Muuduko 26 - Gooti Toolluro Yogalokwono

Aisakol wagwolago Geraruke Biyasibake toru amwallajuko tovinokwono

¹ To'no'gwowi muju'wuulo bwotonyo puruv aiko te sumo'nokakwono. Muju'wuulo bwotonyo su tov aiyoga Eburaiyamol yere maboloduke toga muju'wuulo bwotonyo puruv sumo'noka to'busuko kubalno sumo'nokakwono. Toro te Aisakol Filistiyada'ai a'mwo aguto kig Abimelekollomno wagwolago Geraro'no avlavokaikono.

² Toro plaino sumaiyokwe Gooti Yawel Aisakollu bwiyalo'no'no aro kuudokaikono. “Guu Ijup'no mwolabinono. Toro kweku kuruv moro kwako aguduwallumiyo tovino plavo'bi mwalbinekugono.

³ Toro te aga guu kwako akaru bomwallo imo'no'bi mwalodo'bure toga nuu guuge mwalowosi sugudo pun nogubwemonyugono. Toro te yiuwi'nokai kwako akav guuge'aro gumoro jukweyago sawosunbi toorogai'aro toorekullu nekullamonyugono. Aiyoga gumi junumiyago Eburaiyamollu subuu'yamju me'no aduuwiyajo tov kuvinono uumjunmonyugono.

⁴ Aki gumi jukweyago kwoloraiyo sawosunpi ton kwolallo bwotonyago imo'nopi muunyu kai'muuda'ai sullugabwo toorobusuko imo'nupinogano. Toro tonyu moro sugudo tov nuubwemonyugono. Gumi jukweyago kwoloraiyo tonyu toro kuubwemi tovida'ai yiuwi'nokai a'mwo abolo kwako akavi mwalodupudo kun kuruv sugudo su tov nomapinogano.

⁵ Toro mapino su tov aro tovinokwono. Eburaiyamol moro yogalo tokwe'aro kinamjo'mo yogalo togai'aro loowo togai'aro tonyu kuumjunyajuko tovinokwono.” Gooti Yawel Aisakollu toro kuudokaikono.

⁶ Toro wuujuno sumaiyokwe Aisakol wagwolago Gerar su toru amwallajukekono.

⁷ Toro towai mwaloduke toga wagwolago su toruda'ai a'mwo pworo gamoro abolo Rebekavino aro abuudoganoporogano. “Abolo su tov gumi buro'nyo'mdeyo?” Toro abuudoganopo toorai Aisakol kuudokaikono. “Abolo tov mi nyo'mwokwono.” Aisakol luko yo'no su toro kuudokaikono. Toro tool aro kuudo saurokaikono. A'mwo akawaida'ai tooro moro abolo sugumaluko tovi wonopi kemiyo'mo mallo'moneyokwe noromiyanubwepiyo. Toro kuudo yau'dowo gami abolo tovino, “mi abolokwono,” muujajukekono.

⁸ Toro te Aisakol Gerar towai mwalno mwalno sumaiyokwe puga Filistiyada'ai a'mwo aguto kig Abimelekol gami widoo tovida'ai abwoloonyopiyokaikono. Toro bwoloonyopino sumaiyokwe Aisakol Rebekavi gami ato tokwe mogudupolopiyoduke toollu kwonokaikono.

⁹ Toro wonyuno sumaiyokwe Abimelekol Aisakollu domaro'no kuudokaikono. “Abolo su tov gumi abolokwono. Toro te abolo su tovino, “mi nyo'mwokwono,” anekudodo tov buro'nyo kavlo tovino'mdeyo?” Toro kuudoka tovi Aisakol kuudokaikono. “Moro toro aikudo tov aro tovinokwono. Nuu abolo tovino, “mi abolokwono,” aikudo'mujuko'mno'juki kevu noromiyanubwepiyokweyo'mo luko yono soukuu'naikudonyugono.”

¹⁰ Toro kuudoka tovi Abimelekol aro kuudokaikono. “Guu nemi su toro sanekullugolmodo tov ilaiyo'maiyo. Moro a'mwo pwol gumoro abolo tokwe sumwonyo so'bullujuko'mno'juki gumoro tovasuda'ai jul'nyo bwotonyo nokwo amarowa'jujukonogano.”

¹¹ Toro wuujuno sumaiyokwe Abimelekol yiuwi'nokai a'mwo abolo tonyu duudapi yogalo aro kwiyokaikono. “A'mwo pwol Aisakeke gamoro abolo tokwe teyaullu kaiyako sugolo'ji tool nobolonekono.” Duudapi yogalo toro kuudokaikono.

