Mollurolovomato 20 - Gooti Toolluro Yogalokwono

Gooti toolluro atousal loowo tonyunokwono

¹ To'no'gwowi Gooti tool kuuguudo puruv kuudokaikono. Kuuguudo kuudoka tov arokwono.

² “Nuu Gooti Yawel toonyu kevu Ijup toru ki'nato womdo yodopure togaikullu amollurolovekumokabo toonyu kemi Gooti kuunodonyugono.

³ Toro toonyuno tov kevu kuunano gooti pworai milomoropiyapinono. Yiuno mino to'no julomonuwopiyogaulo.

⁴ Aki kevu kemi kuunano gooti pworai miyakwollupinono. Sulugumdo tovida'aiyorodeyo oo kwako akavida'aiyorodeyo oo wonyo tovida'aiyorodeyo toorobusuko kula'nokakwe kuunano gooti pworai miyakwollupinono.

⁵ Nuu Gooti Yawel kemi Gooti kuunodo me'no ikullumo'nodumdo tovino tov kevu kuunano gooti pworai milomoropiyapinono. Toro kuvi kuruv kevu mi kisuvolo nyopi kuunano pworai sulomoropiyapi to'gwowi nuu ikwonyapino mimonyugono. Toro kwonyu kuruv kemi nerekumwallumonyugono. Aki kemoro su toro supi tovasuda'ai kemi kwolaiyo togai'aro tellukweyago togai'aro tellukweyago tooravuro kwolaiyo togai'aro tonyu nerumwallumonyugono. Mi kisuvolo anyupi tonyu toro wimonyugono.

⁶ Toro kuvi kuruv a'mwo abolo pun mino kalo buuropino winopi moro loowo tonyu kuumjunpi tonyuno'gwowi nuu a'mwo abolo su tonyuno kalo buuropino winmonyugono. Aki kemi kwolaiyo togai'aro tellukweyago togai'aro tellukweyago tooravuro kwolaiyo togai'aro tonyuno kalo buuropino wingovla'monyugono. Aki 1,000 tomgu'aro tono tono wingovla'monyugono.

⁷ Aki kevu moro yovo tovi yasuwa'no nomjodumovla'mwalpiyo. Gooti Yawel toonyu kemi Gooti kuunodonyugono. Toro tovino tov kevu moro yovo tovi yasuwa'no adupi togaikullu nuu ikwonyapino mimonyugono. Toro kuvi kuruv moro kirumwallo tov nomapinogaikikono.

⁸ Aki mino ilomonuwopiyo'moneyokwe kevu iruko Sabat tollugwojuno kuudo po'dogalo yauropi yiuno iruko to'no domwalogaulo.

⁹ Kevu womdo yo'moneyokwe tov 6-pela iruko tobuullu nokwo imwalpinogaikikono.

¹⁰ Toro kugaikul kuruv iruko naba 7 tollugwojuno'gwowi nuu kemi Gooti Yawel toonyuro iruko Sabat tollugwogano. Toro tollugwojuno tov iruko su toga kevu womdo puru'monodo kuruv mimwalpinogaikikono. Kevuge'aro kemi kwolaiyo taiyo togai'aro kemi ki'nato womdokwe togai'aro kemi noonyumwonyu wuulo ki'duvolodupudo toorogai'aro a'mwo abolo pumuuda'ai bomwallo togai'aro yiuwi'nokai togaikul iruko su tollugwoji womdo puru'monodo kuruv mimwalpinogaikikono.

¹¹ Aro tovinokwono. Nuu Gooti Yawel toonyu 6-pela iruko tobuullu sulugumdo tokwe'aro kwako tokwe'aro soolwara tokwe'aro tonyu sokwollopiyonyugono. Aki yiuwi'nokai su tonyu kuula'dupudo kugai'aro sokwollopiyonyugono. Toro yokwollopiyono toga iruko naba 7 tollugwoji iruko to'no amwalonyugono. Toro tovino tov nuu Gooti Yawel toonyu iruko naba 7 su tollugwoji yiuno nuvnokwenyo'moneyokwe judo pumgu'aro ajesollugwogano. Iruko Sabat su tollugwo toro tovinokwono.

¹² Aki kevu kemi tellunumiyago telluneyago tonyu kwako tomuu'aro neya duuwiyogaulo. Kevu toro supi togaikul yere mabolopi kemi Gooti Yawel toonyuro kwako aikullami toru manyu toga nokwo mujomwekovla'mwalpinogaikikono.

¹³ Aki kevu a'mwo abolo punyu maromiyosupinono.

¹⁴ Aki kevu kwolabolo me'no yoma'nodupudo togaikul a'mwo abolo pugai kwonyalo mipinono.

¹⁵ Aki kevu kuuko mipinono.

¹⁶ Aki kevu kooti yogalo aduuwipi toga a'mwo abolo punyuno kuunano mamojokuu'nosupinono.

