Mollurolovomato 9 - Gooti Toolluro Yogalokwono

Ibesa'aiyo wuulo ki'duvolodupudo tooro abolopo tovinokwono

¹ Toruda'ai Gooti Yawel Moosesollu kuudokaikono. “Guu Feroo toollomno uuwo'bi aro duudono. “Nevu Hibruu tonolluro Gooti Yawel gumi aro agudadopiyo. “Moro a'mwo abolo ton mi ilomonuwopiyo'moneyokwe pla'mdopure tonyu guu wonyapino neya jono.

² Toro kuvi kuruv guu mirolowapiyo'bi kuuno airumwallubi to'gwowi

³ nuu Gooti Yawel toonyu nomovagugu'mwojumekugono. Toro te aro gubwemonyugono. Gumoro yiuwi'nokai ibesa'aiyo ki'duvolodupudo toorai nobolluwuulo bwotonyo puruv uubwemonyugono. Kemoro yiuwi'nokai hoos toorogai'aro doonki toorogai'aro kemel toorogai'aro buulmokau toorogai'aro sipsip meme toorogai'aro tooro nobolluwuulo tov nomapinorogano.

⁴ Ijupda'ai ibesa'aiyo wuulo ki'duvolodupudo tooro nobolluwuulo su tov toro amapi kuvi kuruv nuu Gooti Yawel toonyu Isuraiyolda'ai tonyuro ibesa'aiyo wuulo ki'duvolodupudo tooraino'gwowi nomomuudeyomwallumonyugono. Toro amomuudeyomwallumi toga nobolluwuulo su tov mamapinorogano. Toro te Isuraiyolda'ai tonyuro ibesa'aiyo wuulo ki'duvolodupudo tooraida'ai pwolnodo kwol kuruv mabolpinorogano.

⁵ Nuu Gooti Yawel toonyu toro gubweyo'mo tov bi'ai toga imo'noneyokwe tovino ajesumono.” Gooti Yawel toro agudadopiyo.” Duudono.” Kuudokaikono.

⁶ Toro kuudoka tovi Moosesol momworaro'no kuvinono sodubwasokaikono. Toro kuvi kuruv Feroo tool muu'nyubusuko to'no sokaikono. Toro te iruko aikomguda'ai tollugwoji Gooti Yawel gavnokweyolluro me'no adoka tovi uumjuno'no nobolluwuulo tov kuubweyokaikono. Toro kuubweyoka toga yiuwi'nokai Ijupda'ai tooravuro ibesa'aiyo wuulo ki'duvolodupudo tooro abolopiyoporogano. Toro kuvi kuruv Isuraiyolda'ai tooravuro ibesa'aiyo wuulo ki'duvolodupudo toorono'gwowi pwolnodo kwol kuruv maboloporogano.

⁷ Toro te Feroo tool Isuraiyolda'ai tonyuro ibesa'aiyo wuulo ki'duvolodupudo tooro dukobolmwakoveyokwe tovino wonomollo'mo gami womdokwe pworai amodapiyokaikono. Toro amodapiyoka tooro Isuraiyolda'ai tonyuro ibesa'aiyo wuulo ki'duvolodupudo tooro pwolnodo kwol kuruv mabolodopure su toorai wono'mno Feroo toollu abuudoporogano. Toro abuudopo kuvi kuruv Feroo tool gamoro poowokalago tov lumdo aulopingikekono. Toro toolluno tov Isuraiyolda'ai a'mwo abolo tonyu mirolowapiyokaikono.

Ijupda'ai toorai gajuko kwimo'nopo tovinokwono

⁸ Toruda'ai Gooti Yawel Mooseseke Erooneke todorallu kuudokaikono. “Kev todorakul ago mojo'mo simen to'busuko tonyu doto yodupudo toru'no plavo'bullu kwagupto pun luvomuurukuromworaro'bullu Feroo toollomno domokavlaiyulo. Toro mokavla'bullu toga Feroo tool muugonaikwo'dowo'jure toru Moosesol kwagupto tov muunyu tomuu ilourotowopiyawonekono.

