Muuduko 41 - Gooti Toolluro Yogalokwono

Joosepol Feroo toolluro wojo tovuro kavlo tovino kuudoka tovinokwono

¹ Toruda'ai kworomo pullal me'no kuuwolo'noka toga Feroo tool wojo puruv iwo'no'no aro tovi kwonokaikono. Feroo gavnokwe tool wonyo Nailovi wolo toru davo'no kwonokaikono.

² Toro muugonoda'duke toga 7-pela buulmokau bwotonyo inuuguutowopinodo tooro wonyo Nailovida'ai ilabo'mno gwo'gwopto ton bilomulanodopure toorai kwonokaikono.

³ Aki toruda'ai lukomgu 7-pela buulmokau gwovla'jo yogudolnodo pworo wonyo tovida'ai ilabo'mno sumdomguda'ai toorai uumjunodopure kwonokaikono. Toro te yiuwi'nokai buulmokau tooro wonyo Nailovi weko toru abilodavoporogano.

⁴ Toro biloda'mno sumaveyokwe buulmokau gwovla'jo yogudolnodo tooro 7-pela buulmokau bwotonyo inuuguutowopinodo toorai yiunokuudo adovonopiyoporogano. Toro dovanodopure toorai Feroo tool amuugonodavokaikono. Feroo tool wojo su tovi iwo'nyuno sumaiyokwe aiko te adukavokaikono.

⁵ Toro dukaino sumaiyokwe aki aiko te sa woro'no wojo purukwe'aro suwo'nokaikono. Wojo lukomguda'ai suwo'noka su tov aro tovi kwonokaikono. Pasillo to'busuko wit yogudo pwol da'mduke toollu 7-pela no bwotonyo ton ki'nodopure kwonokaikono.

⁶ Toro wonyuno sumaiyokwe lukomgu wit yogudo avalo toollu 7-pela nabwa'juko tooro muulogulluko ailopingopo tooro ki'nodopure toorai kwonokaikono.

⁷ Toro muugona'duke toga nabwa'juko muulogulluko ailopingopo su tooro 7-pela no bwotonyo toorai me'nyudapiyodopure kwonokaikono. Feroo tool toro wonyuno sumaiyokwe dukavo'no adokaikono. “Oo nuu wojo tov juwo'nadokwono.” Adokaikono.

⁸ Toro tool lomwo toga dukaino sumaiyokwe kuudo kwolallo sourukwapiyokaikono. Toro yourukwapino sumaiyokwe yiuwi'nokai Ijupda'ai pi'mwo kuudokwe tooro abupureyokweyo'mo amodapiyokaikono. Toro te Feroo tool Ijupda'ai pi'mwo kuudokwe toorogai'aro kuuloka toorogai'aro toorai me'no doma'no sumaiyokwe gamoro wojo tovalluno kuuguudo kuudokaikono. Toro kuudoka kuvi kuruv wojo su tovalluro kavlo tovino a'mwo pwolnodo kwol kuruv ku'nono muudoporogano.

⁹ Lukomgu Feroo toolluro wain wonyo willokwe tool aro abuudokaikono. “Oo aga moro kaiya'no so puvino kuu'maiyo toru'no dodowiyoku'bworosumo'mokwono.” Abuudokaikono.

¹⁰ Toro buujuno sumaiyokwe aro kuudokaikono. “Aiyoga guu Feroo tooku a'mwo bret doto sajuko a'mwo aguto tooke'aro nuuge'aro toonallu surodo guuno'no wuulo ameronakubweyodonakono. Toro toonallu gumoro duuwato womdokwe toorai mido mollomwalo toolluro wuulo killo'mo ago tovi aulomeronakubweyodonakono.

¹¹ Toro aulomeronakubweyodo toonal surakuuto avalo pullugwoji yiuwi'nokai toonal wojo puruval kavlo go'no go'nodokwe tovallu suwo'nowolonakono.

¹² Toro suwo'nowolo toga a'mwo Hibruuda'ai muugunyo pwol navuge wuulo killo'mo ago tovi ai'nallajukekono. Toro tool gumoro duuwato womdokwe toorai mido mollomwalo toollu womdo kwiyajukekono. Toro toollu namoro wojo suwo'nolo tovalluno kuudowolo tool wojo tovalluro kavlo tov anakudokaikono.

