Kuuguudo Sugudo akav Makolluro sakwollokakwono Mak 7 - Gooti Toolluro Yogalokwono

Juu tooravuro a'mwo mido mollomwalokwe tooro Gooti toolluro loowo tonyu wuugollu'mo'mdupudo tovinokwono

¹ Toruda'ai Farasi pworogai'aro loowo tovino pi'mwo kuudokwe pworogai'aro tooro Jeruusalemda'ai bo'mno Jisasollu wobo toru su'bwo'noporogano.

² Toro i'bwo'nyuno sumaveyokwe Jisasolluro uumjunyokwe toorai kwonoporogano. Uumjunyokwe su tooro kemi ato ton po'dogalo miyal'mo'no'mno kemi bret ton anoporogano. Toro nodopure toorai Farasi toorogai'aro loowo tovino pi'mwo kuudokwe toorogai'aro tooro wonyuno sumaveyokwe aro kuudo sauroporogano. Oo kemi ato ton kaiyako me'no mollugolamo'nodupudorodeyo. Kuudo sauroporogano.

³ Farasi toorogai'aro yiuwi'nokai Juu toorogai'aro tooro aro yodupudorogano. Kemi ato tonyu po'dogalo sal'mo'nupi toga'no wosamujuko nodupudorogano. Pasudo su tov aiyogasuro kemi kwikweyago tooravuro subwasajupo tomgu'aro uumjunodupudorogano.

⁴ Toro tooro maket tovida'ai wosamujuko pun abipi tov miyal'mo'nupi tooro manupinorogano. Aki puruv kemi kapwodeyo disodeyo soospenodeyo alabiyodeyo tonyu yal'meyo'moneyokwe tov kemi kwikweyago tooravuro go'no go'no sal'meyajupo tomgu'aro aval'no yal'mo'mdupudorogano. Aki toro tooro kemi kwikweyago tooravuro kuumjunyajupo su tonbusuko bwotonyago pugai'aro tonyu uumjunodupudorogano.

⁵ Farasi toorogai'aro loowo tovino pi'mwo kuudokwe toorogai'aro tooro toro yodupudorogano. Toro tooro Jisasollu aro kuudoganoporogano. “Gumi gumjunyokwe tooro nemoro aiyogasuro tooravuro sal'mo'nyajupo tomgu'aro miyomjomwekovla'mdupudorogano. Toro tooro kemi ato ton kaiyako me'no mollugolamo'nodupudo su togai buro'nyo'mo jomworenanadokwovo?” Kuudoganoporogano.

⁶ Toro toorai Jisasol aro kuudokaikono. “Aisaiyal kevu kuunanokwe toorekulluno nebal'no ajakwollokaikono. Gooti toolluro yogalo tovi aro sakwollungikokwono. “A'mwo akaro numino mago tokwe to'no mollanyudodupudo kworo kuruv kemoro poowokalago tono'gwowi mi manyu toru'aro wo'dupudogano.

⁷ Toro tooro kemi mago tokwe to'no mino ilomonuwopiyodapudo toga kuudo yaullokwerogano. Oo Gooti tool mino ilaiyo mollonumaronoldeyo. Toro kuudo yau'dupudo kuvi kuruv ku'nono mamolloma'dumdonyugono. Yiuno yasuwa'no yokwerogano. Aki toro tooro Gooti toonyuro kuuguudo tonyuno ibwaso'mo mwinodupudo kworo kuruv yiuno a'mwo pworavuro loowo wosodupudo tonyuno'gwowi ibwasokwerogano.” Sakwollungikokwono.”

⁸ Jisasol toro wuujuno sumaiyokwe aki aro kuudokaikono. “Toro toorobusuko kubalno kevu Gooti toolluro loowo tovi wuugollu'mo'mdupu yiuno kwako akavida'ai a'mwo pworavuro pasudo tonyuno to'no kuumjunadokwoporekikono.”

⁹ Toro wuujuno sumaiyokwe aki aro kuudokaikono. “Kevnokwerekulluro pasudo tonyu uumjunpino'moneyokwe tov kevu Gooti toolluro loowo tovi kisuvolo wiyodupudorekikono. Pasudo su tovino kevu kuural'moptorekikono.”

¹⁰ Toro wuujuno sumaiyokwe aki aro kuudokaikono. “Moosesol ajakwollokaikono. “Kemi telluneyago tokwe tellunumiyago tooke teyaullu dolago tomgu'aro duuwiyulo.” Ajakwollokaikono. Aki puruv, “a'mwo pwol gami ganeyago tokwe ganumiyago tooke teyaulluno burolyogalo ado'ji tool neya abolono.” Ajakwollokaikono.

¹¹ Toro ajakwolloka kuvi kuruv kevno'gwowi aro dodupudorekikono. “A'mwo pwol gami ganumiyago ganeyago teyaul supto yodo'bule teyaullu gami nuugwiyodeyo togai wiyo'mwojo'mo mwino'ji tool aro wuudonekono. “Oo nuugwiyo akakwe nokwo aikullo'mwojo'mujuko kwonyu kuruv Gooti toollu wiyo'mo me'no ajesungikokwono.”

