Mollurolovomato 18 - Gooti Toolluro Yogalokwono

Jetroo'wol Moosesollu abuuru'maroka tovinokwono

¹ To'no'gwowi Jetroo'wol kwako Midiyanda'ai prisekono. Aki Moosesollu ganyalumiyagekono. Toro tool Gooti Yawelluro Moosesollu me'no kwiyo'mwojoka tovino kuu'nokaikono. Aki Gooti Yawel gami a'mwo abolo Isuraiyolda'ai tonyu Ijupda'ai amollurolovomokaboka tovino kuuguudo kuruv me'no kuu'nokaikono.

² Sumdomgu toga Moosesol gamoro abolo Supoorakwe'aro gamoro kwolaiyo toorake'aro tonotai ganyalumiyago Jetroo'wollomno me'no amorapiyokaikono. Toro te Jetroo'wol Moosesollu buuru'mallo'moneyokwe Supooravi momwora'no sumaiyokwe amokabokaikono.

³ Aki gamoro kwolaiyo toorake'aro amokabokaikono. Kwolaiyo muudu'nodo toolluno yovo tov Gesoomolekono. Yovo su tov aro tovinokwono. “Nuu kwako pumuuda'ai toonyu bomwallonyugono.” Moosesol toro yajunyuno sumaiyokwe yovo su tov sowarokaikono.

⁴ Aki gami lukomguda'ai kwolaiyo toolluno yovo tov Eliyeserolekono. Yovo su tov aro tovinokwono. “Ijup toru Feroo tool nonyuromiyo'jokweyo'mo mi nyunumiyago toolluro Gooti tool anyo'mwojokaikono.” Toro tovino kuudo yauro'no yovo tov Eliyeserolo sowarokaikono.

⁵ Toro te Moosesol kwako a'mwomaiyo kuu'maiyo toru Gooti toolluro muumuudo toollu tomuu gami woromollo'mo sel ago tovi amwallajukekono. Su tomuu mwaloduke toollomno ganyalumiyago Jetroo'weke'aro Moosesolluro abolo tokwe'aro gamoro kwolaiyo toorake'aro ton bo'mno

⁶ puuto tomuu Jetroo'wol Moosesolluno aro adopiyabokaikono. “Nuu gumi junyalum Jetroo'wonyuge'aro gumi abolo tokwe'aro gumoro kwolaiyo toorake'aro tonol gumiyomno abumwakuuwono.” Adopiyabokaikono.

⁷ Moosesol toro tovi wuu'nyuno sumaiyokwe gami ganyalum toollu ilaiyo mollomallo'moneyokwe puuto tomuu plavo'no kuuru'marokaikono. Toro wuuru'malluno sumaiyokwe Moosesol Jetroo'wolluro sumdollu toru kwolomuulo'narokaikono. Toro wolomuulo'na'no sumaiyokwe gamoro suwado tovi molluduuduulo amollokaikono. Toro tooral imgu amgu aro samuugoju'nolorakono. “Ilaiyo dukomwakuno?” Samuugoju'nolorakono. Toro me'no yamuugoju'nyuno sumaleyokwe yiuwi'nokai ton Moosesolluro woromollo'mo sel ago tovino bo'mno aulomwalopogano.

⁸ Toro kuulomwalo'mno Moosesol yiuwi'nokai Gooti Yawelluro soka tonyuno kuuguudo tov gami ganyalumiyago toollu kuudokaikono. Aki Gooti Yawel Isuraiyolda'ai tonyu wiyo'mwojo'mo tool Feroo tooke'aro Ijupda'ai togai'aro tonyu kaiyako sugoloka tovino kuuguudo tov kuudokaikono. Aki Isuraiyolda'ai ton puuto tomuu mujo'mabodupu tabunyu ma'dopure tonyu Gooti Yawel amollurolovomokabiyajuko kunyuno kuruv kuudokaikono.

⁹ Toro te Jetroo'wol aro tovi kuu'nokaikono. Gooti Yawel Isuraiyolda'ai tonyu Ijup tooravuro dolago tomuuda'ai me'no amollurolovomokabokaikono. Gooti Yawelluro yiuwi'nokai ilaiyo sugoloka su tonyuno Jetroo'wol wuu'nyuno sumaiyokwe ilaiyo bwotonyo sokaikono.