¹² Toruda'ai Aisakol kwako su toru mwalodowo ikulwiyo bwotonyago ton avlollosajukekono. Toro pulollosoduke kworomo su tollugwoji sulo pullunodo tollugwo no tov 100 tomgu'aro ai'nyajukollugwogano. Aki yiuwi'nokai sulo pulluno pulluno avlollosajuko ton su toro tomgu'aro bwotonyago ki'nodopure tonyu amallajukekono. Gooti Yawel gamoro sugudo tov Aisakollu su toro tomgu'aro kuubweyajukekono.

¹³ Toro uubweyoduke tovida'ai Aisakol kuto ivito bwotonyagokwe sumo'nyajukekono. Aki toro yomjomwekovla'mdowo a'mwo aguto nuugwiyo bwotonyagokwe sumo'nyajukekono.

¹⁴ Toro tool noonyumwonyu sipsip wuulo togai'aro buulmokau wuulo togai'aro a'mwo abolo ki'nato womdokwe togai'aro bwotonyago tonyu amallajukekono. Toro ma'duke toolluno tov a'mwo Filistiyada'ai tooro wono'mno kwekuullu kuudo sauroporogano.

¹⁵ Toro yau'no sumaveyokwe Filistiyada'ai su tooro aiyoga gami ganumiyago Eburaiyamolluro womdokwe tooravuro yiuwi'nokai wonyo buugo alsovomwollosajupo tonyu kwako tokwe me'no aluviropiyajuporogano.

¹⁶ Toro te Abimelekol Aisakollu aro abuudokaikono. “Guu jurogudo kuunodo sumo'nadokuudo tookujuno tov nemi nekugollu'movo'bi pumuuno dovlavono.”

¹⁷ Toro kuudoka tovi Aisakeke'aro gavuge togai'aro ton kuugollu'movopogano. Toro wuugollu'mo'mno sumaveyokwe Geraroda'ai tovuro worato toru'no wola'mno kemi woromollo'mo sel ago ton amodopogano.

¹⁸ Toro mojuno sumaveyokwe Aisakol gami ganumiyago Eburaiyamol kuuno mwaloduke togasuro wonyo buugo alsosajupo tonyu aki aiko te ilso'mo kwinokaikono. Toro tool gami womdokwe toorai morapino sumaiyokwe alsoporogano. Wonyo buugo su tonyu Eburaiyamol aboloka toga Filistiyada'ai tooro kwako tokwe aluviropiyopokwono. Toro tonyu Aisakolluro womdokwe tooro ilsuno sumaveyokwe Aisakol wonyo buugo su tonyuno yovo ton aiyoga gami ganumiyago toolluro me'no sowallajuko yovo togai aval'no sowarokaikono.

¹⁹ Toro te Aisakolluro womdokwe tooro ilsuno sumaveyokwe wonyo sumdo puruv nyulowilovaboduke tovi also'mgonomaroporogano.

²⁰ Toro also'mgonomaropo tovino Geraroda'ai sipsip duuwatokwe tooro Aisakolluro sipsip duuwatokwe toorai ga'gaivolo wiyo'mno aro kuudoporogano. “Wonyo su tov nemorokwono.” Toro kuudopo tovi Aisakolluro sipsip duuwatokwe toorogai molo yogalo sajunoporogano. Toro sajunopo tovino tov Aisakol wonyo buugo alsovomwollosungiko su tovino yovo tov Esekovo sowarokaikono.

²¹ Aki lukomgu Aisakolluro womdokwe tooro wonyo buugo alsovomwollosungiko puvi aki aiko te ilsuno sumaveyokwe wonyo buugo su to kuvino kuruv Filistiyada'ai sipsip duuwatokwe toorogai mebweyogalo aullajunoporogano. Toro sajunopo tovino tov wonyo buugo su tovino yovo tov Sitnavo sowarokaikono.

²² Toro te Aisakeke ton kwako su toru wuugollu'mo'mno sumaveyokwe pumuu abomwalopogano. Toro bomwalo'mno wonyo buugo puruv aki aiko te alsoporogano. Toro alsopo su tovino'gwowi yogalo miyoullajunoporogano. Toro te Aisakol wonyo buugo su tovino yovo tov Reyoobootovo sowarokaikono. Toro yowa'no sumaiyokwe aro adokaikono. “Oo Gooti Yawel nemi nomwalano'moneyokwe akaru sovrovanekubwemokaldeyo. Toro tonol aga akawai ilaiyo to'no yomjomwekovla'mwalanonogano.” Adokaikono.

²³ Toruda'ai lukomgu Aisakeke ton su towai wuugollu'mo'mno sumaveyokwe kwako Biyasiba'no avlavopogano.

