Kuuguudo Sugudo akav Makolluro sakwollokakwono Mak 9 - Gooti Toolluro Yogalokwono

¹ Toruda'ai Jisasol kuudokaikono. “Nebal'no ikudumo'mokwono. Kevu akaru adakwopo pworekul yere mabolodopure toga aro tovi noonpinorekikono. Gooti tool gamoro aguto kig mido mollomwalo tov gavnokweyolluro jurogudo tokwe mokabodowo'jure tovi kuu'maiyo toru noonpinorekikono.” Kuudokaikono.

Jisasolluro kulako tov judo pumgu'aro amoropiyoka tovinokwono

² Toruda'ai iruko atobuul ato pwol kuuwolo'noka toga Jisasol yiuno Pitaike Jemseke Jooneke toorai momwora'no sumaiyokwe muumuudo kumi'yago pwollu amokailokaikono. Toro mokailno sumaiyokwe Jisasol kulako judo pumgu'aro moropiyoduke toollu amuugonaroporogano.

³ Bako pwopiyodowodo to'busuko kubalno gamoro youro tov wiya'jo to'no moropiyoduke tovi kwonoporogano. A'mwo kwako akavida'ai pwolnodo kwol kuruv youro wiya'jo su to'busuko imo'nyo'moneyokwe ku'nono miyal'mopinogano. Toro moropiyoduke tovi kwonoporogano.

⁴ Toro muugona'dopure toga Ilaijaike Mooseseke tooral Jisaseke kuuguudo ajuda'noporogano. Toro juda'nodopure toorai gamoro uumjunyokwe pworapwol su tooro kwonoporogano.

^5-6 Toro wonyuno sumaveyokwe luko bwotonyo soporogano. Toro ino sumaveyokwe Pital aro kuudo saurokaikono. Buro'nyovo wuudomonyudukono. Toro kuudo yauro'no Jisasollu aro kuudokaikono. “Ibwasokweyoloo, nevu akawai amwakuuwo tov ilaiyokwono. Toro te sel ago puruvapuruv amodano. Puruv gumiyo'mokwono. Puruv Ilaijallo'mokwono. Puruv Moosesollo'mokwono. Toro amodano.”

⁷ Toro wuujuno sumaiyokwe toga Jisaseke da'mdopure toorai sulu'wo puruv abwolobu'duvolomarokakwono. Sulu'wo tov toro abwolobu'duvolomaroka toga anakuuto tomuuda'ai yogaimaguurai puruv alokabokakwono. Toro tov aro adokakwono. “Akal moro kwolaiyo kalo buuropino nyunodowodo tookono. Toro toolluro yogalo dodowo'jure tonyu neya duu'nogaulo.”

⁸ Yogalo toro adoka kuga'gwo kuuno Pitaike'aro Jemseke'aro Jooneke'aro tooro wonomolluno sumaveyokwe a'mwo pwolnodo kwollu kuruv ku'nono mwonoporogano. Yiuno Jisasol judo toollu kwonoporogano.

⁹ Su toro tovi me'no wonyuno sumaveyokwe muumuudo toolluda'ai aikomgu kwolaboporogano. Toro wolabino sumaveyokwe toga Jisasol toro toorai duudapi aro aduumjukurokaikono. “Kevu a'mwo abolo punyu muudupinorekikono. Toro kuvi kuruv yiuno A'mwo Kwolaiyo Kuunodo toonyu bolo'mi aduka'mi toga'no'gwowi nokwo wuudupinorekikono.” Aduumjukurokaikono.

¹⁰ Toro te kuuguudo su tovino gamoro uumjunyokwe tooro yiuno kevnokwe toorai akuuto toru abiyojunugoulaporogano. Toro kworo kuruv Jisasolluro yogalo akavino, “Oo nuu bolo'mi aiyo aiko te noduka'monyugono,” adoka su tovino noo'nookwo to'no soporogano. Toro tooro yogalo su tovuro kavlo tovino somoga'bworajunoporogano.

¹¹ Toro tooro Jisasollu kuudoganoporogano. “Loowo tovino pi'mwo kuudokwe tooro aro dodupudorogano. “Sumdomgu Ilaijalda'ai bowo'ji lukomgu Krais tool bwonekono.” Toro dodupudo tov buro'nyo tovino'mdukono?” Kuudoganoporogano.

