Kuuguudo Sugudo akav Makolluro sakwollokakwono Mak 5 - Gooti Toolluro Yogalokwono

Jisasol a'mwo kuullo ma'no ma'nodokwe pwollu sukuloka tovinokwono

¹ Jisaseke'aro a'mwo kuumjunyajupo toorogai'aro tooro wonyo buugo tovi ila'mno igo'mgu Geraseda'ai tooravuro kwako towai sule'movaporogano.

² Ile'mo'mno sumaveyokwe boot tovida'ai bwolodukwopiya'mno a'mwo pwol kuullo ma'no ma'nodo tooro winalo'mduke tool a'mwo buuso tomuuda'ai bo'no abuuru'marokaikono.

³ A'mwo su tool a'mwo buuso tomuu mujomwekovlaiyokwekono. Toro toollu a'mwo pworo wuulo galeroso'moneyokwe senyo wuulo kugai kuruv ku'nono mairosodupudekono.

⁴ Toro toollu yiuwi'nokai toga suvlo ato tovallu senyo wuulo togai galogullosodopure kwol kuruv aru'mdowosajukekono. Toro toollu a'mwo pwolnodo kwol kuruv ku'nono magalagu'mwojajupekono.

⁵ Surakuuto togake'aro iruko togake'aro toga a'mwo buuso toruke muumuudo toruke tomuu yomollodowo deko aderounomollajukekono. Aki gavnokwe tool gami kulako tovi sulo tokwe ado'nyajukekono.

⁶ Toro tool Jisasollu manyu tomuuda'ai kwonyopiyabokaikono. Toro wonyopiyabino sumaiyokwe kano kano bo'no Jisasolluro sumdollu toru suduko abinuguto'nokaikono.

^7-8 Toro binuguto'noduke toga Jisasol aro kuudokaikono. “Kuullo ma'no ma'nodo tooku buugollu'mokalokwono.” Toro kuudoka toga kuullo ma'no ma'nodo tool deko bwotonyo aro adokaikono. “Jisasoloo, guu Gooti Yiuwi'nokai Tonyu Uuwolo'mdowodo toolluro Kwolaiyekugono. Toro tooku mi buro'nyo nyubino'mekudeyo? Mi kaiyako nonyubiyokweyo'mo Gooti toollu subuu'yamju neya duuwiyono.” Kuudokaikono.

⁹ Toruda'ai Jisasol aro kuudoganokaikono. “Gumino yovo tov ala'mwolekudeyo?” Toro kuudoganoka tovi kuullo ma'no ma'nodo tool kuudokaikono. “Nevu bwotonyago kuulomwalodowado toonolluno tov nemino yovo tov Kwolallu'woleyonogano.” Kuudokaikono.

¹⁰ Toro tool Jisasollu aro ajugunokaikono. “Oo guu nemi manyu tomuuno nomodovomjonekwapibiyo,” ajugunokaikono.

¹¹ Kwako su towai wobo toru sa'aiyo wuulo pworo muumuudo toollu anodaiyajupogano.

¹² Toro te kuullo ma'no ma'nodo tooro sa'aiyo su toorai neya aulomodomoronekwopiyawoneyokweyo'mo Jisasollu ajugonoporogano.

¹³ Toro ajugonopo toorai Jisasol nokwo pwo'bworapino sokaikono. Toro te kuullo ma'no ma'nodo tooro a'mwo kuulomwalodupudo toollu wuugollu'mo'mno sumaveyokwe sa'aiyo su toorai aulaporogano. Kuulno sumaveyokwe toga sa'aiyo tooro muumuudo towaida'ai kuukuulo tomuuno kano kano wola'mno wonyo buugo tov ame'nyudapiyokarogano. Sa'aiyo tooro 2,000 tomgu'aro toorai ame'nyudapiyokarogano.

¹⁴ A'mwo sa'aiyo su toorai ki'duvolodupudo tooro Jisasolluro toro yoduke tovi wonyuno sumaveyokwe toga kano kano plavo'mno ago wagwolago togai'aro womnago togai'aro tomuu Jisasolluro soka tovino a'mwo pworai kuudomolloporogano. Toro kuudomollopo tooro wuu'nyuno sumaveyokwe buro'nyo sumo'numoka'mdukoneyokwe tovino kevnokwe tooro wonyo'mo aboporogano.

¹⁵ Toro bino sumaveyokwe Jisasollu wobo toru abai'movoporogano. Toro abai'movopo su tooro a'mwo kuullo ma'no ma'no aulomwallajupo tool Jisaseke wobo toru mwaloduke toollu kwonopekono. A'mwo su tool youro togai me'no yeso'no buroburomaiyo to'no mwaloduke kwonopekono. Toro tooro a'mwo sukulnoka su toollu wono'mno luko soporogano.