⁹ Toro sulourotowopiyawo'ji toga kwagupto tov sullukwako to'busuko imo'nowo'ji kwako Ijup toru aiyowomno yo'mowopiyonokwono. Toro yo'mowopiyowo'ji toga sullukwako su tov a'mwo abolo togai'aro ibesa'aiyo kworogai'aro tonyuro kulako tovi bwolomgu'mo'narowo'ji gajuko tooro bwotonyago wimo'nupinorogano.” Gooti Yawel toro kuudokaikono.

¹⁰ Toro te Mooseseke todoral kwagupto pun luvomuurukuromwora'no sumaleyokwe Feroo toollomno amokavlavolorakono. Toro te Feroo tool nomuugona'duke toga Moosesol kwagupto tov muunyu tomuu sulourotowopiyokaikono. Toro sulourotowopiyoka toga kwagupto tov a'mwo abolo togai'aro ibesa'aiyo toorogai'aro tonyu bwolumgu'mo'no'no gajuko tooro bwotonyago kwimo'noporogano.

¹¹ Toro kwimo'nopo toga yiuwi'nokai Ijupda'ai a'mwo abolo ton gajuko su tooro amaropo kubalno a'mwo bulaptokwe kworai kuruv aval'no kwimo'noporogano. Toro wimo'nyuno sumaveyokwe a'mwo bulaptokwe su tooro gajuko bwotonyagokwe tooraino tov Moosesol da'mduke wobo toru ku'nono mabodavoporogano.

¹² Toro kuvi kuruv Gooti Yawelluro yoduke tovida'ai Feroo tool gamoro poowokalago tov lumdo kuulopiyo'no Mooseseke todoralluro kuudolo tovi muu'nyubusuko to'no sokaikono. Gooti Yawelluro Moosesollu me'no kuudoka su tovi Feroo tool kuvinono sokaikono.

Sullumiyo buuruko bwotonyo tov abwolaroka tovinokwono

¹³ Toruda'ai Gooti Yawel Moosesollu kuudokaikono. “Lomwo iru'mago toga Feroo toollu wuuru'maro'bi aro duudono. “Nevu Hibruu tonolluro Gooti Yawel aro agudadopiyo. “Moro a'mwo abolo ton mi ilomonuwopiyo'mo pla'mdopure tonyu guu wonyapino neya jono.

¹⁴ Guu manuu'nyubusuko subi tov nuu tabunyuwuulo pugai'aro nekubwemonyugono. Sumdomguda'ai tabunyuwuulo ton gumoro a'mwo womdo tovi mollomwalokwe toorogai'aro gumoro a'mwo abolo togai'aro tonyuno to'no uubweyodumdo kuvi kuruv aga'no'gwowi guu kwekuge'aro yiuwi'nokai togaikullu ikubwemonyugono. Toro aikubwemi tovi'aro kevu aro kuudo yanuupinogaikikono. Oo Gooti Yawel su toolbusuko gabovo pwol kwako akavi nonagutomuugono. Kuudo yanuupinogaikikono.

¹⁵ Nuu sumdomgu kemi romiyebuuraikwopiyo'mo nobolluwuulo puruv yere aikubweyo'mujuko'mno'juki kevu yiuwi'nokai togaikul yiunokuudo me'no abolopiyopujukogaikikono.

¹⁶ Toro kwonyu kuruv moro jurogudo tovi ikuduuwallo'moneyokwe maromiyebuuraikwopiyonyugono. Aki mino yovo tovi yiuwi'nokai kwako tomuu ilomonuwopimwolapino'moneyokwe nuu kemi maromiyebuuraikwopiyonyugono.

¹⁷ Toro kuvi kuruv guu ilomoropunyu kuuno yodumdo su tooku moro a'mwo abolo tonyu mirolowapiyadokuudekugono.

