toolluno kuuguudo sugudo tokwe moruudomollodumdonyugono.

¹⁰ Aki moro subusu'nyogalo wuudodumdo puruv aro tovinokwono. Nuu kemi ikwonyo'mo nyunodowodonyugono. Toro kuvi kuruv nuu kemi bekuru'mallo'moneyokwe puuto tov Gooti toollu kuuwoso. Gooti gavnokwe tool soulanubweyo'ji toga ilaiyo imonyugono.

¹¹ Nuu kemi jurogudo daikullumwojo'moneyokwe ikwonyo'mo anyunadopiyo. Toro toonyu kemi abekuru'ma'mi tov kemi yodekubwasumonyugono. Aki kuuguudo sodekubwasumi su tov Gooti toolluro Kuullo toolluda'ai yasuwa'wino tovibusuko nekullamonyugono.

¹² Toro te nuu kemi abekuru'ma'mi toga kemoro Jisasolluno kuudo uubweyodupudo tovi ikwono'mi jurogudo nokwo danyumwojononyugono. Aki kevu moro Jisasolluno kuudo uubweyodumdo tovi nuwonopi toga kev kugaikullu kuruv jurogudo nokwo daikullumwojonogaikikono.

¹³ Miyobuuravoo, nuu kemino kuudo miyaikullulo'gwonodumdonyugono. Bwotonyago toga kemi bekuru'mallo'mo yodumdo kwonyu kuruv buro'nyo buro'nyodeyo pun nuumjuku'dupudonyugono. Nuu a'mwo abolo Juu toonolluro miyawosunodowado togai womdo yodore tovida'ai sulo pun me'no ai'nadokwopogano. Toro to'busuko kubalno kev kugaikul kuruv moro womdo ikullodo'mure tovida'ai sulo pun neya ai'nupureyokwe anyunadopiyo.

¹⁴ Toro te a'mwo abolo kuuguudo sugudo nonagutokwe tobuurai moruudomollo'moneyokwe womdo tov dinau to'busuko mi anuwoso. Nuu yiuwi'nokai a'mwo abolo ajumiyo aguto tonyuda'ai mwalodupudo togai'aro a'mwo abolo i'womdo tomuu mwalodupudo togai'aro aki a'mwo kuudo agutokwe toorogai'aro kuudo agutomaiyokwe toorogai'aro toorai nokwo wonyapino mimonyugono. Toro kwonyu kuruv kuuguudo sugudo tokwe a'mwo abolo su tonyu neya moruudomollumonyugono.

¹⁵ Toro tovino tov kevu Roomda'ai kugaikullu kuruv kuuguudo sugudo tokwe guureji yodekubwaso'mo anyunadopiyo.

Gooti toolluro wiyo'mwojo'moneyokwe jurogudo tov kuuguudo sugudo tovi wo'dowodo tovinokwono

¹⁶ Krais Jisasolluno kuuguudo sugudo su tov jurogudokwono. Toro tovi'aro Gooti tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Toro te a'mwoldeyo oo abolo'mdeyo kuuguudo sugudo su tovino kuudo kuubwepi tonyu Gooti tool kuvinono wiyo'mwojodowodekono. Nevu Juu kuudo uubweyodowa'jure tonolluda'ai sumdomgu nekullo'mwojodowo lukomgu a'mwo abolo Juu tonolluro miyawosunodowado kunyu kuruv wiyo'mwojodowodekono. Toro te nuu kuuguudo sugudo su tovino wogulo mibwosunodumdonyugono. Aki toro tokwe moruujo'moneyokwe luko miyokwenyugono.

¹⁷ Toro tov Gooti tool a'mwo abolo tonol gamoro sumdo tovi sugudo wimo'nyo'moneyokwe puuto soulonekubweyoka tovino nekuduuwallodowodokwono. Toro te a'mwo abolo yiuno kuuguudo sugudo su tovino kuudo kuubwepi tono Gooti toolluro sumdo tovi sugudo nokwo wimo'nupinogano. Toro tovino Gooti toolluro yogalo sakwollungiko puruv aro dodowodokwono. “A'mwo abolo kuudo kuubwepi ton Gooti toolluro sumdo tovi sugudo wimo'nopi aiyo yiunokuudo mujomwekovla'mwalpinogano.” Gooti toolluro yogalo sakwollungiko puruv toro dodowodokwono.

