Kuuguudo Sugudo akav Makolluro sakwollokakwono Mak 6 - Gooti Toolluro Yogalokwono

Nasaretda'ai tooro Jisasollu buulo kuugunyumopiyopo tovinokwono

¹ Su toruda'ai Jisasol bolokwino sumaiyokwe gami wagwolago kuunodo toru'no avlavokaikono. Toro pla'mduke toga gamoro uumjunyokwe tooro kweke avlavoporogano.

² Toro plaino sumaveyokwe wagwolago toru ai'movoporogano. Toro ki'mo'mno sumaveyokwe Jisasol Sabat tollugwoji Juu tooravuro i'bwo'nyago tovi kuula'no muudu'no sodubwasokaikono. Toro yodubwasoduke tovi wuu'no'mno bwotonyago tooro mollolokurosi soporogano. Yo'mno aro sajunoporogano. “A'mwo akalluro sadopiko su ton gadomuuda'ai ma'dowododeyo? Aki gami pi'mwo kuudo ma'dowodo su tov adadomgu'aro'mdukono? Aki gamoro duuwallo jurogudo yodowodo ton gami ato tokwe adado yodowodoldeyo?

³ Nevu a'mwo su toolluno kuudo me'no youroma'dowadekono. Toro tool Mariyavuro kwolaiyekono. Aki ago mojokwe su tool kwekono. Toro tool Jemseke'aro Jooseseke'aro Juudaseke'aro Saimooneke'aro todorotai kuudai'yagekono. Aki gamoro jo'mwo ton nevuge akawai mwalodopudogano.” Toro juno'mno Jisasolluno biyolo kuu'mwojoporogano.

⁴ Toro tovino Jisasol aro kuudokaikono. “Proofet pwollu yiuwi'nokai tomuu yovo aguto wiyodupudekono. Toro kuvi kuruv gamoro avalo tonyuro akuuto toru gami wagwolago'mdeyo oo ago'mdeyo tomuuno'gwowi yovo aguto mwiyodupudekono.” Kuudokaikono.

⁵ Toro tovino tov Jisasol gami wagwolago kuunodo toru amwaloka toga duuwallo jurogudo bwotonyago pugai'aro kuuduuwallowo'jujuko kwol kuruv muuduuwallajukekono. Yiuno nobollokwe punyuno uubogai'no'no sukulokaikono.

⁶ Jisasol toro ikulno sumaiyokwe a'mwo abolo gamino kuudo muubweyodopure su tonyuno kuudo kwolallo sourukwapiyokaikono. Toro yourukwapino sumaiyokwe ajumiyo go'no go'nodo pumuu sodubwosomollajukekono.

Jisasolluro 12-pela uumjunyokwe tooro a'mwo abolo punyu moruudomollo'mo amorapiyoka tovinokwono

⁷ Toro ibwosomolluno sumaiyokwe Jisasol gami 12-pela uumjunyokwe toorai, “Dobiloo,” domaro'no kuullo ma'no ma'nodo toorai modovomjapiyo'moneyokwe jurogudo tov uubweyo'no pworalno pworalno amorapiyokaikono.

⁸ Jisasol nomodapiyo'mo tool aro kuudokaikono. “Noonyumwonyu buro'nyo buro'nyodeyo pugai mamokavlapinorekikono. Yiuno yodeko tokwe domjunugovlaiyulo. Yopi kemi wosamujukodeyo kutodeyo nuugwi pausodeyo pugai mamokavlapinorekikono.

⁹ Aki youro tov puruval puruval mamokavlapinorekikono. Toro kworekul kuruv yiuno suulpweyo tokweno yesopi plapinorekikono.” Kuudokaikono.

¹⁰ Toro wuujuno sumaiyokwe aro kuudokaikono. “Wagwolago puvi ai'mopi toru ago yiuno puru'mono aulapi su tovi sa'mo toga ago su to kuvino wo'mwalpinorekikono. Ago puruvi puruvi mwopinorekikono. Yiuno wagwolago toru wuugollu'meyo'mo toga'no ago su tovi dukwopiyopi plapinorekikono.” Kuudokaikono.

