Muuduko 39 - Gooti Toolluro Yogalokwono

Joosepol Pootifalluro ago toru amwallajuko tovinokwono

¹ To'no'gwowi Isumaiyololluro iko tovasuda'ai a'mwo pworo Joosepollu Ijup'no amokavlavopekono. Toro mokavla'mno sumaveyokwe a'mwo Ijupda'ai pwol Joosepollu abiyomarokaikono. A'mwo abiyomaroka su toolluno yovo tov Pootifalekono. Toro tool Ijupda'ai a'mwo aguto Feroo toollu gavman womdo agutokwe wimo'nodowo a'mwo aguto Feroo toolluro agwapto toruda'ai duuwato womdokwe toorai mido amollomwallajukekono.

² Toro te Joosepol Ijupda'ai a'mwo Pootifalluro agwapto toru womdo sajukekono. Toro yoduke toollu Gooti Yawel kweke mwalodowo kwiyo'mwojajukekono. Toro te Joosepolluro womdo yoduke tov ilaiyo to'no amjumovlaiyajukekono.

³ Toro mujumovla'mduke toollu Pootifal wonomaro'no aro kuudo saurokaikono. Gooti Yawel a'mwo su tooke mwalodowodekono. Toro wiyo'mwojoduke tovida'ai Joosepolluro yiuwi'nokai womdo yodowodo ton yiuno sugudo to'no jumo'nugovla'mwallo. Kuudo saurokaikono.

^4-5 Toro kuudo yau'no sumaiyokwe Pootifal Joosepolluno ilaiyo winodowo gami do'nuwimwalono'moneyokwe ajesokaikono. Aki gamoro agwapto toruke'aro yiuwi'nokai ago tovi kuulomwalodupudo togai'aro tonyu mido mollomwalo imwalono'moneyokwe ajesokaikono. Toro ajesoka togada'ai Gooti Yawel Joosepolluno kuudo yau'dowo Ijupda'ai Pootifalluro yiuwi'nokai agwapto towaida'ai womdo tonyu sugudo kuubweyajukekono. Yiuwi'nokai ago kuulomwalodupudo togai'aro kwa'mguda'ai wosamuju'womdodeyo togai'aro tonyu sugudo kuubweyajukekono.

⁶ Toro te Pootifal gamoro yiuwi'nokai ton Joosepolluro ato tovi me'no kuubweyoka toga'no'gwowi kuudo kwolallo miyourokwapiyajukekono. Toro tool kavo mwalno yodowo yiuno nonyo'mo wosamujuko tonyuno to'no kuudo saullajukekono. To'no'gwowi Joosepol gamoro kulako tov jurogudo imo'nodowo gamoro sumdomago kuruv muugunyo sugumaluko sumo'nyajukekono.

⁷ Lukomgu Pootifalluro abolo tov Joosepollu kwanyu sumdo kinuuwino sumaiyokwe aro kuudoganokakwono. “Guu nuuge sumwonyo nokwo yesunekudeyo?” Kuudoganokakwono.

⁸ Toro kuudoganoka kuvi kuruv Joosepolno'gwowi kaduko mwiyo'no aro kuudokaikono. “Awiyo, moro a'mwo aguto tool gamoro yiuwi'nokai kuto ivito ton moro ato tovi nubweyodowo kuudo kwolallo miyourokwapiyokwekono.

⁹ Gumoro kwolo Pootifaike'aro nuuge'aro toonal ago akavida'ai mido mollomwallo'mo tov yiuwi'nokai toonal aval'nodonakono. Aki gumoro kwolo su tool yiuwi'nokai tonyuno madanumjukullokwekono. Toro kuvi kuruv gamoro abolo to'guuge mollagwollo'mo to'gwowi danumjuku'dowodekono. Toro tovino tov nuu Gooti toollu kaiya'no nyugolmiyokweyo'mo tov kirovanyuvanyu su toro tov ku'nono mimonyugono.” Joosepol Pootifalluro abolo tovi toro kuudokaikono.

¹⁰ Joosepol toro kuudoka kuvi kuruv Pootifalluro abolo tov yiuwi'nokai iruko toga wuudoganyuno wuudoganyuno sajukokwono. Toro wuudoganoduke tovi Joosepol abolo tovi muu'nyubusuko yodowo abolo tokwe mamollallajukekono. Aki abolo tovi wobo toru'aro mwiyajukekono.

¹¹ Toruda'ai iruko pullugwoji Joosepol ago tovi womdo kuullo'moneyokwe a'mwo pworo maulomwalodopure toga aulokaikono.