¹⁸ Toro te guu neya duu'nono. Bi'ai akaro toga nuu sullumiyo buuruko bwotonyo puruv nomoropiyamonyugono. Toro amoropiyami su tov yiuwi'nokai sullumiyo buuruko podowodo punyu nuuwolowonokwono. Aiyoga kantri Ijup muudu'no sumo'noka togada'ai yiuno aga'no su toro to'busuko puruv mavodowodokwono.

¹⁹ Toro te sullumiyo buuruko bwotonyo su tov podowo'jure toga a'mworodeyo oo ibesa'aiyorodeyo tooro kwa'mgu tomuu amwalpi tov nobolpinorogano. Toro te nobolpiyokweyo'mo tov ibesa'aiyo wuulo ki'duvolodupudo toorogai'aro yiuwi'nokai kwa'mgu tomuu amwakopo toorogai'aro tooro ago tonyu kuulomoroso'mo a'mwo pworai domodapiyono.” Gooti Yawel toro agudadopiyo.” Feroo toollu toro duudono.” Kuudokaikono.

²⁰ Toro te Moosesol Gooti Yawelluro kuuguudo su tovi wuudoduke toga Feroo toolluro a'mwo womdo tovi mollomwalokwe pworo kuuguudo su tovino luko yodupu kuvinono kuumjunoporogano. Toro tooro kemoro a'mwo ki'nato womdokwe toorogai'aro ibesa'aiyo wuulo ki'duvolodupudo toorogai'aro toorai ago tonyu aulomorosoporogano.

²¹ Toro kuvi kuruv a'mwo womdo tovi mollomwalokwe pworono'gwowi Gooti Yawelluro kuuguudo tovi muu'nyubusuko yo'mno kemoro a'mwo ki'nato womdokwe toorogai'aro ibesa'aiyo wuulo ki'duvolodupudo toorogai'aro tooro kwa'mgu tomuu amwalodupureyokwe nokwo wonyapino soporogano.

²² Toro yodopure toga Gooti Yawel Moosesollu kuudokaikono. “Gumoro ato tov muunyu kai'muu'aro bomokailawono. Toro abomokailabi toga sullumiyo buuruko bwotonyo tov yiuwi'nokai kwako Ijupda'ai a'mwo abolo mwalodupudo togai'aro ibesa'aiyo toorogai'aro yiuwi'nokai noonyumwonyu aujunakopo kugai'aro tonyu bwolaronokwono.” Kuudokaikono.

²³ Toro te Moosesol gami yodeko tokwe muunyu kai'muu'aro bomokailno sumaiyokwe Gooti Yawel sullumiyo buuruko bwotonyo tov amoropiyabokaikono. Toro moropiyabino sumaiyokwe Gooti Yawel molamopto tokwe'aro kuuloulo tokwe'aro yiuwi'nokai kwako Ijup toru amoropiyabokaikono.

²⁴ Molamopto su tov kuuno mdolopimovla'mdowo sullumiyo buuruko bwotonyo tov guureji abwolallajukokwono. Toro abwolallajuko su tov yiuwi'nokai sullumiyo buuruko podowodo punyu kuuwoleyajukokwono. Aiyoga kantri Ijup muudu'no sumo'noka togada'ai yiuno aga'no sullumiyo buuruko su to'busuko puruv maviyajukokwono.

²⁵ Sullumiyo buuruko bwotonyo su tov sulo toorobusuko bwola'dowo yiuwi'nokai kwako Ijupda'ai a'mwo abolo togai'aro ibesa'aiyo toorogai'aro ton ago tonyu kwa'mgu tomuu amwalopo tobuurai abwoloromiyosokakwono. Aki yiuwi'nokai noonyumwonyu aujunallajupo tonyu kaiyako abwollugolamovokakwono. Aki sullumiyo buuruko bwotonyo su tov yiuwi'nokai iko adaiyajupo kworai kuruv abwolalugujokakwono. Sullumiyo buuruko bwotonyo tov kwako Ijup toru su toro abwolarokakwono.

