Kuuguudo Sugudo akav Makolluro sakwollokakwono Mak 10 - Gooti Toolluro Yogalokwono

Jisasol a'mwo kwolabolo tonyuro yeru'mdowapinodupudo tovino adoka tovinokwono

¹ Jisasol su toro tomuu wuugollu'mo'mno sumaiyokwe Juudiya tomuuno avlavokaikono. Toro plaino sumaiyokwe wonyo Joodanovi igo'mguuno aga'mokailokaikono. Toro ki'mo'mduke toollu a'mwo abolo kwolallo ton aki aiko te abi'bwo'nopogano. Toro abi'bwo'nopo tonyu Jisasol yiuwi'nokai toga yodowodo kubalno aval'no sodubwasokaikono.

² Toro yodubwasoduke toga Farasi pworo bino sumaveyokwe Jisasollu abwolorawoneyokweyo'mo yamju abwiyoganoporogano. Toro tooro aro kuudoganoporogano. “A'mwo pwol gami abolo tovi ru'mdowapiyo'mo tov nokwo'mo'mdukono?” Kuudoganoporogano.

³ Toro kuudoganopo toorai Jisasol samuugojokaikono. “Kevu neya uumjunmwalpino'moneyokwe Moosesol buro'nyovo ajakwollokaldeyo?” Samuugojokaikono.

⁴ Toro samuugojoka tovi Farasi tooro kuudoporogano. “A'mwo pwol gami abolo tovi ru'mdowapiyo'mo tool noru'mdowapiyo'moneyokwe puukwollukwiyo tovi me'no yakwollowo'ji toga aru'mdowapiyo'ji to'gwowi nokwo'mokwono. Moosesolluro ajakwolloka tovi toro nekudodowodokwono.” Kuudoporogano.

⁵ Toro kuudopo toorai Jisasol aro kuudokaikono. “Kemoro poowokalago ton lumdo kuulopiyodupudo toorekulluno tov Moosesol toro sokwollaikubweyokakwono.

⁶ Toro kuvi kuruv muudu'nodo toga'no'gwowi Gooti tool yiuwi'nokai tonyu yakwollo'no yiuno a'mwo tookeno abolo tokweno sokwollosokaikono.

⁷ Toro sakwollungiko tovino tov a'mwo pwol gami ganeyago tokwe ganumiyago tooke tovallu wuugollu'mowo'ji gami abolo tov amaro'ji toga guro'mwonyubullunovakono.

⁸ Toro aguro'mwonyubullu toga go'no go'no mamjomwekovla'bullunovakono. Toro toval kulako yiuno puru'mono imo'nubullunovakono.

⁹ Aki Gooti toolluro amoguro'mwojoso'ji su tovallu a'mwo pwol nomoru'mdowapiyo'jo.” Kuudokaikono.

¹⁰ Toruda'ai Jisaseke'aro gamoro uumjunyokwe toorogai'aro tooro ago tovi aikomgu aulaporogano. Toro kuulno sumaveyokwe uumjunyokwe su tooro Farasi tooravuro sumdomguda'ai kuudoganopo tovino Jisasollu aki aiko te samuugojoporogano.

¹¹ Toro samuugojopo toorai Jisasol kuudokaikono. “A'mwo pwol gami abolo tovi ru'mdowapiyowo'ji abolo puvi amaro'ji tov gami abolo sumdomguda'ai tovi kaiya'no igolowo'ji kwonyalo imwalonekono.

¹² Aki abolo puruv gami kwolo toollu ru'mdowapiyowo'ji a'mwo pwollu kuuma'no'ji tov abolo su tov kwonyalo imwalonokwono.” Kuudokaikono.

Jisasol, “Kevu kwoloraiyo tobuuro miyomno bodopure su tobuurai nokwo wonyapino julo,” adoka tovinokwono

¹³ Toruda'ai a'mwo abolo pun kemi kwoloraiyo tonyu Jisasol ato uubogai'noneyokwe amokabopogano. Toro mokabodopure tonyu Jisasolluro uumjunyokwe tooro wono'mno yogalo amojurugoloporogano.