¹² Toro kuudoganopo toorai Jisasol kuudokaikono. “Toro ajungiko tov nebalokwono. Sumdomgu Ilaijal a'mwo abolo ton kemi poowokalago tovi yovo'dogalpureyokweyo'mo biyodubwasonekono. Toro tool biyodubwasowo'ji Gooti toolluro morapiyabwono toollo'mo yiuwi'nokai tonyu yovo'dogalosonekono. Gooti toolluro yogalo tovi toro sakwollungikokwono. Aki mino aro sakwollungiko tokwe'aro kuudo neya jaullulo. “A'mwo Kwolaiyo Kuunodo toollu dado bwotonyo wuunonekono. Aki toro toollu buulo uugunyumopiyopi kaiya'no wipinekono.” Gooti toolluro yogalo tovi mino toro sakwollungiko tovino kuudo neya jaullulo.” Kuudokaikono.

¹³ Toro wuujuno sumaiyokwe aro kuudokaikono. “Nuu aro ikudumo'mokwono. Gooti toolluro yogalo tovi Ilaijalluno sakwollungiko su tool kuvinono me'no abai'movokaikono. Toro abai'movoka toollu a'mwo pworo kevnokwero kuudo sauropo tovida'ai kaiya'no sugolopekono. Toro sugolopo tov Gooti toolluro yogalo tovi me'no sakwollungiko tomgu'aro kwiyopekono.” Kuudokaikono.

Jisasol kwolaiyo kuullo ma'no ma'nodokwe pwollu sukuloka tovinokwono

¹⁴ Aki toruda'ai Jisaseke'aro gami uumjunyokwe pworapwol toorogai'aro tooro aikomgu kwolaboporogano. Toro wolabo'mno uumjunyokwe gabovo kuumwollumeloka toorai abwoloonoporogano. Toro abwoloonopo su toorai a'mwo abolo kwolallo bwotonyo ton bomwodovomaro'mno loowo tovino pi'mwo kuudokwe tooro kworogai yogalo yajunodopure toorai kwonoporogano.

¹⁵ Uumjunyokwe tooro me'no wonyuno sumaveyokwe yiuwi'nokai kwolallo ton Jisasollu ainomaroporogano. Toro ainomaropo kuga'gwo kuuno mollolokurosi yo'mno ilaiyo mollomallo'moneyokwe kwollomno kano kano aulapogano.

¹⁶ Toro tonyu Jisasol aro kuudoganokaikono. “Kevu yogalo soullajunmwakopo su tov buro'nyo tovino'mdukono?” Kuudoganokaikono.

¹⁷ Toro wuudoganyuno sumaiyokwe kwolallo tooraida'ai pwol kuudokaikono. “Ibwasokweyoloo, guu mabai'mo'mdore toga mi kwolaiyo toollu gumiyomno amokamonyugono. Kuullo ma'no ma'nodo pwol kwolaiyo toollu kuuluumwalodowodo tovida'ai yogaimajo imo'nyokwekono. Toro toollu amokamonyugono.

¹⁸ Kuullo ma'no ma'nodo tool kwolaiyo toollu mwora'dowo'jure toga aro yokwekono. Mogalowiyemwogapiyowo'ji ibu'muudo tov lubiyowo'ji mago tov duguropiyowo'ji gamoro suvlato tov ruuguusopiyodowodekono. Toro toolluro kuullo ma'no ma'nodo toollu modovomjapiyo'moneyokwe kuudumo kworo kuruv gumoro gumjunyokwe tooro ku'nono mamodovomjapimaporogano.” Kuudokaikono.

¹⁹ Toro kuudoka tovino Jisasol kuudokaikono. “Kevu agasuro a'mwo abolo togaikul Gooti toolluro jurogudo tovino kuudo muubwemwakopogaikikono. Nuu kevuge manyu toga me'no mujomwekovla'mdumdonyugono. Aki manyu toga kemoro jul'nyo toorai mollovo'dogalomwalodumdonyugono. Toro kuvi kuruv kevu kuudo po'dogalo miyou'movla'mdupudogaikikono.” Toro wuujuno sumaiyokwe kuudokaikono. “Kwolaiyo toollu donumokabilo.” Kuudokaikono.

²⁰ Toro kuudoka toollomno kwolaiyo su toollu amokaboporogano. Kuullo ma'no ma'nodo tool Jisasollu wono'no kuga'gwo kuuno kwolaiyo toollu kuruukwiyo amollokaikono. Toro amolloka toga kwolaiyo tool kwako tovi kwolarokaikono. Wola'no sumaiyokwe toga gudogwabo kiro'no ibu'muudo alubiyokaikono.

