Mollurolovomato 3 - Gooti Toolluro Yogalokwono

Gooti tool Moosesollu adomaroka tovinokwono

¹ To'no'gwowi Moosesol ganyalumiyago Jetroo'wolluro sipsip meme wuulo toorai ai'duvollajukekono. Jetroo'wol kwako Midiyanda'ai tooravuro pris tool kwekono. Toro toolluro sipsip meme wuulo toorai Moosesol amollomwallajukekono. Iruko pullugwoji Moosesol sipsip meme toorai momwora'no sumaiyokwe kwako a'mwomaiyo kuu'maiyo tomuu amollubworomokavlavokaikono. Toro mollubworomokavla'mno sumaiyokwe muumuudo Hoorep toollu tomuu ai'movokaikono. Muumuudo su tool, Gooti toolluro muumuudolo, dodupudekono. Aki toro toolluno yovo puruv muumuudo Sainailekono.

² Moosesol toro towai ki'mo'mno sumaiyokwe mwaloduke toga Gooti Yawelluro ensel tool aro abwiyalo'nokaikono. I'jurako pwol widuko bomjonugeloduke toollu'aro abwiyalo'nokaikono. Toro tovi Moosesol wonyuno sumaiyokwe widuko tov i'jurako toollu manosoduke tovi kwonokaikono.

³ Toro wonyuno sumaiyokwe Moosesol kuudo kwolallo yourukwapiyo'no adokaikono. “Awi, akaijuv judo pumgu'aro tovi kwonmwakono. Widuko tov i'jurako toollu mamonosadopiko tov buro'nyovidukoneyokwe nuu wobo toru kuula'mi neya wonmo.” Adokaikono.

⁴ Toro juno sumaiyokwe kuulaboduke toollu Gooti Yawel wono'no i'jurako widuko bomjonugeloduke tomuuda'ai deko suloduwopiyabokaikono. “Moosesoloo, Moosesoloo.” Toro kuudoka tovi Moosesol wuu'no'no kuudokaikono. “We, anyugeyo.”

⁵ Toro kuudoka toollu Gooti tool kuudokaikono. “Guu wobo akaru maulabinono. Kwako akaru moro pwekwapto torukono. Toro tovino tov gumi suulpweyo tov jurolosono.” Kuudokaikono.

⁶ Toro wuujuno sumaiyokwe aki aro kuudokaikono. “Gumi jukweyago toorai Gooti tool nuu kwonyugono. Eburaiyamol kuuno Aisakol kuuno Jekoopol kuuno toorai Gooti toonyugono.” Kuudokaikono. Toro kuudoka tovi Moosesol wuu'nyuno sumaiyokwe Gooti toollu noonmiyokwe luko yo'no gami sumdomago tov yiulo sobwoto'narokaikono.

⁷ Toro yobwoto'na'duke toollu Gooti Yawel aro kuudokaikono. “Ijupda'ai tooro moro a'mwo abolo tonyu kaiya'no bwotonyo igolodupudo tonyu me'no wonodumdonyugono. A'mwo abolo su tobuuro aro nyudodupudogano. “Ijupda'ai a'mwo tooro kemoro ki'nato womdo tovi wiyo'moneyokwe guureji kironekumwallodupudorogano. Toro tooravuro dolago tomuuda'ai guu neya bomollurolovonekumokalokwono.” Toro nyudodupudo tovi me'no wuu'nodumdogano. Aki toro tobuuravuro jul'nyo ma'dupudo tonyuno me'no youroma'dumdonyugono.

⁸ Toro te nuu Ijupda'ai toorai dolago tomuu mwalodopure su tobuurai bomollurolovomokalokwiyo'mo kwolamonyugono. Yo'mi kwako Ijupda'ai bomokalokwo'mi kwako bwotonyo puru woguulkwako bwotonyagokwe toru'no mokavla'mogano. Kwako su toru a'mwo Kenanda'ai toorogai'aro Hitda'ai toorogai'aro Amooroda'ai toorogai'aro Peresoda'ai toorogai'aro Hivuda'ai toorogai'aro Jebuusuda'ai toorogai'aro tooro mwalodupudo su toru'no mokavla'monyugono.

⁹ Toro te moro a'mwo abolo Isuraiyolda'ai tobuuro deko nyudodupudo tovi nuu me'no wuu'nodumdonyugono. Aki Ijupda'ai tooravuro kaiyako igolodupudo kunyu kuruv me'no wonodumdonyugono.

¹⁰ Toro tovino tov aga nuu gumi mogwapiyo'mi a'mwo aguto Feroo toollomno pla'binekugono. Toro plavo'bi moro Isuraiyolda'ai a'mwo abolo tonyu kwako Ijupda'ai mollurolovomokabinekugono.” Kuudokaikono.

¹¹ Toro kuudoka kuvi kuruv Moosesol Gooti toollu kuudokaikono. “Awiyo, nuu a'mwo aguto tekwonyumaiyo. Toro tekwonyu Feroo toollu kuuluujo'mo tov nuu ku'nono mimekwonyugono. Aki Isuraiyolda'ai a'mwo abolo tonyu Ijupda'ai bomollurolovomokalokwiyo'moneyokwe kuruv ku'nono manuwonyapiyonekono.” Kuudokaikono.

¹² Toro kuudoka kwollu kuruv Gooti tool aro kuudokaikono. “Guu toro pla'mdo'bure toga nuu guuge novlawosunonyugono. Toro toonyu me'no amogwapimi tovino aro guduuwallumekugono. Guu Isuraiyolda'ai a'mwo abolo tonyu Ijupda'ai mollurolovomokabo'bi muumuudo akallu aiko te bomai'mo'binekugono. Toro yo'bi mino ilomonuwopi yapinogaikikono. Toro supi toga kuudo yau'binekugono. Oo Gooti tool nebal'no amonuwapiyabokaldeyo. Kuudo yau'binekugono.” Kuudokaikono.