¹² Toro tool gami ganumiyago ganeyago teyaullu ku'nono mwiyo'mwojonekono.” Toro toollu kev toorekulno'gwowi aro wuujokwerekikono. “Gumoro sumado tov ilaiyokwono. Gumi junumiyago juneyago teyaullu mwiyo'mwojodumdo su tov nokwo'mokwono.” Wuujokwerekikono.

¹³ Toro toorekul kemoro tellukweyago tooravuro yodekubwasodupudo tonyu uumjunodupudo tov Gooti toolluro yogalo tovi bwolomoropiyodapudokwono. Aki pasudo su tonbusuko bwotonyago pugai'aro yokwerekikono.” Kuudokaikono.

Jisasol, noonyumwonyu pun a'mwo toollu kaiyako mollugolamo'mdupudo tonyuno, adoka tovinokwono

¹⁴ Jisasol a'mwo abolo kwolallo tonyu gamiyomno abupureyokweyo'mo amodapiyokaikono. Toro modoma'no sumaiyokwe aro kuudokaikono. “Kevu yiuwi'nokai togaikul duu'nyulo. Moro yogalo akavi wuu'nopi kavlo tovino neya jouromallulo.” Kuudokaikono.

¹⁵ Toro wuujuno sumaiyokwe yovekurajo aro kuudokaikono. “A'mwo pwolluro noonyumwonyu burowo'nyo wosamujukodeyo pun amano'ji su ton a'mwo su toollu Gooti toolluro sumdo tovi kaiyako mamollugolamo'mdupudogano. Toro kuvi kuruv a'mwo su toolluro yiuno poowokalago tovida'ai burowo'nyo kuudo'mdeyo yogalo'mdeyo noonyumwonyu bolokwodowo'jure su tono'gwowi a'mwo toollu kaiyako mollugolamo'mdupudogano.” Kuudokaikono.

¹⁶ “A'mwo pwol kuuguudo akavi youromallo'moneyokwe tool po'dogalo neya wuu'nono.” Kuudokaikono.

¹⁷ Toro wuujuno sumaiyokwe kwolallo tonyu wuugollu'movo'no ago tovi aulomwalokaikono. Toro kuulomwaloduke toollu gamoro uumjunyokwe tooro yovekurajo kuudoka tovuro kavlo tovino kuudoganoporogano.

¹⁸ Toro kuudoganopo toorai kuudokaikono. “Kev kworekul kuruv buro'nyo'mo kuudo po'dogalo miyouroma'mwakoporekuldeyo? A'mwo pwollu burowo'nyo burowo'nyodeyo kwa'mguda'ai manodowo'jure ton kaiyako mwiyodowodogano.

¹⁹ Toro nodowodo su ton a'mwo toolluro poowokalago tovi maula'dupudogano. Toro kun kuruv gamoro sumwoluko tovino kuula'dupu yiuno luko to'no noropiyodowodogano.” Kuudokaikono. Jisasolluro toro kuudoka tov aro tovino'mokwono. Yiuwi'nokai wosamujuko tonyuno kumako puruv nonagutokwono. Yiuwi'nokai wosamujuko su ton sugudo me'no sumo'nyungopo tonyuno tov nonyo'mogano.

²⁰ Toro wuujuno sumaiyokwe aki aro kuudokaikono. “A'mwo pwolluro poowokalago anakuuto tomuuda'ai bolokwodowo'jure tono'gwowi kaiyako mollugolamo'mdupudekono.

²¹ Aro tovino aikudadokwono. A'mwo pwolluro poowokalago anakuuto tomuuda'ai bolokwodowodo ton aro tonyunokwono. Ma'no ma'no kuudo togai'aro kwonyalo togai'aro kuuko togai'aro romiyosi togai'aro

²² abekuuko togai'aro kuto ivito bwotonyagokwe imo'nyo'mo togai'aro kirovanyuvanyu togai'aro kuunano togai'aro julpasudo togai'aro magu'nyo kuudo togai'aro burolyogalo togai'aro ilomoropunyo'mo togai'aro imokuudo togai'aro togano.

²³ Yiuwi'nokai ma'no ma'nodo su ton a'mwo toolluro poowokalago tovida'ai bolokwodupudo su ton Gooti toolluro sumdo tovi a'mwo toollu kaiyako mollugolamo'mdupudekono.” Kuudokaikono.

Abolo Foonisiyada'ai puruv Jisasolluno kuudo kuubweyoka tovinokwono

²⁴ Jisasol toro wuujuno sumaiyokwe wuugollu'mo'mno sumaiyokwe wagwolago Tairu wo'duke tomuuno avlavokaikono. Toro tool ago puvi aulomwalokaikono. Toro kuulomwalno sumaiyokwe toga kuudo saurokaikono. A'mwo abolo ton nyuworovonmapiyo. Toro kuudo sauroka kwollu kuruv me'no suuworovomaropekono.

