Kuuguudo Sugudo akav Makolluro sakwollokakwono Mak 8 - Gooti Toolluro Yogalokwono

Jisasol wosamujuko tov a'mwo 4,000 toorai kwiyoka tovinokwono

¹ Toro toga a'mwo abolo kwolallo bwotonyo ton aiko te su'bwo'nopogano. Toro su'bwo'nopo su ton wosamujuko nonyo'mo pun nonagutogano. Toro te Jisasol gami uumjunyokwe toorai domaro'no kuudokaikono.

² “A'mwo abolo ton nuuge iruko pullapullu me'no amwalmwakopo ton wosamujuko maiyo tonyuno kalo anyunadopiyo.

³ Mujuko'mo yodopure su tonyu nuu kemi agomno amodapimi tov puuto tomuu kuruwiyo nomjobolmovlapiyo. Aki pworo kemi ago toru manyomda'aiyorogano.” Kuudokaikono.

⁴ Toro kuudoka tovi gamoro uumjunyokwe tooro aro kuudoporogano. “Nevu a'mwomaiyo kuu'maiyo akaru mwalodowa a'mwo abolo akanyu bret nyuto'nupino'moneyokwe wiyo'mo tov gadomuuda'ai maranonoldeyo?” Kuudoporogano.

⁵ Toro kuudopo tool kuudoganokaikono. “Kevu bret adadobuul domworakovo?” Kuudoganokaikono. Toro kuudoganoka tooro aro kuudoporogano. “Nevu bret atobuul ato pworal tobuul amworakuuwono.” Kuudoporogano.

⁶ Toro wuujuno sumaveyokwe Jisasol a'mwo abolo ton kwako tovi wolomwalpureyokwe amodumwallokaikono. Modumwalluno sumaiyokwe bret atobuul ato pworal tobuul malluno sumaiyokwe Gooti toollu, “Nenyoo,” wuudo'no abuudovokaikono. Me'no buudovo'no gami uumjunyokwe tooro a'mwo abolo tonyu uumallupureyokwe morapiyo'no abwimoulaporogano.

⁷ Aki tokwe'aro domwoga pwekwojo kurukwerogano. Toro te Jisasol domwoga tekwojaino, “Nenyoo,” me'no wuudo'no gami uumjunyokwe toorai kuudokaikono. “Kevu akagai'aro duumallulo.” Kuudokaikono.

⁸ Toro ton nyuno nyuno sumaveyokwe sumwoluko kwitovoka ton anugollu'movopogano. Toro anugollu'movopo su ton basket bwotonyo tonyu surosopogano. Basket surosopo su ton atobuul ato pworal tonyu amollu'bworosoporogano.

⁹ A'mwo abolo 4,000 tomgu'aro ton toro anomwalopogano. Me'no nyuno sumaveyokwe Jisasol a'mwo abolo tonyu amorapiyokaikono.

¹⁰ Toro morapino sumaiyokwe kuga'gwo kuuno Jisaseke'aro gamoro uumjunyokwe toorogai'aro tooro boot tovi sulomwaloporogano. Toro tooro plaino sumaveyokwe proovins Dalmanuuta towai ai'movoporogano.

Jisasollu, “Duuwallo jurogudo puruv donekuduuwallono,” kuudopo tovinokwono

¹¹ Toro ki'mo'mno sumaveyokwe Farasi tooro lokabo'mno Jisaseke yogalo somoga'bworajunoporogano. Toro tooro Jisasol abwolorawoneyokweyo'mo yamju kwiyoganoporogano. Toro tooro aro kuudoganoporogano. “Nevu gumino tov, Gooti toolluro amonekwopiyaboka tooldeyo, gudano'mo tov guu muunyu kai'muuda'ai duuwallo jurogudo puruv yowa'no nekuduuwallubinekudeyo?” Youkuu'nuujo'mo tooro toro kuudoganoporogano.