¹³ Toro anakudoka tovi kuvinono anakullumo'nokanakono. Guu mi womdo sajo tovi aiko te amonumwallodekugono. Aki bret doto sajuko toollu noromiyoso'moneyokwe i'noboukuullo tovi sulomejukurosodekugono.” Kuudokaikono.

¹⁴ Feroo tool toro tovi wuu'nyuno sumaiyokwe Joosepollu mallo'mo gami womdokwe pworai amodapiyokaikono. Toro modapino sumaiyokwe womdokwe tooro Joosepollu wuulo killo'mo ago tovida'ai yere amollurolovomokaloboporogano. Toro ino sumaveyokwe Joosepol gami mollato ton kuuruu'nyuno sumaiyokwe youro muuduko pun me'no molloso'no toga womdokwe tooro Feroo toollomno amokabopekono.

¹⁵ Toro mokabino sumaveyokwe Feroo tool Joosepollu aro kuudokaikono. “Moro wojo kwonmo tovino kavlo tovi yowa'no nyudono pwol mamwallo. Toro kuvi kuruv a'mwo pworo aro anyudumaponyugono. “Joosepolno'gwowi wojo tonyuro kavlo ton kuvinono jokwekono.” Anyudumaponyugono.”

¹⁶ Toro kuudoka tovi Joosepol Feroo toollu kuudokaikono. “Awiyo, nuvnokwe toonyu ku'nono magudumonyugono. Toro kuvi kuruv Gooti toolno'gwowi gumi gujumo'nono tovino kavlo tov nokwo gudonekono. Toro gudodowo'jure tovida'ai kavo nokwo mwalbinekugono.” Kuudokaikono.

¹⁷ Toro wuujuno sumaiyokwe Feroo tool Joosepollu kuudokaikono. “Moro wojo tov aro suwo'numonyugono. Nuu wonyo Nailovi wolo toru ada'mono.

¹⁸ Toro da'mdum 7-pela buulmokau bwotonyo inuuguutowopinodo tooro wonyo Nailovida'ai ilabodupu gwo'gwopto tonyu abilomulanumaporogano.

¹⁹ Toro bilomulanodopure toga aki 7-pela buulmokau gwovla'jo yogudolnodo pworo wonyo tovida'ai ilabodopure kwonmonyugono. Buulmokau gwovla'jo yogudolnodo su toorobusuko pworo yiuwi'nokai Ijup tomuu mwonodumdonyugono.

²⁰ Toro te buulmokau gwovla'jo yogudolnodo su tooro buulmokau bwotonyo inuuguutowopinodo toorai adovanmaporogano.

²¹ Toro adovonopimapo kworo kuruv gwovla'jo yogudolnodo kuuno sumo'numaporogano. Toro tooro buulmokau bwotonyo inuuguutowopinodo toorai me'no adovanmapo kworo kuruv madovanmapo toorobusuko sumo'numaporogano. Toro tovi wonodum aduka'monyugono.” Kuudokaikono.

²² Feroo tool toro wuujuno sumaiyokwe aki aro kuudokaikono. “Nuu aki aiko te sa wo'dum wojo aiko te suwo'numonyugono. Toro toonyu aro tovi kwonmonyugono. Pasillo to'busuko wit yogudo pwol da'mduke toollu 7-pela no bwotonyo ton ki'nodopure kwonmonyugono.

²³ Toro muugona'dore toga lukomgu wit yogudo avalo toollu 7-pela nabwa'juko tooro muulogulluko ailopingopo tooro ki'nodopure toorai kwonmonyugono.

²⁴ Aki toro muugona'dore toga nabwa'juko muulogulluko ailopingopo su tooro 7-pela no bwotonyo toorai me'nyudapiyodopure kwonmonyugono. Wojo su toro tovi kwonmonyugono. Toro kwonmo tovino a'mwo kuuloka toorai kuudumo kworo kuruv wojo tovalluro kavlo tovino ku'nono manyudumaporogano.” Kuudokaikono.

²⁵ Toro kuudoka tovi Joosepol Feroo toollu aro kuudokaikono. “Gumoro wojo tovalluro kavlo tov yiuno puru'monodo tovino kwonmadokwono. Gooti tool gamoro nyono tovino aguduuwallumokaikugono.