²⁵ Toro te abolo puruv gamoro taiyo tovi kuullo ma'no ma'nodo pwol kuulomwalodowodokwono. Toro te abolo su tov Jisasol ago tovi kuulomwaloduke toolluno wuu'no'no yere abokakwono. Toro bino sumaiyokwe Jisasolluro suuldolago toru abomuulo'narokakwono.

²⁶ Abolo su tov Juu tooravuro miyawosunopokwono. Aki toro tov Foonisiya iko tovasuda'aiyokwono. Abolo su tov gami taiyo tovuro kuullo ma'no ma'nodo toollu modovomjapiyono'moneyokwe Jisasollu guureji ajugonokakwono.

²⁷ Toro te Jisasol abolo tovi yovekurajo kuuguudo aro kuudokaikono. “Kwoloraiyo ton sumdomgu wosamujuko tov anyuto'nupureyokwe nokwo wonyapino julo. Nuu kwoloraiyo tobuuravuro wosamujuko ton juluko toorai amoruudukwopimi tov sugudo'maiyo.” Kuudokaikono.

²⁸ Toro kuvi kuruv abolo tov aro kuudokakwono. “Agutoloo, gumoro yogalo su tov kuvigono. Toro kuvi kuruv juluko toorono'gwowi kwoloraiyo tonyuro bret sulmiyo tobuuro noluuleyo tovi dolago tomuu abwolorawo'ji tonyu molle'bworanodupudorogano.” Kuudokakwono.

²⁹ Toro kuudoka tovi Jisasol kuudokaikono. “Guu toro anyudumado tovino tov gumoro taiyo tovuro kuullo ma'no ma'nodo kuulomwalodowodo tool me'no abolokuumokaikono. Toro te gumi ago tomuuno aikomgu dovlavono.” Kuudokaikono.

³⁰ Toro wuujuno sumaiyokwe abolo tov gami ago tomuuno plavo'no ai'movokakwono. Toro ki'mo'mno sumaiyokwe gami taiyo tovi kuullo ma'no ma'nodo tool me'no abuugollu'mokalokwoka tobuul alabiyo tovi sa wo'duke kwonokakwono.

Jisasol a'mwo kadu'nollukullo yogaimajokwe pwollu sukuloka tovinokwono

³¹ Toruda'ai Jisasol wonyo buugo Galili'no plaiyo'moneyokwe Tairu towai wuugollu'mo'mno sumaiyokwe Saidoon towai'aro avlavokaikono. Toro plaino sumaiyokwe wonyo buugo Galili tovi ai'movokaikono. Wonyo buugo Galili tov proovins Dikapooles toru kwoso.

³² Toro towai ki'mo'mduke toollomno a'mwo kadu'nollukullo yogaimajokwe pwollu amokaboporogano. Toro mokabino sumaveyokwe Jisasol ato kuubogai'no'ji ikulono'moneyokwe guureji ajugonoporogano.

³³ Toro ajugonopo tovi Jisasol a'mwo toollu kwolallo ton mwalodopure tonyuro yiulo tomuu molludapiyo'no gamoro pollo tovake a'mwo toolluro kadupuuto tovallu kuubogai'nokaikono. Aki gami pollo tovi ibupto kupuroso'no a'mwo toolluro kwavlolo tovi kuubogai'nokaikono.

³⁴ Toro tool muunyu kai'muuno iloonyopiya'no suumjudo ki'noma'no sumaiyokwe aro kuudokaikono. “Efata,” kuudokaikono. Yogalo su tov aro tovinokwono. “Dousodavono.” Jisasol yogalo su tov toro kuudokaikono.

³⁵ Toro kuudoka kuga'gwo kuuno a'mwo toolluro kadu'nollukullo toval kuusodavo'no aki gamoro yogaimajo tov modukwopiyo'no ilaiyo to'no adokaikono.

³⁶ Toro te Jisasol a'mwo abolo tonyu aro aduumjukurokaikono. “Kevu moro sumo su tovino muudomollupinono.” Su toro me'no aduumjukuroka kworo kuruv Jisasolluro soka tovino a'mwo abolo punyu amoruudomollopogano. Toro te Jisasol aki aiko te guureji aduumjukurokaikono. Toro kun kuruv muunyu toru'aro guureji to'no amoruudomollopogano.

³⁷ Toro ton kuudo bwotonyo yourukwapiyo'mno aro sajunopogano. “Gamoro yiuwi'nokai yodowodo ton sugudo to'no yodowodekono. A'mwo kadu'nollukullokwe kworai kuruv kaduko ton kuusubweyodowodekono. Aki yogaimajokwe kworai kuruv yogalo nokwo dupino'moneyokwe uubweyokwekono.” Sajunopogano.