¹⁷ Aki kevu a'mwo pwolluro ago tovino kwanyu sumdo mainuwipinono. Gamoro abolo tokwe'aro gamoro a'mwo abolo ki'nato womdokwe togai'aro buulmokau doonki toorogai'aro gamoro yiuwi'nokai buro'nyo buro'nyodeyo tonyuno kwanyu sumdo mainuwipinono.” Gooti Yawel toro kuudokaikono.

A'mwo abolo ton Gooti toolluno luko sopo tovinokwono

¹⁸ Toro kuudoka tovi yiuwi'nokai a'mwo abolo ton wuu'nyuno sumaveyokwe aro tonyu amuugonodaiyajupogano. Muumuudo toollu kuuloulo tokwe biugel ki'noduke tokwe tovallu wuu'no'mno aki molamopto tokwe juto biloduke tokwe tovallu wonyuno sumaveyokwe luko yo'mno bu'buto sopogano. Toro ton muumuudo toollu manyu toru'aro amuugonodaiyajupogano.

¹⁹ Toro muugonoda'mdupu Moosesollu kuudopogano. “Nevu Gooti toolluro nekudodowo'jure tovi kuu'na'ji tovida'ai nobola'jo. Toro tovino tov yiuno judo tooku anekudubi to'gwowi nokwo guu'nanonogano.” Kuudopogano.

²⁰ Toro kuudopo tovi Moosesol kuudokaikono. “Kevu luko mipinono. Gooti tool yiuno yamju to'no ikulloganyo'moneyokwe bwolomwalodowo kevu gamoro dolago tomuu amwalpureyokwe kwinadopiyo. Aki kevu ma'no ma'no nyumovla'mwalpiyokwe kwinadopiyo.” Kuudokaikono.

²¹ Moosesol toro kuudoka kuvi kuruv a'mwo abolo ton manyu toruda'ai kuuno amuugonodaiyajupogano. Toro muugonoda'mdopure toga Moosesol sulu'wo dugumdo tovi wobo toru'no sulokaikono. Toro ilno sumaiyokwe Gooti tool kuulomwaloduke tomuu abilai'movokaikono.

Gooti toollu wiroudapiyo'moneyokwe dukwagupto tovino kuuguudokwono

²² Toruda'ai Gooti Yawel Moosesollu kuudokaikono. “Guu Isuraiyolda'ai a'mwo abolo tonyu aro duudono. “Moro yogaimaguurai tov muunyu kai'muuda'ai wolodekwopiyabodore tovi kevnokwe togaikul me'no au'na'mapogaikikono.

²³ Toro togaikul moro aiko toru mallo'moneyokwe kevu kuunano gooti pworai silva tovida'ai miyokwolludapipinono. Aki kemi gooti ikullumo'nyo'moneyokwe kevu gool tovida'ai kuunano gooti pworai miyokwolludapipinono.

²⁴ Toro kugaikul kuruv miyo'mo iroudapiyo'moneyokwe dukwagupto puruv kwako tovida'ai neya jakwollulo. Toro sakwollupi tovi kemi sipsip buulmokau tooro mokabopi juroudapiyogaulo. Toro suroudapipi tooro pworo duko tovi yiunokuudo nonopiyono'moneyokwerogano. Aki pworo sumwoluko puru'mono wosunyo'moneyokwe wiroudapiyo'morogano. Toro te kevu mi ilomonuwopiyo'moneyokwe moro kwako go'no go'no ajaikubwemi tomuu nuu wolabo'mi kemi sugudo pun nekubwemonyugono.

²⁵ Aki kevu miyo'mo iroudapiyo'moneyokwe dukwagupto tovi yakwollo'mo toorekul sulo ton a'mwo pworavuro me'no doviyovo'dogalosodupudo togai maluvagilopinorekikono. Toro kworekul kuruv yiuno sulo muuduko togai to'no luvagilopinorekikono. Su toro tov aro tovinokwono. Moro sumdo tovi dukwagupto tovi luvagileyo'moneyokwe sulo muuduko tooro nokwo'morogano. Toro kuvi kuruv sulo pworo a'mwo pworavuro muugo tokwe doviyovo'dogalosodupudo toorono'gwowi moro sumdo tovi ilaiyo manyumo'nodupudorogano.

²⁶ Aki puruv kevu miyo'mo iroudapiyo'moneyokwe dukwagupto tovi luvagileyo'moneyokwe i'deko tokwe miru'mo'melapinono. Toro kworekul kuruv yiuno i'dekomaiyokwe to'no doluvagilelo. Su toro tov aro tovinokwono. Kevu dukwagupto tov i'deko tokwe sakwollupi tov aro nekullumo'no'jo. A'mwo pwol mi ilomonuwopiyo'moneyokwe i'deko tovi ilodowo'jure toollu pworo dolago tomuuda'ai davopi muukanyulmaiyo toollu nyuloonyopiyapiyo. Toro tovino tov kevu dukwagupto tov i'deko tokwe miyakwollupinono.” Duudono.” Kuudokaikono.