Mollurolovomato 32 - Gooti Toolluro Yogalokwono

Kuunano gooti pwollu sakwollopo tovinokwono

¹ Toruda'ai Isuraiyolda'ai a'mwo abolo ton Moosesol muumuudo toolluda'ai aikomgu yere mwolaboduke tovi wonyuno sumaveyokwe Eroonollu bomwodovomaro'mno aro kuudopogano. “Nemi kwako Ijupda'ai amollurolovonekumokaboka Moosesol muumuudo toollomno suloka tool yere mwolabadopiyo. Toro toollu burowo'nyo'mno'juki dukwimo'nadopiyo. Nevu su to kwolluno kuudo miyau'mwakuuwono. Toro tovino tov aga nemi sumdomgu mollubworonekumokavlapto imwalono'moneyokwe guu nemi gooti pwollu jokwolludapiyono.” Kuudopogano.

² Toro kuudopo tovi Eroonol kuudokaikono. “Kemi abolo togai'aro kwolaiyo taiyo togai'aro tonyuro kaduko tovida'ai yesodupudo gool mabidoga ton irolomaropi miyomno donumokabilo.” Kuudokaikono.

³ Toro wuujuno sumaiyokwe yiuwi'nokai Isuraiyolda'ai ton kemi kaduko tovida'ai gool mabidoga yesodupudo ton irolomokabino sumaveyokwe Eroonollu abuuwiyopogano.

⁴ Toro abuuwiyopo tonyu Eroonol mollu'bwo'no sumaiyokwe duko tovi doto suraloka ton wonyo buugo adovomwonosokakwono. Toro adovomwonosoka tovi Eroonol kwako tovi buuso alsosoka tovi aluvemowosokaikono. Toro luvemowosuno sumaiyokwe lukuuto me'no adopiyoka tovi jopurovoma'no sumaiyokwe supurolo tokwe buulmokau taiyo toolbusuko pwollu sokwolludapiyokaikono. Toro sokwolludapiyoka toollu a'mwo abolo ton wonyuno sumaveyokwe adopogano. “Oo akal nevu Isuraiyolda'ai tonolluro gooti tookono. Kwako Ijupda'ai amollurolovonekumokaboka tool akal kwekonoo.” Adopogano.

⁵ Toro dodopure tonyu Eroonol wono'no buulmokau taiyo sokwolludapiyoka toollu sumdollu toru wiroudapiyo'moneyokwe dukwagupto puruv wobo toru sakwollokaikono. Toro yakwolluno sumaiyokwe a'mwo abolo tonyu kuudokaikono. “Bi'ai toga Gooti Yawelluno lubullu doto yanyo'moneyokwe togakono.” Kuudokaikono.

⁶ Toro wuujuno sumaiyokwe iruko aikomguda'ai tollugwojuro lomwo toga a'mwo abolo ton yere dukaino sumaveyokwe romiroudapiyo'moneyokwe ibesa'aiyo pworo mokabo'mno kwiroudapiyopogano. Toro kwiroudapiyopo su tooro pworo duko tovi yiunokuudo nopiyo'moneyokwerogano. Aki pworo sumwoluko puru'mono wosunyo'moneyokwerogano. Toro mokabino sumaveyokwe sonomwalopogano. Toro ton wosamujuko togai'aro imo'wonyo togai'aro nyuno nyuno sumaveyokwe a'mwo abolo ton kwonyalo womdo abomjumoulapogano.

⁷ Toro bomjumoulodopure tovi Gooti Yawel wonyuno sumaiyokwe Moosesollu aro kuudokaikono. “Guu aikomgu yere doolawono. Gumoro a'mwo abolo Ijupda'ai amollurolovomokabodo su ton kirovanyuvanyu bwotonyo airoungovla'mwakovo.

⁸ Toro ton moro numjunyo'moneyokwe aduuwiyo tovino yere suvlo ilomaveku'no yodupu kemi gool tonyuda'ai buulmokau taiyo kula'noka toolbusuko pwollu yokwolludapiyodupu sulomoropimwolavo. Aki toro toolluno suduko winuguto'nodupu kemi ibesa'aiyo pworo kwiromiroudapiyadokwovo. Yodupu aro adadokwovo. Oo nevu Isuraiyolda'ai tonolluro gooti akal Ijupda'ai amollurolovonekumokaboka tookono. Adadokwovo.” Kuudokaikono.

⁹ Gooti Yawel Moosesollu toro wuujuno sumaiyokwe aki aro kuudokaikono. “A'mwo abolo su tonyu nuu me'no wonoma'dumdogano. Kemoro poowokalago ton mi numjunyo'mo tov dogaipo'nyo kuunodo imo'nyokweyogano.

¹⁰ Toro tonyuno nuu surodo bwotonyo nuunodowo noromiyebuuropiyo'mo yodo'mure toonyu guu nuumjukuto nonyubiyo. Nuu a'mwo abolo su tonyu romiyebuuropiyo'mi kwonyu kuruv gumino'gwowi aro gubwemonyugono. Guuge'aro gumi jukweyago kwolaiyo toorogai'aro toorekullu kwolallo bwotonyago yawosunopi kantri jurogudo puruv imo'nupinorekikono.” Kuudokaikono.