²¹ Jisasol toro toollu wonyuno sumaiyokwe gami ganumiyago toollu kuudoganokaikono. “Pasudo akaro tov adogasuro kwimo'nugelabiyajuko'mdeyo?” Toro kuudoganoka toollu ganumiyago tool kuudokaikono. “Kwolaiyo kula'nyo toolluda'ai kwimo'nugelabiyajukokwono.” Kuudokaikono.

²² “Toro toollu wonyodeyo dukodeyo tonyu kuullo ma'no ma'nodo tool noromiyoso'moneyokwe gallugolamo'mdowodekono. Toro kuvi kuruv guu nokwo'mekuno'juki nemino kalo neya gujunowo'ji donekullo'mwojono.” Kuudokaikono.

²³ Toro kuudoka toollu Jisasol kuudokaikono. “Gumoro aro anyudumodo tov, “Nokwo'mekuno'juki,” anyudumodo su tov buro'nyo'mo'mdeyo. Guu aro tovino'gwowi kuudo neya jaurono. A'mwo Gooti toollu kuudo kuubweyo'ji tool buro'nyo buro'nyodeyo pun imokwe kuudo sauro'ji tov nokwo'mekono.” Kuudokaikono.

²⁴ Jisasol toro kuudoka kuga'gwo kuuno kwolaiyo toolluro ganumiyago tool kuudokaikono. “Nuu kuudo nogubwemono. Toro kuvi kuruv moro kuudo magubwemwako punyuno'gwowi donyo'mwojonoo!” Kuudokaikono.

²⁵ Toro wuujuno sumaiyokwe toga a'mwo abolo kwolallo ton i'bwo'nyo'mo yere abopogano. Toro bodopure tonyu Jisasol wonyuno sumaiyokwe kuullo ma'no ma'nodo toollu guureji aro aduuwiyokaikono. “Kuullo ma'no ma'nodo akaiku guu kadu'nollukullo yogaimajo tov wiyodumdo tooku kwolaiyo akallu yiunokuudo duugollu'movono. Toro tooku aki aiko te maulabinekugono.” Jisasol toro aduuwiyokaikono.

²⁶ Kuullo ma'no ma'nodo tool deko bwotonyo juno sumaiyokwe kwolaiyo toollu kuruukwiyo bwotonyo tov wino sumaiyokwe abolokwokaikono. Toro bolokwoduke toga kwolaiyo tool yiunokuudo me'no aboloka toolbusuko wo'duke toollu bwotonyago ton wono'mno adopogano. “Me'no abollugiyo.”

²⁷ Toro dodopure kuvi kuruv Jisasol kwolaiyo toolluro ato tov gaibworoma'no sumaiyokwe kwolaiyo tool sulodavokaikono.

²⁸ Toruda'ai Jisasol ago puvi aulokaikono. Toro kuulno sumaiyokwe yiuno gami uumjunyokwe toorogai aulomwaloporogano. Toro aulomwalopo yiulo su tomuu gamoro uumjunyokwe tooro aro kuudoganoporogano. “Nevu kuullo ma'no ma'nodo toollu mamodovomjapimawo tov burowo'nyo kavlo tovino'mdeyo?” Kuudoganoporogano.

²⁹ Toro kuudoganopo toorai Jisasol aro kuudokaikono. “Kuullo ma'no ma'nodo su toro toorai yasuwa'no mamodovomjapipinorekikono. Toro kworekul kuruv yiuno subusu'nyogalo me'no adupi toga'no'gwowi kuullo ma'no ma'nodo su tooro yowa'no bolokuumwalpinorogano.” Kuudokaikono.

Jisasol gamoro nobollo'mo tokwe'aro nodukaiyo'mo tokwe'aro tovalluno aki aiko te kuudoka tovinokwono

³⁰ Toruda'ai Jisaseke'aro gami uumjunyokwe toorogai'aro tooro amwallajupo su tomuuda'ai bolokwo'mno Galili tomuu'aro avlaiyajuporogano. Toro pla'mdupu Jisasol aro kuudo saullajukekono. Oo moro avla'mwako akavino a'mwo pwolnodo kwol kuruv nuu'no'jo. Kuudo saullajukekono.