¹⁴ Toro wuudodopure toga Jisasol gamoro uumjunyokwe toorai wono'no surodo'mo sokaikono. Toro toorai kuudokaikono. “Kwolaiyo taiyo numiyomno bodopure tonyu kevu uumjukuto mipinono. Nokwo wonyapino julo. Su tov aro tovino'mokwono. Aguto kig Gooti toolluro mido mollomwalodowodo tovi dolago tomuu kuulomwallo'mo tov a'mwo abolo ton yiuno kwoloraiyo akanbusuko sumo'nupi tono nokwo kuulomwalpinogano.

¹⁵ Nuvu nebal'no ikudumo'mokwono. Kwoloraiyo ton aguto kig Gooti toolluro mido mollomwalodowodo tovi ilaiyo molloma'dupudo kubalno kev kugaikul kuruv aval'no neya domollomarogaulo. Toro kuvi kuruv a'mwo pwol aguto kig Gooti toolluro mido mollomwalodowodo tovi kwoloraiyo tonbusuko ilaiyo mamollomaro'ji toolno'gwowi ku'nono maulomwalonekono.” Kuudokaikono.

¹⁶ Toro wuujuno sumaiyokwe Jisasol kwoloraiyo amokabopo tonyu pwolda'ai pwolda'ai mogalausunyuno sumaiyokwe ato tokwe uubogai'no'no yogalo sugudo tov aro adubweyokaikono. “Gooti tool ilaiyo nyaikullugolmwalonekonoo.” Adubweyokaikono.

A'mwo kuto ivito bwotonyagokwe pwol Jisaseke kuuguudo adolo tovinokwono

¹⁷ Toruda'ai Jisasol puuto tovi kado'mo yoduke toga a'mwo pwol kano kano bino sumaiyokwe suduko binuguto'no'no aro kuudoganokaikono. “Ibwaso sugudo tookunoo. Nuu aiyo yiunokuudo mujomwekovlaiyo'moneyokwe tov adado yo'mi ma'monyudeyo?” Kuudoganokaikono.

¹⁸ Toro kuudoganoka toollu Jisasol kuudokaikono. “Guu buro'nyo'mo mino, “Sugudoloo,” donyudadokuuno? Sugudo tool yiuno Gooti tookono.

¹⁹ Guvu loowo tovino kuudo nyau'mwakuno. Romiyosi mibinono. A'mwo pworavuro abolo tonyu kwonyalo mibinono. Kuuko mibinono. A'mwo pworaino kuunano mamollouruudubinono. Jokuuromato mibinono. Guu junumiyago juneyago tovallu kwako tomuu'aro duuwiyogawono.” Kuudokaikono.

²⁰ Toro wuujuno sumaiyokwe a'mwo tool kuudokaikono. “Ibwasokweyoloo, nuu kula'nyo togada'ai yiuwi'nokai su tonyu uumjungelabodumdonyugono.” Kuudokaikono.

²¹ Jisasol toro toollu wonyuno sumaiyokwe kalo buuropino wino'no aro kuudokaikono. “Guu puvino supto kuuno sadokuuno. Mi neya donumjunono. Guu numjunyo'moneyokwe tooku aro ibinekugono. Guu a'mwo pworaiyomno plavo'bi gumoro yiuwi'nokai kuto ivito tonyu agubipuro. Toro agubipi tonyuda'ai nuugwiyo tov maro'bi a'mwo apoo'nyaiyo tekwojai wiyo'bi mi neya donumjunono. Toro subi tooku Gooti toolluro ago muunyu kai'muu mubiyo sugudo tollovo noma'binekugono.” Kuudokaikono.

²² Toro tool kuto ivito bwotonyagokwe toolluno tov yogalo su tovi wuu'nyuno sumaiyokwe kumjujo kulako moropiyo'no jul'nyo ibwosuno'no Jisasollu kuugollu'mokavlavokaikono.

²³ Toro te Jisasol sumdo wonomollo'no gami uumjunyokwe toorai kuudokaikono. “Aguto kig Gooti toolluro mido mollomwalodowodo tovi dolago toru a'mwo kuto ivito bwotonyagokwe tekwojo kuulomwallo'mo tov kaveno mwimo'nupinekwojogano.” Kuudokaikono.