²⁶ Toro kuvi kuruv yiuno Isuraiyolda'ai tonyuro mwalodupudo kwako Goosen towai'no'gwowi sullumiyo buuruko bwotonyo su tov mabwolallajukokwono.

²⁷ Toruda'ai Feroo tool Mooseseke Erooneke todorallu doma'no sumaiyokwe aro kuudokaikono. “Aga toga nuu ma'no ma'nodo tov me'no sugono. Gooti Yawel yiuno sugudo to'no yoduke kuvi kuruv nuuge'aro moro a'mwo abolo togai'aro tonolno'gwowi ma'no ma'no sumwakuuwonogano.

²⁸ Toro te sullumiyo buuruko bwotonyo tokwe kuuloulo tokwe tovalluda'ai kaiyako guureji mamo'movlaiyo'mo anekullunadopiyo. Toro tovino tov sullumiyo buuruko bwotonyo tovi uumjukullo'mo kevu Gooti Yawellu subusu'nyogalo neya duujulo. Toro kuudubullu toga kevu akawai kuuno mamjomwekovlavopi nuugollu'mo'mdopure togaikullu nuu ikwonyapino to'no imonyugono.” Kuudokaikono.

²⁹ Toro kuudoka tovi Moosesol kuudokaikono. “Yowa'nogano. Guu Gooti Yawelluno kuudo yau'bino'moneyokwe nuu wagwolago bwotonyo akavida'ai me'no abolokuumi toga moro ato tov bomokaila'mi Gooti Yawellu subusu'nyogalo nuudumonyugono. Toro kuudumi toga kuuloulo tokwe sullumiyo buuruko bwotonyo tokwe toval novla'bullunovakono. Toro avla'bullu toga wonomaro'bi kuudo yau'binekugono, Oo yiuwi'nokai kwako akav yiuno Gooti Yawelluro'mdeyo, kuudo yau'binekugono.

³⁰ Toro sau'bi kweku kuruv nuu kuudo kuuno saikuu'mwakono. Guuge'aro gumoro a'mwo womdo tovi mollomwalokwe toorogai'aro toorekul Gooti Yawelluno luko miyodupu kwollu dolago tomuu yere mwallo'mo mwinjadokwovo. Kuudo saikuu'mwakono.” Moosesol toro kuudokaikono.

³¹ Sullumiyo buuruko bwotonyo su tov wosamujuko bali ton no ki'nodopure tonyu abwoloromiyosokakwono. Aki mekwako flaks ton pwopto ki'nodopure tonyu abwoloromiyosokakwono. Toro te yiuwi'nokai bali togai flaks togai tonyu kaiyako me'no sugolosokakwono.

³² Toro kuvi kuruv wit tono'gwowi pwopto yere mai'nodopure tonyuno tov kaiyako migolosokakwono.

³³ Toruda'ai Moosesol Feroo toollu wuugollu'mo'mno sumaiyokwe wagwolago bwotonyo su tovi kwa'mgu tomuuno abolokwokaikono. Toro bolokwino sumaiyokwe gamoro ato toval bomokaila'no Gooti Yawellu subusu'nyogalo kuudokaikono. Toro kuudoka toga kuuloulo tokwe sullumiyo buuruko bwotonyo tokwe aki buuruko yasuwa'no aviyajuko tokwe ton avomuudodavopogano.

³⁴ Toro avomuudodavopo tovi Feroo tooke'aro gamoro a'mwo womdo tovi mollomwalokwe toorogai'aro tooro me'no kwonopo kworo kuruv ma'no ma'no aki aiko te yo'mno kemoro poowokalago ton lumdo aulopiyoporogano.

³⁵ Toro te Feroo tool poowokalago lumdo aulopingikokwe toolluno tov Isuraiyolda'ai tonyu mirolowapiyokaikono. Aki Gooti Yawel Feroo toolluro yono tovino Moosesollu sumdomgu me'no kuudokaikono. Toro kuudoka tomgu'aro Feroo tool kuvinono sokaikono.