Kuuguudo Sugudo akav Makolluro sakwollokakwono Mak 2 - Gooti Toolluro Yogalokwono

Jisasol a'mwo suvlato abolopingikokwe pwollu sukuloka tovinokwono

¹ Iruko pubuul uuwolo'no'no Jisasol wagwolago Kapurniyam'no aiko tomgu avlavokaikono. Toro tool me'no ki'mo'no sumaiyokwe ago tovi kuulomwaloduke toolluno tov a'mwo abolo ton aro ajunopogano. “Ago tovi akaigwol aulomwallo.” Ajunopogano.

² Toro tovino tov a'mwo abolo bwotonyago ton abi'bwo'nopogano. Toro bi'bwo'no'mno ago tovi anakuuto tomuu aiyowomno amwollutowopiyopokwono. Noullo kuwai kuruv a'mwo tooro aiyowomno amwollutowopiyopokwono. Toro tovi a'mwo pwol kuullo'mo tov nonaguto sumo'nokakwono. Toro mwollutowopiyodopure toga Jisasol Gooti toolluro kuuguudo tovi sodubwasajukekono.

³ Toro yodubwasoduke toga a'mwo suvlato abolopingiko pwollu amokaboporogano. A'mwo aral aral tooro i'buronyuko tovi wo'duke toollu amollukwovomokaborogano.

⁴ Toro mokabino sumaveyokwe me'no amwollutowopiyopo tovino tov Jisasollu wobo toru mokaullo'mo tov ku'nono mamokaulaporogano. Toro tooro Jisasol ago kuulomwaloduke tovi muunyu tomuu mokaila'mno ajulmdo tovida'ai kula'nyo pwekwo amouropiyopokwono. Toro mouropino sumaveyokwe a'mwo suvlato abolopingikokwe tool i'buronyuko te wo'duke toollu wuulo tovi'aro kwolomollukwo'bworopiyaporogano.

⁵ Toro amokabopo su tooro Jisasolluno kuudo uubweyodopure tovi Jisasol wono'no a'mwo suvlato abolopingikokwe toollu yere mikulo'no aro kuudokaikono. “Mi a'mwoloo, nuu gumoro ma'no ma'nodo tovuro kirumwallo tovi amagudukwopimono.” Kuudokaikono.

⁶ Toro wuudoduke towai a'mwo loowo tovino pi'mwo kuudokwe amwalopo pworo wuu'no'mno kemi poowokalago togai aro kuudo sourukwapiyoporogano.

⁷ “Awi, a'mwo akal buro'nyo'mo aro dukodadopiyo? Nuu gumoro ma'no ma'no pasudo yodumdo tovuro kirumwallo tovi amagudukwopimono. Jisasolluro toro kuudumoka su tov Gooti toolluno kaiya'no yogalo adumokaikono. Yiuno Gooti toolno ma'no ma'nodo tovuro kirumwallo tovi nokwo modukwopiyonekono.” Kuudo sauroporogano.

⁸ Toro yau'dopure kuga'gwo kuuno Jisasol kemoro kuudo tovi me'no youroma'no sumaiyokwe aro kuudokaikono. “Kemi poowokalago togai buro'nyo'mo kuudo kwolallo jourukwapimwakovo?

⁹ Nuu suvlato abolopingikokwe toollu yere nokwo ikulmonyugono. Aki gamoro ma'no ma'nodo tovuro kirumwallo kuruv yere nokwo modukwopimonyugono. Yiuwi'nokai su tovallu kuvinono yo'mo tov mi jurogudo manyumo'nodubulonyugono. Toro toonyu a'mwo suvlato abolopingikokwe toollu aro nokwo wuudumonyugono. “Guu ilodavo'bi gumoro i'buronyuko tovi domokwanono.” Nokwo wuudumonyugono.” Kuudokaikono.

¹⁰ Jisasol toro wuujuno sumaiyokwe aki aro kuudokaikono. “A'mwo Kwolaiyo Kuunodo toonyu kwako akavi mwalo'mi toga kemoro ma'no ma'nodo tovuro kirumwallo tovi moro jurogudo tokwe nokwo modukwopimonyugoneyo'mo aikuduuwallumwakono.” Toro wuujuno sumaiyokwe Jisasol a'mwo suvlato abolopingikokwe toollu aro kuudokaikono.