²⁴ Toro pla'mdopure surakuuto su tollugwoji Gooti Yawel Aisakollu bwiyalo'no'no aro kuudokaikono. “Nuu gumi junumiyago Eburaiyamolluro Gooti toonyugono. Toro te guu luko mibinono. Nuu guuge mwalowosi sugudo pun gubweyo'mi guu gumi jukweyago kwoloraiyo bwotonyago tonyu yawosunbinekugono. Nuu moro womdokwe anyumo'nyajuko Eburaiyamolluno kuudo yau'dumdo toonyu toro gubwemonyugono.” Kuudokaikono.

²⁵ Toro wuujuno sumaiyokwe kwako su towai Aisakol Gooti Yawellu wiroudapiyo'mo dukwagupto puruv sulo tokwe luvagilovo'no Gooti Yawelluno sulomoropiyokaikono. Toro ilomoropino sumaiyokwe kemi woromollo'mo sel ago ton amodopogano. Toro mojuno sumaveyokwe Aisakolluro womdokwe tooro wonyo buugo puruv alsoporogano.

Aisakeke Abimelekeke tooralluro subuu'yamju sajunolo tovinokwono

²⁶ Toruda'ai a'mwo aguto kig Abimelekeke'aro gami kuuguudo dumul'mwojokwe Ausateke'aro gami molo'mo a'mwo toorai mido mollomwalokwe Fikooleke'aro tooro wagwolago Gerar toru wuugollu'movo'mno Aisakollomno avlavoporogano.

²⁷ Toro tooro plaino sumaveyokwe wuuru'maro'mno Aisakol a'mwo su toorai aro kuudokaikono. “Kevu mino surodo ikuunodowodo toorekul me'no amonuwopiyaboporekikono. Toro toorekul aga buro'nyo'mo miyomno abadokwoporekuldeyo?”

²⁸ Toro kuudoka tovi aro kuudoporogano. “Gooti Yawel guuge amwakulo tovino gwonodowadonogano. Toro te nevuge'aro guuge'aro yiuwi'nokai toonol subuu'yamju neya yajunano.

²⁹ Subuu'yamju su tov aro tovino'mokwono. Nevu kemi ilaiyo to'no yaikullodowadonogano. Toro to'busuko kubalno guu kweku kuruv nemi ilaiyo aval'no neya janekullogologawono. Aki nevu gumino tov nemoro sumwoluko ton kavo gubweyowono gumi pumuuno amogwapiyowonogano. Aki aga Gooti Yawel sugudo to'no gubweyoduke tookuji nevu kuu'maiyo toru'no agwonmwakuuwono.” Kuudoporogano.

³⁰ Toro kuudopo tovi Aisakol lubullu doto yanyo'moneyokwe wonyo togai'aro wosamujuko togai'aro tonyu yovrowosuno sumaiyokwe a'mwo su toorogai sonomwaloporogano.

³¹ Toro yonomwalno sumaveyokwe kworoporogano. Toro wolluno sumaveyokwe lomwo iru'mago toga dukavo'mno yiuwi'nokai tooro subuu'yamju sajunoporogano. Toro yajunyuno sumaveyokwe Aisakol nomodapiyo'moneyokwe aro kuudokaikono. “Kemoro sumwoluko ton kavo wosopi dovlaiyulo.” Toro amodapiyoka tooro Aisakollu wuugollu'movo'mno avlavoporogano.

³² Toro pla'mdopure toga iruko avalo su tollugwoji Aisakolluro womdokwe tooro bo'mno aro abuudoporogano. “Buuso alsumwakuuwo tovi wonyo sumdo puruv silowilovabadopiyo.”

³³ Toro abuudopo tovi Aisakol wonyo buugo alsovomwollosopo su tovino yovo tov Subavo sowarokaikono. Toro sowaroka tovino tov aga kuga kuruv wagwolago su toru'no yovo tov Biyasibavo dodupudokwono.

Isoo'wolluro abolo tonyuro yovo tonyunokwono

³⁴ To'no'gwowi Isoo'wol 40-pela kworomo tobuul uuwolo'nyuno sumaiyokwe toga abolo puruval amarokaikono. Abolo su toval Hitda'aiyovakono. Toro tovalluro puvino yovo tov Beriyolluro taiyo Juuditovokwono. Aki puruv Eloonolluro taiyo Basematovokwono.

³⁵ Toro amaroka su toval gami kuunum kwolabolo Aisakeke Rebekakwe teyaullu kaiyako sugollajulovakono. Toro igolodole tovino tov Aisakeke Rebekakwe teyaul wosamujuko po'dogalo maulonallajuleyaukono.