A'mwo abolo ton Gooti toollu buulo uugunyumopiyodupudo tovinokwono

¹⁸ Toro kuvi kuruv a'mwo abolo pun kuudo muubwepi tonyuno'gwowi Gooti tool surodo wuunodowodekono. Toro tool surodo su tov muunyu kai'muuda'ai yiuno kuu'maiyo toru'no me'no anekuduuwallokaikono. Yiuwi'nokai a'mwo abolo gamino buulo uugunyumopiyodupu ma'no ma'no yodupudo tonyuno surodo wuunodowodekono. Ma'no ma'no toro yodupudo su ton Gooti toolluro nebaikuuguudo tovi kisuvolo wiyodupudogano.

^19-20 Gooti toolluro nebaikuuguudo su tovi kuudo nokwo kuubweyopujukogano. Su toro tov aro tovinokwono. Muudu'nodo toga Gooti tool kwako tokwe sulugumdo tokwe tovallu sokwollosokaikono. Toro sokwollosoka tovallu a'mwo abolo ton me'no wonodupudogano. Toro wonodupudo ton Gooti miyalo'nodowodo toolluno kuudo go'no go'nodo aro ton youroma'dupudogano. Oo Gooti tool gavnokweyolluro jurogudo tokwe yiunokuudo mujomwekovla'mdowodoldeyo. Aki yiuno judo su tool Gooti tooldeyo. Kuudo youroma'dupudogano. Toro me'no youroma'dupudo tovino tov a'mwo pwolnodo kwol kuruv aro madonekono. “Oo nuu Gooti su toolluno kuudo maiyonyugono.” Ku'nono madonekono. Toro kuvi kuruv Gooti tool gavnokweyolluno kuu'maiyo toru'no me'no wuuduuwallunodowodekono. Toro wuuduuwallunoduke tovi kuu'maiyo toru'no wonodupudo ton Gooti toolluro tonyu me'no wonoma'dupudogano.

²¹ Toro me'no wonoma'dupudo kun kuruv Gooti kuunodo su toolluno ilomoropiyo'mo mwinodupudogano. Aki toro ton Gooti su toolluno, “Nenoloo,” nokwo kuudopujuko kun kuruv muudodupudogano. A'mwo abolo su toro yodupudo ton junorukuudokweyogano. Toro tonyuno tov kemoro kuudo tooro dugumwuulo toollu anakuuto tomuu wo'dupudorogano. Aki toro tonyuro kuudo kworo kuruv noo'nookwo to'no yodupudogano.

²² Aki kevnokwe ton ilomoropunyo'moneyokwe aro dodupudogano. “Oo nevu pi'mwo kuudokwenogano.” Toro dodupudo kuvi kuruv yiuno junoruko to'no imo'nodupudogano.

²³ Aki toro ton Gooti aiyo yiunokuudo mujomwekovlaiyokwe toolluno nokwo sulomoropiyapujuko kun kuruv kemi ato tokwe yokwolludapiyodupudo pworaino'gwowi Gooti jurogudo kuunodo su toolluro aiko toru'no morosopi ilomoropiyodapudogano. Kemi a'mwo me'no bolodupudorodeyo oo dokatorodeyo oo sa'aiyorodeyo oo gabakuto wagwollogudorodeyo toorobusuko kula'noka pworai yokwolludapiyopi ilomoropiyodapudogano.

A'mwo abolo ma'no ma'nodokwe punyuro go'no go'no kirounomollodupudo tovinokwono

^24-26 Toro ton Gooti kuunodo toollu milomoropiyodapu aki ku'nono muumjunyajupekono. Toro kun kuruv gamoro sokwollosoka pworaino'gwowi sulomoropiyajupogano. Toro sulomoropiyajupo kuvi kuruv nevno'gwowi Gooti toollu yiunokuudo ilomoropimwolowano'moneyokwekono. Yogalo akav nebal'no kuunodokwono. Aki a'mwo abolo Gooti toollu muumjunyajupo su ton gamoro nebaikuuguudo tovi kuudo nokwo kuubweyopujuko kun kuruv Gooti toolluno nebaikuuguudo su tovi amodukwopiyajupogano. Toro modukwopiyodupu kemi kuunano yogalo tonyuno to'no kuudo kuubweyajupogano. Toro sajupo tovino tov Gooti tool nokwo wonyapino sajukekono. Wonyapino toro yoduke toga a'mwo abolo su ton kemi poowokalago ton kaiya'no kuumwiyo imo'nodupu ma'no ma'no kiroungovlaiyo'mo kwinyajupogano. Su toro yodopure tovida'ai kemi kulako ton kaiyako sugolamo'nyajupogano. Toro ton aro tomgu'aro sugolamo'nyajupogano. Abolo ton kemi a'mwo toorogai sumwonyo yo'mo mwinodupudo kun kuruv abolo pugai to'gwowi kevnokwe ton kwonyalo pasudo sajupogano.