²⁶ Toro te 7-pela buulmokau bwotonyo toorogai'aro 7-pela wit no bwotonyo toorogai'aro tooro 7-pela kworomo tobuullunokwono. Yiuwi'nokai su tooro kavlo puru'monodo su tovino kwonmadokwono.

²⁷ Aki lukomguda'ai 7-pela buulmokau gwovla'jo yogudolnodo toorogai'aro 7-pela wit nabwa'juko muulogulluko ailopingopo toorogai'aro tooro muju'wuulo bwotonyo puruv imo'nowo'ji 7-pela kworomo uuwolo'nono tobuullunokwono.”

²⁸ Toro wuujuno sumaiyokwe aki aro kuudokaikono. “Nuu sumdomgu agudumo tov kuvinono agujumo'nadopiyo. Toro te Gooti tool gamoro lukomgu nyono tonyuno guu Feroo tookuji yiuno'no aguduuwallumokaikugono. Toro tov aro tonyunokwono.

²⁹ Wosamujuko bwotonyago kuunodo tov bilaronokwono. Yiuwi'nokai kantri Ijup tomuu muudomullosumovla'mno muudomullosumovla'mno yopi 7-pela kworomo tobuullu toro yomwalpinogano.

³⁰ Kworomo su tobuullu me'no plawo'ji toga lukomgu muju'wuulo bwotonyo puruv nobwonokwono. Muju'wuulo su tov kuuno mujo'movla'mno mujo'movla'mno yowo'ji 7-pela kworomo uuwolo'nonokwono. A'mwo abolo ton muju'wuulo su toro mujomwekovlavopi sumdomguda'ai wosamujuko bwotonyago kwollajuko tonyuno kuudo yallulo'gwonpinogano. Toro te muju'wuulo bwotonyo su tov yiuwi'nokai kantri Ijup tomuu mwalodupudo tonyu kaiyako bwotonyo igolonokwono.

³¹ Toro te muju'wuulo su tovida'ai tabunyu bwotonyo bai'mo'mdowo'jure tovino tov aiyoga ilaiyo to'no amjomwekelabiyajupo tovino kuudo puru'monodo kuruv miyaupinorogano.

³² Aki guu Feroo tooku wojo pugasal suwo'numado tovino tov Gooti toolluro aguduwallumoka tov kuvinono nyumo'nonokwono. Aki toro tov nyumo'nono'mo wobo togakono.

³³ Toro te aga guu Feroo tooku a'mwo pi'mwo kuudokwe pwollu yo'mgonomaro'bi yiuwi'nokai kantri Ijup toru mido mollomwalo yono toollu neya jesubinekugono.

^34-35 Aki kwako Ijup akavi go'no go'nodo tomuu mido mollomwallo'moneyokwe a'mwo pworai jesubinekugono. Toro ajesubi tooro yiuwi'nokai wosamujuko bwotonyago abai'mowo'ji tonyu maropi atobuul momuudeyosupinorogano. Toro amomuudeyosupi tonyuda'ai aval aval tov a'mwo womdokwe toollo'mokwono. Aki amomuudeyosupi puru'gwowi maropi pumuu moroso'mokwono. Toro te wosamujuko pumuu moroso'moneyokwe su ton maropi wagwolago go'no go'nodo tonyu mollu'bworosopi mollomwalmwalpinokwono. Wagwolago su ton guu Feroo tookuji dolago tomuu wo'dupudo tonyu morosopi mollomwalmwalpinogano. 7-pela kworomo wosamujuko bwotonyagokwe tobuullu tono tono mujumovlapinorogano.

³⁶ Wosamujuko amollu'bworosupi ton Ijup kwako akavida'ai a'mwo abolo ton nobolpiyokweyo'mo mollu'bworosupinokwono. Toro te lukomgu 7-pela kworomo tobuullu muju'wuulo bwotonyo tov imo'nodowo'jure toga a'mwo abolo ton nokwo mujonomwekovla'mwalpinogano.” Joosepol Feroo toollu toro kuudokaikono.