²⁴ Toro kuudoka tovino gamoro uumjunyokwe tooro kuudo bwotonyo sourukwapiyoporogano. Toro yourukwapiyodopure kworai kuruv Jisasol aki aiko te kuudokaikono. “Mi kwoloraiyoravoo. Aguto kig Gooti toolluro mido mollomwalo tovi dolago toru kuulomwallo'mo tov kaveno mimo'nodowodokwono.

²⁵ Sa'ai kemel pwol lodo tovi wuulo kuulopiyodapudo nodobuullo tovi'aro kuullo'mo tov kavenodo'maiyo. Su toro to'busuko kubalno a'mwo kuto ivito bwotonyagokwe tekwo aguto kig Gooti toolluro mido mollomwallo tovi kuullo'moneyokwe to'gwowi kaveno mwimo'nonekwogano.” Kuudokaikono.

²⁶ Gamoro uumjunyokwe tooro toro kuudoka tovino mollolokurosi bwotonyo yo'mno kuudoporogano. “Toro anekudumado tov aiyo yiunokuudo mujomwekovlaiyo'moneyokwe tovi ala'mworuvo nokwo mapino'mdeyo?” Kuudoporogano.

²⁷ Jisasol toro toorai moroono'no aro kuudokaikono. “Su tovi yo'mo tov a'mwo tooro ku'nono mipinokwono. Toro kuvi kuruv Gooti toolno'gwowi su tovi yo'mo tov nokwo'mekono. Su tov aro tovinokwono. Gooti tool yiuwi'nokai noonyumwonyu pun yo'mo kuudo sauro'ji kuruv kaveno yonekono.” Kuudokaikono.

²⁸ Toro wuudoduke toga Pital muudu'no aro kuudokaikono. “Dukonekwonadokuuno? Nevu nemi yiuwi'nokai tonyu yogallu'mowono gumi agumjunmwakuuwono.” Kuudokaikono.

²⁹ Pital toro wuujuno sumaiyokwe Jisasol kuudokaikono. “Nebal'no ikudumo'mokwono. Yiuwi'nokai a'mwo tooro mino tokwe'aro kuuguudo sugudo tokwe'aro tovalluno kuudo kuubwepi tooro kemi agodeyo kuugwai'yagorodeyo jo'mwodeyo kuuneyagodeyo kuunumiyagorodeyo kwoloraiyodeyo womdodeyo tonyu kuugollu'mopi tov

³⁰ a'mwo su tooro kwako akavi kuuno mwalopi toga yiuwi'nokai kuugollu'mopi ton aiko toru'no nomapinorogano. Noonyumwonyu kuto ivitodeyo agodeyo kuugwai'yagorodeyo jo'mwodeyo kuuneyagodeyo kwoloraiyodeyo womdodeyo ton muuduko pun mapinorogano. Me'no kuugollu'mopi su tooro muuduko punyu amapi toga Gooti tool 100-pela pugai'aro nuuwiyonekono. Toro amapi tooro tabunyuwuulo kun kuruv nomapinorogano. Tabunyuwuulo toro amapi kworo kuruv puga lukomgu abai'mowo'ji toga aiyo yiunokuudo mujomwekovlaiyo'moneyokwe tovi maropi yiunokuudo mujomwekovlapinorogano.

³¹ Su toro toga, agasuro sumdomgu abillumo'numwolapo tooravuro bwotonyago tooro aiyowo'mo bwollumo'napinorogano. Aki agasuro aiyowo'mo abwollumo'numwolapo toorono'gwowi su toga sumdomgu nobillumo'napinorogano.” Jisasol toro kuudokaikono.

Jisasol gamoro nobollo'mo tokwe'aro nodukaiyo'mo tokwe'aro tovalluno aki aiko te kuudoka tovinokwono

³² Toruda'ai Jisaseke'aro gamoro uumjunyokwe toorogai'aro tooro puuto tovi'aro Jeruusalem'no avlavoporogano. Jisasol sumdomgu wano'no Jeruusalem ki'meyo'mo tovino luko miyoduke toollu gamoro uumjunyokwe tooro wono'mno kuudo bwotonyo sourukwapiyoporogano. Aki pworo lukomgu kuumjunopo kworo kuruv, Burowo'nyovo tov bai'mowono'mdukono, kuudo yauro'mno luko sumjunoporogano. Toro te Jisasol gami 12-pela toorai aki aiko te judo tomuu magulkuuro'no gami wimo'nyo'mo tonyuno kuudokaikono.