¹¹ Wuujuno sumaiyokwe aki aro kuudokaikono. “Buro'nyo buro'nyomuuda'airodeyo tooro kemi maikwonyubusuko supi tooro kemoro yogalo tonyu muu'nyubusuko supi tov kwako su toru duugollu'meyulo. Toro supi tooravuro ma'no ma'nodo su tovino wuuduuwallo'moneyokwe toorekul sullukwako tov kemi suvlo tovi kwosuko tokwe ago su toru doluvourokurosumovlaiyulo.” Kuudokaikono.

¹² Toro wuujuno sumaiyokwe a'mwo 12-pela uumjunyokwe tooro plavo'mno a'mwo abolo ton Gooti toollomno kuudo youragunyumo'nupureyokweyo'mo amoruudomollajuporogano.

¹³ Toro moruudomollodupu kuullo ma'no ma'nodo bwotonyago toorai amodovomjapiyajuporogano. Aki nobollokwe bwotonyago tooravuro mido tovi oolip munyupto tov kimovobweyodupu sukullajuporogano.

Joonol wonyo galuvollokwe tool aboloka tovinokwono

¹⁴ Toruda'ai Jisasolluno yovo tov yiuwi'nokai tomuu abomjodumoulapokwono. Toro bomjodumoulodopure tovi a'mwo aguto kig Heroot kwol kuruv kuu'nokaikono. Toro tool aro tovi kuu'nokaikono. “Wonyo galuvollokwe Joonol kwekono. Me'no aboloka kwol kuruv adukavokaikono. Toro toolluno tov yiuwi'nokai duuwallo jurogudo ton yodowodekono.”

¹⁵ Toro junodopure toga aki pworo aro ajunoporogano. “Ilaijal kwekono.” Aki pworo aro ajunoporogano. “Proofet pwekono. Toro tool aiyogasuro amwallajupo tooravuro pwolbusukekono.”

¹⁶ Pworo toro junodopure kuvi kuruv Herootolno'gwowi wuu'no'no aro ajajukekono. “Nuu Joonollu mido tovi me'no adovalugulo su tool aduka'mokaldeyo.” Ajajukekono.

^17-18 Sumdomgu toga Heroot gavnokweyol aro sokaikono. Gagwai'yago Filipolluro abolo Heroodiyasovi amarokaikono. Toro ma'duke tovi Joonol wono'no aro kuudokaikono. “Gumi jugwai'yago toolluro abolo tovi mama'binokwono. Toro ajungiko loowo tovi kisuvolo sadokuuno.” Toro wuudoduke toga Heroodiyasov wuu'no'no Joonolluno ilaiyo mwinyajukokwono. Toro te Herootol Joonollu wuulo killo'mo ago tovi kuulomeroso'moneyokwe gami womdokwe toorai amodapiyokaikono. Toro tooro Joonollu maro'mno aulomerosopekono.

¹⁹ Toro kuulomerosodopure toga Heroodiyasov Joonolluno surodo bwotonyo yo'no noromiyoso'mo kwinokakwono. Toro kuvi kuruv ku'nono maromiyosokakwono.

²⁰ Joonol sugudo to'no yodowodo toolluno tov Herootol luko yo'no a'mwo pworo kaiyako nuuwipiyokwe pi'mwono amollomwallajukekono. Toro mollomwaloduke toollu gamoro abolo tov ku'nono maromiyosokakwono. Herootol Joonolluro kuuguudo yodubwasoduke tonyu kuu'nyajukekono. Toro kuu'nyajuko tool jul'nyo ibwosunodowo kuudo bwotonyo sourukwapiyajukekono. Toro kwol kuruv Joonolluro kuuguudo pugai'aro wuu'nyo'mo kwinyajukekono.

²¹ Lukomgu abolo tov Joonollu romiyoso'mo kuunodo toga abai'movokakwono. Herootol gami ganeyago tov somaroka iruko tollugwojuno aki aiko te kuudo yaullo'moneyokwe lubullu doto sanokaikono. Toro sanoka toga a'mwo aguto gavman womdokwe pworogai'aro mollurogudo tooravuro a'mwo aguto pworogai'aro Galilida'ai a'mwo aguto pworogai'aro tooro bo'mno lubullu doto su tovi sanoporogano.