Feroo tool Joosepollu gami iwapiyo'mo ajesoka tovinokwono

³⁷ Joosepol toro wuudoduke tovi Feroo tooke'aro gamoro a'mwo aguto toorogai'aro tooro wuu'no'mno ilaiyo subwosunoporogano.

³⁸ Toro ibwosuno'mno Feroo tool gami a'mwo aguto toorai aro kuudokaikono. “A'mwo akal Gooti toolluro Kuullo tool kuulomwalodowodekono. Toro toolbusuko gabovo pwollu nokwo yo'mgonomaranonoldukono? Awiyo, a'mwo akalbusuko pwollu ku'nono miyo'mgonomaranonogano.” Kuudokaikono.

³⁹ Toruda'ai Feroo tool Joosepollu kuudokaikono. “Gooti tool yiuwi'nokai nyumo'nono tonyuno gumi me'no aguduuwallumokaikono. Aki guvubusuko a'mwo pi'mwo kuudokwe pwol nonagutomuugono.

⁴⁰ Toro tovino tov moro kantri akavi mido mollomwallo'mo mogudapimekugono. Toro tookuji moro yiuwi'nokai a'mwo abolo ton gumi dogalo tomuu mwalopi gumjunpinogano. Nuu Feroo toonyuno tov judo toonyu gumi mido mollogumwalmonyugono.” Kuudokaikono.

⁴¹ Feroo tool toro wuujuno sumaiyokwe Joosepollu aro adubweyokaikono. “Duu'nono, yiuwi'nokai Ijupda'ai mido mollomwallo'mo amogudapimono.” Kuudokaikono.

⁴² Feroo tool toro wuujuno sumaiyokwe gavnokweyolluro pollo tovida'ai rig yesowodo tov iroloma'no sumaiyokwe Joosepolluro pollo tovi subweyokaikono. Rig su tov yasuwa'nodo'maiyo. Feroo judo toolluro puukwollo sakwollungikokweyokwono. Toro tovi ibweyo'no aki youro sugumaluko puuso mollubweno sumaiyokwe gool tovida'ai mabidoga wuulo sakwollungiko tov Joosepolluro boruko tovi kuuruubiyokaikono.

⁴³ Toro wuuruubino sumaiyokwe Feroo tool gamoro iwapiyo toolluro mokavlapto'mo karis tool Joosepollu kwiyokaikono. Toro te Joosepol karis toollu ilomwalo'no sa'ai hoos pworal ame'nomokwanolorakono. Toro me'nomokwanodole toga a'mwo pworo sumdomgu wano'mno, “Lukojuloo,” deko amjodumwanyajuporogano. Feroo tool toro amolludapiyoka toga Joosepol yiuwi'nokai Ijupda'ai a'mwo abolo tonyu mido mollomwalokwe sumo'nokaikono.

⁴⁴ Toruda'ai aki Feroo tool Joosepollu aro kuudokaikono. “Nuu Feroo toonyugono. Toro toonyu aro agudumono. “Yiuwi'nokai Ijupda'ai a'mwo abolo ton kevnokwenyuro kuudo tovida'ai mamjumovla'mwalpinogano. Toro kun kuruv gumoro yogalo kuudubi tovino to'no uumjunmwalpinogano.” Agudumono.” Feroo tool toro kuudokaikono.

^45-46 Toro wuujuno sumaiyokwe Feroo tool Joosepollu muudu'yovo puruv sowarokaikono. Yovo su tov Safenat-paneyolo sowarokaikono. Toro yowa'no sumaiyokwe Pootiferalluro taiyo Asenatovi kuumasokaikono. Pootiferal wagwolago Heliyapoolesda'ai pris womdo yokwekono. Toro te Joosepol 30-pela kworomokwe tool Ijupda'ai a'mwo aguto kig Feroo toolluro womdo tovi muudu'no amolludovokaikono. Toro tool Feroo toollu wuugollu'mo'mno sumaiyokwe gami womdo tov yovo'dogallo'moneyokwe yiuwi'nokai kwako Ijup tomuu somollokaikono.

⁴⁷ Toruda'ai 7-pela kworomo tobuullu kwako Ijupda'ai tonyuro womdo tonyu wosamujuko bwotonyago ton ai'nopogano. Toro ki'nugovla'mno sumaveyokwe bwotonyago abuukuu'nopogano.