¹¹ Gooti Yawel toro kuudoka kuvi kuruv Moosesol kumdo aro ajugonokaikono. “Mi Gooti Yaweloo, guvnokwekujuro jurogudo tokwe gumoro a'mwo abolo su tobuurai Ijupda'ai amollurolovomokabodobuurogano. Toro tobuuraino guu surodo maguuno'jo.

¹² Aki toro tobuurai kwako akavida'ai yiunokuudo aromiyobwi'golosubi tov Ijupda'ai tooro wuu'nopi gumino aro kuudo yaguupinorogano. Awi, kemi Gooti su tool gami a'mwo abolo su tobuurai muumuudo toollu tomuu romiyobwi'goloso'moneyokwe abomokalokwoka tooldeyo. Su toro kuudo nyaguupiyokweyo'mo tov gumoro surodo aguunadopiko tov iroto duumwogapiyono. Aki guu a'mwo abolo su tonyu kaiyako igollo'mo sadokuudo tovino kuudo pumgu'aro neya jaurono.”

¹³ Moosesol toro wuujuno sumaiyokwe aki aro kuudokaikono. “Aiyoga gumoro womdokwe Eburaiyamol Aisakol Jekoopol toorai subuu'yamju aro me'no kwiyodekugono. “Moro yodo'mure tovida'ai kemoro tellukweyago tooro kwolallo bwotonyago imo'nopi sullugabwo toorobusuko imo'nupinorogano. Aki toro sumo'nupi tooro moro subuu'yamju kwiyo kwako su tovi maropi yiunokuudo mujomwekovla'mwalpinorogano.” Guvnokwe tookujuro subuu'yamju toro me'no kwiyodo tovino kuudo nyallulo'gwonbiyo.” Kuudokaikono.

¹⁴ Moosesol toro wuujuno sumaiyokwe Gooti Yawel Isuraiyolda'ai tonyu kaiyako igollo'mo soka kwol kuruv kuudo muuduko yauro'no kaiyako migolokaikono.

¹⁵ Toruda'ai Moosesol loowokwe sulbweko tooral ato tokwe momwora'no sumaiyokwe muumuudo toolluda'ai aikomgu yadu'mwonyo'no kwolabokaikono. Sulbweko su toorallu imgu amgu tomgu Gooti toolluro loowo ton sakwollungikorakono.

¹⁶ Sulbweko su tooral Gooti gavnokwe toolluro sakwollokarakono. Aki loowo tonyuno puukwollo sokwollosungiko kun kuruv Gooti gavnokwe toollurokwono.

¹⁷ Toro tovallu Moosesol momwora'no sumaiyokwe muumuudo toolluda'ai wolabo'no Joosuuwallu abwolluru'marokaikono. Toro tooral wolabino sumaleyokwe Joosuuwal a'mwo abolo tonyuro deko delowo'na'dopure tovi wuu'nyuno sumaiyokwe Moosesollu aro kuudokaikono. “Awi, nemoro woromollo'mo sel ago akaibuuwaida'ai deko adadokwopo akaibiv ikomago toorogai molo inodupudo to'busuko kuu'nadokwono.”

¹⁸ Toro kuudoka kuvi kuruv Moosesol kuudokaikono. “Awiyo, deko akaibiv a'mwo molo tovi uuwolo'mdupudo tooravuro deko to'busuko'maiyo. Aki a'mwo molo tovi muuwolo'mdupudo tekwojavuro dodupudo to'busuko'maiyo. Toro kuvi kuruv deko adadokwopo akaibi'gwowi a'mwo abolo tonyuro dato derounoda'mdopure tovino kuu'numwakono.” Kuudokaikono.

¹⁹ Toro wuujuno sumaiyokwe Moosesol woromollo'mo sel ago toru bwolai'movo'no abwoloonoka tov gool tovida'ai buulmokau taiyo kula'noka toolbusuko sokwolludapiyopo tooke'aro a'mwo abolo ton kworomo bomjojumoulodopure togai'aro tonyu bwoloonyuno sumaiyokwe surodo bwotonyo kuunokaikono. Toro tool Gooti toolluro loowokwe sulbweko toorallu muumuudo toolluro aiyowo'mo do'gwapiyo toru abwolmwogapiyokaikono. Toro te sulo su tooral abuudowopiyolorakono.

²⁰ Moosesol toro ino sumaiyokwe a'mwo abolo tonyuro buulmokau taiyo kula'noka toolbusuko sokwolludapiyopo su toollu bwoloma'no sumaiyokwe duko tovi amolluroudapiyokaikono. Toro amolluroudapiyoka su tovi aki aiko te luvomaro'no mwimuulluno mwimuulluno sumaiyokwe sullukwako to'busuko wonyo tovi amwimuullumikapiyokaikono. Toro mwimuullumikapino sumaiyokwe Isuraiyolda'ai a'mwo abolo tonyu adumuurolovokaikono. “Wonyo su tovida'ai neya juranyulo.” Adumuurolovokaikono. Toro te a'mwo abolo ton wonyo su tovida'ai kuvinono anopogano.