²² Toro kuulojanodopure toga gamoro abolo Heroodiyasovuro taiyo tov a'mwo tooravuro sumdollu toru kuuloda'mno sumaiyokwe lupuro lupuropto sokakwono. Toro yoduke tovi Herooteke'aro a'mwo lubullu doto ajanyajupo toorogai'aro tooro wono'mno ilaiyo ainuwiyoporogano. Toro te a'mwo aguto kig Herootol sujuraiyo su tovi aro kuudokaikono. “Guu buro'nyo buro'nyodeyo agujunmwalo'ji tonyuno anyudubi tov nuu nokwo gujamonyugono.” Kuudokaikono.

²³ Toro wuujuno sumaiyokwe subuu'yamju aro aduuwiyokaikono. “Guu burowo'nyo burowo'nyo tonyuno anyudubi tov yowa'no gujamonyugono. Aki kwako akavi nuu a'mwo aguto kig toonyuro mido mollomwalo sugo tovino, Akuuto toru'aro dovonakurojo'bi donyabono, anyudubi kuruv yowa'no gujamonyugono.” Subuu'yamju aduuwiyokaikono.

²⁴ Toro aduuwiyoka tovi taiyo tov bolokwino sumaiyokwe ganeyago tovi aro kuudokakwono. “Burowo'nyo tovino wuudume'deyo?” Toro kuudoganoka tovi ganeyago tov kuudokakwono. “Aro duudono. Wonyo Galuvollokwe Joonolluro mido tov dovalugulo'bi nyabubino'migono, duudono.” Kuudokakwono.

²⁵ Toro kuudoka tovi sujuraiyo tov a'mwo aguto kig toollomno yere kuula'no aro kuudokakwono. “Guu Wonyo Galuvollokwe Joonolluro mido tov dovolugulomaro'bi plet tovi woso'bi nyabino'migono.” Kuudokakwono.

²⁶ Toro te a'mwo aguto kig tool Joonolluno kalo winoduke kwol kuruv, Oo a'mwo lubullu doto janodopure tooravuro sumdo tovi subuu'yamju me'no kwimonyudeyo. Toro kuudo yau'no sumaiyokwe, “Awiyo,” muudokaikono.

²⁷ Toro kuudoka kuga'gwo kuuno a'mwo aguto kig tool romiyosi womdokwe pwollu Joonolluro mido tov adovolugulomaroneyokweyo'mo amorapiyokaikono. Toro amodapiyoka tool Joonol wuulo killo'mo ago tovi kuule'na'duke toollu kuula'no gamoro mido tov aulodovolugulomarokaikono.

²⁸ Toro kuulodovoluguloma'no sumaiyokwe pleto tovi'aro duu'gwolomokabo'no sujuraiyo tovi abwiyokaikono. Sujuraiyo tov maro'no ganeyago tovi kuumallokakwono.

²⁹ Su toro tovino Joonolluro uumjunyokwe tooro kuu'nopo toga Joonolluro kulako tov maro'mno buuso tovi amollurosoporogano.

Jisasol a'mwo 5,000 toorai wosamujuko kwiyoka tovinokwono

³⁰ Toruda'ai Jisasolluro kuurotokwe tooro aikomgu bo'mno Jisaseke su'bwo'nomwaloporogano. Toro i'bwo'nomwalo'mno yiuwi'nokai kemoro womdo somollajupo togai'aro kuuguudo sodubwosomollajupo togai'aro tonyuno Jisasollu kuudoporogano.

³¹ Toro wuudodopure toga a'mwo abolo pun kworaiyomno kuulno lokabino kuulno lokabino yodopure tovino tov wosamujuko tov ku'nono manoporogano. Toro te Jisasol aro kuudokaikono. “Kevu iruko po'dogalo mwallo'moneyokwe nevu kwako a'mwomaiyo judo pumuuno avlawano.” Kuudokaikono.

³² Toro te kevnokwe judo tooro boot tovi ilomwalo'mno a'mwomaiyo tomuuno avlavoporogano.