¹⁶ A'mwo gabovo pworo Jisasolluro yoduke su tovi me'no amuugonallajuporogano. Toro tooro a'mwo kuullo ma'no ma'no aulomwallajupo toolluno a'mwo abopo toorai kuu'maiyo toru adodolubweyoporogano. Aki wonyo tov sa'aiyo toorai ame'nyudapiyoka kurukwe'aro tovino adodolubweyoporogano.

¹⁷ Toro tovi wuu'nyuno sumaveyokwe Jisasollu guureji aro kuudoganoporogano. “Nemoro amwakuuwo akaru yowa'no wuugollu'mo'binekudeyo?” Toro kuudoganoporogano.

¹⁸ Toro te Jisasol novlaiyo'mo tool boot tovi muunyu toru ilomwallo'mo yoduke toga a'mwo kuullo ma'no ma'nodokwe sukuloka su tool Jisasollu guureji aro kuudoganokaikono. “Nuu guuge yowa'no plawosunonyudeyo?” Kuudoganokaikono.

¹⁹ Toro kuudoganoka toollu Jisasol aro kuudokaikono. “Awiyoo, guu gumi ago tomuu plavo'bi guuge avalo amwakopo toorai Aguto toolluro yiuwi'nokai gumi ilaiyo bwotonyo agubwemoka tonyuno duudawono. Aki Aguto tool gumino kalo mamwonyodowo ilaiyo agubwemoka kurukwe'aro tonyuno neya duudawono.” Kuudokaikono.

²⁰ Toro te a'mwo tool plavo'no Dikapooles toru yiuwi'nokai a'mwo abolo tonyu amoruudomollajukekono. Toro tool yiuwi'nokai Jisasolluro gamino womdo subweyoka tonyuno amoruudomollajukekono. Toro moruudomolloduke tovi a'mwo abolo ton wuu'nodupu kuudo kwolallo sourukwapiyajupogano.

Jisasol a'mwo pwolluro taiyo nobollokwe puvi ikullo'mo tool avlavoka tovinokwono

²¹ Toruda'ai Jisasol boot tovi'aro wonyo buugo tovi aikomgu suloga'movokaikono. Toro iloga'mo'mno sumaiyokwe Jisasol wonyo wolo tovi wobo toru mwaloduke toga kwolallo bwotonyo ton aiyowomno abomwodovomaropogano.

²² Toro bomwodovoma'dopure toga Juu tooravuro i'bwo'nyago puvi mido mollomwalokwe pwol abokaikono. A'mwo su toolluno yovo tov Jairasolekono. Toro tool bino sumaiyokwe Jisasollu wono'no gamoro suvlo dolago toru suduko abinuguto'nokaikono.

²³ Toro inuguto'nyuno sumaiyokwe Jisasollu guureji aro kuudokaikono. “Moro taiyo tov nobollo'mo sadopiyo. Toro tovi guu kuubogai'nubi tov nokwo ikunonokwono. Ikunowo'ji ilaiyo nokwo mwalonokwono.” Kuudokaikono.

²⁴ Toro wuujuno sumaiyokwe Jisasol a'mwo su tooke avlavokaikono. Toro pla'mduke toga kwolallo bwotonyo ton amobwi'buullopimovlavopogano.

Jisasol abolo puruv abewo'nyo nobollokwe tovi sukuloka tovinokwono

²⁵ Toro mobwi'buullopimovla'mdopure toga abolo nobollokwe puruv amjomokavlavokakwono. Nobollo su tov abewo'nyo to'no to'no yodowodo tov 12-pela kworomo kuuwolo'nokakwono.

²⁶ Abolo su tov dookta judo'no judo'no bwotonyago tooraiyomno pla'mdowodo toga yiuno dado to'no kwiyajuporogano. Toro toorai gami yiuwi'nokai nuugwiyo ton adukwopiyajukokwono. Toro kuvi kuruv mikullajupokwono. Aki gamoro nobollo tov bwotonyo sumo'nyajukokwono.

²⁷ Toro yoduke toga Jisasol abokaikono. Jisasol a'mwo abolo tonyuro akuuto tomuu bomwaloduke toolluno wuu'no'no kwollomno bino sumaiyokwe Jisasolluro buulo tomgu'aro kuula'no gamoro youro do'gwapiyo tovi kuubogai'nokakwono.

²⁸ Toro kuubogai'noka tov aro sajunokakwono. “Nuu gamoro yiuno youro tovino kuubogai'numi tov ikunme'gono.” Toro yajuno'no kuubogai'nokakwono.

²⁹ Toro uubogai'nyuno sumaiyokwe kuga'gwo kuuno abolo tovuro abewo'nyo nobollo tov sukulnokakwono. Toro te abolo tov gamoro kulako tovi ibwosuno'no aro kuudo saurokakwono. Oo moro nobollo tov me'no donyukulmaiyo. Kuudo saurokakwono.