³¹ Su tov aro tovinokwono. Gamoro uumjunyokwe kuunodo tooraino'gwowi nyodubwosumovlaiyo'mo kwinyajukekono. Toro tool uumjunyokwe su toorai aro sodubwosumovlaiyajukekono. “Nuu A'mwo Kwolaiyo Kuunodo toonyu galonumworaropi a'mwo pworai nomanubwepinonyugono. Toro toonyu romiyanubwepinonyugono. Me'no aromiyanubwepi toga iruko pullapullu nuwolo'nowo'ji aiko te duka'monyugono.” Jisasol toro sodubwosumovlaiyajukekono.

³² Toro yodubwosumovla'mduke kuvi kuruv gamoro uumjunyokwe tooro kuuguudo su tovino kavlo tov kuudo miyouromaroporogano. Aki kavlo su tovino Jisasollu wuudoganyo'moneyokwe luko soporogano.

Jisasolluro uumjunyokwe tooro, “Nemoro akavida'ai pwol ala'mwol dukonekuuwolo'mwallo?” Ajunopo tovinokwono

³³ Toruda'ai Jisaseke'aro gamoro uumjunyokwe toorogai'aro tooro plaino sumaveyokwe Kapurniyam toru ai'movoporogano. Toro ki'mo'mno sumaveyokwe ago puvi kuula'mno Jisasol gami uumjunyokwe toorai aro kuudoganokaikono. “Nevu puuto tomuu bodowa kevu buro'nyo'mo somoga'bworajunmaporekuldeyo?” Kuudoganokaikono.

³⁴ Toro kuudoganoka tooro yogalo puru'monodo kuruv maravoporogano. Toro sopo tov aro tovino'mokwono. Puuto tomuu bo'mno aro sajunopokwono. “Nemoro akavida'ai pwol ala'mwol dukonekuuwolo'mwallo?” Toro sajungopo tovino wogulo'mo yo'mno Jisasollu yogalo puru'monodo kuruv muuraiyopekono.

³⁵ Jisasol wolomwalo'no 12-pela toorai gamiyomno domaro'no aro kuudokaikono. “A'mwo pwol aguto kuunodo imo'nyo'mo kwino'ji tool yiuwi'nokai a'mwo abolo tonyu aiyowo'mo neya bwollumo'nawonekono. Yowo'ji womdokwe pwolbusuko neya wimo'nowo'ji yiuwi'nokai a'mwo abolo tonyu womdo wimwalonekono.”

³⁶ Toro wuujuno sumaiyokwe Jisasol kwoloraiyo puruvi kemoro akuuto toru amolludapiyokaikono. Toro amolludapiyoka tovi galausuno'no gamoro uumjunyokwe toorai aro kuudokaikono.

³⁷ “A'mwo pwol kwoloraiyo aka'busuko puruvi mino yovo tovida'ai ilaiyo amollomaro'ji tov nuu kwonyuda'ai ilaiyo amollunuma'mwallo. Aki tokwe'aro a'mwo pwol mi ilaiyo amollunumaro'ji tool mi kwolomoronuwopiyaboka kwolluda'ai ilaiyo amolloma'mwallo.” Kuudokaikono.

“A'mwo pwol nemi ikomago manekullumo'no'ji tool nemi avalo anekullumo'nadopiyo,” adoka tovinokwono

³⁸ Toruda'ai Joonol Jisasollu kuudokaikono. “Ibwasokweyoloo, nevu a'mwo pwol kuullo ma'no ma'nodo toorai gumoro yovo tovida'ai modovomjapiyoduke toollu kwonowonogano. Toro tool nevu gumi gumjunodowado toonolluda'aiyolmaiyo. Toro toollu uumjukuto sowonogano.” Kuudokaikono.

³⁹ Toro kuudoka kuvi kuruv Jisasol kuudokaikono. “Kevu a'mwo toollu uumjukuto mipinono. A'mwo pwol moro yovo tovida'ai duuwallo jurogudo puruv so'ji tool moro yovo tovino buulo yogalo yere madonekono.” Kuudokaikono.

⁴⁰ “Toro te a'mwo pwol nemi ikomago manekullumo'no'ji tool nemi avalo anekullumo'nadopiyo.

⁴¹ Nebal'no ikudumo'mokwono. Lukomgu a'mwo pwol kemi ikwonowo'ji aro aikudo'ji tov, “Oo Krais toollu uumjunyokwe toorodeyo,” toro ikudowo'ji kuuleyaluko'mo yodopure toorekullu kapwo wonyo puruv aikulluro'ji tov a'mwo su toolluro mubiyo sugudo tov lukomgu Gooti tool nuuwiyonekono. Toro tool kuvinono nomaronekono.” Kuudokaikono.