¹¹ “Su toro tovino wuuduuwallo'mo tov agudadokwono. Guu ilodavo'bi gumi i'buronyuko tov maro'bi gumi ago tomuuno domokwanono.” Kuudokaikono.

¹² Toro kuudoka kuga'gwo kuuno a'mwo suvlato abolopingikokwe tool iloda'mno sumaiyokwe gami i'buronyuko tov amokwanokaikono. Toro toollu a'mwo abolo ton wonyuno sumaveyokwe adopogano. “Toro mwonodowado akav buro'nyovo to'mdeyo?” Do'mno yiuwi'nokai ton kuudo kwolallo yourukwapiyo'mno Gooti toolluno sulomoropiyapogano.

Jisasol Livaiyollu adomaroka tovinokwono

¹³ Toruda'ai Jisasol wonyo wolo buugo aiko toru'no avlavokaikono. Toro pla'mduke toollu a'mwo abolo ton merobuu'buullopiyodopure toru sodubwosumovlaiyajukekono.

¹⁴ Toro yodubwosumovla'mno sumaiyokwe Alfiyasolluro kwolaiyo Livaiyol takis ma'dupudo adaiyo tekwoji mwaloduke toollu kwonokaikono. Toro toollu aro kuudokaikono. “Guu donumjunono.” Toro tool iloda'mno sumaiyokwe Jisasollu kuumjunokaikono.

¹⁵ Toruda'ai Jisasol Livaiyolluro ago tovi aulonomwalolekono. A'mwo takis nuugwiyo mallokwe pworogai'aro a'mwo ma'no ma'nodokwe pworogai'aro bwotonyago su tooro Jisaseke'aro gamoro uumjunyokwe toorogai'aro tooro aulonomwaloporogano. Su tov aro tovinokwono. Jisasol nyodubwosomolloduke su toga a'mwo bwotonyago tooro kuumjunyajuporogano.

¹⁶ Toro toorogai kuulonomwaloduke toollu Farasi tooravuro loowo tovino pi'mwo kuudokwe pworo wono'mno gamoro uumjunyokwe toorai aro kuudoganoporogano. “Akaikwol a'mwo takis nuugwiyo mallokwe toorogai'aro a'mwo ma'no ma'nodokwe toorogai'aro su toorogai buro'nyo'mo doulonomwallo?” Kuudoganoporogano.

¹⁷ Toro wuudoganodopure tovi Jisasol wuu'nyuno sumaiyokwe yovekurajo tov aro kuudokaikono. “Nobollomaiyokweyonoldeyo,” adupi tooro dookta toollomno mavla'mdupudorogano. Toro kuvi kuruv, “Nobollokweyonoldeyo,” adupi toorono'gwowi dookta toollomno pla'mdupudorogano. Toro to'busuko kubalno nuu a'mwo pworo, “Sugudonoldeyo,” adupi tooraiyomno abonyumaiyo. Toro kwonyu kuruv a'mwo, “Ma'no ma'nodokweyonoldeyo,” adupi tooraino'gwowi miyomno de'nomallo'moneyokwe abonyugono.” Kuudokaikono.

Jisasol wosamujuko nonyo'mo kumako mwalodupudo tonyuno adoka tovinokwono

¹⁸ Toruda'ai Joonollu uumjunyokwe toorogai'aro Farasi tooravuro uumjunyokwe toorogai'aro tooro Gooti toollu ilaiyo mollo'mo tooro iruko pullugwoji wosamujuko tonyuno kumako amwaloporogano. Toro amwalopo toga a'mwo pworo bo'mno Jisasollu yamuugojo aro kuudoganoporogano. “Joonollu uumjunyokwe toorogai'aro Farasi tooravuro uumjunyokwe toorogai'aro tooro Gooti toollu ilaiyo mollo'mo tooro wosamujuko tonyuno kumako amwalmwakovo. Toro kuvi kuruv gumi gumjunyokwe toorono'gwowi kumako mamwalmwakopo tov buro'nyo'mo'mdeyo?” Kuudoganoporogano.