³⁰ Abolo tov toro yoduke toga Jisasol gamoro jurogudo tov bolokwoduke tovino subwosunokaikono. Toro tool a'mwo kwolallo tonyu buulo tomgu mogunyubworoono'no aro kuudoganokaikono. “Moro youro tovi ala'mwol kuubogai'numoka'mdeyo?”

³¹ Toro kuudoganoka tovi gamoro uumjunyokwe tooro aro kuudoporogano. “Doonono. Kwolallo bwotonyo ton gulluto'nyo gulluto'nyo avla'mwakuuwono. Toro tovino tov guu buro'nyo'mo aro jamuugojadokuuno, Moro youro tovi ala'mwol kuubogai'numoka'mdeyo?”

³² Toro kuudoganopo tool ala'mwol kuubogai'numoka'mdukoneyokwe tovino sumdo kwonomollokaikono.

³³ Toro wonomolloduke toga abolo sukulnoka tov kuudo saurokakwono. Oo Jisasol me'no anyukulmoka tooldeyo. Kuudo yauro'no luko kwopto ino sumaiyokwe Jisasolluro sumdomago toru bo'no abomuulo'narokakwono. Bomuulo'na'no sumaiyokwe yiuwi'nokai kwimo'numoka tonyuno adodowiyoku'bworosunokakwono.

³⁴ Toro adodowiyoku'bworosunoka tovi Jisasol kuudokaikono. “Abewalobuuloo, gumoro kuudo anubwemwakudo tovino tov agujukulmono. Toro agujukulmo to'guu nokwo pla'bino'guugono. Sumwoluko tov kavo woso'bi duuwanono.” Kuudokaikono.

Jisasol taiyo me'no aboloka pubuullu amododukavoka tovinokwono

³⁵ Jisasol abolo tovi toro wuudoduke toga Juu tooravuro i'bwo'nyago tovi mido mollomwalokwe tool Jisaseke kuuno da'mduke toollu gamoro ago tovida'ai yogalokwe pworo bino sumaveyokwe aro kuudoporogano. “Gumoro taiyo tov me'no abolmokakwono. Toro te aga'no'gwowi guu ibwasokwe toollu uumjukuto nuuwibiyo.” Kuudoporogano.

³⁶ Toro wuudodopure toga Jisasol wuu'no'no kwol kuruv Juu tooravuro i'bwo'nyago tovi mido mollomwalokwe toollu kuudokaikono. “Luko mibinono. Gumoro kuudo tov yiuno mino to'no donubweyono.” Kuudokaikono.

³⁷ Toro te Jisasol yiuwi'nokai a'mwo abolo tonyu nonumjunpiyokweyo'mo duumjuku'no sumaiyokwe yiuno Pitaike'aro Jemseke Jooneke todorake'aro tooraino amokavlavokaikono.

³⁸ Toro tooro plaino sumaveyokwe i'bwo'nyago tovi mido mollomwalokwe toolluro ago toru ki'movo'mno Jisasol kumdato deraunodopure toorai wuu'no'no kwonokaikono.

³⁹ Toro tool ago tovi kuula'no noulomwalodopure tonyu aro kuudokaikono. “Kevu buro'nyolno kumdato doderaunadokwovo? Taiyo tov mabolmokakwono. Sa to'no kwoso.” Kuudokaikono.

⁴⁰ Kumdato auloderaunyajupo tooro Jisasolluro toro kuudoka tovino wuu'no'mno kakwo amadoporogano. Kakwo madodopure kworai Jisasol bilomodovomjapiyo'no taiyo tovi kuunum kwolabolo teyauke'aro gami uumjunyokwe pworapwol toorogai'aro tonyu taiyo tov wo'duke toru'no amokaulokaikono.

⁴¹ Toro mokaulno sumaiyokwe Jisasol taiyo tovuro ato tovi maro'no kuudokaikono. “Talita Kuumi.” Yogalo su tov nemoro yogalo tovi aro'mokwono. “Taiyobuuloo, dodukavono.” Toro tovino kuudokaikono.

⁴² Toro kuudoka kuga'gwo kuuno taiyo tov adukoviyomollokakwono. Taiyo tov 12-pela kworomokwe tov toro sokakwono. Taiyo tov toro dukoviyomolluduke tovi amwalopo ton wono'mno mollolokurosi bwotonyo sopogano.

⁴³ Toro tonyu Jisasol yogalo jurogudo aro aduuwiyokaikono. “Moro sumo akavino a'mwo pworo nyouronmapiyo. Toro tovino kevu muudupinono. Aki taiyo tovi mujuko'mo wosa pun duuwiyulo.” Aduuwiyokaikono.