¹⁰ Toro te Jetroo'wol aro kuudokaikono. “Oo nuu Gooti Yawelluno ilomoropi sumonoo. Yiuno su toolno kevu Isuraiyol tobuurekullu Feroo tooke'aro Ijupda'ai a'mwo toorogai'aro tooravuro ato tovida'ai amollurolovekwapiyokaikono.” Kuudokaikono.

¹¹ Toro wuujuno sumaiyokwe aki Gooti Yawelluno aro adokaikono. “Aga'no'gwowi nuu kuudo me'no souromakono. Yiuno Gooti Yawel su tool noonyumwonyu gooti pworai kuuwolo'mwallukekono. Aki Ijupda'ai tooro ilomoropunyu yodupu Isuraiyolda'ai tobuurai kaiyako sugollajuporogano. Toro tooravuro dolago tomuuda'ai Gooti Yawel Isuraiyol su tobuurai me'no amollurolovomokabokaikono. Toro toolluno nuu kuudo me'no souromakono.” Adokaikono.

¹² Moosesollu ganyalumiyago Jetroo'wol toro juno sumaiyokwe Gooti toollu wiroudapiyo'moneyokwe sipsip buulmokauworodeyo pwollu amokabokaikono. Duko tov yiunokuudo nopiyo'moneyokwe sipsip tooke'aro Gooti toollu wiyo'moneyokwe pugai'aro tonyu mokabino sumaiyokwe kwiroudapiyokaikono. Toro wiroudapino sumaiyokwe Erooneke'aro Isuraiyolda'ai a'mwono moduvomwallokwe toorogai'aro tooro Moosesollu ganyalumiyago tooke Gooti toolluro mwalodowodo wobo toru i'bwo'nomwalo'mno ilomoropiyo'moneyokwe bret ton anoporogano.

A'mwo kooti yogalo tovi mollomwallo'mo pworai ajesopo tovinokwono

¹³ Toro nyuno sumaveyokwe iruko aikomguda'ai tollugwoji Moosesol Isuraiyolda'ai a'mwo abolo togai wolomwalo'no kemi kooti yogalo ton adomwalopogano. A'mwo abolo ton kemoro yogalo youllajunodupudo tonyuno wuudodopure toga Moosesol wuu'nodowo kooti yogalo tovi amollomwallajukekono. Toro ton kuuguudo bwotonyago juno juno sumaveyokwe lomwo togada'ai yiuno sula'dugumdo toga'no adumwogapiyopogano.

¹⁴ Toro te Moosesol a'mwo abolo tonyuro kooti yogalo tovi mollomwaloduke tovi ganyalumiyago Jetroo'wol kwonokaikono. Toro wonyuno sumaiyokwe Moosesollu aro samuugojokaikono. “Awi, a'mwo abolo kwolallo ton gumi aiyowomno momwodovoguma'dupu guu akuuto toru mwalno mwalno yodum lomwo togada'ai yiuno sulato toga'no sumadekwogugono. Toro tooku a'mwo abolo tonyu kuubweyadokuudo su tov judo tekwogu buro'nyo'mo toro yodumdekwogudeyo?” Samuugojokaikono.

¹⁵ Toro samuugojoka tovi Moosesol gami ganyalum toollu aro kuudokaikono. “Oo a'mwo abolo ton Gooti toolluro kuudo tovi wuu'nyo'mo tov yiuno miyomno bodupudogano.

¹⁶ Toro ton miyomno bopi kemoro yogalo soullajunpi tonyu nuu wuu'nodumdonyugono. Toro te a'mwo yogalo kuuno soullajunbullu tovalluro kuuguudo tovi momuudeyomaro'mi domdukuurubweyodumdonyugono. Aki Gooti toolluro loowo adosungiko togai'aro Gooti toolluro, Tono tono julo, duuwiyodowodo togai'aro tonyu yodubwasodumdonyugono.” Kuudokaikono.

¹⁷ Moosesol toro kuudoka tovi ganyalumiyago Jetroo'wol aro kuudokaikono. “Gumoro womdo yodumdo su tov pi'mwono womdo miyodumdekugono.