³³ Toro tool aro kuudokaikono. “Duu'nyuloo. Nevu Jeruusalem'no avla'mwakuuwono. Jeruusalem me'no ai'mowa'ji toga a'mwo pwol A'mwo Kwolaiyo Kuunodo toonyu galonumworarowo'ji pris mido mollomwalokwe toorogai'aro loowo tovino pi'mwo kuudokwe toorogai'aro toorai manubweyononyugono. Toro toonyu kooti yogalo danyopi nyudupinonyugono. “Neya abolono.” Toro dopi a'mwo Juu tooravuro miyawosunodupudo pworai manubwepinonyugono.

³⁴ Toro manbweyopi toga a'mwo bomwallo su tooro burolyogalo nyudopi ibupto nuupuropi wuulo tokwe gunyukuuronumollopi noromiyollusanubwepinonyugono. Toro aromiyollusanubwepi toga iruko pullapullu nuwolo'nowo'ji toga aki aiko te duka'monyugono.” Kuudokaikono.

Jemseke Jooneke todoral a'mwo aguto imo'nyo'mo kwinolo tovinokwono

³⁵ Toruda'ai Sebediyolluro muugunyo Jemseke Jooneke todoral bino sumaleyokwe Jisasollu aro kuudolorakono. “Ibwasokweyoloo, navu aro anakullunadopiyo. Namoro buro'nyo buro'nyodeyo tonyuno agudoganosi su tov guu neya ibinekugono.” Kuudolorakono.

³⁶ Toro kuudolo todorallu kuudoganokaikono. “Nuu kemi burowo'nyo ikullumo'mo dekullunadopiyo?”

³⁷ Toro kuudoganoka todoral kuudolorakono. “Guu gumoro jurogudo kuunodo tokwe a'mwo aguto kig mido mollomwalokwe sumo'nubi toga navu gumi wobo toru mwalowosi yogwapi yesunonakono. Toro imo'nowosi guuge yiuwi'nokai a'mwo abolo tonyu mido mollomwalanonogano. Toro toonalluro pwol gumoro anatomgu mwalonekono. Pwol gumoro kwonamomgu mwalonekono. Toro te aga guu toro imo'nyo'mo toonallu yowa'no jenakubwebinekudeyo?” Kuudolorakono.

³⁸ Toro kuudolo kworallu kuruv Jisasol kuudokaikono. “Kemoro anyudumalo tovino kuudo maiyo toorakikono. Toro toorakul nuvubusuko dado tov subwosunmi kubalno kev kworakul kuruv puga nokwo ibwosunbullunorakuldeyo? Aki nuvubusuko abolmi kubalno kev kworakul kuruv puga nokwo bolbullunorakuldeyo?” Kuudokaikono.

³⁹ Toro tooral kuudolorakono. “Tade, nokwo'monakono.” Toro kuudolo toorallu Jisasol kuudokaikono. “Kuvinono ikullumo'nonorakikono. Toro te moro dado tov subwosunmi to'busuko kubalno puga kev kworakul kuruv ibwosunbullunorakikono. Aki moro nobollo'mo to'busuko kubalno puga kev kworakul kuruv bolbullunorakikono.” Kuudokaikono.

⁴⁰ “Toro kworakul kuruv moro kwonamo anato toru mwallo'mo tov moro jeso'moneyokweyo'maiyo. Toro kuvi kuruv kwonamo anato su toru mwallo'mo tov Gooti toolluro me'no sovo'dogalubweyongiko toorono mwallo'moneyokweyorukono.”

⁴¹ Toro yajunodopure tovi gamoro uumjunyokwe atousal gabovo tooro wuu'no'mno Jemseke Jooneke todoralluno surodo'mo soporogano.