¹⁹ Toro kuudoganopo tovi Jisasol yovekurajo puruv aro kuudokaikono. “A'mwo pwol abolo nomallo'mo tool kuuno mwalodowo'jure toga gami ibwoto'nyo pworo gavuge ilaiyo yopi wosamujuko tonyuno kumako mwalpinorodukono? Awiyo, neya nonomwalpinorogano.

²⁰ Toro kuvi kuruv iruko pullugwoji abolo nomallo'mo su toollu nomokavlapinekono. Me'no amokavlapi toga'no'gwowi mamwaloduke toolluno tov gami ibwoto'nyo tooro wosamujuko tonyuno kumako mwalpinorogano.” Kuudokaikono.

²¹ Toro wuujuno sumaiyokwe aki yovekurajo puruv aro kuudokaikono. “A'mwo pwol youro uumnorojo tovi giwollo'mo tool youro aiyo tokwe madokuuragiwolonekono. Toro adokuuragiwolo'ji tov youro aiyo nodokuullo tov uumdo tovi guureji ki'nomarowo'ji bwotonyo rojonokwono. Toro tovino tov uumdo tokwe aiyo tokwe amolla'mo'bi tov kaiya'no imo'nonokwono.” Kuudokaikono.

²² Toruda'ai aki yovekurajo puruv aro kuudokaikono. “A'mwo pwol meme kulako tovida'ai sakwollungiko guumiyo uumdo tovi wain aiyo tokwe suroso'ji tov wain wonyo su tov munowo'ji nobwolowikuropiyawonokwono. Toro abwolowikuropiyawo'ji tov meme kulako tovida'ai sakwollungiko guumiyo uumdo tokwe wain aiyo tokwe toval kaiyako yopibullunovakono. Toro tovino tov wain aiyo tov meme kulako tovida'ai sakwollungiko guumiyo yiuno aiyo tovino iroso'mokwono.” Yovekurajo su tov toro kuudokaikono.

Jisasol iruko Sabat tollugwojuno adoka tovinokwono

²³ Toruda'ai Sabat pullugwoji Jisasol puuto tov wit womdo akuuto tomuu kuuloduke toollu gamoro uumjunyokwe tooro uumjuno'mno wit no tonyu amuudonugovlavoporogano.

²⁴ Toro muudonugovla'mdopure toga Farasi tooro wonyuno sumaveyokwe Jisasollu aro kuudoporogano. “Doonono. Gumoro gumjunyokwe tooro Sabat tovi miyo'moneyokwe tov buro'nyo'mo kisuvolo jumwakovo?” Kuudoporogano.

²⁵ Toro kuudopo tool kuudokaikono. “Kevu Gooti toolluro kuuguudo tov mwonodupudorekuldeyo? Deviteke'aro gami uumjunyokwe toorogai'aro tooro wosamujuko supto yo'mno mujuko'mo yodopure toga Devitolluro soka tovino kuuguudo tov mwonodupudorekuldeyo?

²⁶ Toro tool Abiyatarol pris aguto mwaloduke toga Gooti toollu ilomoropiyo'moneyokwe sel ago tovi kuula'no bret pun Gooti toollu me'no kwingiko ton maro'no amanokaikono. Bret su ton yiuno pris toorono nyo'moneyokwe tovi amanokaikono. Toro tool pun gami uumjunyokwe kworai kuruv kuumallokaikono.” Kuudokaikono.

²⁷ Jisasol toro wuujuno sumaiyokwe aki aro kuudokaikono. “Gooti tool a'mwo abolo tonyu Sabat tovino'mo sokwollosokalmaiyo. Toro kuvi kuruv Sabat su to'gwowi a'mwo abolo tonyo'mo sokwollubweyokaikono.

²⁸ Toro te A'mwo Kwolaiyo Kuunodo toonyu Sabat su tollugwojuro agutonyugono.” Kuudokaikono.