¹³ Toro kuudoka tovi Moosesol kuudokaikono. “Nuu Isuraiyolda'ai tonyu wuuru'maro'mi aro wuudumonyugono. “Kemi tellukweyago toorai Gooti tool amonuwopiyamokanyugono.” Toro kuudumi kuvi kuruv, “Gooti su toolluno yovo tov ala'mwoldeyo,” anyudupi to'gwowi nuu buro'nyovo wuudumonyudeyo?” Kuudokaikono.

¹⁴ Toro kuudoka tovi Gooti tool Moosesollu kuudokaikono. “Nuu Kwonyugoneyolo toonyugono. Toro te guu Isuraiyolda'ai tonyu aro wuudubinekugono. “Gooti toolluno Nuu Kwonyugoneyolo dodupudo su tool mi kemino amonuwopiyamokanyugono.” Toro duudono.”

¹⁵ Gooti tool Moosesollu toro wuujuno sumaiyokwe aki kuuguudo pugai'aro kuudokaikono. “Guu Isuraiyolda'ai a'mwo abolo tonyu aro duudono. “Yawel kemi tellukweyago Eburaiyameke Aisakeke Jekoopeke toorai Gooti su tool mi kemiyomno amonuwopiyamokanyugono.” Wuudubinekugono. Mino Yaweyolo nyudodupudo yovo su tov yiunokuudo mujo'movla'mwalonokwono. Toro tovi kemi tellukweyago kwoloraiyo sumo'nupi ton yovo su tovi mujonyudumovlavopi mino kuudo miyallulo'gwonmwalpinogano.

¹⁶ Toro te guu plavo'bi Isuraiyolda'ai mido mollomwalo toorai mollu'bworumwallo'bi aro duudono. “Yawel kemi tellukweyago Eburaiyameke Aisakeke Jekoopeke toorai Gooti su tool biyanyulo'nodowo aro anyudumokaikono. Nuu kemi me'no muugonaikwo'dumdonyugono. Ijupda'ai tooro kemi kaiya'no yaikullugolodopure tovino kuudo me'no yaikuu'dumdonyugono.

¹⁷ Toro te aro adaikullumono. Ijupda'ai tooro kaiya'no yaikullugolodopure tomuuda'ai bomollurolovekumokalokwo'mi kwako sugudo puru woguulkwako bwotonyagokwe toru'no mollubworekumokavla'monyugono. Kwako su toru a'mwo Kenanda'ai toorogai'aro Hitda'ai toorogai'aro Amooroda'ai toorogai'aro Peresoda'ai toorogai'aro Hivuda'ai toorogai'aro Jebuusuda'ai toorogai'aro tooro mwalodupudorukono.” Isuraiyolda'ai mido mollomwalokwe toorai toro duudono.

¹⁸ Toro kuudubi tovi kaduko gujopi gumjunpinorogano. Toro te guu Isuraiyolda'ai mido mollomwalo toorai maro'bi yiuwi'nokai toorekul Ijupda'ai a'mwo aguto kig Feroo toollomno kuulapi aro wuudupinorekikono. “Yawel Hibruuda'ai tonolluro Gooti tool nemi abiyanekulo'numokaikono. Toro te nevu nemi Gooti toollo'mo romiroudapiyo'moneyokwe kwako a'mwomaiyo kuu'maiyo toru'no iruko pullapullu tobuullu puuto tomuu pla'mdowa'jure tonollu nokwo nekwonyapino ibinekugono.” Wuudupinorekikono.

¹⁹ Toro kuudupi kuvi kuruv Ijupda'ai a'mwo aguto kig Feroo tool ku'nono maikwonyapiyonekono. Aki toro tool moro jurogudo tovida'ai danyu'nyu pun mibwosunowo'ji tool maikwonyapiyonekono.

²⁰ Toro kwol kuruv nuu Ijupda'ai tonyu kirumwallo'mo tov moro jurogudo tokwe yiuwi'nokai duuwallo judo'no judo'nodo ton me'no kuubwemi toga'no'gwowi nokwo ikwonyapino yonekono.

²¹ Aki kevu kwako Ijupda'ai bolokuupino su toga yasuwa'no muugollu'mopinogaikikono. Numoro aikullo'mwojumi tovida'ai Ijupda'ai a'mwo abolo ton kemi kwako tomuu'aro ikullupinogano. Aki su toro tonyuro kuto ivito aikullabupi togai kevu nomokavlapinogaikikono.

²² Toro te kevu kwako Ijup toru wuugollu'meyo'mo togaikul Ijupda'ai tonyuro kuto ivito tonyu jupolomallo'moneyokwe aro neya ipinogaikikono. Yiuwi'nokai Isuraiyolda'ai abolo ton kemoro ago woboruda'ai mwalodupudo Ijupda'ai abolo punyu neya wuudoganpinogano. Aki abolo bomwallo pun kemoro ago su tonyu kuulomwalodupudo kunyu kuruv neya wuudoganpinogano. Toro kuudoganpi toga kaduko nuuwipinogano. Youro tousogai'aro gool togai'aro silva togai'aro tonyuno kuudoganpi tov kuvinono nekullabupinogano. Toro aikullabupi tonyu kemi kwolaiyo taiyo tonyu wiropipinogaikikono. Kevu Ijupda'ai tonyuro kuto ivito bwotonyago ton su toro tomgu'aro jupolomokavlapinogaikikono.” Gooti tool Moosesollu toro kuudokaikono.