¹² Toro dodopure tovi wuu'nyuno sumaiyokwe Jisasol gamoro poowokalago tov jul'nyo subwosunokaikono. Toro tool aro kuudokaikono. “Agasuro a'mwo abolo akagaikul buro'nyo'mo duuwallo jurogudo tonyuno to'no wonyo'mo ikullunodowodogaikuldeyo? Nuu nebal'no ikudumo'mokwono. Gooti tool duuwallo jurogudo pun maikuduuwallonorekikono.” Kuudokaikono.

¹³ Toro wuujuno sumaiyokwe kuugollu'movokaikono. Toro wuugollu'mo'mno sumaiyokwe boot tovi ilomwalo'no buugo tovi igo'mguuno suloga'movokaikono.

Jisasol yovekurajo puruv bret munyo'moneyokwe yis tovino adoka tov Farasi toorogai'aro Herooteke'aro tooro kaiya'no mollubworomokavla'mdupudo toorainokwono

¹⁴ Aki Jisasolluro uumjunyokwe tooro boot tovi sulomwalopo toga bret yiuno pwolno amokavlavoporogano. Toro tooro bret pugai'aro mokavlaiyo'mo tovino kuudo sallulo'gwonoporogano.

¹⁵ Toro toorai Jisasol duudapi yogalo wuujo'moneyokwe yovekurajo tov aro kuudokaikono. “Kevu Farasi tooravuro bret munyo'moneyokwe yis tokwe'aro Herootolluro bret munyo'moneyokwe yis tokwe'aro tovalluno wako neya dou'nyulo.” Kuudokaikono.

¹⁶ Toro kuudoka tovi wuu'no'mno aro sajunoporogano. “Oo nevu bret nonaguto toonolluno dodadopiyo.” Sajunoporogano. Toro yajunyuno sumaveyokwe kemi akuuto toru bret nonaguto tovino yogalo aullajunoporogano.

¹⁷ Toro junodopure tovi Jisasol youroogano'no kuudokaikono. “Kevu bret nonaguto tovino buro'nyo'mo jajunadokwovo? Nuvu bret tovino maikudumwakono. Kevu mi nuwonodupudo kworekul kuruv kavlo tovino kuudo yere miyouroma'mwakopo tov ilaiyo'maiyo. Aki kemoro poowokalago ton lumdo kuulopiyodupudo tov ilaiyo'maiyo.” Kuudokaikono.

¹⁸ “Kevu sumdokwe kworekul kuruv po'dogalo mwonodupudorekikono. Aki kadukokwe kworekul kuruv po'dogalo muu'nodupudorekikono. Kevnokwe toorekul me'no wonodupudo tonyuno kuudo jukiyau'mwakovo?

¹⁹ Nuu a'mwo 5,000 toorai bret tov atobuul tokwe uubuudeno anopogano. Toro nyuno sumaveyokwe anugollu'movopo tonyu kevu bret nobuudeyokwe sutowosungiko basket adado tobuul amollu'bworoporekuldeyo?” Kuudokaikono. Toro tooro kuudoporogano. “12-pela basket ton amollu'bworowonogano.” Kuudoporogano.

²⁰ Aki Jisasol kuudokaikono. “Bret tov atobuul ato pworal tobuuke a'mwo 4,000 tooro anoporogano. Toro anopo tovida'ai bret nobuudeyokwe basket ton kevu adadobuul amollu'bworosoporekuldeyo?” Kuudokaikono. Toro tooro kuudoporogano. “Basket bret nobuudeyokwe sutowosungiko ton atobuul ato pworal tonyu amollu'bworosowonogano.” Kuudoporogano.

²¹ Toro kuudopo tool kuudokaikono. “Kevu mi amonuwopiyaboka toolluro jurogudo tovino kuudo tov kuuno miyau'mwakoporekikono.” Kuudokaikono.

Jisasol Betisaidoda'ai a'mwo sumnowojokwe pwollu sukuloka tovinokwono

²² Toruda'ai Jisaseke'aro gamoro uumjunyokwe toorogai'aro tooro plaino sumaveyokwe Betisaida'no ai'movaporogano. Toro ki'mo'mno sumaveyokwe a'mwo ago su toruda'ai tooro a'mwo sumnowojokwe pwollu amogaibworomokaboporogano. Toro tooro Jisasol a'mwo su toollu neya uubogai'noneyokweyo'mo ajugonoporogano.