³³ Boot tovi toro pla'mdopure toga a'mwo abolo bwotonyago ton wono'mno me'no suworovomaropogano. Toro iworovoma'no sumaveyokwe aro sajunopogano. “Oo nevu su tomuuno neya avlawano.” Toro juno sumaveyokwe yiuwi'nokai wagwolago go'no go'no tomuuda'ai su ton sumdomgu yere uuwo'mno ai'movapogano.

³⁴ Toro ki'mo'mdopure tonyu Jisasol boot tovida'ai bolokwino sumaiyokwe kwolallo bwotonyo su tonyu kwonokaikono. Toro ton sipsip tobuurobusuko imo'nodopure tobuurai a'mwo duuwato'moneyokwe pwol nonaguto sumo'nyajupogano. Su toro imo'nodopure tobuuraino Jisasol kalo kwinokaikono. Toro tonyu kuuguudo bwotonyago ton sodubwasokaikono.

³⁵ Toro yodubwosumovla'mduke toga surakuuto junyo'mo yoduke tovi gamoro uumjunyokwe tooro wono'mno Jisasollu aro abuudoporogano. “Akamuu judo tomuugono. Aki surakuuto junyo'mo sadopiyo.

³⁶ A'mwo abolo tonyu domodapiyono. Guu modapiyo'bi wosamujuko nonyo'mo pun womnagomdeyo oo ajumiyomdeyo tomuu plavopi nokwo mubiyanupinogano.” Kuudoporogano.

³⁷ Toro kuudopo kuvi kuruv Jisasol aro kuudokaikono. “Kevu a'mwo abolo su ton nupino'moneyokwe wosamujuko pun neya duuwiyulo.” Toro kuudoka toollu aro kuudoganoporogano. “Nevu plavowa'ji bret ton 200 silva nuugwisulo tekwogai mubiyowa'ji a'mwo abolo su tonyu wiyano'mo dukonekudadokuuno?” Kuudoganoporogano.

³⁸ Toro kuudoganopo toorai aro kuudokaikono. “Bret adadobuul dukomworakoveyokwe tovino doonomolloulo.” Toro tooro wonomollo'mno abuudoporogano. “Bret tov atobuul pubuuke'aro domwoga tov pworake'aro tobuul amworakovo.” Abuudoporogano.

³⁹ Toro te Jisasol gami uumjunyokwe toorai a'mwo abolo ton muudukuu'nopi kabimwomdo toru wolomwalpureyokwe amodapiyokaikono.

⁴⁰ Toro kuudopo ton 50-peladeyo 100-peladeyo tomgu'aro muudukuu'no'mno kwolomwalopogano.

⁴¹ Toro mwalodopure toga Jisasol bret atobuul tokwe domwoga toorake malluno sumaiyokwe muunyu kai'muu iloonyopiya'no wosamujuko su tonyuno Gooti toollu, “Nenyoo,” kuudokaikono. Toro wuujuno sumaiyokwe bret tov buudeno buudeno sumaiyokwe gami uumjunyokwe toorai a'mwo abolo tonyu uumallupureyokwe amorapiyokaikono. Aki domwoga toorake'aro yiuwi'nokai a'mwo abolo ton nonpino'neyokwe abuudowapiyokaikono.

⁴² A'mwo kwolallo yiuwi'nokai amwalopo ton wosamujuko su tov nyuno nyuno sumaveyokwe sumwoluko kwitovoka ton nonyugollu'mopto sopogano.

⁴³ Toro anyugollu'movopo tonyu bret nobuudeyo togai domwoga nobuudeyo togai basket tov 12-pela tobuullu sutowosungiko tonyu Jisasolluro uumjunyokwe tooro yomollo'mno amollu'bworomaroporogano.

⁴⁴ Kwolallo su tonyuro bret anopo a'mwo tooro 5,000 toorogano.

Jisasol wonyo buugo tovi muunyu toru kado avlavoka tovinokwono

⁴⁵ Bret tov me'no nopiyo'mno kuga'gwo kuuno Jisasol gami uumjunyokwe toorai aro kuudokaikono. “Kevu boot tovi ilomwalopi wonyo buugo te igo'mgu wagwolago Betisaida'no juloulo.” Kuudokaikono. Jisasol kwolallo amwalopo tonyu modapiyo'moneyokwe tool amwalokaikono.