¹² Toro kuuloduke toga Pootifalluro abolo tov Joosepollu gami youro laplap kanyulo tovi'aro gale'nomwora'no sumaiyokwe kuudokakwono. “Yere sumwonyo yolo.” Toro kuudoka kuvi kuruv Joosepol lukado plaiyo'moneyokwe laplap kanyulo tov modowiyodukwopino sumaiyokwe abolo tov laplap kanyulo tovi mwora'duke toga Joosepol ago tovida'ai lukado abolokwokaikono.

¹³ Joosepol toro bolokwoduke toga abolo tov aro kwonomarokakwono. Oo Joosepolluro youro laplap kanyulo tov nuu kuuno mwora'dore lukado dobolokuumaiyo. Kwonomarokakwono.

¹⁴ Toro wonoma'no sumaiyokwe abolo tov agwapto towaida'ai womdokwe pworai deko doma'no sumaiyokwe aro soukuu'nuudokakwono. “Kevu bopi bwonyulo. Moro kwolo toolluro Hibruuda'ai a'mwo abiyomokaboka tool nemi wogulo yanekullugollo'mo sumokaikono. Toro tool aro anyumokaikono. Mi kwonyalo nyo'mo tool kuulaboduke toga nuu deko bwotonyo adume'gono.

¹⁵ Deko toro adumo tovi wuu'nodowo nuuge wobo toru amwalluko tool gamoro laplap kanyulo tov irolosodowo lukado abolokuumokaikono.” Soukuu'nuudokakwono.

¹⁶ Abolo su tov Joosepolluro laplap kanyulo tov kuuno momwora'no sumaiyokwe gami kwolo tool ago tovi aikomgu abwoneyokweyo'mo tovino sogwollo amainokakwono.

¹⁷ Toro te Pootifal aikomgu aboka toga gamoro abolo tov Joosepolluno kuunano kuuguudo tov aki aiko te aro soukuu'nuudokakwono. “Gumoro Hibruuda'ai a'mwo abiyomokabodo tool mi wogulo yonuwo'gallo'mo tool miyomno aulamokaikono.

¹⁸ Toro tool miyomno wobo toru kuulaboduke toga nuu deko adumo tovi wuu'nodowo gamoro laplap kanyulo tov irolosodowo lukado abolokuumokaikono.” Soukuu'nuudokakwono.

¹⁹ Toro soukuu'nuudoka tovi wuu'nyuno sumaiyokwe Joosepolluro a'mwo aguto tool kuudo saurokaikono. Oo Joosepol moro abolo tovi ilaiyo migolmokaldeyo. Kuudo yau'no sumaiyokwe Joosepolluno surodo kuunokaikono.

²⁰ Pootifal toro wuunyuno sumaiyokwe Joosepollu wuulo killo'mo ago tovi kuulomerosupino'mo gamoro womdokwe pworai amodapiyokaikono. Toro tooro Joosepollu galomworaro'mno wuulo killo'mo ago tovi aulomerosopekono. Wuulo killo'mo ago su tov a'mwo aguto kig toolluro a'mwo kaiya'no yodopure toorai kuulomerosodowodorukono. Joosepol toro tovi aule'nallajukekono.

²¹ Joosepol wuulo killo'mo ago tovi toro kuule'na'duke kwollu kuruv Gooti Yawel kweke mwalodowo kalo buuropino kwinyajukekono. Toro winoduke tovida'ai Joosepol ilaiyo to'no amjumovlaiyajukekono. Toro mujumovla'mduke toollu wuulo killo'mo ago tovida'ai a'mwo mollomwalokwe tool wono'no Joosepolluno ilaiyo kwinokaikono.

²² Toro kwinoka tool Joosepollu yiuwi'nokai wuulo killo'mo ago tovida'ai kuule'na'dupudo toorai mido mollomwallo'mo womdo tov kuubweyokaikono. Aki yiuwi'nokai wuulo killo'mo ago tovida'ai womdo kun kuruv Joosepollu dolago tomuu kuubweyokaikono.

²³ Toro uubweno sumaiyokwe Gooti Yawel Joosepeke mwalodowo wiyo'mwojoduke tovida'ai yiuwi'nokai womdo ton ilaiyo to'no sumo'nugovlaiyajukokwono. Toro tovino tov wuulo killo'mo ago tovida'ai a'mwo mollomwalokwe tool yiuwi'nokai womdo ton Joosepollu me'no kuubweyoka tonyuno kuudo kwolallo miyourokwapiyajukekono.