⁴⁸ Toro buukuu'nodopure tonyu Joosepol nomollu'bworoso'moneyokwe a'mwo pworai amodapiyajukekono. Toro modapiyoduke toga a'mwo abolo ton kemi wosamuju'womdo tonyuda'ai wosamujuko ton mokabodupu wagwolago yiuwi'nokai judo'no judo'nodo tonyu amollu'bworosajuporogano. Yiuwi'nokai Ijup tomuu 7-pela kworomo tobuullu wosamujuko ton toro amollu'bworosajuporogano.

⁴⁹ Wosamujuko amollu'bworosajupo su ton bwotonyago kuunodo sumo'nokakwono. Muudu'nodo toga Joosepol wosamujuko amollu'bworosajupo ton ajagillajuko kwol kuruv bwotonyago me'no sumo'nopo toga'no'gwowi ku'nono majagillajukekono. Wosamujuko su ton soolwaravuro wolo tomuuda'ai we'gullugulludo bwotonyago wo'dowodo to'busuko tonyu amollu'bworosajuporogano.

⁵⁰ To'no'gwowi muju'wuulo bwotonyo tov yere maboduke toga Joosepeke gami abolo Asenatokwe teyaul kwolaiyo pworallu sawosunoleyaukono. Asenatovi ganumiyago Pootiferal Heliyapoolesda'ai pris womdo sajukekono.

⁵¹ Toro te Joosepol gami kwolaiyo muudu'no sawosunoka toollu wonyuno sumaiyokwe aro sajunokaikono. “Oo Gooti tool nyo'mwojoduke tovida'ai moro tabunyu togai'aro moro nyunumiyago toolluro iko tovasuda'ai togai'aro tonyuno kuudo me'no yallulo'gwonodumdonyugono.” Toro sajunoka tovino tov gami kwolaiyo muudu'nodo toolluno yovo tov Manaseyolo sowarokaikono.

⁵² Aki kwolaiyo lukomguda'ai pwollu sawosunokaikono. Toro toollu wonyuno sumaiyokwe aro sajunokaikono. “Nuu kwako akaru jul'nyo pun amaro kuvi kuruv Gooti tool nyo'mwojodowo kwolaiyo akarallu sawosunmono.” Toro yajunyuno sumaiyokwe kwolaiyo lukomguda'ai sawosunoka toolluno Efreyumolo sowarokaikono.

⁵³ Toruda'ai Ijup toru wosamujuko abuukuu'nyajuko 7-pela kworomo tobuul me'no abawokakwono.

⁵⁴ Toro bawino sumaiyokwe Joosepolluro me'no adoka kuvinono 7-pela kworomo muju'wuulo bwotonyokwe tobuul abai'movopogano. Toro abai'movopo toga kantri pumuuda'ai ton mujuko bwotonyo abolopogano. Toro bolodopure kuvi kuruv Ijupda'ai tono'gwowi kemi wosamujuko amollu'bworosajupo ton kurukweyogano.

⁵⁵ Toro te Ijupda'ai ton kemi wosamuju'womdo tonyuda'ai wosamujuko ton me'no nopiyo'mno mujuko'mo sopogano. Toro ino sumaveyokwe Feroo toollu wosamujuko pun anekullabwoneyokweyo'mo guureji kuudoganopogano. Toro kuudoganopo kuvi kuruv Feroo tool aro amodapiyokaikono. “Kevu Joosepollu wuudoganopi gamoro yiuwi'nokai aikudo'ji tovi kuvinono duumjunyulo.” Amodapiyokaikono.

⁵⁶ Toro te muju'wuulo bwotonyo su tov Ijup toru aiyowomno me'no imo'nugwoduke toga Joosepol wosamujuko amollu'bworosajupo ago ton ausokaikono. Toro kuusuno sumaiyokwe Ijupda'ai a'mwo abolo ton wosamujuko tov amubiyomallajupogano.

⁵⁷ Aki yiuwi'nokai tomuu muju'wuulo bwotonyo wo'duke tovino tov yiuwi'nokai kwako go'no go'no pumuuda'ai a'mwo abolo kun kuruv wosamujuko mubiyo'moneyokwe Joosepollomno Ijup'no abiyajupogano. Toro bodupu wosamujuko ton abiyomorabiyajupogano.