¹⁸ Guu judo tekwogu womdo akavi ku'nono mimovla'binekwogugono. Toro tekwogu su toro tovi kuuno kuumjungovla'bi tov tagunyo agujumo'nadopiko tovi ku'nono muuwolo'binekwogugono. Aki womdo su tovi kuuno amjumovla'bi tov a'mwo abolo guuge mwalodupudo su togai'aro guu kwekuge'aro yiuwi'nokai togaikul biyolo ikuu'nonogaikikono.

¹⁹ Toro tovino tov moro kuudo agujami akavi guu kaduko yo'bi kuumjunbi tov Gooti Yawel guuge nomwalbullunekono. Toro te guu a'mwo abolo tonyuro mago tovida'ai molloda'mdum Gooti Yawellu wuudodumdo tov ilaiyokwono. Toro yodumdo tooku aga a'mwo abolo tonyuro yogalo youllajunodupudo tonyu maro'bi Gooti toolluro sumdollu toru neya boduuwiyogawono.

²⁰ Aki Gooti toolluro loowo adosungiko togai'aro Gooti toolluro, Tono tono julo, duuwiyodowodo togai'aro tonyu jodubwasogawono. Yo'bi a'mwo abolo ton po'dogalo yomjomwekovlavogapureyokweyo'mo dodumul'mwojogawono.

²¹ Aki a'mwo pi'mwo kuudokwe pworo aro yodupudo toorai jo'mgonomarono. A'mwo pworo Gooti toollu dolago tomuu uumjungovla'mdupu nebal'no yogalo to'no dopi aki a'mwo abolo punyuro nuugwiyo ki'nomallo'mo mwinodupudogano. Toro toorai yo'mgonomaro'bi dojesono. Toro ajesubi su tooravuro pworo 1,000 pworo 100 pworo 50 pworo 10-pela a'mwo abolo tonyu mido mollomwalmwalpinorogano.

²² A'mwo toro ajesubi su tooro a'mwo abolo tonyuro yogalo youllajunodopure tonyu kooti yogalo duuwiyopi kuuguudo ton aguto'mdeyo adupi tov gumiyomno mokamwalpinorogano. Toro kuvi kuruv kemoro kuuguudo ton kula'nyo'mdeyo adupi to'gwowi kevnokwe tooro kooti yogalo duuwiyopi nokwo domdukuurubweyomwalpinorogano. A'mwo ajesubi su tooro gumoro womdo su tovi ado'nagujupi toga'no'gwowi tagunyo aguuwo'mwalluko su tov piyarupto nokwo gujonokwono.

²³ Toro te guu Gooti toolluro kuuguudo agudadopiko akavi kuumjunbi tov gumoro womdo tov manyu toru'aro nokwo yomjumovla'binekugono. Aki yiuwi'nokai a'mwo abolo kwolallo i'bwo'nodupudo tonyuro sumwoluko ton kavo wosopi kemi go'no go'no ago tomuuno nokwo pla'mwalpinogano.” Kuudokaikono.

²⁴ Toro te Moosesol gami ganyalumiyago toolluro yiuwi'nokai kuuguudo kuudoka tovi kuvinono kuumjunokaikono.

²⁵ Toro te Moosesol Isuraiyolda'ai a'mwo aguto mido mollomwallo'mo toorai jeso'moneyokwe a'mwo pwolno pwolnodo tooraino saurokarogano. Oo a'mwo akal nokwo'moldeyo. Toro kuudo sauroka toorai ajesokaikono. Toro ajesoka su tooravuro pworo 1,000 pworo 100 pworo 50 pworo 10-pela a'mwo abolo tonyu mido amollomwallajuporogano.

²⁶ Moosesol toro me'no ajesoka toga'no'gwowi a'mwo ajesoka su tooro a'mwo abolo tonyuro kooti yogalo tovi mollomwekovla'mdupu yogalo kula'nyodeyokwe kevnokwe tooro adovomdukuurosajuporogano. Toro kuvi kuruv yogalo bwotonyodeyokwe to'gwowi Moosesollomno amokabiyajuporogano.

²⁷ Toro te Moosesol gami ganyalum Jetroo'wollu wuugollu'meyo'mo toga, “Ilaiyokwono,” kuudokaikono. Toro wuujuno sumaiyokwe Jetroo'wol gami kantri tovino aikomgu avlavokaikono.