Mollurolovomato 7 - Gooti Toolluro Yogalokwono

¹ To'no'gwowi Gooti Yawel Moosesollu aro kuudokaikono. “Moro yodo'mure tovida'ai guu Feroo toolluro sumdo tovi Gooti toonyubusuko wimo'nubinekugono. Aki nuu moro yogalo tovi mollajokwe a'mwo pworai uubweyodo'mure tooro moruudodupudo kubalno gumi judai'yago Eroonol gumoro yogalo tovi mollajokwe gujumo'nonekono. Toro tool gumoro yogalo tokwe Feroo toollu moruudonekono.

² Toro te moro yiuwi'nokai kuuguudo dagujodo'mure ton gumi judai'yago Eroonollu wuudubinekugono. Toro wuudodo'bure tovi marowo'ji Feroo toollu moruudonekono. Kuuguudo moruudono tov arokwono. “Guu Isuraiyolda'ai a'mwo abolo ton gumoro kwako akaru nuugollu'mo'mdopure toga wonyapino neya jono.” Moruudonekono.

³ Toro amoruudo'ji kuvi kuruv Feroo toollu gamoro poowokalago tov lumdo aulopiyoneyokwe uubwemekono. Toro kuubwemi tov aro tovinokwono. Moro duuwallo jurogudo bwotonyago ton kwako Ijup toru wuuduuwallumogano. Toro wuuduuwallodo'mure tonyu wonopi kuudo kwolallo yourukwapipinogano.

^4-5 Duuwallo su tonyu wonopi kuvi kuruv Feroo tool gumi maguu'nyubusuko yonekono. Toro so'ji tovino tov nuu Ijupda'ai tonyu kirumwallo'moneyokwe duuwallo jurogudo togai kaiyako igolmonyugono. Toro igolo'mi moro a'mwo abolo Isuraiyololluro go'no go'no iko tovasuda'ai tonyu kwako Ijup toruda'ai bomokalokuumonyugono. Toro bomokalokwodo'mure toga Ijupda'ai tooro wonopi mino tov, Oo Gooti Yawel kwoldeyo, kuudo yanuupinorogano.” Gooti Yawel Moosesollu toro kuudokaikono.

⁶ Toro te Mooseseke Erooneke todoral Gooti Yawelluro aduuwiyoka tonyu kuvinono kuumjunolorakono.

⁷ Su toro toga Moosesol 80 kworomokwekono. Aki Eroonol 83 kworomokwekono. Toro todoral Feroo toollu auluudolorakono.

Eroonolluro yodeko tovino kuuguudokwono

⁸ Toruda'ai Gooti Yawel Mooseseke Erooneke todorallu kuudokaikono.

⁹ “Feroo toollu kuudubullu toga aro ikudonekono. “Nuu kemino tov, Nebaloraldeyo kuudo yaikuu'mo'mo tov duuwallo jurogudo puruv donyuduuwallulo.” Toro aikudo'ji toga guu Eroonollu aro wuudubinekugono. “Gumoro yodeko tov Feroo toolluro sumdollu toru kwako tovi duumwogapiyono. Toro uumwogapiyodo'bure tov gabakuto imo'nonokwono.” Wuudubinekugono.” Gooti Yawel toro kuudokaikono.

¹⁰ Toro wuujuno sumaiyokwe Mooseseke Erooneke todoral Gooti Yawelluro kuudoka tovi uumjunyuno sumaleyokwe Feroo toollomno avlavolorakono. Toro plaino sumaleyokwe Feroo tooke'aro gamoro womdo tovi mollomwalokwe toorogai'aro tooravuro sumdollu toru Eroonol gamoro yodeko tov kwako tovi kuumwogapiyokaikono. Toro kuumwogapiyoka tovi gabakuto sumo'nokakwono.

¹¹ Toro sumo'noka tovi wonyuno sumaiyokwe Feroo tool a'mwo pi'mwo kuudokwe toorogai'aro kuuloka toorogai'aro toorai adomarokaikono. Toro adomaroka tooro Eroonolluro soka to'busuko kubalno Ijupda'ai kevnokweravuro bula'yogalo tokwe sopo tov aval'no sumo'nokakwono.

¹² Yiuwi'nokai tooravuro yodeko kuumwogapiyopo ton gabakuto sumo'nopogano. Toro sumo'nopo kuvi kuruv Eroonolluro gabakuto toolno'gwowi a'mwo su tooravuro gabakuto toorai adovanokaikono.

¹³ Toro adovanoka tovi Feroo tool kwonoka kwol kuruv gamoro poowokalago tov lumdo aulopiyokaikono. Aki toro tool Mooseseke Erooneke todorallu kaduko mwiyokaikono. Gooti Yawelluro me'no adoka su tov kuvinono sokaikono.