²³ Toro te a'mwo sumnowojokwe toollu Jisasol wagwolago tovida'ai kwa'mgu tomuuno gami ato tovi'aro abomogaibworomokalokwokaikono. Toro bomogaibworomokalokwino sumaiyokwe a'mwo toolluro sumnowojo tovallu ibupto kuupurokaikono. Me'no uupu'no sumaiyokwe Jisasol ato uubogai'no'no aro kuudokaikono. “Aga buro'nyo tonyu doonadokuuno?” Kuudokaikono.

²⁴ Toro kuudoka tovi a'mwo sumnowojokwe tool wonomollo'no kuudokaikono. “Tade, nuu a'mwo tooro nyomollodopure toorai kwonadokwono. Toro kuvi kuruv iko toorobusuko toorai kwonadokwono.” Kuudokaikono.

²⁵ Toro kuudoka tovi Jisasol a'mwo toolluro sumdo tovallu aki aiko te kuubogai'nokaikono. Toro uubogai'nyuno sumaiyokwe toga sukulokaikono. Toro sukuloka toga a'mwo toolluro sumdo toval ilaiyo to'no kinyuno sumaiyokwe yiuwi'nokai tonyu pi'mwono kwonokaikono.

²⁶ Me'no ikulno sumaiyokwe Jisasol a'mwo toollu kuudokaikono. “Guu wagwolago akavi aki aiko te maulabiyo. Toro kweku kuruv gumi ago tomuuno'gwowi dovlavono.” Kuudokaikono.

Pital Jisasollu, “Gooti toolluro amonekwopiyaboka tool guu kwekugono,” kuudoka tovinokwono

²⁷ Toruda'ai Jisaseke'aro gamoro uumjunyokwe toorogai'aro tooro wagwolago pun Sisariya Filipai woboruda'ai su tonyuno avlavoporogano. Puuto tomuu plaino sumaveyokwe Jisasol gamoro uumjunyokwe toorai aro samuugojokaikono. “A'mwo abolo ton mino tov, Ala'mwekono, nyudodupudonyudeyo?” Samuugojokaikono.

²⁸ Toro samuugojoka tooro kuudoporogano. “Pworo gumino tov, Wonyo Galuvollokwe Joonekono, dodupudorogano. Aki pworo gumino tov, Ilaijaikono, dodupudorogano. Aki pworo, proofet pwekono, gudodupudorogano.” Kuudoporogano.

²⁹ Toro kuudopo tovi aro samuugojokaikono. “A'mwo pworo toro nyudodupudo kuvi kuruv kevu toorekulno'gwowi numino tov, Ala'mwekono, kuudo jukiyanuu'mwakovo?” Samuugojokaikono. Toro samuugojoka toollu Pital kuudokaikono. “Guu Gooti toolluro amonekwopiyaboka Krais tookugono.” Kuudokaikono.

³⁰ Toro kuudoka tovi Jisasol gami uumjunyokwe toorai duudapi aro aduuwiyokaikono. “Kevu a'mwo abolo punyu mino tov, Krais tool kwekono, muudupinono.” Aduuwiyokaikono.

Jisasol gamoro nobollo'mo tokwe'aro nodukaiyo'mo tokwe'aro tovalluno kuudoka tovinokwono

³¹ Toro togada'ai Jisasol aro tonyuno sodubwasajukekono. “A'mwo Kwolaiyo Kuunodo toonyu dado go'no go'no bwotonyo punyu nuunononyugono. Toro toonyu Juu tooravuro mido mollomwalokwe toorogai'aro pris mido mollomwalokwe toorogai'aro loowo tovino pi'mwo kuudokwe toorogai'aro tooro mino buulo nuugunyumopiyopi romiyanubwepinonyugono. Toro aromiyanubwepi toga iruko pullapullu nuwolo'nowo'ji aki aiko te duka'monyugono.” Kuudokaikono.