⁴² Jisasol yiuwi'nokai toorai doma'no sumaiyokwe kuudokaikono. “Kevu kuudo nyau'mwakovo. A'mwo Juu miyawosunodupudo pworaino, “Oo nemi mido mollonekumwallokwerodeyo,” dodupudorogano. A'mwo su tooro kevnokwero ilomoropunyo'moneyokwe a'mwo pworai womdo jurogudo ipureyokweyo'mo dumuurolo'mdupudorogano. Su toro duuwiyodupudo toorai bwolomorumwogapi yodapudorogano.

⁴³ Toro yodupudo kuvi kuruv kevno'gwowi su toorobusuko mimo'nupinono. Kemoro tovida'ai pwol a'mwo aguto imo'nyo'mo kwino'ji tool kemi womdokwe pwolbusuko neya aikullumo'nono.

⁴⁴ Aki kemoro tovida'ai pwol sumdomgu ikullumo'nyo'mo kwino'ji tool yiuwi'nokai toorekulluro a'mwo ki'nato womdokwe pwekwobusuko neya aikullumo'nono.”

⁴⁵ Toro wuujuno sumaiyokwe kuudokaikono. “Nuu A'mwo Kwolaiyo Kuunodo kwonyu kuruv mino womdo anyupureyokweyo'mo abonyumaiyo. Toro kuvi kuruv nuu a'mwo abolo tonyu wiyo'mwojo'moneyokwe womdo yo'mo abonyugono. Toro toonyu a'mwo abolo bwotonyago tonyu mubiyo biyomallo'moneyokwe tovino bollo'mo abonyugono.” Kuudokaikono.

Jisasol a'mwo sumnowojokwe pwollu sukuloka tovinokwono

⁴⁶ Toruda'ai Jisaseke'aro gamoro uumjunyokwe toorogai'aro tooro wagwolago Jerikoo toru abai'movoporogano. Toro bai'mo'mno sumaveyokwe lukomgu Jisasol wagwolago tovida'ai bolokwoduke toga gamoro uumjunyokwe toorogai'aro a'mwo bwotonyago pworogai'aro tooro kuumjunoporogano. Toro bolokwodopure toga a'mwo sumnowojokwe pwol puuto tovi wobo toru domdo ajugonyajukekono. Toro tool Timeyosolluro kwolaiyo Batimeyasolekono.

⁴⁷ Toro tool Nasaretda'ai Jisasol puuto te boduke toolluno wuu'no'no deko aro kuudokaikono. “Devitolluro kwolaiyo Jisasoloo, mino kalo neya agujunono.” Kuudokaikono.

⁴⁸ Deko toro wuudoduke toga bwotonyago tooro muudo'jokweyo'mo aduumjukuroporogano. Toro duumjuku'dopure kwol kuruv guureji wuujuno wuujuno sokaikono. “Devitolluro kwolaiyoloo, mino kalo agujunono.”

⁴⁹ Deko toro doduke toollu Jisasol wuu'no'no kuru kuuloda'mno sumaiyokwe a'mwo toorai kuudokaikono. “Domodopiyabilo.” Toro tooro a'mwo toollu kuudoporogano. “Jisasol gumino adoguma'mwallo. Toro tovino tov gumi poowokalago tov jurogudo nokwo imo'no'bi julodavono.”

⁵⁰ Toro kuudopo tool ilaiyo ino sumaiyokwe nobwaiyo tov amodosodukwopiyokaikono. Toro modosodukwopino sumaiyokwe yere ilovlovodavo'no Jisasollomno abokaikono.

⁵¹ Toro aboka toollu Jisasol kuudokaikono. “Nuu gumi buro'nyo gujumo'mo dogujunadopiyo?” Toro kuudoka tool kuudokaikono. “Ibwasokweyoloo, Nuu sumdo kinumo'mo anyunadopiyo.” Kuudokaikono.

⁵² Toro kuudoka toollu Jisasol kuudokaikono. “Guu kuudo anubwemwakudo tovino tov agujukulmono. Toro tooku nokwo wanbinekugono.” Toro kuudoka kuga'gwo kuuno a'mwo sumnowojokwe tool sumdo kino'no puuto tovi Jisasollu kuumjunokaikono.