A'mwo pwol Gooti toolluno kuudo uubweyo'mo yodopure tobuurai nuumjukuro'jokwe tovinokwono

⁴² Jisasol toro wuujuno sumaiyokwe aki aro kuudokaikono. “A'mwo pwol kwoloraiyo mino kuudo anubwemwakopo akabuurai ma'no ma'no ipino'moneyokwe tovino amollubworomokavlawo'ji su toollu jul'nyo bwotonyo nomaronekono.” Su tov yovekurajo aro to'busukokwono. “A'mwo kaiya'no amollubworomokavlawo'ji su toollu a'mwo pworo gamoro boruko tovi sulo bwotonyo pweke galogullosopi wonyo buugo tovi wolomogalowopiyapinekono. Su tov jul'nyo bwotonyokwono. Toro kuvi kuruv a'mwo pwol kwoloraiyo tobuurai kaiya'nodo tomgu'aro amollubworomokavlawo'ji su toollu Gooti toolluro jul'nyo kuubweyo'ji to'gwowi bwotonyo kuunodokwono.”

^43-44 Aki Jisasol yovekurajo puruv aro kuudokaikono. “Guu, “Du'muudo maduuwiyopiyodowodo tovi novla'miyo,” adubi tooku gumoro ato tov ma'no ma'no yo'mo tovino ame'nogumokwo'ji tov dovo'mowopiyono. Toro tooku a'nowa'meyokwe sumo'nubi kweku kuruv aiyo yiunokuudo mujomwekovlaiyo'moneyokwe tovi mallo'mo tov ilaiyokwono. Guu ato puusalokwe tooku ma'no ma'nodo tov kuuno gwo'dowo'jure tookuno'gwowi du'muudo maduuwiyopiyodowodo tovi novla'biyo.”

^45-46 Aki puruv aro kuudokaikono. “Guu, “Du'muudo maduuwiyopiyodowodo tovi novla'miyo,” adubi tooku gumoro suvlo tov ma'no ma'no yo'mo tovino ame'nogumokwo'ji tov dovo'mowopiyono. Toro tooku suvlo nowa'meyokwe sumo'nubi kweku kuruv aiyo yiunokuudo mujomwekovlaiyo'moneyokwe tovi mallo'mo tov ilaiyokwono. Guu suvlo puruvalokwe tooku ma'no ma'nodo tov kuuno gwo'dowo'jure tookuno'gwowi du'muudo maduuwiyopiyodowodo tovi novla'biyo.”

⁴⁷ Aki puruv aro kuudokaikono. “Guu, Du'muudo maduuwiyopiyodowodo tovi novla'miyo, adubi tooku gumoro sumdo puruv ma'no ma'no yo'mo tovi ame'nogumokwo'ji tov dogalowojopiyono. Toro tooku sumnowojokwe sumo'nubi kweku kuruv aguto kig Gooti toolluro mido mollomwalo tovi kuulomwallo'mo tov ilaiyokwono. Guu sumdo puruvalokwe tooku ma'no ma'nodo tov kuuno gwo'dowo'jure tookuno'gwowi du'muudo maduuwiyopiyodowodo tovi novla'biyo.

⁴⁸ A'mwo du'muudo su tomuu pla'mdupudo tooravuro kulako tovi avluko maluko'nyo tooro lu'mulonugoulno lu'mulonugoulno yapi mallu'mulonopipinorogano. Aki su tomuu duko tov manebuulopiyowo'ji yiunokuudo mujonugovla'mwalonokwono.”

⁴⁹ Toro wuujuno sumaiyokwe aki yovekurajo puruv aro kuudokaikono. “A'mwo abolo ton wosamujuko tonyu soore tokwe wosodupudo to'busuko kubalno Gooti tool yiuwi'nokai a'mwo abolo tonyu soore to'busuko duko tov uubweyonekono.”

⁵⁰ Toro wuujuno sumaiyokwe kuudokaikono. “Soore tov sugudokwono. Toro kuvi kuruv gamoro wuullo tov aduuwiyopiyo'ji to'gwowi wuullo su tovi adadomgu'aro aki aiko te molludo'bino'mdeyo? Awiyo, ku'nono mamolludo'binokwono. Toro te kevu soore wuullokwe to'busuko jumo'nogaulo. Toro sumo'nupi toga a'mwo abolo togai kemoro sumwoluko tov aval'no wosopi kaveno mujomwekovla'mwalpinorekikono.” Kuudokaikono.