³² Toro kuudoka tov gami wimo'nyo'mo tovino yiuno kuu'maiyo toru'no kuudokaikono. Toro wuudoduke toga Pital Jisasollu bomodomokalokwino sumaiyokwe judo tomuu davolno Jisasollu yogalo amojurugolokaikono.

³³ Toro mojurugoloduke toga Jisasol yadu'mwonyo'no gami uumjunyokwe toorai moroonyuno sumaiyokwe Pitallu yogalo aro amojurugolokaikono. “Satanyoloo, guu moro buulo tomgu'aro dovlavono! Gumoro kuudo sau'mwakudo su tov Gooti toolluro kuudo yau'dowodo tomgu'aro'maiyo. Toro kuvi kuruv kuudo su tov a'mwo kwako akavida'ai tooravuro yau'dupudokwono.” Jisasol Pitallu yogalo toro amojurugolokaikono.

³⁴ Toruda'ai Jisasol a'mwo abolo kwolallo togai'aro gami uumjunyokwe toorogai'aro tonyu gamiyomno me'no moju'bworumwallo'no aro kuudokaikono. “A'mwo pwol numino numjunyo'mo kwino'ji tool gavnokweyolluro noonyumwonyu kuudo yau'dowodo tonyu neya yogallu'mowonekono. Yogallu'mowo'ji gami i'noguropte tovi momworarowo'ji mi neya numjunonekono. A'mwo su tool nobolmonyudeyo kuudo yaurowo'ji kwol kuruv neya anumjunono.

³⁵ Aki a'mwo pwol gavnokweyolluro kulako tovuro aiyo mwallo'mo tovino to'no wiyo'mwoju'nonekono. Toro kwiyo'mwoju'no'ji su tool aiyo yiunokuudo mujomwekovlaiyo'moneyokwe to'gwowi ku'nono mwiyo'mwoju'nonekono. Toro kuvi kuruv a'mwo pwolno'gwowi mino kuudo nubweyodowo'jure tokwe'aro kuuguudo sugudo tokwe'aro tovalluda'ai gavnokweyolluro kulako tovuro aiyo tov nokwo yovlawonokwono. Toro sovlawo'ji kuvi kuruv aiyo yiunokuudo mujomwekovlaiyo'moneyokwe to'gwowi nomaronekono.

³⁶ Aki a'mwo pwol yiuwi'nokai kwako akavida'ai ton marowo'ji abolo'ji toga yiuwi'nokai amaro'ji su ton aiyo yiunokuudo amjomwekovlawoneyokwe tovino nokwo wiyo'mwojonoldukono? Awiyo. Yiuwi'nokai su ton ku'nono mwiyo'mwojonogano.

³⁷ Aki a'mwo pwol aro kuudo yauronekono. Oo nuvu yiunokuudo nobolmiyo. Su toro kuudo yaurowo'ji aiyo yiunokuudo mujomwekovlaiyo'moneyokwe su tovi mallo'mo tool Gooti toollu buro'nyo tokwe nokwo biyomaronoldeyo? Awiyo. A'mwo pwol aiyo yiunokuudo mujomwekovlaiyo'moneyokwe mallo'mo tool Gooti toollu noonyumwonyu pugai ku'nono mabiyomaronekono.

³⁸ Agasuro a'mwo abolo akan Gooti toollu buulo uugunyumopiyodupu ma'no ma'no bwotonyo amjumovla'mwakopogano. Su toro tonyuda'ai a'mwo pwol numino tokwe'aro moro yogalo tokwe'aro tonyuno wogulo'mo nyo'jo. A'mwo mino wogulo'mo so'ji su toolluno nuu A'mwo Kwolaiyo Kuunodo kwonyu kuruv wogulo'mo imekono. Nuu mi Nyunumiyago toolluro bako bwotonyo pwopiyodowodo tovi anakuuto tomuu gamoro ensel toorogai nomokamonyugono. Toro amokami su toga a'mwo mino wogulo'mo so'ji su toolluno nuu kwonyu kuruv wogulo'mo imekono.” Kuudokaikono.