Tabunyuwuulo ton Ijup toru sumo'noka tovinokwono

¹⁴ Toruda'ai Gooti Yawel Moosesollu kuudokaikono. “Feroo toolluro poowokalago tov lumdo kuuno aulopiyadopiyo. Toro tool Isuraiyolda'ai tonyu irolowapiyo'mo mwinadopiyo.

¹⁵ Toro tool lomwo toga wonyo Nailovino wolawonekono. Toro wolodowo'jure toollomno wolabinekugono. Guu Feroo toollu wuuru'mallo'moneyokwe wonyo Nailovi wolo toru doolodavono. Toro wolodavo'bi toga gumoro yodeko tokwe neya momwora'binekugono. Yodeko su tov sumdomgu gabakuto imo'nyuno sumaiyokwe yodeko aki aiko te sumo'nokakwono.

¹⁶ Toro te guu Feroo toollu wuuru'maro'bi toga aro neya duudono. “Hibruu tonyuro Gooti Yawel gumi aro gujo'mo amonuwopiyabokanyugono. Moro a'mwo abolo ton mi ilomonuwopiyo'mo kwako a'mwomaiyo kuu'maiyo toru'no pla'mdopure tonyu wonyapino neya jono.” Nuu su toro me'no agudo kweku kuruv guu kaduko yere manyumwakuno.

¹⁷ Toro tovino tov aga Gooti Yawel aro agudadopiyo. “Guu moro sumi tovi wono'bi aro kuudo yanuu'binekugono, Oo Gooti Yawel kwoldeyo, yanuu'binekugono.” Agudadopiyo. Toro te guu domuugonanuwo'dono. Nuu yodeko amworako akakwe wonyo Nailovi aromimi toga wonyo tov mujako imo'nonokwono.

¹⁸ Toro sumo'no'ji toga wonyo tovi mwalodupudo domwoga tooro nobolpinorogano. Aki wonyo tov buullujudo kuunowo'ji a'mwo abolo Ijupda'ai ton wonyo Nailovida'ai ku'nono miranpinogano.” Kuudokaikono.

¹⁹ Toro wuujuno sumaiyokwe toga Gooti Yawel Moosesollu aro kuudokaikono. “Guu Eroonollu duudono. “Kwako Ijupda'ai wonyo ton mujako imo'nupino'moneyokwe gumoro yodeko tov momworaro'bi wonyo togai wonyo kuralo togai wonyo buugo togai tonyu judowosono. Toro subi toga yiuwi'nokai kwako Ijupda'ai wonyo ton mujakuumwiyo imo'nupinogano. Aki wonyo pun ikodeyo oo sulodeyo tonyuda'ai sakwollungiko tonyu irosodupudogano. Wonyo irosodupudo su to kun kuruv mujakuumwiyo imo'nupinogano.” Eroonollu duudono.” Gooti Yawel toro kuudokaikono.

²⁰ Toro kuudoka tovi Mooseseke Erooneke todoral Gooti Yawelluro kuudoka kuvinono solorakono. Toro te Feroo tooke'aro gamoro womdo tovi mollomwalokwe toorogai'aro tooro muugona'dopure toga Eroonol gami yodeko tokwe momworaro'no wonyo Nailovi aromiyokaikono. Toro aromiyoka tovi wonyo tov mujako sumo'nokakwono.

²¹ Toro sumo'noka toga wonyo Nailovi mwalodupudo domwoga tooro aboloporogano. Toro abolopo tovida'ai wonyo tov buullujudo bwotonyo kuunoduke tovi Ijupda'ai a'mwo abolo ton wonyo iranyo'mo tov ku'nono miranopogano. Toro te yiuwi'nokai kwako Ijupda'ai wonyo ton muja'buugo to'no kworopogano.

²² Toru sumo'noka kuvi kuruv Ijupda'ai a'mwo bulaptokwe tooro Eroonolluro soka to'busuko kubalno kevnokweravuro bula'yogalo tovida'ai sopo ton aval'no sumo'nokakwono. Feroo tool toro tovi wonyuno sumaiyokwe gamoro poowokalago tovi lumdo kuulopiyo'no Mooseseke Erooneke todorallu kaduko mwiyokaikono. Gooti Yawelluro me'no adoka kuvinono Feroo tool toro sokaikono.

²³ Toro ino sumaiyokwe Feroo tool buulo uugunyumopiyo'no gami ago tovino aulokaikono. Toro kuulno sumaiyokwe yiuwi'nokai sumo'noka tonyu me'no kwonoka kwol kuruv kuudo pwekwonodo kuruv muubweyokaikono.

²⁴ Aki Ijupda'ai a'mwo abolo ton wonyo Nailovida'ai ku'nono miranopo tovino tov wonyo iranyo'moneyokwe wonyo tovuro wolo toru buuso pun alsajupogano.

²⁵ Gooti Yawel wonyo Nailovi muja'buugo me'no amollumo'nosoka togada'ai 7-pela iruko tobuul kuuwolo'nokakwono.