⁴⁶ Jisasol kwolallo tonyu aro amodapiyokaikono. “Donuwanyuloo.” Toro modapino sumaiyokwe subusu'nyogalo wuujo'mo tool muumuudo pwollomno sulokaikono.

⁴⁷ Jisasol muumuudo toollu mwaloduke toga surakuuto ajunokakwono. Surakuuto me'no ajunoka toga Jisasol judo tool kwako tovi mwaloduke toga gamoro uumjunyokwe toorono'gwowi boot tovi wonyo buunakuuto toru amwaloporogano.

⁴⁸ Lomwo iru'mago toga Jisasol kwako tovi davo'no gami uumjunyokwe tooro boot tovi mwalodopure kwonokaikono. Toro tooro dolo bwotonyo yoduke tovi novraibwollo'mo guureji wiyoganodopure toorai kwonokaikono. Toro tooraiyomno plaiyo'mo tool wonyo buugo tovi muunyu toru kwokado kuuwokaikono. Toro uuwo'no gami uumjunyokwe toorai irukuruwoleyo'mo avlavokaikono.

⁴⁹ Toro pla'mduke kwollu kuruv gamoro uumjunyokwe tooro wono'mno kurokuro'deko aro adoporogano. “Awi, kumamdekonoo.” Adoporogano.

⁵⁰ Toro pla'mduke toollu yiuwi'nokai tooro wono'mno luko bwotonyo soporogano. Luko toro jodopure toorai Jisasol yere kuudokaikono. “Kemi poowokalago ton jurogudo nokwo jumo'nyulo. Nuu toonyugono. Toro te luko mipinono.” Kuudokaikono.

⁵¹ Toro tool kworogai boot tovi muunyu toru sulomwalokaikono. Toro sulomwaloka toga dolo tov sumwogapiyokakwono. Gamoro uumjunyokwe tooro Jisasolluro soka tovi wono'mno mouguurotowosi soporogano.

⁵² Mougurotowosi toro sopo tov aro tovinokwono. Kemoro poowokalago tov lumdo kuulopiyo'mno Jisasolluro bret puukwollo sokwolluwiyoka tovino kavlo tov po'dogalo miyouromaroporogano. Toro tovino tov mouguurotowosi soporogano.

Jisasol Genesaret toru a'mwo nobollokwe bwotonyago tonyu sukuloka tovinokwono

⁵³ Toro tooro boot tovi purebwo'melno sumaveyokwe kwako Genesaret towai sule'movaporogano. Toro ile'mo'mno sumaveyokwe boot tovi wuulo aluviyogullosoporogano.

⁵⁴ Toro tooro boot tovida'ai bolokwodopure kuga'gwo kuuno a'mwo abolo amwalopo ton wono'mno Jisasolluno suworovomaropogano.

⁵⁵ Toro iworovoma'no sumaveyokwe yiuwi'nokai tomuu kano kano plavo'mno kuudomollopogano. Toro wuudomollodopure tovida'ai a'mwo abolo ton Jisasolluro judo'no judo'no yomolloduke tomuuno me'no kuu'nyajupogano. Toro kuu'nyajupo su ton kemi nobollokwe tobuurai i'buronyuko tovi'aro Jisasollomno amollumovomokabopogano.

⁵⁶ Yiuwi'nokai ajumiyo kula'nyo'mdeyo oo wagwolago aguto'mdeyo oo womnago'mdeyo tomuu Jisasol aullajukekono. Toro tomuu kuuloduke toollu a'mwo nobollokwe tobuurai wosamujuko maket wosodupudo toru abomorosopogano. Toro abomorosopo ton Jisasollu guureji kuudoganopogano. “Nobollokwe tobuuro gumoro youro do'gwapiyo tovino to'no nokwo uubogai'nupinodukono?” Kuudoganopogano. Toro te yiuwi'nokai nobollokwe tobuuro Jisasolluro youro do'gwapiyo tovino uubogai'nodopure su tobuurai sukulokaikono.