²⁷ Aki a'mwo kworo kuruv kemi abolo togai sumwonyo yo'mo mwinodupudo kworo kuruv a'mwo toorogai to'gwowi kevnokwe tooro kwonyalo pasudo sajuporogano. A'mwo abolo su ton kevnokwenyuro kulako togai ilaiyo igollunyo'moneyokwe to'no amjumovlaiyajupogano. A'mwo abolo su toro sajupo ton wogulo subwosunopujuko kun kuruv nokwo amjumovlaiyajupogano. Toro mujumovla'mdopure tonyu Gooti tool kevnokwe tonyuro yodopure tomgu'aro airumwallajukekono.

²⁸ Toro te a'mwo abolo su ton Gooti toollu kisuvolo wiyodupu kemi kuudo kaiya'nodo tonyu kuumjungovlaiyajupogano. Toro uumjungovla'mdopure tonyu Gooti tool nokwo wonyapino sajukekono. Aki toro tonyuro kirovanyuvanyu go'no go'no amjumovlaiyajupo su ton yiuno kaiya'no kuumwiyo kuunodogano. Toro kunyu kuruv a'mwo abolo su ton kuvinono mujumovla'mdopure toga Gooti tool muumjuku'dowo nokwo wonyapino sajukekono.

²⁹ A'mwo abolo su tonyuro poowokalago tovi kemi kirovanyuvanyu go'no go'no yo'moneyokwe ton aiyowomno aullo'mowopiyajukogano. Toro kuullu'mowopiyoduke tovida'ai aro sajupogano. Ma'no ma'no yodupu kwanyu sumdo kinuwiyodupu suroguudo yau'dupu kwekuullu kuudo yau'dupu aki pworai yiuno'no aromiyosajupogano. Yodupu aki molo inodupu kuunano yogalo youkuu'nuudodupu magu'nyo kuudo yau'dupu aki a'mwo abolo punyu bwolomorumwogapiyo'moneyokwe yogalo ajajupogano.

³⁰ Aki toro ton buulo yogalo wuudodupu aki Gooti toolluno suroguudo saullajupogano. Aki a'mwo abolo punyu biyolo duu'mwojodupu aki kevnokwe ton ilomoropunyo'mo sajupogano. Aki aro kuudo saullajupogano. A'mwo pworo nemi neya ilomonekwopiyogapuro. Aki ma'no ma'no pasudo toorai kiroungovlaiyo'moneyokwe puuto muuduko ton soulosunyajupogano. Aki kemi kuunum kwolabolo tonyu kisuvolo kwiyajupogano.

³¹ Aki toro ton kwolaiyo muudoga punbusuko to'no kuudo saullajupogano. Aki kemi subuu'yamju me'no duuwiyodopure tonyu kisuvolo sajupogano. Aki kalomaiyo sumo'nyajupogano. Aki a'mwo abolo punyu mido mallo'mo to'no kwinyajupogano. Tono tono yomjomwekovla'mdupu kemoro poowokalago ton kalo mamwonyo'moneyokwe pasudo tov maullo'mowopiyajukogano.

³² Aki toro ton kemi ma'no ma'nodo tonyuno Gooti tool nerumwallono tovino kuudo me'no souromallajupogano. Toro tovino Gooti toolluro kuuguudo sakwollungiko puruv aro dodowodokwono. “A'mwo abolo kaiya'no judo'no judo'no yodupudo tonyuro kirumwallo tov yiuno bolnodokwono.” Gooti toolluro kuuguudo su toro sakwollungiko tovino kuudo me'no youroma'dupudogano. Toro kun kuruv muu'nyubusuko yodupu kemi ma'no ma'nodo tonyu guureji amjumovlaiyajupogano. Aki toro ton aro sajupogano. A'mwo abolo punyuro ma'no ma'nodo tonyu wonodupu maduumjukullajupogano. Toro kun kuruv aro kuujajupogano. “Oo ilaiyo sadokwovo.” Kuujajupogano. Su toro kuujajupo tov kaiya'no bwotonyo sajupogano. Su toro tomgu'aro kaiyako sugolamo'nyajupogano.